Gutpela samting i save kamap long pasin bilong stadi long Baibel. Tasol i gat hatwok bilong en. Sampela taim yu tingting, bai yu inap stadi yet long Baibel o nogat? Wai na i gutpela long yu wok yet long stadi? Wanem samting bai helpim yu long stadi yet maski i gat hatwok?

1. Wai na i bikpela samting long stadi long Baibel?

“Tok bilong God i gat laip na i wok strong i stap.” (Hibru 4:12) Baibel i bikpela samting bikos em i kamapim tingting na filings bilong God long yu. Em i helpim yu long kisim save, na tu, kisim savetingting na bilip na wetim gutpela samting bai kamap. Na bikpela samting moa, Baibel i helpim yu long kamap pren bilong Jehova. Taim yu stadi long Baibel, yu larim strong bilong tok bilong en i stiaim ol samting yu mekim long laip bilong yu.

2. Wai na i bikpela samting long luksave long ol tok i tru bilong Baibel?

Ol tok i tru i stap long Baibel ol i olsem ol samting i dia tumas. Olsem na Baibel i kirapim yumi long “baim tok i tru na no ken salim.” (Provep 23:23) Taim yumi tingim tok i tru bilong Baibel i bikpela samting, bai yumi wok strong long stadi yet—maski yumi bungim ol hevi.—Ritim Provep 2:4, 5.

3. Hau bai Jehova i helpim yu long wok yet long stadi?

Jehova em Krieta i gat olgeta strong na Pren bilong yu, na em i laik helpim yu long kisim save long em. Em bai givim yu “dispela laik na strong long mekim ol samting.” (Ritim Filipai 2:13.) Tasol sampela taim sapos yu nidim yet dispela laik bilong stadi na bihainim ol tok yu lainim, em i ken helpim yu. Sapos yu nidim moa strong long winim ol hevi o pasin birua, em bai givim long yu. Long olgeta taim, beten askim Jehova long helpim yu long wok yet long stadi long Baibel.—1 Tesalonaika 5:17.

KISIM SAMPELA SAVE MOA

4. Putim stadi bilong yu long Baibel i stap nambawan

Sampela taim yumi pilim olsem yumi bisi tumas na yumi no gat taim long stadi long Baibel. Wanem samting inap helpim yu? Ritim Filipai 1:10, na stori long ol dispela askim:

• Yu ting wanem ol samting “i bikpela samting moa” long laip?

• Hau bai yu inap putim Baibel stadi bilong yu i stap nambawan samting?

1. Sapos yu pulapim wesan long baket na bihain yu putim ol ston, ol ston bai no gat spes

2. Sapos yu putim ol ston pastaim, bai i gat spes long yu putim olgeta wesan i go insait. Olsem tasol, sapos yu putim “ol samting i bikpela samting moa” i stap nambawan long laip bilong yu, yu bai mekim ol dispela samting, na yu gat taim tu long mekim ol narapela samting

Pasin bilong stadi long Baibel i inapim laik bilong yumi long kisim save long God na lotuim em. Ritim Matyu 5:3, na stori long dispela askim:

• Taim yumi putim stadi bilong yumi long Baibel i stap nambawan, dispela i helpim yumi olsem wanem?

5. Sanap strong taim ol man i birua long yu

VIDIO: Em i Sanap Strong na Gutpela Samting i Kamap (5:22)

• Ol pren na famili bilong Francesco i mekim wanem taim em i tokim ol long ol samting em i lainim?

• Em i sanap strong na wanem gutpela samting i kamap?

Ritim 2 Timoti 2:24, 25, na stori long ol dispela askim:

• Ol famili na pren bilong yu i pilim olsem wanem long ol samting yu lainim?

• Olsem ol dispela ves i kamapim, bai yu mekim wanem taim wanpela i no amamas long yu stadi long Baibel? Bilong wanem?

6. Trastim Jehova long helpim yu

VIDIO: Jehova i Save Helpim Yumi Long Mekim Ol Senis (3:56)

• Long vidio, Jim i mekim wanem ol senis bilong amamasim Jehova?

• Yu laikim wanem samting long stori bilong em?

Ritim Hibru 11:6, na stori long ol dispela askim:

• Jehova bai mekim wanem long ol man i “wok strong long painim em”—em ol man i wok strong long kisim save long em na amamasim em?

• Dispela i givim wanem tingting long yu long hau Jehova i pilim taim em i lukim yu wok strong long stadi long Baibel?

OL BIKPELA POIN

Tru em i no isi, tasol pasin bilong stadi long Baibel bai helpim yu long stap amamas oltaim. Wok yet long trastim Jehova, na em bai blesim yu.

Riviu

• Wai na ol tok i tru i stap long Baibel i olsem ol samting i dia tumas long yu?

• Hau bai yu inap “skelim gut wanem ol samting i bikpela samting moa”?

• Wai na yu mas askim Jehova long helpim yu long stadi yet long Baibel?

MEKIM WOK PAINIMAUT

Skelim 4-pela rot we i helpim planti man long yusim gut taim bilong ol.

“Hau Long Yusim Gut Taim Bilong Yu” (Kirap!, Februeri 2014)

Lukim hau Jehova i helpim wanpela meri em man bilong em i no kliagut long wai na em i wok strong long amamasim God.

Jehova i Strongim Yumi Long Karim Hevi (5:05)

Lukim hau pasin bilong wanpela meri long i no givap i helpim man bilong em.

Mi Skelim Skelim Tok i Tru (6:30)

Sampela taim ol man i sutim tok long ol Witnes Bilong Jehova olsem ol i save brukim famili. Yu ting dispela tok em tru?

“Ol Witnes Bilong Jehova i Save Brukim Ol Famili o Strongim Ol?” (Atikol long websait)

Yumi olgeta i gat ol disisen yumi mas wokim. Planti bilong ol dispela disisen inap mekim sampela samting long yumi na pasin pren bilong yumi wantaim Jehova. Olsem, ating yumi mas wokim disisen long wanem hap yumi laik stap, rot bilong kisim mani bilong lukautim yumi, o bai yumi marit o nogat. Taim yumi wokim ol gutpela disisen, yumi inap stap amamas na mekim Jehova i belgut.

1. Olsem wanem yu ken yusim Baibel long helpim yu long wokim ol gutpela disisen?

Paslain long yu wokim wanpela disisen, beten askim Jehova long helpim yu na skelim tok Baibel i mekim bilong kisim tingting bilong em long dispela samting. (Ritim Provep 2:3-6.) Long sampela samting, Jehova i putim stret lo long en. Sapos olsem, orait gutpela disisen yu ken wokim em long bihainim dispela lo.

Tasol olsem wanem sapos Baibel i no kolim wanpela lo stret long samting yu mas mekim? Jehova bai stiaim yu long ‘rot yu mas wokabaut long en.’ (Aisaia 48:17) Em i mekim olsem wanem? I gat ol stiatok inap stiaim yu. Ol stiatok bilong Baibel em ol bikpela tok i tru i kamapim tingting na filings bilong God. Planti taim yumi kisim save long tingting bilong God long wanpela samting taim yumi ritim wanpela stori long Baibel. Taim yumi save long tingting bilong Jehova, yumi bai wokim ol disisen i amamasim em.

2. Yu mas tingim wanem ol samting paslain long yu wokim wanpela disisen?

Baibel i tok: “Man i gat pasin bilong tingting gut na mekim samting, em i save skelim gut olgeta wokabaut bilong em.” (Provep 14:15) Dispela i makim olsem, paslain long yumi wokim wanpela disisen, yumi mas lusim haptaim long skelim ol samting yumi tingting long mekim. Taim yu wok long skelim wan wan bilong ol, askim yu yet: ‘Wanem stiatok bilong Baibel i stret long dispela? Wanem samting i stret long mekim? Disisen mi wokim bai mekim wanem long ol arapela? Bikpela samting moa, disisen bilong mi bai mekim Jehova i amamas o nogat?’​—Lo 32:29.

Jehova i gat rait long tokim yumi long wanem samting i gutpela na wanem samting i nogut. Taim yumi kisim save gut long ol lo na ol stiatok bilong em na tingting strong long bihainim, yumi wok long skulim maus bilong bel bilong yumi. Maus bilong bel em tingting i stap insait long yumi long wanem samting i stret na wanem samting i no stret. (Rom 2:14, 15) Sapos yumi skulim gut maus bilong bel, em bai helpim yumi long wokim ol gutpela disisen.

KISIM SAMPELA SAVE MOA

3. Larim Baibel i stiaim yu

VIDIO: Larim Ol Stiatok Bilong Baibel i Stiaim Yu (5:54)

• Pasin bilong i stap fri i makim wanem samting?

• Bilong wanem Jehova i larim yumi i stap fri long makim ol samting yumi laik mekim?

• Em i givim wanem samting bilong helpim yumi long yusim gut pasin bilong yumi long i stap fri?

Bilong lukim wanpela stiatok bilong Baibel, ritim Efesus 5:15, 16. Bihain stori long olsem wanem yu ken “yusim gut taim” long . . .

• ritim Baibel long olgeta de.

• kamap gutpela poroman marit, papa, mama, pikinini man, o pikinini meri.

• go long ol miting bilong kongrigesen.

4. Skulim maus bilong bel bilong yu long wokim ol gutpela disisen

VIDIO: “Oltaim Maus Bilong Bel Bilong Yupela i Mas i Stap Stret” (5:13)

• Long vidio, sista i mekim wanem ol samting bilong skulim maus bilong bel bilong em na bai em inap wokim disisen we i amamasim Jehova?

Wai na yumi no ken askim ol narapela long wokim ol disisen em yumi yet i mas wokim? Ritim Hibru 5:14, na stori long ol dispela askim:

• Ating em isi long askim ol narapela long wokim ol disisen bilong yumi, tasol yumi yet i mas kliagut long wanem samting?

• I gat wanem ol samting inap helpim yu long skulim maus bilong bel bilong yu na yu inap wokim ol gutpela disisen?

5. Rispektim maus bilong bel bilong ol narapela

Olgeta man wan wan bai wokim ol narapela narapela disisen. Olsem wanem yumi ken soim rispek long maus bilong bel bilong ol narapela? Skelim dispela tupela samting:

Namba 1: Wanpela sista i save werim trausis long ol bung o long taim em i save mekim ol wok bilong em, i muv i go long wanpela kongrigesen we planti sista bel bilong ol i gat tok taim ol i lukim ol narapela i werim trausis.

Ritim Rom 15:1 na 1 Korin 10:23, 24, na stori long ol dispela askim:

• Olsem tok bilong dispela tupela skripsa i kamapim, ating dispela sista bai wokim wanem disisen? Yu bai mekim wanem sapos yu stap wantaim wanpela em maus bilong bel bilong em i gat tok long wanpela samting em maus bilong bel bilong yu i no gat tok long en?

Namba 2: Wanpela brata i save olsem Baibel i no tambuim pasin bilong dring liklik alkohol, tasol em i wokim disisen olsem em bai i no inap dring alkohol. Sampela i singautim em i go long wanpela bung we em i lukim ol brata i dring alkohol.

Ritim Eklisiastis 7:16 na Rom 14:1, 10, na stori long ol dispela askim:

• Olsem tok bilong dispela tupela skripsa i kamapim, ating dispela brata bai wokim wanem disisen? Yu bai mekim wanem sapos yu lukim wanpela i mekim samting em maus bilong bel bilong yu i no orait long yu mekim?

Wanem ol samting inap helpim yu long wokim ol gutpela disisen?

1. Askim Jehova long helpim yu long wokim disisen long samting yu bai mekim.​—Jems 1:5.

2. Mekim wok painimaut long Baibel na ol buk na nius bilong Baibel bilong painim ol stiatok i stret long dispela samting. Yu ken kisim tu tingting bilong ol strongpela Kristen.

3. Skelim ol samting em disisen bilong yu bai mekim long maus bilong bel bilong yu na bilong ol narapela.

OL BIKPELA POIN

Yumi inap wokim ol gutpela disisen taim yumi painimaut tingting Jehova i gat long wanpela samting, na tu, taim yumi skelim sapos ol samting yumi laik mekim bai helpim ol narapela o putim hevi long ol.

Riviu

• Olsem wanem yu ken wokim ol disisen i amamasim Jehova?

• Olsem wanem yu ken skulim maus bilong bel bilong yu?

• Olsem wanem yu ken soim rispek long maus bilong bel bilong ol narapela?

MEKIM WOK PAINIMAUT

Olsem wanem yu ken wokim ol disisen we i strongim pasin pren bilong yu wantaim God?

“Wokim Ol Disisen i Givim Biknem Long God” (Wastaua, Epril 15, 2011)

Kisim sampela save moa long olsem wanem Jehova i save givim ol tok bilong helpim yumi.

Jehova i Stiaim Lain Bilong Em (9:50)

Kisim save long wanem ol samting i helpim wanpela man long wokim wanpela disisen i hatwok long mekim.

Jehova i Tok Promis Long Givim Ol Gutpela Samting (5:46)

Kisim sampela save moa long olsem wanem yu inap amamasim Jehova taim em i no givim wanpela lo long wanpela samting.

“Oltaim i Mas i Gat Wanpela Lo Bilong Baibel Bilong Stiaim Yu?” (Wastaua, Disemba 1, 2003)