Stap Bel Isi i Save Helpim Yumi

INAP longtaim ol dokta bilong nau i bin save olsem pasin bilong belhat inap bagarapim bodi bilong man. Winim 100 yia i go pinis, wanpela nius i tok: “Wanpela man i dai long taim em i kros nogut tru, na ol man i tok, ating klok bilong em i no strong na i no inap mekim bikpela wok long taim em i belhat. Ol man i no ting em i dai, long wanem, inap longtaim tru em i save kros planti na dispela i bagarapim klok bilong em.”​—⁠The Journal of the American Medical Association (JAMA).

Ol man i save skul long Baibel, em Tok Bilong God, ol i no kirap nogut long dispela tok. Inap 2,900 yia paslain long nius JAMA i tokaut long samting nogut em belhat inap kamapim, spirit holi i kirapim King Solomon long raitim tok olsem: “Sapos man i stap bel isi, orait bodi bilong en bai i stap gut.” (Sindaun 14:30) Dispela tok i tru yet long nau.

Sapos yumi stap bel isi, planti sik i kamap long ol man i save belhat kwik i no ken painim yumi, olsem mak bilong blut i go antap tumas, na het i pen, na olkain sik sotwin. Sapos yumi wok strong long ‘lusim kros na pasin bilong belhat’ bai yumi ken abrusim sampela kain sik, na tu, bai yumi stap gut wantaim ol narapela. (Song 37:⁠8) Ol manmeri i go long Jisas, long wanem, em i save mekim pasin isi na em i pilim tru hevi bilong ol. (Mak 6:​31-34) Yumi tu inap mekim gut bel bilong ol narapela sapos yumi kisim pasin bilong i stap bel isi.​—⁠Matyu 11:​28-30.