Abrusim Pasin Antap!

Wanpela Baibel tok Inglis (NW) i tanim Sindaun 17:19 olsem: “Man i wokim dua i go antap em i wok long painim bagarap.” Olsem wanem dua i antap i no gutpela? Wanem insait bilong dispela savetok?

LONG bipo, planti stilman i save raun long hos. Sapos haus i no gat strongpela banis samting, ol stilman i no hatwok long stilim samting. Bilong lukautim gut ol samting bilong ol, sampela papa bilong haus i bin wokim banis i gat wanpela kain dua long en. Banis i go antap, tasol dua i kam daun. Sampela dua i daun tumas​—⁠ol i no winim wan mita​—⁠olsem na hos wantaim man i sindaun long en i no inap kam insait. Tasol sapos dua bilong banis i no daun, man i sindaun long hos inap kam insait na kisim ol samting.

Long ol biktaun, ol dua bilong banis i save daun na i no naispela, olsem na ol stilman i no save gut, planti gutpela samting i stap insait o . . . Tasol long Persia, sapos dua i go antap tru, dispela i olsem wanpela mak bilong king. Sampela man i aninit long king ol i bin bihainim dispela pasin bilong wokim dua​—⁠tasol sori tru​—⁠ol samting bilong ol i go pinis. Man i wokim dua i go antap em i laik bai ol man i ting em i gat planti gutpela samting, na i olsem em i singautim ol stilman i kam. Bagarap inap painim em, long wanem, em i hambak na litimapim nem bilong em yet.

Olsem na wanpela savetok bilong Baibel i tok stret olsem: “Man i litimapim nem bilong em yet, em i wok long painim bagarap.” (Sindaun 17⁠:19) Yumi mas pilim gut dispela tok. Maus bilong man i hambak na mekim tok i litimapim nem bilong em yet, tasol kain tok olsem i save kamapim tok pait na dispela inap bringim ol hambakman i go long rot bilong bagarap. Tru tumas, sapos man i abrusim pasin antap, em i bihainim gutpela tingting!

[Piksa Kredit Lain long pes 30]

Picturesque Palestine, Sinai and Egypt, Volume 1, by Colonel Wilson (1881)