Pulim “Wara” i Stap Daunbilo Tru i Kam Antap
WANPELA savetok bilong Baibel i tok: “Tingting bilong man i olsem wanpela hul wara i daun moa. Tasol man i gat gutpela save, em inap pulim dispela tingting i kam antap.” (Sindaun 20:5) Long taim bilong ol man bilong raitim Baibel ol man i hatwok tru long kisim wara, winim hatwok ol man i save mekim long nau long planti hap. Taim Jisas i toktok wantaim wanpela meri Samaria, meri i wok long pulimapim wara long hul wara Jekop i bin wokim, na dispela hul wara i daun moa inap olsem 23 mita!—Jon 4:5-15.
Olsem Sindaun 20:5 i tok, man i mas i gat gutpela tingting na save bilong pulim i kam antap ol tingting i stap long bel bilong wanpela man, na em i wankain olsem hatwok man i mekim bilong kisim wara long hul wara i daun moa. Dispela i stret long planti samting i save painim yumi long i stap bilong yumi. Olsem: Ating yu save long sampela man, inap planti yia ol i bin mekim wok na ol i gat planti save long mekim ol samting. Sapos long laik bilong ol yet ol i no givim sampela tingting long yu bilong helpim yu, orait ol dispela tingting na save i stap long bel bilong ol, yu yet yu mas pulim i kam antap. Yu mas laik long kisim dispela tingting i stap long bel bilong ol, olsem givim ol askim long ol, na long gutpela pasin wok strong long painim dispela tingting. Taim yu mekim olsem, i olsem yu daunim baket bilong yu i go insait long hul wara i daun moa, em i olsem bel bilong man i gat gutpela tingting na save long en.
Ol tok i stap long Sindaun 20:5 i stret tu long ol famili. Sampela taim ol meri marit i save tok: “Man bilong mi i no save tokim mi long ol tingting bilong em!” Na man marit bai tok: “Meri bilong mi i no save toktok long mi!” Sapos kain samting olsem i kamap, ol i mas i gat gutpela tingting na save bilong pulim ol tingting i stap long bel bilong poroman marit bilong ol i kam antap. Ol i ken mekim ol gutpela askim (Sampela hevi i bin painim yu long dispela de? Wanem samting i kamap? Bai mi helpim yu olsem wanem?) na ol dispela askim inap opim rot long ol i ken toktok gut wantaim. Sapos ol i bihainim kain gutpela tingting olsem, dispela bai strongim marit bilong ol, na em inap helpim man na meri wantaim.