Gutpela Tingting na Save Bilong God—Olsem Wanem Yumi Inap Kamapim?
“OL MANMERI i save ting olsem, sapos wanpela man i rabisman, orait gutpela tingting bilong en i samting nating tasol. Olsem na ol i no harim tok bilong en.” Saveman King Solomon i mekim dispela tok bilong pinisim stori em i bin mekim long wanpela rabisman, em i stap rabis tasol em i gat gutpela tingting na save, na em i bin mekim na wanpela biktaun olgeta i no bin bagarap. Tasol sori tru, bihain “ol man i no tingim dispela rabisman moa.”—Saveman 9:14-16.
Ol man i save tingim ol rabisman i olsem samting nating, maski ol dispela rabisman i bin mekim gutpela wok tru. Dispela samting i bin painim Jisas. Aisaia i tok profet long em olsem: “Ol man i bin givim baksait long em na rabisim em na ol i no laikim em tru. Oltaim em i bin pulap long sori na ol kain kain hevi.” (Aisaia 53:3) Ol i bin mekim nogut long Jisas, long wanem, em i no gat namba olsem ol bikman long taim bilong em i bin i gat. Tasol em i gat planti gutpela save na tingting winim tru bilong olgeta sinman bilong graun. Ol manmeri long ples bilong Jisas ol i no laik luksave olsem dispela “pikinini bilong wanpela kamda” i gat kain gutpela save na tingting olsem, na em i save mekim ol kain strongpela wok. Ol i bin popaia tru, long wanem, Baibel i tok moa olsem Jisas “i no wokim planti mirakel long dispela ples, long wanem, ol i no bilip long em.” Man! Ol dispela man i lus tru long kisim gutpela samting!—Matyu 13:54-58.
Yumi no ken mekim wankain popaia olsem. Jisas i tok: “Ol wok bilong God i soim olsem save bilong en em i samting tru.” Ol man i mekim wok bilong God na bihainim gutpela save na tingting bilong God ol i stap narapela kain. Tasol i no olsem ol i gat biknem na gutpela sindaun na ol i narapela kain, nogat, ol i stap narapela kain long pasin bilong ol long bilip na gutpela pasin em tok bilong Baibel i as bilong en.—Matyu 7:18-20; 11:19.