Baibel i Tok Wanem Long Daniel?

Tok Baibel i mekim

Daniel em wanpela profet bilong lain Juda, na em i bin stap 600 yia samting paslain long Jisas Krais. God i givim strong long em long kamapim mining bilong ol driman, givim em ol visen bilong ol samting bai kamap bihain, na stiaim em long rot bilong holi spirit long raitim buk bilong Baibel we i kamapim nem bilong em yet.—Daniel 1:17; 2:19.

Daniel em i husat?

Daniel i kamap bikpela long Juda, em kingdom we taun Jerusalem na tempel bilong ol Juda i stap long en. Long 617 B.C.E., king bilong Babilon, em Nebukatnesar, i daunim Jerusalem na kisim “ol bikman bilong kantri” i go kalabus long Babilon. (2 King 24:15; Daniel 1:1) Long dispela taim, ating Daniel em i wanpela tineja taim ol i kisim em i go wantaim ol.

Ol wokman bilong king i kisim Daniel na ol narapela yangpela man i go long haus king long Babilon.

Ol i kisim Daniel na sampela narapela yangpela man (em makim tu Satrak, Mesak, na Abetnego) i go long haus king long Babilon bilong kisim spesel trening long wok long haus king. Maski ol ofisa i putim presa long ol long lusim ol bilip bilong ol, Daniel na 3-pela pren bilong em i holimpas pasin bilong ol long stap gut long God bilong ol, Jehova. (Daniel 1:3-8) Bihain long ol i kisim trening inap 3-pela yia, King Nebukatnesar i onarim ol bikos em i luksave olsem ol i gat savetingting na gutpela save, na em i tok “ol i winim tru ol pris i save wokim kain kain mejik na ol man i save toktok wantaim ol daiman.” Em i makim Daniel na ol pren bilong em long wok long haus king.—Daniel 1:18-20.

Planti yia bihain, ating taim Daniel i gat 90 krismas samting, ol i singautim em long i go long haus king. Wanpela man nem bilong em Belsasar, husat i bin mekim wok king long Babilon long dispela taim, em i tokim Daniel long kamapim mining bilong wanpela narakain rait i kamap long wol. God i stiaim Daniel na em i tokaut olsem lain Midia-Persia bai daunim Babilon. Long dispela nait tasol, lain Midia-Persia i daunim Babilon.—Daniel 5:1, 13-31.

Daniel i kamapim mining bilong rait long wol.

Nau, aninit long wok king bilong Midia-Persia, ol i makim Daniel long kamap wanpela nambawan ofisa na King Darius i laik givim sampela namba moa long em. (Daniel 6:1-3) Ol jeles ofisa i wokim plen long kilim i dai Daniel long rot bilong tromoi em i go daun long hul bilong laion, tasol Jehova i seivim em. (Daniel 6:4-23) Klostu long taim Daniel i laik dai, tupela taim wanpela ensel i kamap long em na i strongim Daniel olsem em i “man i dia tumas.”—Daniel 10:11, 19.

Lukim ol dispela samting long Baibel drama i gat 2-pela hap Daniel: Em i Holimpas Bilip Long Laip Olgeta.

Histori i kamapim wanem samting long Buk Daniel long Baibel?

Daniel i tok: Nebukatnesar i wokim wanpela traipela imis, na em i tokim ol manmeri long lotuim dispela imis, na em i tromoi ol lain i sakim tok bilong em i go insait long bikpela paia i hat nogut tru.—Daniel 3:1-6.

Histori i tok: Olsem buk Encyclopædia Britannica i kamapim, Nebukatnesar i mekim ol bikpela wok bilong sanapim ol bilding long Babilon, em i mekim olsem “long em i ken kisim biknem, na tu, long givim ona long ol god. Em i tok long em yet olsem ‘man i kirapim ol manmeri long lotuim ol bikpela god.’”.

Long sait bilong tromoi man insait long bikpela paia, planti taim ol rait bilong Babilon long bipo i stori long dispela, na ol i stori tu olsem sampela taim king yet i save orait long ol i tromoi man insait long paia. Wanpela rait bilong bipo long taim Nebukatnesar i mekim wok king i stori long panismen em ol ofisa i save kisim taim ol i no soim rispek long ol god bilong Babilon. Dispela rait i tok: “Bagarapim ol, kukim ol, rostim ol, . . . putim ol insait long aven . . . mekim smok bilong ol i kamap bikpela, mekim paia i hat nogut tru na kamapim bikpela smok so ol bai i dai.”a

Daniel i tok: King Nebukatnesar i save apim nem bilong em yet long ol wok konstraksen em i mekim.—Daniel 4:29, 30.

Wanpela brik ol i painim long Babilon, em i gat nem bilong Nebukatnesar i stap long en

Histori i tok: “Ol rekod em Nebukatnesar yet i raitim i stori olsem . . . em i nambawan king na em i bilip olsem em i save mekim stretpela pasin na em i gat bikpela strong.”b Olsem, rait long wanpela bilding i kamapim dispela tok Nebukatnesar i bin mekim bilong apim nem bilong em yet olsem: “Mi kisim kolta na brik na wokim wanpela strongpela banis, na olsem wanpela maunten, ol man i no inap surikim dispela banis . . . Mi bin strongim banis bilong Esagila na Babilon na nem bilong wok king bilong mi bai i stap oltaim.”c Planti bilong ol dispela brik ol i painim long Babilon i gat nem bilong Nebukatnesar i stap long ol.

Daniel i tok: King Belsasar i laik bai Daniel i “stap namba 3 long kingdom na mekim wok bos” long Babilon.—Daniel 5:1, 13-16.

Dispela ston i gat rait bilong bipo kirap long 550 B.C.E. i gat nem bilong King Nabonaidas na pikinini man bilong em, Belsasar

Histori i tok: Wanpela man nem bilong em Nabonaidas i bin mekim wok king long dispela taim Daniel i raitim dispela tok long Daniel sapta 5. Tasol inap longpela haptaim Nabonaidas i mekim wok king long Arebia, na i no long Babilon. Husat i mekim wok king long Babilon taim em i no stap? Saveman Raymond Philip Dougherty i tok long buk bilong em Nabonidus and Belshazzar olsem: “Wanpela wok painimaut bilong bipo i soim olsem Nabonaidas i givim dispela wok king long fes pikinini man bilong em, Belsasar. Maski papa bilong em husat em king i no stap, long nem bilong papa bilong em, Belsasar i mekim ol wok em king i save mekim.” Nabonaidas na Belsasar i stap namba 1 na namba 2 pinis insait long kingdom, olsem na Belsasar i laik bai Daniel i stap namba 3 long kingdom.

a Journal of Biblical Literature, Volume 128, Number 2, pes 279, 284.

b Babylon—City of Wonders, em Irving Finkel na Michael Seymour i raitim, pes 17.

c Archæology and the Bible, em George Barton i raitim, pes 479.