• Daniel—Wanpela Buk i Gat Kot
    Putim Yau Long Tok Profet Bilong Daniel!

    • WANPELA KING OL I TING I NO BIN I STAP

      7. (a) Wanem as na inap longpela taim pinis ol saveman i amamas taim Daniel i stori long Belsasar? (b) Olsem wanem long dispela tok olsem Belsasar i no bin stap tru?

      7 Daniel i tok Belsasar, em “pikinini” bilong Nebukatnesar, em i stap king long Babilon taim narapela kantri i daunim dispela ples. (Daniel 5:​1, 11, 18, 22, 30) Inap longpela taim pinis ol saveman i bin sutim tok long ol dispela ves, long wanem, nem Belsasar i stap long Baibel tasol, ol narapela buk nogat. Ol man bilong bipo em ol i bin raitim stori bilong ol samting i kamap, ol i tok Nabonaidas, em man i kisim wok king bihain long Nebukatnesar, em i laspela king bilong Babilon. Olsem na long 1850, Ferdinand Hitzig i tok Belsasar i no wanpela man i bin stap tru​—em i stap long tingting bilong man i raitim Buk Daniel tasol. Tasol yu ting Hitzig i tingting gut na mekim dispela tok? Tingim: I no gat planti olpela rait i stori long ol samting i bin kamap long dispela taim, olsem na taim ol i tok ol i no painim nem bilong Belsasar, yu ting i gat as na ol i ken tok em i no bin i stap tru? Tasol long 1854, long Ur, em wanpela olpela taun bilong Babilon i bagarap pinis na i stap long hap saut bilong kantri nau ol i kolim Irak, ol i painim sampela rait ol i bin katim long ston. Long ol dispela rait i gat wanpela beten, na long dispela beten King Nabonaidas i tok long “Bel-sar-usur, namba wan pikinini man bilong mi.” Ol saveman i mas wanbel long tok olsem dispela man em Belsasar bilong Buk Daniel.

      8. Wanem samting i kamapim klia olsem stori bilong Daniel long Belsasar i mekim wok king em i tru?

      8 Tasol dispela i no pasim maus bilong ol saveman. Wanpela man olsem, em H. F. Talbot, em i tok, “Dispela i no kamapim klia wanpela samting.” Em i tok, ating dispela pikinini man em rait i kolim, em i liklik pikinini, tasol Daniel i tok em i mekim wok king. Tasol wanpela yia bihain long taim ol i kamapim dispela tok bilong Talbot, ol i painim sampela rait moa i tok Belsasar i gat sampela kuskus na wanpela lain bilong lukautim haus bilong em. Em nau, Belsasar i no wanpela liklik pikinini, a? Bihain ol i painim sampela rait moa i tok sampela taim Nabonaidas i save lusim Babilon inap sampela yia na i go sindaun long narapela hap. Ol dispela rait i tok, taim em i mekim olsem em i save “em i putim wok king” long han bilong namba wan pikinini man bilong em (Belsasar). Long kain taim olsem, Belsasar i stap olsem king​—em i wok king wantaim papa bilong em.c

  • Daniel—Wanpela Buk i Gat Kot
    Putim Yau Long Tok Profet Bilong Daniel!

    • b Sampela saveman i no laik tokaut olsem wanpela man i giaman na tok em i profet Daniel na em i raitim Buk Daniel. Olsem na ol i tok, man bilong raitim dispela buk i kisim nating nem Daniel, olsem sampela man bilong raitim ol buk ol i mekim wok long wanpela nem i no nem tru bilong ol. Tasol Profesa Ferdinand Hitzig i tok: “Dispela tok olsem narapela man i bin raitim Buk Daniel, em i narapela kain samting. I olsem dispela man i giaman na kisim nating nem bilong Daniel, na em i laik giamanim ol man i ritim dispela buk long taim bilong em, tasol em i mekim bilong helpim ol.”