Buk Bilong Baibel Namba 39—Malakai
Man Bilong Raitim: Malakai
Ples Em i Bin Raitim: Jerusalem
Raitim Pinis: Bihain long 443 B.C.E.
1. Wanem samting i kamapim klia olsem Malakai i givim bel tru long Jehova?
MALAKAI em i husat? I no gat tru wanpela liklik hap stori bilong em o bilong lain tumbuna bilong em. Tasol tok profet bilong em i kamapim klia olsem em i givim bel tru long God Jehova, na em i litimapim nem bilong God na stap gut long lotu i tru, na em i les tru long ol man i giaman long mekim wok bilong God tasol ol i helpim ol yet tasol. Em i kolim nem bilong Jehova 48 taim long ol 4-pela sapta bilong buk bilong em.
2. Ating wanem insait bilong nem bilong Malakai? Yumi ken ting em i bin stap long wanem taim?
2 Nem bilong em long tok Hibru em Mal·ʼa·khiʹ, na ating insait bilong en i olsem “Man Bilong Autim Tok Bilong Mi.” Lista bilong ol buk long Ol Skripsa Hibru na Baibel Septuagint, na yia em i bin raitim, ol i makim olsem Buk Malakai em i laspela bilong ol 12-pela liklik buk bilong ol profet. Bikpela Kaunsil Juda bilong bipo i tok, Malakai i kamap bihain long Hagai na Sekaraia na em i stap long taim bilong Nehemia.
3. Wanem samting i makim olsem Malakai i bin raitim buk bihain long yia 443 B.C.E.?
3 Em i raitim tok profet long wanem taim? Em i raitim long taim i gat namba wan gavman i bosim ples, em long taim ol Juda i stretim bek Jerusalem bihain long taim kantri Juda i stap nating inap 70 yia pinis. (Mal. 1:8) Tasol husat i stap namba wan gavman long dispela taim? Malakai i stori tasol long ol pasin bilong lotu na mekim ol ofa, tasol em i no stori long ol i wokim tempel, olsem na yumi save em i bin raitim buk bilong em bihain long taim bilong namba wan gavman Serubabel; taim Serubabel i holim dispela wok ol i pinisim wok bilong wokim tempel. Narapela namba wan gavman bilong dispela taim em Baibel i stori long en, em Nehemia—Baibel i no stori long narapela. Olsem wanem? Tok profet bilong Malakai i stret long taim bilong Nehemia? Malakai i no stori long ol i wokim gen Jerusalem na banis bilong en, olsem na yumi save em i no raitim buk long taim Nehemia i kirap nupela long mekim wok olsem namba wan gavman. Tasol Malakai i stori planti long ol pasin nogut ol pris i mekim na dispela ol pasin nogut i stap long taim Nehemia i kam long Jerusalem long namba 2 taim, bihain long taim King Artaserksis i singautim em i go bek long Babilon long yia 443 B.C.E., em namba 32 yia bilong Artaserksis i stap king. (Mal. 2:1; Neh. 13:6) Sampela tok bilong Malakai na Nehemia i klostu wankain, na dispela i makim olsem tok profet bilong Malakai i bilong dispela hap taim.—Mal. 2:4-8, 11, 12—Neh. 13:11, 15, 23-26; Mal. 3:8-10—Neh. 13:10-12.
4. Wanem samting i kamapim klia olsem spirit bilong God i as bilong ol tok bilong Buk Malakai na yumi inap bilip tru long en?
4 Oltaim ol Juda i bin bilip olsem ol tok bilong Buk Malakai i hap tru bilong Baibel. Ol man bilong raitim Ol Skripsa Grik i kamapim ol tok bilong Malakai na i soim olsem truim bilong sampela i kamap pinis, na dispela i kamapim klia olsem spirit bilong God i as bilong ol tok bilong Buk Malakai na lain Kristen i bilip olsem em i hap tru bilong Ol Skripsa Hibru.—Mal. 1:2, 3—Ro. 9:13; Mal. 3:1—Mt. 11:10 na Lu. 1:76 na Lu. 7:27; Mal. 4:5, 6—Mt. 11:14 na Mt. 17:10-13, Mk. 9:11-13 na Lu. 1:17.
5. Ol manmeri i stap olsem wanem long ol samting bilong spirit na dispela i kirapim Malakai long mekim tok profet?
5 Hagai na Sekaraia i autim tok long taim bilong wokim gen tempel na ol i bin kirapim ol manmeri long givim bel long lotu na wok strong, tasol tok profet bilong Malakai i kamapim olsem nau ol manmeri i no givim bel moa long mekim lotu. Ol pris i no mekim gut wok bilong ol, na ol i hambak na ting ol yet i stretpela man. Ol i giaman tasol long mekim ol wok lotu long tempel. Ol manmeri i no givim moa ol namba 10 hap na ol ofa, long wanem, ol i ting God i no tingim Israel. Ol samting ol i ting Serubabel bai mekim, i no kamap; na sampela i ting Mesaia bai kam long dispela taim, tasol em i no kam. Ol Juda i no strong moa long ol samting bilong spirit. I gat wanem as na ol i ken strongim bel na wetim gutpela samting i kamap? Olsem wanem ol inap save olsem pasin bilong ol i no stret na ol inap kirap gen long bihainim stretpela pasin? Ol tok profet bilong Malakai i helpim ol long save long ol dispela samting.
6. Wanem pasin bilong Malakai long raitim ol tok?
6 Malakai i raitim ol strongpela tok i sutim stret ol man. Pastaim em i kolim samting em i laik bai ol i tingim, na ol tok ol i no wanbel long en bihain em i bekim tok bilong ol long dispela. Na las tru, em i kolim gen tok em i bin mekim pastaim. Dispela i strongim tok bilong em na mekim i kamap klia. Em i no mekim planti toktok na bilasim gut ol dispela tok, nogat; em i mekim ol sotpela strongpela tok i olsem tok pait.
HELPIM YUMI OLSEM WANEM?
13. Malakai i tok wanem long (a) marimari na sori bilong Jehova? (b) wok bilong ol man i save skulim ol narapela long Tok Bilong God? (c) ol man i sakim ol lo bilong Jehova bilong stiaim tingting?
13 Buk Malakai i helpim yumi long save gut long ol lo bilong God Jehova i no save senis, na marimari na sori bilong em. Long namba wan sapta, buk i tok Jehova i laikim tru lain bilong em, “Jekop.” Em i tokim ol lain bilong Jekop: “Mi tasol mi Bikpela na mi no save senisim tingting bilong mi.” Ol i mekim pasin nogut tru, tasol em i redi long kisim bek ol sapos ol i kam bek long em. Tru tumas, em i God bilong marimari tru! (Mal. 1:2; 3:6, 7; Ro. 11:28; Kis. 34:6, 7) Long rot bilong Malakai, Jehova i tok ol pris i mas skulim ol manmeri “long save gut long [em].” Dispela i mas givim tingting long olgeta man i gat wok long skulim ol narapela long Tok Bilong God na ol i mas givim stretpela save long ol. (Mal. 2:7; Fl. 1:9-11; skelim wantaim Jems 3:1.) Jehova i no laikim ol man bilong giaman, em ol i save tok, “Bikpela i ting ol man bilong mekim rong ol i gutpela man.” Man i no ken ting em inap giamanim Jehova na em i mekim ol ofa nogut long dispela bikpela King. (Mal. 2:17; 1:14; Kl. 3:23, 24) Kwiktaim Jehova bai mekim kot long ol man i sakim ol stretpela lo bilong em bilong stiaim tingting; ol i no ken ting ol inap mekim pasin nogut na abrusim strafe, nogat. Jehova bai skelim pasin bilong ol long kot. (Mal. 3:5; Hi. 10:30, 31) Ol stretpela man i ken bilip tru olsem, Jehova bai tingim pasin bilong ol na givim gutpela prais long ol. Ol i mas tingim gut Lo Bilong Moses olsem Jisas i mekim, long wanem, planti tok bilong Lo i kamap tru long Jisas.—Mal. 3:16; 4:4; Lu. 24:44, 45.
14. (a) Buk Malakai i makim wanem samting i mas kamap bihain? (b) I gat wanem truim bilong Malakai 3:1 long taim bilong ol aposel?
14 Buk Malakai em i laspela buk bilong Ol Skripsa Hibru na i makim ol samting i mas kamap taim Mesaia i kam, na taim em i kamap 400 yia samting bihain, dispela i as na ol i raitim Ol Skripsa Grik. Long Malakai 3:1, Jehova bilong ol bikpela lain ami i tok: “Bai mi salim wanpela man bilong autim tok bilong mi na em bai i go pas bilong redim rot bilong mi.” Spirit holi i kirapim lapun Sekaraia long tokaut olsem dispela tok i makim pikinini bilong em, Jon Bilong Baptais. (Lu. 1:76) Jisas Krais tu i tokaut olsem, na em i tok: “Jon Bilong Baptais em i winim olgeta man i bin kamap long graun. Tasol man i stap liklik tru long kingdom bilong heven, em i winim Jon.” Olsem Malakai i tok profet long en, God i salim Jon bilong “redim rot,” olsem na Jon i no insait long lain em bihain Jisas i tok promis long givim Kingdom long ol.—Mt. 11:7-12; Lu. 7:27, 28; 22:28-30.
15. Husat dispela “Elaija” em Malakai i tok profet long em?
15 Na long Malakai 4:5, 6, Jehova i tok promis olsem: “Bai mi salim profet Elaija i kam.” Husat dispela “Elaija”? Jisas na dispela ensel i bin kamap long Sekaraia, tupela wantaim i tok, em Jon Bilong Baptais, em i man bilong “stretim bek olgeta samting,” na em bai i “redim ol man” olsem wanpela lain bilong Jehova, long kisim Mesaia taim em i kam. Tasol Malakai i tok tu olsem “Elaija” i mas kam pastaim na bihain ‘bikpela De bilong mekim olgeta manmeri i pret nogut tru’ em bai kamap, olsem na i gat narapela truim bilong dispela tok, em bai kamap long wanpela taim bilong kot long bihain.—Mt. 17:11; Lu. 1:17; Mt. 11:14; Mk. 9:12.
16. Malakai i stori long wanem gutpela taim bilong bihain? Em i kirapim yumi long mekim wanem?
16 Jehova bilong ol bikpela lain ami i tingim dispela de na em i tok: “Ol manmeri bilong olgeta kantri ol i save givim biknem long mi . . . long wanem, mi bikpela king, na olgeta lain pipel [bai] pret [“long nem bilong mi,” NW ] na aninit long mi.” Tru tumas, ol i mas pret long nem bilong em! Long wanem, long dispela de ‘paia bai kukim olgeta bikhetman na man nogut, olsem paia i save kukim kunai i drai, na bai ol i pinis olgeta.’ Tasol ol manmeri i pret long nem bilong Jehova, ol i ken amamas, long wanem, san bilong stretpela pasin bai lait antap long ol na oraitim ol. Dispela i makim taim bilong amamas bilong ol manmeri i bihainim tok; bai ol i kamap orait olgeta—long spirit, na bel, na tingting, na skin. (KTH 21:3, 4) Malakai i stori long dispela gutpela taim bihain na em i kirapim yumi long givim bel olgeta long bringim ofa long haus bilong Jehova, em i tok: “Yupela i mas tilim olgeta samting bilong yupela long 10-pela hap na bringim wanpela hap olgeta long haus bilong mi. . . . Yupela i mekim olsem na bai mi ken givim planti gutpela samting long yupela na yupela i no ken sot. Bihainim dispela rot na bai yupela i ken save olsem tok bilong mi em i tru olgeta.”—Mal. 1:11, 14; 4:1, 2; 3:10.
17. Malakai i mekim ol tok lukaut, tasol em tok tu long ol i ken wetim wanem gutpela samting i kamap?
17 Dispela laspela buk bilong ol Profet i mekim tok lukaut yet long ‘bagarap’ bai kamap long olgeta hap bilong graun, tasol em i tok tu long ol manmeri i ken amamas na wetim gutpela samting bai kamap, olsem Jehova i tokim lain bilong em: “Bai olgeta arapela lain pipel i lukim yupela na i tok, ‘Ol Israel i stap gut tru. Ol i amamas moa yet.’ Long wanem, graun bilong yupela bai i kamap gutpela ples bilong sindaun long en.”—4:6; 3:12.