“Em i Lukim Wanpela Bis i Gutpela Tru”

“Ol strongpela man . . . i bin wok strong long kisim kingdom bilong heven.”​—⁠Matyu 11:⁠12.

1, 2. (a) Wanem dispela pasin em Jisas i kamapim long wanpela tok piksa em i mekim long Kingdom? (b) Long tok piksa i stori long wanpela gutpela bis, Jisas i tok wanem?

OLSEM WANEM? I gat wanpela samting yu tingim i gutpela samting tru na yu redi long lusim olgeta samting yu holim pinis bambai yu inap kisim dispela samting? Tru, sampela man i save givim bel olgeta long kisim samting ol i bin putim mak long kisim​—⁠mani, biknem, o namba​—⁠tasol ating i no gat planti taim we man i lukim samting em i laikim tumas na em i redi long lusim olgeta samting bilong em bambai em inap kisim dispela samting. Jisas Krais i toktok long dispela pasin bilong lusim olgeta samting bilong kisim narapela samting​—⁠em wanpela pasin yumi no lukim planti taim, tasol em wanpela pasin ol man i litimapim​—⁠long wanpela tok piksa em i mekim long Kingdom Bilong God.

² Jisas i kamapim dispela tok piksa long ol disaipel tasol bilong em. Dispela tok piksa i stori long wanpela bis i gutpela tru. Jisas i tok: “Kingdom bilong heven em i olsem wanpela bisnisman i wok long painim ol naispela naispela bis. Na taim em i lukim wanpela bis i gutpela tru, orait em i go salim olgeta samting bilong en na i go baim dispela gutpela bis.” (Matyu 13:​36, 45, 46) Jisas i laik bai ol man i harim dispela tok piksa i kisim wanem skul long en? Na olsem wanem dispela tok bilong Jisas inap helpim yumi?

Ol Bis i Gat Bikpela Pe

3. I gat wanem as na ol naispela bis long bipo ol i gat bikpela pe?

³ Kirap long bipo yet ol man i save laikim tumas ol bis olsem bilas. Wanpela man bilong Rom bilong raitim buk, nem bilong em Pliny Namba 1, i tok ol bis “i gat bikpela pe tru, winim planti narapela samting i gat bikpela pe.” Ol bis i narapela kain long gol na silva na ol gutpela gutpela ston, long wanem, samting i gat laip i save kamapim ol. Sampela kain kina inap mekim ol liklik hap ston, em ol i bin kam insait long kina, i tanim na i kamap bis. Wanpela kain marasin (nacre) em kina i kamapim, dispela i save karamapim ston na long dispela rot ol gutpela bis inap kamap. Bipo, ol i save kisim ol naispela bis long solwara Retsi, Persian Galf, na solwara Indian​—⁠longwe tru long kantri Israel. Long dispela as Jisas i tok dispela “bisnisman i wok long painim ol naispela naispela bis.” Bilong painim ol bis i gutpela tru, man i mas mekim bikpela wok.

4. Wanem nambawan bikpela samting bilong dispela tok piksa bilong Jisas i stori long bisnisman?

⁴ Tru, kirap long bipo yet ol naispela bis ol i gat bikpela pe long en, tasol dispela i no nambawan bikpela samting long tok piksa bilong Jisas. Long dispela tok piksa, Jisas i no tok Kingdom Bilong God i olsem wanpela gutpela bis na em tasol, nogat; em i stori long “wanpela bisnisman i wok long painim ol naispela naispela bis” na long samting bisnisman i mekim taim em i painim pinis wanpela bis olsem. Dispela man i raun na wok bisnis long bis, em i no wanpela bisnisman nating, nogat. Dispela bisnisman inap luksave long ol liklik liklik samting bilong bis na long ol gutpela gutpela samting i no stap long ples klia, em ol samting i makim wanpela bis i narapela kain na i gutpela tru. Taim em i lukim wanpela bis, em inap luksave em i gutpela bis o nogat​—⁠em i no larim giaman bis i trikim em na em i baim, nogat.

5, 6. (a) Wanem samting i mekim na dispela bisnisman long tok piksa bilong Jisas i narapela kain? (b) Tok piksa bilong bokis mani ol man i bin haitim i kamapim wanem samting bilong dispela bisnisman?

⁵ I gat narapela samting bilong dispela bisnisman yumi mas tingim. Taim wanpela bisnisman nating i skelim hamas mani em bai tromoi long baim bis na bai em inap kisim winmani taim em i salim, pastaim em i mas tingim em inap salim long hamas. Na tu, em i mas tingim i gat sampela man i gat laik long baim dispela bis na em inap salim kwik, o nogat. Em i gat bikpela tingting long kisim kwik winmani; em i no gat tingting long holim dispela bis bilong em yet. Tasol dispela bisnisman long tok piksa bilong Jisas em i narapela kain. Em i no tingting long kisim winmani. Em i redi long lusim “olgeta samting bilong en”​—⁠ating olgeta hap graun na haus samting​—⁠bambai em inap kisim dispela samting em i bin wok long painim.

⁶ Long tingting bilong planti bisnisman, ating samting dispela man i mekim i no savepasin. Bisnisman i gat savetingting i no save mekim samting em i no inap kisim winmani long en. Tasol dispela bisnisman long tok piksa bilong Jisas em i gat narapela kain tingting long samting em i tingim i bikpela samting. Em i no tingting long kisim winmani; em i tingting long bikpela amamas em inap kisim long holim samting i gutpela tru. Dispela samting i kamap klia long narapela tok piksa bilong Jisas. Em i tok: “Kingdom bilong heven em i olsem wanpela bokis mani ol i bin haitim long wanpela gaden. Wanpela man i lukim, na em i haitim gen. Em i amamas tru, na em i go salim olgeta samting bilong en na i go baim dispela gaden.” (Matyu 13:44) Yes, bikpela amamas em dispela man bai kisim long holim dispela bokis mani em i bin painim, dispela i bin kirapim em long lusim olgeta samting bilong em. Olsem wanem? I gat sampela man long nau i kain olsem? I gat wanpela gutpela samting tru i stap, inap long yumi lusim olgeta samting bilong yumi long kisim?

Ol i Bin Tingim Kingdom i Bikpela Samting Tru

7. Jisas i mekim wanem bilong soim olsem em i tingim Kingdom i bikpela samting tru?

⁷ Taim Jisas i mekim dispela tok piksa, em i toktok long “kingdom bilong heven.” Em yet i tingim Kingdom i bikpela samting tru. Ol Gutnius i kamapim klia dispela samting. Taim em i baptais pinis long 29 C.E., Jisas “i stat long autim tok long ol manmeri. Em i tok olsem, ‘Yupela i mas tanim bel, long wanem, kingdom bilong heven em i kam klostu pinis.’ ” Inap 3-pela yia na hap, em i lainim planti man long tok bilong Kingdom. Em i save raun long olgeta hap bilong Israel, “long ol taun na ol ples na em i wok long autim gutnius bilong kingdom bilong God long ol manmeri.”​​—⁠Matyu 4:​17; Luk 8:⁠1.

8. Jisas i mekim wanem bilong kamapim long ples klia ol samting Kingdom bai mekim?

⁸ Na tu, long rot bilong wokim planti mirakel long olgeta hap bilong Israel​—⁠oraitim ol sikman, givim kaikai long ol man i hangre, bosim win na wara samting, kirapim bek ol man i dai pinis​​—⁠Jisas i kamapim long ples klia ol samting Kingdom Bilong God bai mekim. (Matyu 14:​14-​21; Mak 4:​37-​39; Luk 7:​11-​17) Bihain, em i kamapim klia em i stap gut long God na Kingdom taim em i givim laip bilong em​—⁠em i dai long pos olsem man i holimpas bilip. Olsem dispela bisnisman i amamas long lusim olgeta samting bilong em long kisim “bis i gutpela tru,” Jisas i mekim bikpela wok tru, na em i dai tu, bilong kisim Kingdom.​​—⁠Jon 18:⁠37.

9. Ol disaipel bilong Jisas bilong pastaim ol i kamapim wanem kain pasin em yumi no lukim planti taim?

⁹ Jisas i mekim bikpela wok bilong Kingdom, na tu, em i kamapim wanpela lain disaipel. Ol tu i tingim Kingdom i bikpela samting. Wanpela em Andru, em pastaim em i wanpela disaipel bilong Jon Bilong Baptais. Taim Andru na narapela disaipel bilong Jon, em pikinini bilong Sebedi, em tu nem bilong em Jon, ol i harim Jon Bilong Baptais i tok Jisas em i “Pikinini Sipsip Bilong God,” wantu ol i kam long Jisas na ol i kamap bilipman. Tasol i no dispela tupela tasol. Kwiktaim Andru i go long brata bilong em Saimon na i tokim em: “Mipela i lukim pinis Mesaia.” Kwiktaim bihain, Saimon (bihain ol i kolim em Sifas, o Pita), na Filip na pren bilong em Nataniel, ol tu i luksave olsem Jisas i Mesaia. Bel bilong Nataniel i kirapim em long tokim Jisas: “Yu Pikinini Bilong God. Yu King bilong Israel.”​​—⁠Jon 1:​35-​49.

Ol i Kirap Mekim Wok

10. Ol disaipel i mekim wanem taim Jisas i kam singautim ol sampela mun bihain long namba wan taim em i bin bungim ol?

¹⁰ Bikpela amamas em Andru, Pita, Jon, na ol arapela i kisim taim ol i lukim pinis Mesaia, i wankain olsem dispela amamas em bisnisman i bin kisim taim em i painim pinis wanpela bis i gutpela tru. Orait, nau ol bai mekim wanem? Ol Gutnius i no stori tumas long samting ol i mekim bihain stret long dispela namba wan taim ol i bungim Jisas. Planti ol i go bek long wok skin bilong ol. Tasol 6-pela mun i go inap wanpela yia bihain, Jisas i bungim gen Andru, Pita, na Jon, na brata bilong em Jems, long hap we ol i mekim wok bisnis bilong ol long kisim pis klostu long raunwara Galili.a Taim Jisas i lukim Pita na Andru, em i tok: “Yutupela kam bihainim mi, na bai mi lainim yutupela long pasin bilong kisim ol manmeri.” Ol i mekim wanem? Gutnius bilong Matyu i tok: “Kwiktaim tupela i lusim umben na i go bihainim em.” Na Jems na Jon i mekim wanem? “Kwiktaim tupela i lusim bot na i lusim papa bilong tupela, na tupela i go bihainim Jisas.” Na Gutnius bilong Luk i tok: “Ol i lusim olgeta samting bilong ol, na ol i bihainim Jisas.”​​—⁠Matyu 4:​18-​22; Luk 5:​1-​11.

11. Ating wanem samting i mekim na kwiktaim ol disaipel i bihainim singaut bilong Jisas?

¹¹ Yu ting ol disaipel i kirap nating tasol na bihainim Jisas? Nogat! Maski ol i bin go bek long wok bisnis bilong famili bilong ol long kisim pis bihain long namba wan taim ol i bungim Jisas, samting ol i bin lukim na harim i bin kirapim tru bel na tingting bilong ol. Bikpela haptaim i bin lus​—⁠klostu wanpela yia​—⁠we ol inap tingim gut ol samting ol i bin lukim na harim. Orait nau taim i kamap pinis long ol i mas tingim wanem samting ol bai mekim. Olsem wanem? Bai ol i olsem dispela bisnisman em taim em i lukim gutpela bis, bel i kirapim em long “go” kwiktaim na mekim ol samting em i mas mekim bilong baim dispela gutpela bis? Yes. Samting ol i bin lukim na harim i kirapim tru bel bilong ol. Ol i luksave olsem taim i kamap pinis bilong ol i mas kirap na mekim wok. Em nau, olsem ol Gutnius i tokim yumi, kwiktaim ol i lusim olgeta samting bilong ol na kamap disaipel bilong Jisas.

12, 13. (a) Planti man i harim tok bilong Jisas ol i mekim wanem? (b) Jisas i tok wanem long ol gutpela disaipel bilong em, na wanem mining bilong dispela tok?

¹² Ol dispela gutpela disaipel ol i narapela kain long sampela narapela em bihain ol Gutnius i stori long ol! I gat planti man em Jisas i bin oraitim sik bilong ol o givim kaikai long ol, tasol ol i mekim yet wok ol i save mekim long olgeta de. (Luk 17:​17, 18; Jon 6:​26) Sampela i givim eskius taim Jisas i singautim ol long kam bihainim em. (Luk 9:​59-​62) Tasol ol dispela gutpela disaipel ol i narapela kain. Bihain Jisas i tok: “Stat long taim Jon Bilong Baptais i autim tok na i kam inap nau, ol strongpela man . . . i bin wok strong long kisim kingdom bilong heven.”​​—⁠Matyu 11:⁠12.

¹³ Saveman bilong Baibel, Heinrich Meyer i stori long dispela ves olsem: “Ol i wok strong tru long kisim kingdom bilong Mesaia i kam klostu . . . Ol i amamas na givim bel tru (ol i no stap isi na wet tasol) long kisim kingdom.” Olsem dispela bisnisman, kwiktaim ol dispela disaipel i luksave long samting i gutpela tru, na ol i amamas long lusim olgeta samting bilong ol na bai ol i ken kisim Kingdom.​​—⁠Matyu 19:​27, 28; Filipai 3:⁠8.

Sampela Moa i Kirap Long Painim Kingdom

14. Olsem wanem Jisas i redim ol aposel long wok bilong autim tok bilong Kingdom? Wanem samting i kamap long dispela?

¹⁴ Taim Jisas i wok yet long autim tok, em i lainim na helpim sampela moa long kisim Kingdom. Pastaim, em i makim 12-pela disaipel long kamap aposel, em ol man em i salim ol i go. Jisas i kolim planti tok em ol i mas bihainim long wok autim tok na em i tokim ol long ol hevi inap painim ol. (Matyu 10:​1-​42; Luk 6:​12-​16) Inap tupela yia moa ol i raun wantaim Jisas taim em i autim tok long olgeta hap bilong Israel na ol i pas gut wantaim em. Ol i harim ol tok na lukim ol strongpela wok em i mekim, na ol i lukim ol gutpela pasin em yet i bihainim. (Matyu 13:​16, 17) Bel bilong ol i pilim tru olgeta dispela samting, na wankain olsem dispela bisnisman, ol i givim bel olgeta long painim Kingdom.

15. Jisas i tok i gat wanem as tru na ol disaipel i ken amamas?

¹⁵ Na tu, Jisas “i makim 70 man moa, na em i salim ol i go tupela tupela, na ol i go paslain long em. Em i salim ol i go long olgeta taun na ples em yet i laik i go long en.” Na tu, em i tokim ol long ol hevi ol bai kisim bihain, na ol i mas tokim ol manmeri: “Kingdom bilong God i kam klostu pinis long yupela.” (Luk 10:​1-​12, sta) Taim ol 70 man i kam bek, ol i amamas tru na ol i tokim Jisas: “Bikpela, mipela i bin kolim nem bilong yu, na ol spirit nogut tu ol i bihainim tok bilong mipela.” Tasol ating ol i kirap nogut tru taim Jisas i tokim ol long wanpela bikpela amamas ol inap kisim bihain long wanem ol i bin givim bel tru long Kingdom. Em i tokim ol: “Yupela i no ken amamas na tok olsem, ‘Ol spirit nogut ol i bihainim tok bilong mipela.’ Nogat. Yupela i mas amamas long God i raitim pinis nem bilong yupela long buk bilong en long heven.”​​—⁠Luk 10:​17, 20.

16, 17. (a) Jisas i givim wanem tok long ol aposel i stap gut long em, long laspela nait em i stap wantaim ol? (b) Dispela tok bilong Jisas i mekim na ol aposel inap amamas long wanem samting, na ol inap bilip tru long wanem samting?

¹⁶ Bihain, long laspela nait Jisas i stap wantaim ol aposel, long Nisan 14, 33 C.E., em i kamapim wanpela bung, em bihain ol i kolim Kaikai Bilong Bikpela, na em i tokim ol long tingim dispela bung. Em i tokim ol 11-pela aposel: “Taim ol samting i kamap bilong traim mi, yupela i bin i stap wantaim mi, na yupela i no lusim mi. Papa bilong mi em i givim kingdom long mi, olsem tasol mi givim kingdom long yupela. Na long kingdom bilong mi yupela bai i sindaun long tebol bilong mi na kaikai na dring. Na yupela bai i sindaun long ol gutpela sia na yupela bai i bosim ol 12-pela lain bilong Israel.”​​—⁠Luk 22:​19, 20, 28-​30.

¹⁷ Yumi ken ting olsem bel bilong ol aposel i amamas tru taim ol i harim dispela tok bilong Jisas! Bai ol inap holim wanpela gutpela wok tru i winim olgeta narapela wok ol man inap holim. (Matyu 7:​13, 14; 1 Pita 2:⁠9) Olsem dispela bisnisman, ol i bin lusim planti samting bambai ol inap bihainim Jisas long wok bilong painim Kingdom. Nau ol inap bilip tru olsem ol samting ol i bin lusim, i no lus nating.

18. Husat moa​—⁠i no ol 11-pela aposel tasol​—⁠bai kisim ol gutpela samting bilong Kingdom?

¹⁸ Ol aposel i bin stap wantaim Jisas long dispela nait, i no dispela 11-pela tasol bai kisim Kingdom, nogat. Em laik bilong Jehova long 144,000 olgeta i kam insait long kontrak bilong Kingdom na mekim wok king wantaim Jisas Krais long Kingdom long heven. Na tu, aposel Jon i bin lukim long driman “planti manmeri tru ol i bung i stap, na i no inap man i kaunim namba bilong ol. . . . Ol i sanap i stap long pes bilong sia king na long ai bilong Pikinini Sipsip. . . . Ol i singaut strong olsem, ‘God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi na mekim yumi i stap gut.’ ” Ol dispela manmeri i bilong i stap long graun aninit long dispela Kingdom.b​​—⁠KTH 7:​9, 10; 14:​1, 4.

19, 20. (a) Wanem rot i op long ol manmeri bilong olgeta lain? (b) Stadi i kamap bihain long dispela bai stori long wanem askim?

¹⁹ Paslain liklik long Jisas i go antap long heven, em i tokim ol gutpela disaipel: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela. Harim. Mi save stap wantaim yupela olgeta de, i go inap long dispela taim i pinis.” (Matyu 28:​19, 20) Olsem na ol manmeri bilong olgeta lain bai kamap disaipel bilong Jisas Krais. Ol tu bai wok strong long painim Kingdom​​—⁠maski gutpela pe ol bai kisim em long heven o long graun⁠—​olsem dispela bisnisman i bin wok strong long painim gutpela bis.

²⁰ Tok bilong Jisas i kamapim klia olsem ol bai mekim dispela wok bilong kamapim ol disaipel i go inap long “dispela taim i pinis.” Orait olsem wanem? Long taim bilong yumi i gat sampela man i stap, em ol i olsem dispela bisnisman, ol i redi long lusim olgeta samting bilong ol bilong painim Kingdom Bilong God? Stadi i kamap bihain long dispela bai stori long dispela samting.

[Ol Futnot]

Wok Bilong Painim “Gutpela Bis” Long Nau

“Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim.”​​—⁠MATYU 24:⁠14.

1, 2. (a) Ol Juda long taim bilong Jisas ol i gat wanem tingting long Kingdom Bilong God? (b) Jisas i mekim wanem bilong helpim ol man long kliagut long Kingdom, na wanem samting i kamap long dispela?

TAIM Jisas i stap long graun, Kingdom Bilong God em i wanpela samting ol Juda i gat bikpela laik long save long en. (Matyu 3:​1, 2; 4:​23-​25; Jon 1:​49) Pastaim, planti ol i no kliagut Kingdom bai bosim olgeta hap bilong graun na mekim dispela wok olsem wanem, na tu, ol i no save em i wanpela gavman long heven. (Jon 3:​1-5) Sampela em bihain ol i kamap disaipel bilong Jisas ol tu i no kliagut Kingdom Bilong God em i wanem samting na ol i mas mekim wanem bilong kisim blesing bilong mekim wok king wantaim Krais.​​—⁠Matyu 20:​20-​22; Luk 19:11; Aposel 1:⁠6.

² Isi isi Jisas i skulim ol disaipel bilong em long planti samting, wanpela em dispela tok piksa long gutpela bis em stadi paslain long dispela i bin stori long en, em i kamapim klia olsem ol i mas taitim bun tru bilong kisim ol blesing bilong Kingdom long heven. (Matyu 6:​33; 13:​45, 46; Luk 13:​23, 24) Yumi ken save bel bilong ol i bin pilim tru dispela tok, long wanem, kwiktaim bihain ol i kirap autim gutnius bilong Kingdom long olgeta hap bilong graun. Ol i no pret o les long mekim dispela wok, olsem Buk Aposel i kamapim klia.​​—⁠Aposel 1:8; Kolosi 1:​23.

3. Taim Jisas i stori long taim bilong yumi, em i mekim wanem tok long Kingdom?

³ Orait, olsem wanem long nau? Tok bilong ol gutpela blesing bilong wanpela paradais long graun aninit long Kingdom em i save go long planti milion manmeri. Long bikpela tok profet bilong Jisas i stori long taim bilong “pinis,” em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:​3, 14; Mak 13:10) Na em i tok ol bai mekim dispela bikpela wok, maski ol bikpela hevi, na pasin birua tu, i painim ol. Tasol em i tok promis: “Ol manmeri i stap strong inap long las de, God bai i kisim bek ol.” (Matyu 24:​9-​13) Bilong mekim dispela wok, ol i mas givim bel olgeta na redi long lusim sampela samting bilong ol yet, olsem dispela bisnisman long tok piksa bilong Jisas i bin mekim. Olsem wanem? I gat sampela manmeri long nau i bilip na givim bel olgeta long painim Kingdom?

Amamas Bilong Painim Tok i Tru

4. Tok i tru bilong Kingdom i save mekim wanem long ol manmeri long nau?

⁴ Dispela bisnisman long tok piksa bilong Jisas em i amamas tru taim em i painim pinis wanpela “bis i gutpela tru.” Dispela amamas i kirapim em long mekim olgeta samting em inap mekim na bai em inap kisim dispela bis. (Hibru 12:⁠1) Long nau tu, tok i tru bilong God na Kingdom bilong em i save pulim ol man i kam long God na i kirapim ol long mekim wok. Dispela samting i kirapim yumi long tingim tok bilong Brata A. H. Macmillan, em i raitim wanpela buk (Faith on the March) i stori long samting em yet i bin mekim bilong painim God na long kisim save long laik bilong God long ol manmeri. Em i tok: “Mi painim pinis samting em planti manmeri i save wok yet long painim long olgeta yia. Ol dispela manmeri ol i wankain olsem yu na mi, long wanem, ol i bilong olgeta kain lain na skin na sindaun na krismas. Tok i tru em i samting bilong olgeta kain man. Em i samting olgeta kain man i save laikim.”

5. Wanem gutpela samting i bin kamap olsem yumi lukim long ripot bilong 2004 sevis yia?

⁵ Yumi ken save dispela tok bilong em i tru, long wanem, long olgeta yia, gutnius bilong Kingdom Bilong God i save kirapim planti tausen manmeri i gat gutpela bel long dediketim laip bilong ol long Jehova na long bihainim laik bilong em. Em samting i bin kamap tu long 2004 sevis yia, kirap long Septemba 2003 i go Ogas 2004. Insait long dispela 12-pela mun, 262,416 manmeri i bin kisim baptais long wara long ai bilong ol man bilong makim olsem ol i dediket pinis long Jehova. Dispela samting i bin kamap long 235 kantri, we ol Witnes Bilong Jehova i wok long mekim 6,085,387 Baibel stadi long olgeta wik bambai ol inap helpim ol man bilong kain kain lain na sindaun na tok ples long kisim save long tok i tru bilong Baibel i bilong givim laip long ol.​​—⁠KTH 7:⁠9.

6. Wanem samting i mekim na lain i lotu tru long Jehova i wok long go bikpela long olgeta yia?

⁶ Dispela ol samting i bin kamap olsem wanem? Olsem: Jehova i bin kirapim ol dispela man i gat gutpela bel long kam long em. (Jon 6:​65; Aposel 13:48) Tasol yumi mas tingim tu bikpela wok bilong ol lain i bin givim ol yet long painim Kingdom​—⁠ol i no bin tingim ol yet tasol, ol i bin wok strong tru long helpim ol arapela. Brata Macmillan i gat 79 krismas taim em i tok: “Kirap long namba wan taim mi kisim save long ol gutpela promis em ol man bilong graun i save sik na dai ol inap wetim, na i kam inap nau, bilip bilong mi long ol dispela gutpela tok bilong Baibel i no bin lus​—⁠i stap strong yet. Mi bin tingting strong long kisim sampela save moa long Baibel bambai mi inap helpim ol arapela i wankain olsem mi, em ol i wok long kisim save long God Jehova i Gat Olgeta Strong na long ol gutpela samting em i laik mekim long ol manmeri long graun.”

7. Wanem ekspiriens i kamapim bikpela amamas bilong ol man i painim pinis tok i tru bilong Baibel?

⁷ Dispela bikpela laik bilong helpim ol narapela em i stap namel long lain wokboi bilong Jehova long nau tu. Tingim Daniela bilong Vienna, Ostria. Em i tok: “Kirap long taim mi liklik pikinini, God i bin stap nambawan gutpela pren bilong mi. Mi gat bikpela laik long save long nem bilong God, long wanem, mi save dispela tok ‘God’ i no wanpela nem tru. Tasol mi mas wet inap long taim mi gat 17 krismas na ol Witnes Bilong Jehova i kam long haus bilong mi. Ol i helpim mi long save long olgeta samting bilong God mi gat laik long save long en. Em nau, mi painim pinis tok i tru, na dispela em wanpela gutpela samting tru! Mi amamas tumas na mi save autim tok long olgeta man mi bungim.” Em i amamas long autim tok na i no longtaim na ol wanskul i kirap na tok bilas long em. Tasol Daniela i tok: “I olsem mi lukim truim bilong ol tok profet, long wanem, mi save Jisas i bin tok olsem ol man bai birua long ol lain em nem bilong em i stap long ol. Mi kirap nogut na mi amamas tu.” I no longtaim na Daniela i dediketim laip bilong em long Jehova, na kisim baptais, na putim mak bilong mekim wok misineri. Taim em i marit pinis, Daniela wantaim man bilong em Helmut i kirap autim tok long ol lain bilong Afrika, Saina, Filipins, na India, ol i sindaun long Vienna. Nau Daniela na Helmut i mekim wok misineri long saut-wes Afrika.

Ol i No Givap

8. Wanem wanpela rot we planti manmeri i bin soim olsem ol i laikim tru God na stap gut long Kingdom bilong em?

⁸ Tru tumas, wok misineri em wanpela rot we lain bilong Jehova long nau i save soim olsem ol i laikim tru God na stap gut long Kingdom bilong em. Olsem dispela bisnisman long tok piksa bilong Jisas, ol misineri i redi long i go long ol longwe hap bilong mekim wok bilong Kingdom. Tasol ol i no go long ol dispela longwe hap bilong painim gutnius bilong Kingdom, nogat; ol i go bilong bringim dispela gutnius i go long ol man i stap long ol dispela hap​—⁠ol i save skulim ol na helpim ol long kamap disaipel bilong Jisas Krais. (Matyu 28:​19, 20) Long planti kantri, ol i save karim bikpela hevi. Tasol pasin bilong ol long sanap strong na karim hevi i save kamapim planti gutpela samting.

9, 10. Wanem sampela gutpela ekspiriens i bin painim ol misineri long ol longwe hap, olsem Ripablik Bilong Sentral Afrika?

⁹ Olsem: Long Ripablik Bilong Sentral Afrika long yia i go pinis, 16,184 manmeri i bung long Memorial bilong tingim dai bilong Krais​—⁠dispela namba i winim namba bilong ol pablisa bilong Kingdom long dispela kantri inap 7-pela taim. Long planti hap long dispela kantri i no gat pawa, olsem na ol man i save stap ausait na mekim wok bilong ol aninit long diwai i givim ples kol long ol. Olsem na ol misineri tu i save bihainim wankain pasin​—⁠ol i save mekim ol Baibel stadi aninit long diwai. Ausait i gat gutpela lait bilong san na i no hat tumas, na i gat narapela gutpela samting tu. Ol man i save laikim tru Baibel na amamas long stori long ol samting bilong lotu. Olsem na taim ol man i wokabaut i go i kam ol i lukim ol misineri i mekim Baibel stadi, planti taim ol i kam sindaun na ol tu i insait long stadi.

¹⁰ Taim wanpela misineri i mekim Baibel stadi ausait, wanpela yangpela man i stap long hapsait bilong rot we ol i mekim Baibel stadi, em i kam na tokim misineri olsem i no gat wanpela i bin kam lukim em, olsem na misineri i mas kam lukim em na mekim Baibel stadi wantaim em tu. Misineri i amamas long mekim olsem, na nau dispela yangpela man i wok long kamap strong hariap. Long dispela kantri, planti taim ol polis i save stopim ol Witnes long rot, tasol i no bilong kotim ol, nogat; ol i laik kisim ol nupela Wastaua na Kirap! o tok tenkyu long wanpela stori ol i bin amamas long ritim.

11. Maski sampela hevi i bin painim ol, ol misineri bilong longtaim ol i gat wanem tingting long wok bilong ol?

¹¹ Planti manmeri em ol i bin kirap 40 o 50 yia i go pinis long mekim wok misineri, ol i mekim yet dispela wok. Ol i stap gutpela piksa tru long pasin bilong bilip na sanap strong em yumi olgeta i ken bihainim! Insait long 42 yia i go pinis, tupela marit i bin mekim wok misineri long 3-pela kantri. Man i tok: “Tru, sampela hevi i bin painim mipela. Inap 35 yia mipela i bin pait bilong daunim sik malaria. Tasol i no gat wanpela taim mipela i bin bel hevi long mipela i kamap misineri.” Meri bilong em i tok: “Olgeta taim i gat planti samting bilong tenkyu long en. Mipela kisim bikpela amamas long wok autim tok, na i no hatwok long kirapim ol nupela Baibel stadi. Na taim mipela i lukim ol sumatin i kam long ol miting na narapela i kisim save long narapela, olgeta wan wan miting i olsem bung bilong wanpela famili.”

Ol i “Lusim Pinis Olgeta Arapela Samting”

12. Ol man i save mekim wanem bilong soim olsem ol i tingim tru ol gutpela samting bilong Kingdom?

¹² Taim bisnisman i painim pinis gutpela bis, “em i go salim olgeta samting bilong en na i go baim dispela gutpela bis.” (Matyu 13:46) Dispela pasin bilong redi long lusim olgeta gutpela samting, em i pasin bilong ol manmeri husat i tingim tru ol gutpela samting bilong Kingdom. Aposel Pol i wetim taim em bai mekim wok wantaim Krais long Kingdom, na em i tok: “Mi save long Krais Jisas, em i Bikpela bilong mi, na mi lukim dispela save tasol em i samting tru, na olgeta gutpela samting bilong dispela graun ol i olsem pipia nating. Mi laik bihainim Krais tasol, na mi lusim pinis olgeta arapela samting, bai mi ken holimpas Krais.”​​—⁠Filipai 3:⁠8.

13. Wanpela man long Ripablik Sek i bin mekim wanem bilong soim olsem em i laikim tru Kingdom?

¹³ Na olsem tasol, planti man long nau i redi long mekim ol bikpela senis long i stap bilong ol na bai ol inap kisim ol blesing bilong Kingdom. Olsem: Long Oktoba 2003, wanpela man i gat 60 krismas, em hetmasta bilong wanpela skul long Ripablik Sek, em i lukim wanpela buk bilong stadi long Baibel, nem bilong en Save i Bringim Man Long Laip Oltaim. Taim em i ritim pinis, kwiktaim em i go lukim ol Witnes Bilong Jehova na askim ol long stadi wantaim em long Baibel. Em i kamap strong long ol samting bilong spirit na i no longtaim em i stat long kam long olgeta miting. Tasol olsem wanem long tingting bilong em, em i bin tingting long sanap long eleksen na kamap wanpela bikman bilong ples, na bihain, kamap wanpela bikman bilong gavman? Em i no tingting moa long dispela samting. Em i kirap long givim bel long mekim narapela kain wok​—⁠wok bilong autim tok bilong Kingdom. Em i tok, “Mi tilim planti buk bilong Baibel long ol sumatin long skul.” Long bikpela kibung i bin kamap long Julai 2004, em i kisim baptais long wara bilong makim olsem em i dediket pinis long Jehova.

14. (a) Gutnius bilong Kingdom i bin kirapim planti milion manmeri long mekim wanem? (b) Yumi ol wan wan i ken givim wanem ol askim long yumi yet?

¹⁴ Planti milion manmeri long olgeta hap bilong graun i bin mekim wankain samting taim ol i harim gutnius bilong Kingdom. Ol i lusim ol pasin nogut bilong dispela graun, ol pasin bilong olpela bel, ol poroman bilong bipo, na ol wok na amamas bilong dispela graun. (Jon 15:19; Efesus 4:​22-​24; Jems 4:4; 1 Jon 2:​15-​17) Bilong wanem ol i mekim ol dispela samting? Long wanem, ol i tingim ol blesing bilong Kingdom Bilong God i winim tru olgeta samting dispela graun inap givim long ol. Olsem wanem? Yu tu i gat wankain tingting long gutnius bilong Kingdom? Em i kirapim bel bilong yu long mekim ol senis yu mas mekim na bai i stap bilong yu i stret wantaim ol samting Jehova i laik bai yu mas mekim? Sapos yu mekim olsem, bai yu kisim planti gutpela blesing, long nau na long bihain tu.

Pinis Bilong Wok i Kam Klostu

15. Baibel i tok profet long ol manmeri bilong God bai mekim wanem long taim bilong pinis?

¹⁵ Man bilong raitim song i tok: “Taim yu laik pait long ol birua ol manmeri bilong yu bai [“amamas long,” NW ] i go wantaim yu na helpim yu.” Insait long dispela lain i amamas long givim ol yet, i gat planti yangpela i olsem “wara i save kamap long gras,” na i gat “planti meri” i ‘go autim tok.’ (Song 68:11; 110:⁠3) Ol dispela manmeri bilong Jehova​—⁠ol man na meri, ol yangpela na lapun​—⁠ol i wok strong tru na ol i bin lusim planti samting bilong ol yet nau long dispela taim bilong pinis, na wanem samting i bin kamap long dispela?

16. Stori long wanpela samting ol wokboi bilong God i mekim bilong helpim ol arapela long kisim save long Kingdom.

¹⁶ Wanpela painia long India, em i autim tok bilong Kingdom fultaim, i bin tingting planti long olsem wanem 2 milion yaupas i stap long dispela kantri inap kisim save long Kingdom. (Aisaia 35:⁠5) Em i tingting long go long wanpela skul long Bangalore bilong lain long tok ples bilong ol yaupas. Long dispela skul em inap autim bilip bilong em long Kingdom long planti yaupas, na em i kamapim sampela Baibel stadi grup. Insait long sampela wik tasol, winim 12-pela i kirap long kam long ol miting long Haus Kingdom. Bihain, long wanpela bung bilong marit, dispela painia i bungim wanpela yangpela man yaupas bilong Calcutta, em i gat planti askim na bikpela laik long kisim sampela save moa long Jehova. Tasol i gat wanpela hevi. Dispela yangpela man bai go bek long Calcutta, em 1,600 kilomita longwe, bilong i go long haiskul, tasol long dispela hap i no gat ol Witnes i save long tok ples bilong ol yaupas. Em i strong long papa i mas larim em i go long wanpela skul long Bangalore bambai em inap stadi yet long Baibel. Em i kamap strong long ol samting bilong spirit, na bihain long wanpela yia, em i dediketim laip bilong em long Jehova. Orait nau em yet i kirap na stadi long Baibel wantaim sampela yaupas, wanpela em pren bilong em long bipo taim ol i liklik yet. Nau brens ofis long India i wok long stretim rot bilong ol painia i ken lain long tok ples bilong ol yaupas bilong helpim ol yaupas.

17. Wanem samting yu lukim long 2004 sevis yia ripot long pes 19 i go 22 em i strongim yu.

¹⁷ Long pes 19 i go 22 bilong dispela nius, bai yu lukim ripot bilong wok bilong ol Witnes Bilong Jehova bilong 2004 sevis yia. Lusim liklik haptaim bilong skelim ripot, na bai yu yet i ken lukim klia olsem ol manmeri bilong Jehova long olgeta hap bilong graun ol i wok strong long painim “gutpela bis” long nau.

“Wok Pastaim Long Painim Kingdom”

18. Long tok piksa bilong bisnisman, Jisas i no stori long wanem samting? Bilong wanem em i no mekim olsem?

¹⁸ Orait nau yumi ken tingim gen dispela tok piksa bilong Jisas long bisnisman. Tingim: Jisas i no tok long samting bisnisman bai mekim bilong lukautim em yet taim em i salim pinis olgeta samting bilong em. Olsem na ating sampela i laik save: ‘Olsem wanem dispela bisnisman bai kisim kaikai, klos, haus, long wanem, nau em i no holim wanpela samting bilong em yet? Dispela gutpela bis bai helpim em olsem wanem?’ Em ol gutpela askim. Tasol Jisas i bin tokim ol disaipel: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela”? (Matyu 6:​31-​33, Nupela Testamen na Ol Sam) Bikpela poin bilong dispela tok piksa i olsem ol disaipel i mas givim bel olgeta long God na long Kingdom. Olsem wanem? I gat sampela samting long dispela tok piksa bilong lainim yumi tu?

19. Wanem bikpela samting yumi bin lainim long tok piksa bilong Jisas long gutpela bis?

¹⁹ Maski em nau tasol yumi kirap long kisim save long dispela gutnius o longtaim pinis yumi bin wok long painim Kingdom na tokim ol arapela long ol gutpela blesing bilong en, yumi mas wok yet long painim Kingdom. Tru, yumi stap long taim bilong planti hevi, tasol i gat as na yumi ken bilip olsem samting yumi wok long painim, dispela em i samting tru na i no gat narapela samting i gutpela olsem​—⁠wankain olsem dispela bis em bisnisman i lukim. Ol samting i kamap long graun na truim bilong ol tok profet bilong Baibel i kamapim long ples klia olsem yumi stap long taim bilong “pinis.” (Matyu 24:⁠3) Olsem dispela bisnisman, yumi mas soim olsem yumi givim bel olgeta long Kingdom Bilong God na amamas long gutpela wok bilong yumi long autim gutnius.​​—⁠Song 9:​1, 2.