“Wanpela Mak”
INAP planti handet yia ol boskru i bin skelim ol mak bilong skai, olsem: Sapos skai i retpela long apinun bai i gutpela taim, tasol sapos skai i retpela long moningtaim bai i gat win na ren. Long nau, ol man i save mekim wok long ol satelait na kompyuta samting bambai ol inap save bai i gat san o win o ren, o nogat. Planti taim ol samting ol satelait na kompyuta samting i tokaut long en em i wankain stret long ol samting em skai i bin tokaut long en long ol boskru bilong bipo.
Taim ol birua i tokim Jisas “long wokim wanpela mirakel olsem mak” bilong kamapim klia olsem em i Mesaia, em i tok: “Long apinun yupela i save tok, ‘Skai i retpela. Bai gutpela taim nau.’ Na long moningtaim yupela i save tok, ‘Klaut i blak na skai i retpela. Olsem na nau bai i gat win na ren.’ Yes, yupela i save lukim ol mak bilong skai na skelim gut. Tasol yupela i no save lukim na skelim ol mak bilong dispela taim nau. Ol manmeri bilong dispela taim ol i lain manmeri nogut na ol i no save bel tru long god. Oltaim ol i save singaut long lukim mak. . . . Wanpela mak tasol bai ol i lukim, em mak bilong profet Jona.”—Matyu 16:1-4.
Ol birua bilong Jisas inap skelim ol mak bilong skai, tasol ol i no inap skelim gut ol samting bilong spirit. Orait, olsem wanem long “mak bilong profet Jona”? Jona i kamap olsem mak, long wanem, em i bin stap 3-pela de long bel bilong wanpela pis na bihain em i autim tok long ol man bilong biktaun Ninive. Ol man long taim bilong Jisas ol i lukim ‘mak bilong Jona’ olsem: Jisas i stap 3-pela de long matmat na bihain em i kirap bek. Ol disaipel bilong em ol i tokim ol man long dispela samting, olsem na Jisas i kamap olsem mak.—Matyu 12:39-41.
Long narapela taim ol disaipel i askim Jisas long “wanpela mak” na bai lain bilong em ol i ken save em i “kam bek” na i stap king. Jisas i kolim kain kain samting bilong makim dispela taim olsem: ol bikpela pait, na ol bikpela guria, na hangre, na long olgeta hap ol i autim tok olsem Kingdom bilong God i kirap pinis na i stap.—Matyu 24:3-14.
Olsem wanem? Yu lukim ol dispela samting i makim olsem Jisas i kam pinis na em i stap King long heven? Ol man bilong dispela taim nau ol i lukim truim bilong en. (Matyu 24:34) Na olsem wanem long bihain? Baibel i tokaut, klostu nau pasin bilong dispela graun bai pinis na God bai kamapim nupela taim.—2 Pita 3:13.