Tok Profet i Kamap Tru

TAIM ol disaipel i askim Krais Jisas long wanem mak bai kamap pastaim na bai ol inap save em i kam i stap olsem king, Jisas i tok profet olsem “pasin nogut bai i kamap bikpela.” (Matyu 24:​3, 12) Olsem wanem? Long nau yumi lukim truim bilong dispela tok profet?

Tru tumas​—⁠yumi lukim! Lain Yunaitet Nesen i wokim wanpela buk (The United Nations and Crime Prevention, bilong Oktoba, 1991) i tok olsem: ‘Pasin raskol i wanpela bikpela hevi bilong planti kantri long olgeta hap. Planti kantri i no gat strong bilong daunim dispela pasin. . . . Pasin raskol i go nogut olgeta, olsem na pasin bilong bagarapim man, na mekim pretim ol polis na jas samting, na grisim ol na bai ol i paulim kot, em i kamap bikpela. Ol lain i mekim pasin birua na pretim man ol i bin kilim i dai planti tausen tausen manmeri i no gat rong. Pasin bilong brukim lo na wok bisnis long drak i mekim nogut long planti man long olgeta hap. Pasin bilong bagarapim graun na wara na win i kamap bikpela moa, na dispela tu i wanpela kain pasin raskol.’

Paitim man: Long 1970, inap 150 manmeri long olgeta 100,000, ol narapela i paitim ol, tasol long 1990, dispela lain i go bikpela inap olsem 400 long olgeta 100,000.

Stil: Long 1970, inap olsem 1,000 man long olgeta 100,000 ol i mekim pasin stil, tasol long 1990 dispela lain i go bikpela inap 3,500 long olgeta 100,000.

Tingim na kilim man i dai: Namel long 1975 na 1985 long ol kantri i no gat planti wok bisnis, lain bilong tingim na kilim man i dai i go bikpela inap 1 i go 2.5 long olgeta 100,000. Tasol namel long ol dispela yia long ol kantri i gat planti wok bisnis, dispela lain i go bikpela inap 3 i go 3.5 samting.

Pasin raskol na ol drak: Dispela buk i tok: ‘Ol bikpela lain bilong brukim lo na wok bisnis long drak ol i gat planti mani na gan samting, olsem na ol gavman bilong ol liklik kantri i no inap pasim wok bilong ol. Na long ol kantri i gat planti wok bisnis, ol dispela lain i bin pasim wok em kot na polis samting i laik mekim bilong daunim wok bisnis long drak.’

Olgeta kain pasin raskol: Ol i tok, kirap long 1985 i go inap 2000, dispela pasin bai kamap bikpela moa, winim inap tupela taim.

Pasin raskol i go bikpela moa long olgeta hap, na i truim tok profet Jisas i mekim bilong makim pasin bilong “dispela graun i laik pinis.” (Matyu 24:⁠3) Jisas i tok: “Taim yupela i lukim ol dispela samting i kamap, yupela i ken save, kingdom bilong God i kam klostu pinis.”​—⁠Luk 21⁠:⁠31.