Husat i Autim Dispela Gutnius?

“ . . . ol bai autim . . . long olgeta hap bilong graun.”​—MATYU 24:⁠14.

OL Witnes Bilong Jehova i wok long autim dispela gutnius long olgeta hap bilong graun. Ol i mekim olsem long kain kain rot. Wanpela rot em ol i . . .

Toktok Wantaim Ol Man. Olsem Jisas na ol disaipel bilong em i bin mekim, ol Witnes Bilong Jehova i save go lukim ol man na autim gutnius long ol. (Luk 8:1; 10:⁠1) Ol i no wet long ol man i kam long ol. Olgeta Witnes, winim 7 milion, ol i insait long wok bilong tokim ol man long Kingdom Bilong God. Ol i save autim tok long ol man long ol haus, ol strit, long telefon, na long sampela narapela rot. Long las yia, ol Witnes i bin lusim 1.5 bilion aua long mekim dispela wok.

Ol i skulim ol narapela long Kingdom Bilong God, na tu, long “olgeta samting [Jisas i] tokim [ol] long mekim.” (Matyu 28:20) Ol i save mekim fri Baibel stadi wantaim 8 milion manmeri.

Ol Witnes i mekim wok autim tok long olgeta hap bilong graun long 236 kantri. Ol i save autim tok long ol manmeri bilong kain kain sindaun. Ol i save autim tok long ol ples na long ol biktaun, long ol bikbus bilong Amason na Saibiria, long ples wesan nating bilong Afrika, na long ol bikpela maunten bilong Himaleya. Ol i no kisim pe long wok ol i mekim; ol i laikim tru God na ol narapela, olsem na ol i yusim mani na taim bilong ol yet bilong mekim dispela wok. Na tu, ol i autim gutnius long rot bilong . . .

Ol Buk na Nius. Dispela nius, nem olgeta bilong en em Wastaua i Tokaut Long Kingdom Bilong Jehova, nau ol i wokim long 185 tokples na ol i save prinim olsem 42 milion long olgeta wan wan mun. Poroman bilong en, em nius Kirap!, i tokaut tu long Kingdom, ol i wokim long 83 tokples na ol i save prinim olsem 40 milion long olgeta wan wan mun.

Ol buk, buklet, ol liklik nius, ol CD/MP3, na ol DVD we i stori long ol tok bilong Baibel, ol i stap long 540 tokples. Insait long 10-pela yia tasol i go pinis, ol Witnes i bin wokim na tilim inap 20 bilion bilong ol dispela samting, i olsem ol i tilim 3-pela bilong ol dispela samting long olgeta wan wan man i stap long graun olgeta!

Ol Witnes Bilong Jehova i bin prinim o givim wok long ol narapela long prinim sampela Baibel. Ol Witnes i bin tanim tok, prinim, na tilim Baibel New World Translation of the Holy Scriptures; hap bilong dispela Baibel o Baibel olgeta i stap nau long 96 tokples. Ol i bin tilim pinis 166 milion kopi bilong dispela Baibel. Na tu, ol Witnes i save autim gutnius bilong Kingdom long . . .

Ol Miting Kristen. Ol miting bilong ol Witnes Bilong Jehova i save kamap long olgeta wik long Haus Kingdom, ol i no bung nating bilong lotu na em tasol, nogat, wok bilong en i bilong skulim gut ol man. I gat ol tok i save kamap na i stiaim tingting bilong ol man i go long ol tok bilong Baibel, na ol i save stadi long Baibel long rot bilong nius Wastaua na ol narapela buk na nius. Na tu, long ol miting, ol Witnes i save lain long olsem wanem ol inap mekim gut moa wok bilong autim gutnius.

Ol Witnes long olgeta hap bilong graun i save stadi long wankain buk na nius long winim 107,000 kongrigesen, na dispela i mekim na ol i stap wanbel. Olgeta kain manmeri i ken kam long ol dispela miting. Ol i no singaut long mani. Olgeta dispela wok i no inap kamapim gutpela samting sapos ol Witnes yet i no bihainim ol tok ol i save autim. Olsem na ol i laik kirapim ol man long harim gutnius, na ol i mekim olsem long rot bilong i stap . . .

Gutpela Piksa. Ol i wok strong long stap gutpela piksa long bihainim pasin Kristen, na ol i traim bes long mekim ol pasin em ol i laik bai ol narapela i mekim long ol. (Matyu 7:12) Ol i gat sin i stap long skin na sampela taim ol i save mekim ol popaia, tasol ol i gat laik tru long mekim pasin laikim long olgeta manmeri long rot bilong autim gutnius long ol, na tu, long rot bilong helpim ol long taim ol i mas kisim helpim.

Wok autim tok bilong ol Witnes Bilong Jehova i no bilong kirapim olgeta man long tanim bel, nogat. Tasol taim ol i mekim dispela wok inap long mak Jehova i laikim, orait pinis bai kamap olsem Jisas i bin tok profet long en. Dispela bai mekim wanem long graun na ol manmeri i stap long en?

[Piksa long pes 7]

Ol Witnes Bilong Jehova i autim gutnius long olgeta hap bilong graun

“Pinis” Em Wanem Samting?

“. . . na bihain long dispela, pinis bai kamap.”​—⁠MATYU 24:⁠14.

LONG nau i gat kain kain stori long pinis bilong dispela graun. Ol buk, ol muvi, ol komik na olkain saiens buk i stori long dispela samting. Ol i stori long graun bai pinis long rot bilong pait nuklia, ol komet i bam, wanpela vairas nogut i kilim i dai ol man, bikpela senis long raun bilong san, ren na win samting, na ol welman bilong ples antap i kam pait long ol man bilong graun.

Ol lotu tu i gat kain kain tingting long dispela samting; planti i skulim ol man olsem taim “pinis” i kamap, bagarap bai painim olgeta samting i gat laip. Wanpela tisa bilong lotu i stori long Matyu 24:14 na em i tok: “Dispela ves tu i gat bikpela insait bilong en, winim olgeta narapela tok i stap long Tok Bilong God . . . I gat bikpela bagarap bai painim ol man long taim bilong yumi na planti bilong yumi i no laik tingim dispela samting nogut i laik kamap.”

Ol man i gat ol kain tingting olsem, ol i no tingim wanpela bikpela samting: God Jehova i bin wokim graun bilong i stap “strong tru. Em i no wokim graun bilong i stap nating. Nogat. Em i bin wokim bilong olgeta samting i ken i stap long en.” (Aisaia 45:18) Olsem na taim Jisas i toktok long “pinis,” dispela i no makim olsem graun bai bagarap, na tu, dispela i no makim olsem olgeta lain manmeri long graun bai bagarap na pinis olgeta, nogat. Tok bilong em i makim olsem bagarap bai painim ol man nogut​—⁠em ol man i bikhet na i no laik bihainim ol gutpela tok bilong Jehova.

Tingim wanpela tok piksa. Yu papa bilong wanpela naispela haus na yu larim ol man i sindaun long en na ol i no gat wok long baim rent. Sampela bilong ol i stap gut wantaim ol narapela na ol i lukautim gut haus bilong yu. Tasol ol narapela i kamapim ol hevi, ol i pait wantaim ol narapela na mekim nogut long ol gutpela man i sindaun long haus. Ol i bagarapim ol samting long haus na ol i bikhet na i no laik bihainim tok bilong yu long stopim dispela pasin bilong ol.

Yu bai mekim wanem bilong stretim dispela hevi? Yu ting yu bai bagarapim haus bilong yu? Ating nogat, a? Ating yu bai rausim ol man nogut na stretim gen ol samting ol i bin bagarapim.

Jehova bai mekim wankain pasin. Em i kirapim man bilong raitim song long tok: “Ol man nogut bai i bagarap olgeta. Tasol ol manmeri i bilip na wetim Bikpela i helpim ol, bai ol i stap gut long graun bilong ol. I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”​—⁠Song 37:​9-11.

Aposel Pita tu i mekim tok long wankain samting. Holi spirit i kirapim em, na em i tok: “Long bipo tru skai i stap na graun i stap strong antap long wara na i stap namel long wara. Long dispela rot ol manmeri bilong graun long dispela taim ol i bin kisim bagarap taim bikpela tait wara i karamapim ol.” (2 Pita 3:​5, 6) Long dispela ves, aposel Pita i toktok long Bikpela Tait i bin kamap long taim bilong Noa. Bagarap i bin painim ol manmeri husat i sakim tok bilong God, tasol graun yet i no bin bagarap. Dispela Bikpela Tait i bin kamap long graun olgeta, em i stap olsem piksa na “i makim ol samting bai kamap long ol man i sakim tok bilong God.”​—⁠2 Pita 2:⁠6.

Na Pita i tok moa olsem: “Skai na graun bilong nau i wetim paia i kamap.” Sapos yumi ritim dispela hap ves tasol, ating bai yumi kisim tingting kranki. Tingim, dispela ves i tok moa olsem: “Na ol man i sakim tok bilong God, ol bai bagarap olgeta.” Bagarap i no inap painim dispela graun, nogat, bagarap bai painim ol man i sakim tok bilong God. Wanem samting bai kamap bihain long dispela? Pita i tok: “God i promis pinis long wokim nupela skai [Kingdom Bilong God long han bilong Mesaia] na nupela graun [ol stretpela lain manmeri], na stretpela pasin tasol bai i stap long en. Em dispela samting tasol yumi wetim.”​—⁠2 Pita 3:​7, 13.

Tok profet bilong Baibel i soim olsem taim bilong “pinis” em i klostu tru. Ritim Matyu 24:​3-14 na 2 Timoti 3:​1-5 bilong skelim ol mak i soim olsem ol dispela tok i tru.a

Olsem wanem? Yu kirap nogut olsem planti man i no kliagut long Matyu 24:​14, em wanpela ves we wanpela pikinini i ken kliagut long en? I gat as na i olsem. Satan i pasim tingting bilong ol man na ol i no inap luksave long ol gutpela tok i tru i stap insait long Baibel. (2 Korin 4:⁠4) Na tu, God i no kamapim ol samting em i tingting pinis long mekim long ol man i gat pasin antap, nogat, em i kamapim long ol man i gat pasin daun. Long dispela samting, Jisas i bin tok: “Papa, Bikpela bilong heven na graun, mi litimapim nem bilong yu long ai bilong ol man, long wanem, yu bin haitim ol dispela samting long ol man i gat savetingting na ol klevaman, na yu bin kamapim long ol man i stap olsem ol liklik pikinini.” (Matyu 11:25) Em i gutpela blesing tru olsem yumi tu i insait long lain manmeri husat i gat pasin daun, na yumi kliagut long Kingdom Bilong God em wanem samting, na yumi inap wetim ol gutpela blesing em dispela Kingdom bai kamapim long ol manmeri i stap daun long en!