• “Ol Dispela Samting i Mas Kamap”
    Wastaua—1999 | Me 1

    • Ol Manmeri Bilong Dispela Taim Bai Lukim

      11. Jisas i tok wanem long “ol manmeri bilong dispela taim”?

      11 Planti Juda i ting olsem pasin bilong ol long lotu, em tempel i bikpela samting bilong en, dispela i no inap pinis. Tasol Jisas i bin tok: “Yupela i ken kisim save long diwai fik. Taim han bilong en i gat wara na ol nupela lip i kamap, yupela i save, taim bilong gutpela san i laik kamap nau. Olsem tasol, taim yupela i lukim dispela olgeta samting i kamap pinis, orait yupela i ken save, Pikinini Bilong Man i kam klostu pinis, na i stap long dua. Mi tok tru long yupela, taim ol manmeri bilong dispela taim i no i dai yet, dispela olgeta samting bai i kamap. Skai wantaim graun bai i lus, tasol tok bilong mi bai i no inap lus.”​—⁠Matyu 24:​32-35.

      12, 13. Taim Jisas i toktok long “ol manmeri bilong dispela taim,” ol disaipel i kisim wanem tingting?

      12 Long ol yia paslain long 66 C.E., ol Kristen i bin lukim pinis truim bilong planti samting bilong dispela mak i gat planti hap bilong en​—⁠olsem ol bikpela pait, hangre, na wok bilong autim gutnius bilong Kingdom i go long planti hap. (Aposel 11:28; Kolosi 1:23) Tasol las de bai kamap long wanem taim? Wanem insait bilong tok bilong Jisas olsem: “Taim ol manmeri bilong dispela taim [tok Grik, ge·ne·aʹ] i no i dai yet”? Ol Juda i birua long God na ol i stap long taim bilong Jisas, na ol hetman bilong lotu tu, planti taim Jisas i bin kolim ol olsem “lain manmeri nogut na ol i no save bel tru long God.” (Matyu 11:16; 12:​39, 45; 16:4; 17:17; 23:36) Olsem na taim Jisas i stap long maunten Oliv na em i toktok gen long “ol manmeri bilong dispela taim,” em i no toktok long olgeta Juda em ol i bin stap kirap long bipo yet na i kam inap long dispela taim, nogat; na em i no toktok long ol disaipel bilong em, maski ol i olsem wanpela “lain manmeri bilong [God] stret.” (1 Pita 2:⁠9) Na Jisas i no tok “ol manmeri bilong dispela taim” ol i bilong wanpela hap taim. Nogat.

      13 Jisas i toktok long ol Juda i birua long God long dispela taim bipo em ol bai lukim truim bilong dispela mak em i bin kolim. Profesa Joel B. Green i stori long “ol manmeri bilong dispela taim” em Luk 21:32 i toktok long en, olsem: “Long Namba 3 Gutnius, ‘ol manmeri bilong dispela taim’ (na sampela tok olsem) long olgeta taim em i makim wanpela lain i birua long laik bilong God. . . . [Em i makim] ol manmeri i bikhet na givim baksait long laik bilong God.”b

      14. Wanem samting i painim “ol manmeri bilong dispela taim”? Wanem samting i painim ol Kristen?

      14 Ol manmeri nogut bilong lain Juda i birua long God, em ol i lukim truim bilong dispela mak Jisas i bin kolim, ol bai lukim tu las de i kamap. (Matyu 24:​6, 13, 14) Na tru tumas, ol i lukim dispela samting i kamap! Long yia 70 C.E., ami bilong Rom em Taitus i bosim, em pikinini man bilong King Vespesian, ol i kam bek. Yumi no inap tingim bikpela pen na hevi i bin painim ol Juda i stap insait long Jerusalem.c Wanpela man i bin lukim ol samting i bin kamap, em Flavius Josifas, em i stori olsem long taim ol Rom i bagarapim pinis dispela taun, inap olsem 1,100,000 Juda i dai pinis na ol i kisim olsem 100,000 manmeri i go kalabus, tasol i no longtaim na planti bilong ol i kisim nogut tru​—⁠ol i dai long hangre o long ol ples pilai bilong ol Rom. Tru tumas, bikpela hevi tru i kamap long yia 66 i go inap long yia 70 C.E., em nambawan bikpela hevi i bin painim Jerusalem na lain Juda i kam inap long dispela taim bipo o i kamap bihain long dispela taim. Tasol dispela bikpela hevi i no painim ol Kristen i bin bihainim tok profet bilong Jisas na ol i ranawe lusim Jerusalem bihain long ol ami bilong Rom i lusim dispela hap long yia 66 C.E.! Ol Kristen God i bin makim, olsem “ol manmeri em i makim pinis,” ol i abrusim bagarap, o ol i no lus, long yia 70 C.E.​—⁠Matyu 24:​16, 22.

  • “Ol Dispela Samting i Mas Kamap”
    Wastaua—1999 | Me 1

    • b Wanpela saveman bilong Briten, em G. R. Beasley-Murray, em i tok: “Dispela tok ‘ol manmeri bilong dispela taim,’ i no inap givim hatwok long ol man i save kamapim insait bilong tok bilong Baibel. Tru, insait bilong dispela tok genea, long tok Grik bilong pastaim em olsem mama i karim pikinini, ol manmeri i kamap long wanpela tumbuna, na lain man, . . . tasol long Baibel [Grik Septuagint] planti taim ol i tanim wanpela tok Hibru, dôr, insait bilong en i olsem taim, taim bilong ol manmeri bilong graun, o ol manmeri bilong wanpela taim, olsem ol i stap long wankain taim tasol. . . . Long ol tok Jisas i kamapim, dispela tok i makim tupela samting, olsem: long olgeta taim em i makim ol manmeri i stap long taim bilong em, na long olgeta taim em i givim strongpela tok long dispela lain.”