“Sapos Sol i Lusim Pait Bilong En”

OL MAN i bin pait long en. Ol i bin mekim wok long en olsem senis bilong kisim sampela narapela samting. Long ol Saina long bipo, gol i stap olsem samting i gat bikpela pe na sol i stap olsem namba tu long en. Tru tumas, long bipo yet na i kam inap long nau ol man i tingim sol i olsem wanpela samting i gat bikpela pe. I kam inap long nau, ol man i save mekim wok long en bilong stretim sik samting, na long olgeta hap ol i mekim wok long en bilong putim long kaikai na putim long sampela samting bambai dispela samting i no ken bagarap.

Sol i gat planti gutpela wok bilong en, olsem na yumi no kirap nogut taim Baibel i mekim wok long en olsem piksa long makim wanpela samting. Olsem: Lo Bilong Moses i tok olsem olgeta ofa ol i mekim long Jehova long alta, ol i mas putim sol long en. (Wok Pris 2:​13) Ol i no mekim dispela bambai ofa i gat swit long en, nogat; ol i mekim olsem, long wanem, sol i makim ol samting i no inap bagarap.

Long bikpela tok bilong em antap long maunten, Krais Jisas i tokim ol disaipel bilong em: “Yupela i olsem sol bilong graun.” (Matyu 5:​13) Taim Jisas i mekim dispela tok, em i makim olsem taim ol i autim tok bilong Kingdom bilong God long ol narapela, dispela tok inap helpim ol dispela man long stap laip, olsem ol i no ken bagarap. Tru tumas, ol man i bihainim ol tok bilong Jisas, ol inap stap gut na mekim wok bilong God maski ol i stap namel long ol man em pasin bilong ol i nogut na ol i no tingim ol samting bilong spirit.​—⁠1 Pita 4:​1-3.

Tasol Jisas i tok lukaut olsem: “Sapos sol i lusim pait bilong en, . . . ol man i save rausim tasol na krungutim long lek bilong ol.” Wanpela saveman bilong Baibel, em Albert Barnes, em i tok, sol long taim bilong Jisas na ol aposel, “i no klin, na ol hap pipia lip na pipia graun i pas long en.” Olsem na sapos sol i lusim pait bilong en, “bikpela hap pipia bilong graun samting” bai i stap yet long en. Em i tok: ‘Dispela i no gutpela sol bilong mekim wok long en; em i bilong putim long rot bilong ol man i ken wokabaut antap long en.’

Taim ol Kristen i bihainim dispela tok lukaut, ol i mas was gut, nogut ol i lusim wok autim tok na kirap bihainim ol pasin bilong dispela graun. Sapos ol i no was gut, ol bai bagarap long ol samting bilong spirit na ol i no inap mekim gutpela wok moa, olsem ‘sol i bin lusim pait bilong en.’