Long rot bilong Kingdom bilong Jehova, klostu nau em bai pinisim olgeta hevi bilong yumi. Dispela nius em gutpela nius na olgeta man i mas harim. Jisas i laik bai ol disaipel bilong em i autim dispela tok long olgeta man! (Matyu 28:19, 20) Ol Witnes Bilong Jehova i mekim wanem bilong bihainim tok bilong Jisas?

1. Olsem wanem tok bilong Matyu 24:14 i kamap tru long nau?

Jisas i tok profet olsem: “Ol bai autim dispela gutnius bilong Kingdom long olgeta hap bilong graun.” (Matyu 24:14) Ol Witnes Bilong Jehova i amamas long dispela bikpela wok. Mipela i autim gutnius long olgeta hap bilong graun long winim 1,000 tokples! Bilong mekim dispela bikpela wok, mipela i mas lusim taim, strong, na oganaisim gut ol samting. Na Jehova i helpim mipela long mekim dispela wok.

2. Mipela i mekim wanem ol samting bilong autim tok long ol man?

Mipela i autim tok long olgeta hap we mipela i bungim ol man. Olsem ol Kristen long taim bilong ol aposel, mipela i autim tok long “olgeta wan wan haus.” (Aposel 5:42) Dispela kain pasin bilong autim tok i mekim na long olgeta yia mipela i save bungim planti milion manmeri. Planti man i no save stap long haus, olsem na mipela i save autim tok tu long ol pablik ples. Olgeta taim mipela i save painim rot long tokim ol man long Jehova na ol samting em i tingting pinis long mekim.

3. Em wok bilong husat long autim gutnius?

Wok bilong autim gutnius long ol narapela, em wok olgeta Kristen i mas mekim. Mipela i tingim dispela wok i bikpela samting. Mipela i laik autim tok long olgeta man bikos dispela wok bai helpim ol long kisim laip. (Ritim 1 Timoti 4:16.) Mipela i no kisim pe long dispela wok bikos Baibel i tok: “Yupela i kisim fri, olsem na yupela i mas givim fri.” (Matyu 10:7, 8) I no olgeta man bai harim tok mipela i autim. Tasol mipela i wok yet long autim tok, long wanem, em hap wok lotu bilong mipela na dispela i mekim Jehova i amamas.

KISIM SAMPELA SAVE MOA

4. Mipela i wok strong long autim tok long olgeta man

VIDIO: Autim Tok “i Go Inap Long Olgeta Hap Bilong Graun” (7:33)

• Yu pilim olsem wanem long bikpela wok ol Witnes Bilong Jehova i mekim long autim tok?

Ritim Matyu 22:39 na Rom 10:13-15, na stori long ol dispela askim:

• Olsem wanem wok autim tok bilong mipela i soim olsem mipela i laikim ol narapela man?

• Jehova i pilim olsem wanem long ol man em ol i autim gutnius?—Lukim ves 15.

5. Mipela ol wanwok bilong God

Planti ekspiriens i soim olsem Jehova i stiaim wok bilong mipela. Olsem, long Nu Silan wanpela brata nem bilong em Paul i bungim wanpela meri taim em i autim tok long ol haus long wanpela apinun. Long dispela moning, meri i bin beten long God na kolim nem bilong God, em Jehova, na askim em long salim wanpela i kam lukim em. Paul i tok: “Tripela aua bihain mi go kamap long haus bilong em.”

Ritim 1 Korin 3:9, na stori long dispela askim:

• Olsem wanem ol ekspiriens kain olsem dispela bilong Nu Silan i soim olsem Jehova i stiaim wok bilong autim tok?

Ritim Aposel 1:8, na stori long dispela askim:

• Wai na mipela i nidim helpim bilong Jehova bilong inapim dispela wok bilong autim tok?

Yu save long dispela?

Long ol miting bilong mipela namel long wik, mipela i save kisim skul bilong helpim mipela long mekim wok bilong autim tok. Sapos yu bin kam long ol dispela miting, yu ting olsem wanem long dispela skul?

6. Mipela i bihainim tok bilong God long autim tok

Long taim bilong ol aposel, ol birua i traim long stopim ol disaipel bilong Jisas long autim tok. Ol Kristen bilong pastaim i sambai long raits bilong ol long autim tok “long rot bilong kot.” (Filipai 1:7) Ol Witnes Bilong Jehova i mekim wankain pasin long nau.a

VIDIO: Go Long Kot Bilong Difendim Gutnius (2:28)

Ritim Aposel 5:27-42, na stori long dispela askim:

• Wai na mipela i no stop long autim tok?—Lukim ves 29, 38, na 39.

OL BIKPELA POIN

Jisas i tokim ol disaipel bilong em long autim gutnius long olgeta lain man. Jehova i helpim lain bilong em long mekim dispela wok.

Riviu

• Husat i autim gutnius long olgeta hap?

• Olsem wanem wok bilong mipela long autim tok i soim olsem mipela i laikim ol narapela man?

• Yu ting wok bilong autim tok inap mekim yumi amamas? Bilong wanem?

MEKIM WOK PAINIMAUT

Lukim hau ol Witnes Bilong Jehova i autim tok long ol bikpela siti.

Wok Autim Tok Long Ol Pablik Ples Long Paris (5:11)

Olsem wanem ol Witnes Bilong Jehova i autim tok long ol refiuji?

Inapim Laik Bilong Ol Refiuji Long Kisim Save Long God (5:59)

Harim stori bilong wanpela meri i kisim amamas long insait long wok bilong autim tok fultaim.

Mi Amamas Olsem Mi Makim Dispela Wok (6:29)

Kisim save long sampela disisen we kot i mekim na dispela i helpim wok bilong autim gutnius.

“Kingdom Preachers Take Their Case to Court” (God’s Kingdom Rules!, chapter 13)

Jisas i tok olgeta Kristen i mas kisim baptais. (Ritim Matyu 28:19, 20.) Tasol baptais i makim wanem samting? Na man i mas mekim wanem bilong winim dispela mak?

1. Baptais i makim wanem samting?

Dispela tok “baptais” i kam long wanpela tok Grik, mining bilong en “putim i go insait” long wara. Taim Jon i baptaisim Jisas, em i putim Jisas i go insait long Wara Jordan, na bihain Jisas i “lusim wara na i kam antap.” (Mak 1:9, 10) Olsem tasol taim ol Kristen tru i kisim baptais, ol i putim ol i go insait tru long wara.

2. Taim man i kisim baptais, dispela i kamapim klia wanem samting?

Taim man i baptais, em i soim olsem em i dediket pinis long Jehova God. Olsem wanem man i dediket? Paslain long man i baptais, em yet i beten na tokim Jehova olsem em i laik mekim wok bilong Em inap oltaim. Em i tok promis long lotuim Jehova wanpela tasol na em bai putim laik bilong God i stap nambawan long laip bilong em. Em i “givim baksait long ol laik bilong em yet . . . na bihainim” tok na pasin bilong Jisas. (Matyu 16:24) Taim em i dediket na kisim baptais, dispela i opim rot long em i pas gut wantaim Jehova na ol wanbilip.

3. Man i mas mekim wanem paslain long em i kisim baptais?

Paslain long yu baptais yu mas kisim save long Jehova na strongim bilip bilong yu long em. (Ritim Hibru 11:6.) Taim save na bilip bilong yu i kamap strong, pasin bilong yu long laikim Jehova tu bai i go bikpela. Yu bai gat laik long tokim ol narapela long em na bihainim ol lo bilong em long laip bilong yu. (2 Timoti 4:2; 1 Jon 5:3) Taim man i ‘wokabaut long pasin tru bilong [“Jehova,” NWT],’ em bai i gat laik long dediketim laip bilong em long God na kisim baptais.—Kolosi 1:9, 10, BB.a

KISIM SAMPELA SAVE MOA

4. Samting yumi lainim long baptais bilong Jisas

Ritim Matyu 3:13-17 bilong kisim sampela save moa long baptais bilong Jisas. Na stori long ol dispela askim:

• Yu ting Jisas i kisim baptais taim em i bebi?

• Em i baptais olsem wanem? Ol i bin kapsaitim liklik wara long het bilong em?

Taim Jisas i baptais pinis, em i kirap long mekim dispela bikpela wok God i givim long em. Ritim Luk 3:21-23 na Jon 6:38, na stori long dispela askim:

• Bihain long Jisas i baptais, em i putim wanem wok i stap nambawan samting long laip bilong em?

5. Yu inap winim mak bilong kisim baptais

Pastaim taim yu tingim dediket na baptais ating yu pret. Tasol taim yu stadi i go na kamap strong long bilip yu inap pilim olsem yu redi long wokim dispela bikpela disisen. Bilong lukim sampela i bin mekim olsem, pilaim VIDIO.

VIDIO: Rot Bilong Kamap Pren Bilong Jehova (1:11)

Ritim Jon 17:3 na Jems 1:5, na stori long dispela askim:

• Wanem samting inap helpim man long redi long kisim baptais?

1. Yumi dediket long Jehova, taim yumi beten na tokim em olsem yumi laik mekim wok bilong em oltaim

2. Taim yumi kisim baptais, yumi soim olgeta man olsem yumi dediket long God

6. Taim yumi kisim baptais yumi insait long famili bilong Jehova

Taim yumi kisim baptais, yumi insait long wanpela famili i stap wanbel long olgeta hap bilong graun. Maski yumi bilong kain kain hap na bekgraun, yumi olgeta i gat wankain bilip, na bihainim ol wankain stretpela lo bilong Baibel. Ritim Buk Song 25:14 na 1 Pita 2:17, na stori long dispela askim:

• Baptais i mekim wanem long pasin pren bilong man wantaim Jehova na ol narapela i lotuim Em?

OL BIKPELA POIN

Jisas i tok olgeta Kristen i mas kisim baptais. Bilong winim dispela mak, man i mas strongim bilip bilong em long Jehova, bihainim ol lo bilong Em, na dediket long Em.

Riviu

• Baptais i makim wanem samting? Na bilong wanem em i bikpela samting?

• Olsem wanem dediket na baptais i poroman wantaim?

• Man i mas mekim wanem ol samting paslain long em i dediket na kisim baptais?

MEKIM WOK PAINIMAUT

Kisim save long baptais i makim wanem samting na em i no makim wanem samting?

“Baptais i Makim Wanem Samting?” (Atikol long websait)

Skelim ol samting man inap mekim na em i ken kisim baptais.

“Laikim na Tenkim Jehova—Dispela Bai Kirapim Yu Long Kisim Baptais” (Wastaua, Mas 2020)

Ritim stori bilong wanpela man i wokim disisen long kisim baptais na bel i no kirapim em nating long mekim.

“Ol i Laik Mi Yet i Mas Save Gut Long Tok i Tru” (Wastaua, Februeri 1, 2013)

Skelim wai na baptais em gutpela mak long winim, na wanem ol samting yu ken mekim bilong redi long kisim baptais.

“Mi Mas Kisim Baptais?” (Atikol long jw.org/tpi)