JISAS i wok long lainim ol disaipel bilong em long pasin bilong autim tok na bihain em i tokim ol, ol i mas lukaut long ol birua. Em i tok: “Harim. Mi salim yupela i go olsem ol sipsip i go namel long ol weldok. . . . Yupela lukaut long ol man. Ol bai i kotim yupela long ol kaunsil bilong ol, na ol bai i wipim yupela insait long ol haus lotu bilong ol. Ol bai i ting long daunim mi, na pulim yupela i go long ol gavman na ol king.”

Tru Jisas i bin givim dispela toksave long ol 12-pela aposel bilong em na em i bin givim tok long ol bilong lainim ol na strongim ol, tasol ol dispela tok em bilong ol manmeri bihain bai ol i autim tok long olgeta hap bilong graun taim em i dai na kirap bek pinis. Yumi inap save long dispela samting, long wanem em i tok, “olgeta man bai i bel nogut tru long yupela,” i no ol Israel tasol, em ol aposel i bin autim tok long ol. Taim ol aposel i mekim liklik raun bilong ol bilong autim tok, ol man i no bin pulim ol i go long ol gavman na ol king. Na tu, long dispela taim famili bilong ol bilipman i no bin kotim ol na tokim kot long kilim ol i dai.