‘Stap Wokboi Bilong Bosman, Em Krais’
KIRAP long bipo yet, planti milion manmeri i bin karim hevi bilong i stap wokboi nating. Olsem: Planti tausen yia i go pinis, ol Israel i bin kisim nogut tru long han bilong ol bosman bilong Isip. Olsem Baibel i tok: “Ol Isip i givim wok long ol bosman bilong hatim ol Israel long wok bai ol i mekim ol Israel i wok hat tru.” Ol i mekim moa yet long taim ol i wokim ol brik.—Kisim Bek 1:11.
Long planti kantri long nau, ol man i no stap wokboi nating olsem, nogat, tasol planti man i mas mekim bikpela hatwok inap planti aua moa, na sampela taim ol i mas wok long taim nogut tu. Ol i karim bikpela hevi tru olsem man i wok kalabus, bambai ol i ken kisim liklik mani kago samting.
Tasol i gat wanpela kain pasin bilong stap wokboi, na em i no givim hevi long yumi. Aposel Pol i tokim ol wanbilip bilong em olsem: ‘Stap wokboi bilong Krais.’ (Kolosi 3:24) Ol man i stap wokboi bilong Krais, ol bai i kisim malolo long hevi ol i karim. Jisas yet i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. . . . Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo. Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.”—Matyu 11:28-30.
Taim yumi stap wokboi bilong Krais, i no olsem yumi no gat wok long lukautim famili bilong yumi long ol samting bilong skin, nogat. (1 Timoti 5:8) Tasol dispela i helpim yumi na yumi no tingting tumas long kisim planti samting bilong skin i save kalabusim yumi. Ol Kristen i no tingting tumas long kisim planti samting bilong skin, tasol ol i amamas long ol i gat ol samting ol i mas kisim bilong lukautim ol.—1 Timoti 6:6-10; skelim wantaim 1 Korin 7:31.
Ol Kristen i save kisim amamas taim ol i mekim wok bilong ol long “autim gutnius” bilong Kingdom bilong God. (Matyu 24:14) Dispela i givim amamas tru long ol na ol i stap belgut!
Yumi mas tenkyu long yumi “stap ol wokboi bilong Krais, . . . em i Bosman tru” bilong yumi!
[Piksa Kredit Lain long pes 32]
Pictorial Archive (Near Eastern History) Est.