MAN bilong raitim hap bilong Baibel yumi kolim Gutnius Luk i raitim, em i man bilong tingting gut na bel sori, na spirit bilong God i stiaim em, olsem na em i raitim stret ol samting i bin kamap, na taim yumi ritim, bel bilong yumi i pilim tru. Long kirap bilong sapta 1, em i tok: “Mi bin wok longpela taim long askim gut long as bilong dispela olgeta samting. Nau mi raitim stret tasol, olsem ol dispela samting i bin kamap.” Tru tumas, em i stori gut long olgeta liklik liklik samting olsem em i bin tok long mekim.​—⁠Lu. 1:⁠3.

⁴ Wanem taim Luk i raitim dispela Gutnius bilong em? Aposel 1:1 i makim olsem man i bin raitim Buk Aposel (em Luk tasol) pastaim em i bin raitim stori bilong Jisas. Yumi ken save, Luk i raitim pinis Buk Aposel long yia 61 C.E., taim em i stap wantaim Pol long Rom na Pol i wetim Sisar i harim kot bilong em. Olsem na Luk i bin raitim Gutnius long Sisaria namel long yia 56 na yia 58 C.E., long taim Pol i mekim pinis namba 3 raun bilong em bilong autim gutnius na tupela i lusim Filipai na i kam bek, na Pol i kalabus long Sisaria inap tupela yia na wetim ol i kisim em i go kot long Rom. Long dispela taim Luk i stap long Palestain na em inap tru long ‘askim gut ol man long as bilong dispela olgeta samting i bin kamap’ na raitim stret stori bilong i stap na wok bilong Jisas. Olsem na yumi ken ting Luk i raitim Gutnius bilong em paslain long Mak.

⁵ Luk i no bin lukim olgeta samting em i stori long en long Gutnius em i bin raitim, long wanem, em i no wanpela bilong ol 12-pela aposel​—⁠ating em i kamap Kristen bihain long taim Jisas i dai. Tasol em i poromanim Pol long mekim wok misineri. (2 Ti. 4:11; Fm. 24) Olsem na yumi save Pol i bin givim sampela tingting long Luk na dispela i kamap klia long stori Luk i raitim. Yumi ken save long dispela samting taim yumi skelim stori bilong Luk long Kaikai Bilong Bikpela long Luk 22:​19, 20, wantaim stori bilong Pol long 1 Korin 11:​23-​25. Na bilong kisim sampela save moa, Luk inap lukim Gutnius Matyu i raitim. Na bilong kisim gut save long ‘as bilong olgeta samting i bin kamap,’ em inap askim planti man i bin lukim long ai bilong ol yet ol samting Jisas i mekim, olsem ol disaipel i stap yet na ating mama bilong Jisas tu, em Maria. Yumi save, Luk i bihainim olgeta rot i op long em bambai em inap kisim ol dispela save na raitim stret stori bilong gutnius.