‘Tok Tru Em Wanem Samting Tru?’

GAVENA Pontius Pailat bilong Rom i mekim dispela askim long Jisas long pasin i makim olsem i no gat rot long save long tok i tru. Em i no gat laik long save long bekim bilong dispela askim, na Jisas i no givim wanpela bekim. Ating Pailat i ting tok i tru em i samting yumi no inap kliagut long en.​—Jon 18:38.

Planti man long nau, ol bikman bilong lotu, ol tisa, na ol man politik, ol i gat dispela kain tingting long tok i tru. Ol i ting tok i tru​—olsem ol samting bilong stretpela pasin na ol samting bilong lotu​—em i no klia olgeta na i save senis senis long olgeta taim. Dispela tingting i makim olsem ol man yet i ken makim wanem pasin i stret na wanem pasin i no stret. (Aisaia 5:​20, 21) Em i givim rot tu long ol man long tok olsem ol lo long stretpela pasin ol man i bin bihainim long bipo, ol i no stret moa long taim bilong yumi.

Em i gutpela long tingim dispela tok Jisas i bin mekim na i kirapim Pailat long mekim dispela askim. Jisas i tok: “Mama i karim mi na mi kam long dispela graun bilong mekim wanpela wok tasol, em bilong autim tok tru.” (Jon 18:37) Jisas i no ting tok i tru em i wanpela samting em man i no inap kliagut long en. Em i tok promis long ol disaipel olsem: “Yupela bai i save long tok tru, na tok tru bai i mekim yupela i kamap fri.”​—Jon 8:32.

Yumi ken painim we kain tok i tru olsem? Wanpela taim Jisas i beten na i tokim God olsem: “Tok bilong yu i tru olgeta.” (Jon 17:17) Spirit bilong God i bin kirapim ol man long raitim Baibel, em i kamapim ol tok bilong stiaim yumi em yumi inap bilip tru long en na i helpim yumi long bilip na wetim gutpela samting bai kamap bihain​—em laip i stap gut oltaim oltaim.​—2 Timoti 3:​15-​17.

Pailat i gat rot long kisim save long tok i tru, tasol em i sakim. Olsem wanem long yu? Yu ken askim ol Witnes Bilong Jehova long dispela “tok tru” em Jisas i lainim ol man long en, em i wanem samting? Ol bai amamas long stori wantaim yu long dispela tok tru.