Pasin Bilong i No Insait Long Ol Samting Bilong Dispela Graun i Makim Wanem?

Jisas i skulim ol disaipel bilong em olsem ol “i no insait long ol samting bilong dispela graun.” (Jon 15:19) Dispela i makim olsem yumi no ken insait long ol wok politik na ol woa samting bilong dispela graun. Tru, em i no isi long mekim olsem. Ating ol man bai tok bilas long yumi bikos yumi no insait long ol dispela samting. Hau yumi ken stap longwe long ol samting bilong dispela graun na stap gut yet long Jehova God?

1. Ol Kristen tru i gat wanem tingting long ol gavman bilong ol man?

Ol Kristen i save rispektim ol gavman. Mipela i bihainim tok bilong Jisas na givim “ol samting bilong Sisar . . . long Sisar”​—dispela i makim olsem mipela i bihainim ol lo bilong kantri, olsem mipela i baim ol takis em gavman i askim long en. (Mak 12:17) Baibel i skulim mipela olsem ol gavman bilong ol man i stap bikos Jehova i larim ol long mekim wok bos. (Rom 13:1) So mipela i luksave olsem wok bos bilong ol gavman i gat mak bilong em, na i aninit moa long wok bos bilong God. Mipela i wet long God bilong mipela na Kingdom bilong em long heven long stretim olgeta hevi bilong ol man.

2. Hau yumi ken soim olsem yumi no insait long ol samting bilong dispela graun?

Olsem Jisas, yumi no insait long ol wok politik. Taim ol manmeri i lukim ol mirakel bilong Jisas na traim long mekim em i kamap king bilong ol long graun, em i no larim ol. (Jon 6:15) Bilong wanem? Bikos bihain em i tok, “Kingdom bilong mi i no bilong dispela graun.” (Jon 18:36) Yumi disaipel bilong Jisas, olsem na yumi soim olsem yumi no insait long ol samting bilong dispela graun. Olsem, yumi no insait long woa. (Ritim Maika 4:3.) Yumi rispektim ol bikpela mak bilong kantri​—olsem fleg​—tasol yumi no salutim bikos em i wankain olsem pasin bilong lotuim fleg. (1 Jon 5:21) Na yumi no save sapotim o agensim wanpela sait bilong wanpela politikol pati o kendidet. Long ol dispela samting na ol narapela samting, yumi soim olsem yumi stap gut long gavman bilong God​—Kingdom bilong em.

KISIM SAMPELA SAVE MOA

3. Ol Kristen tru i no insait long ol samting bilong dispela graun

Jisas na ol disaipel bilong em i stap gutpela eksampel bilong yumi. Ritim Rom 13:1, 5-7 na 1 Pita 2:13, 14. Na pilaim VIDIO na stori long ol dispela askim.

VIDIO: Ol Kristen Tru i No Insait Long Ol Samting Bilong Dispela Graun​—Hap 1 (4:28)

• Wai na yumi mas soim rispek long ol gavman?

• Wanem sampela rot yumi ken soim olsem yumi daun long ol?

Long taim bilong woa, ating sampela kantri bai tok ol i no insait long dispela woa, tasol ol i givim ol samting bilong helpim ol lain i insait long dispela woa. Pasin bilong i no insait long ol samting bilong dispela graun i makim wanem samting? Ritim Jon 17:16. Na pilaim VIDIO na stori long dispela askim.

VIDIO: Ol Kristen Tru i No Insait Long Ol Samting Bilong Dispela Graun​—Hap 2 (3:11)

• Pasin bilong i no insait long ol samting bilong dispela graun i makim wanem?

Olsem wanem sapos gavman i tokim yumi long mekim samting we i pait wantaim lo bilong God? Ritim Aposel 5:28, 29. Na pilaim VIDIO na stori long ol dispela askim.

VIDIO: Ol Kristen Tru i No Insait Long Ol Samting Bilong Dispela Graun​—Hap 3 (1:18)

• Sapos lo bilong ol man na lo bilong God i pait wantaim, bai yumi bihainim lo bilong husat?

• Yu inap tingim sampela samting inap kamap we ol Kristen i no ken bihainim tok bilong ol gavman?

4. Long tingting na long pasin bilong yumi tu, yumi no ken insait long ol samting bilong dispela graun

Ritim 1 Jon 5:21. Na pilaim VIDIO na stori long ol dispela askim.

VIDIO: Wai na Ol Kristen Tru i Mas Strongim Bel​—Long i No Insait Long Wok Politik (2:49)

• Long vidio, wai na Ayenge i no sapotim politikol pati o i no insait long bung bilong litimapim kantri, olsem salutim fleg?

• Yu ting em i mekim gutpela disisen?

Wanem ol narapela samting inap traim pasin bilong yumi long i no insait long ol samting bilong graun? Pilaim VIDIO, na stori long ol dispela askim.

VIDIO: Skul Yumi Kisim Long Wastaua​—Stap Narapela Kain Maski Ol Lain i Bruk (5:16)

• Hau bai yumi soim olsem yumi stap narapela kain taim ol tim bilong ol kantri i salens long ol spot?

• Sapos sampela disisen bilong lain politik i mekim sampela samting long yumi, hau bai yumi soim olsem yumi stap narapela kain?

• Ol nius ripot o ol poroman bilong yumi inap mekim wanem long pasin bilong yumi long i no insait long ol samting bilong graun?

OL BIKPELA POIN

Long tingting, toktok, na pasin bilong ol, ol Kristen i wok strong long i no sapotim wok politik.

Riviu

• Yumi mas givim wanem samting long ol gavman?

• Wai na yumi no insait long ol samting bilong wok politik?

• Wanem ol samting inap kamap na i traim pasin bilong yumi long i no insait long ol samting bilong dispela graun?

MEKIM WOK PAINIMAUT

Wanem sampela samting yumi mas lusim na bai yumi no insait long ol samting bilong graun?

Jehova i No Lusim Mipela (3:14)

Ol famili i ken mekim wanem paslain long ol samting i kamap we inap traim pasin bilong ol long i no insait long ol samting bilong graun?

Stap Narapela Kain Long Ol Bikpela Bung (4:25)

Wai na pasin bilong difendim kantri i no wanpela wok i givim biknem long man?

“God Inap Mekim Olgeta Samting” (5:19)

Skelim ol samting yu mekim na yu no insait long ol samting bilong dispela graun taim yu mekim ol disisen bilong yu long wok mani.

‘Olgeta Man Wan Wan Bai i Karim Hevi Bilong Ol Yet’ (Wastaua, Mas 15, 2006)

I no longtaim na ol man bai birua na mekim nogut long olgeta Kristen. Yu ting dispela i mas mekim yumi pret?

1. Hau na yumi save olsem ol man bai mekim nogut long yumi?

Baibel i tok: “Olgeta man husat i laik bihainim pasin bilong givim bel tru long God olsem ol disaipel bilong Krais Jisas, ol man bai mekim nogut long ol tu.” (2 Timoti 3:12) Ol man i mekim nogut long Jisas, long wanem, em i no insait long ol samting bilong dispela graun bilong Satan. Yumi tu i no insait long ol samting bilong dispela graun, olsem na yumi no kirap nogut taim ol gavman bilong dispela graun na ol lotu i mekim nogut long yumi.​—Jon 15:18, 19.

2. Olsem wanem yumi ken redi long ol man bai mekim nogut long yumi?

Long nau yumi mas strongim pasin bilong yumi long trastim Jehova. Yumi mas lusim haptaim long olgeta de long beten long em na ritim Baibel. Oltaim go long ol miting. Ol dispela samting bai givim yu strong yu nidim bilong sanap strong taim ol man, na tu, ol famili bilong yu i mekim nogut long yu. Aposel Pol, em planti taim ol man i bin mekim nogut long em, em i tok: “Jehova em i helpim bilong mi; mi no inap pret.”​—Hibru 13:6.

Yumi inap strongim tu pasin bilong yumi long i gat strongpela bel long rot bilong autim tok long olgeta taim. Wok bilong autim tok i skulim yumi long trastim Jehova na daunim pasin bilong pret long ol man. (Provep 29:25) Long nau sapos yu kisim pasin bilong strongim bel na autim tok, yu bai redi long autim tok yet maski gavman i putim tambu long wok bilong yumi.​—1 Tesalonaika 2:2.

3. Taim yumi sanap strong long taim ol man i mekim nogut long yumi, olsem wanem dispela bai helpim yumi?

Tru, yumi no amamas taim ol man i mekim nogut long yumi, tasol taim yumi sanap strong na karim hevi, bilip bilong yumi bai kamap strong moa. Yumi bai go klostu moa long Jehova, long wanem, yumi lukim em i helpim yumi taim yumi pilim olsem yumi no gat strong olgeta. (Ritim Jems 1:2-4.) Jehova i save bel hevi taim em i lukim yumi karim hevi, tasol em i save amamas taim em i lukim yumi sanap strong na karim hevi. Baibel i tok: “Sapos yupela i mekim gutpela pasin na yupela i karim pen long dispela, orait God i save amamas long dispela.” (1 Pita 2:20) Pe Jehova bai givim long olgeta man i sanap strong na karim hevi em laip oltaim long nupela taim we i no gat ol man i birua long lotu i tru.​—Matyu 24:13.

KISIM SAMPELA SAVE MOA

4. Yu inap long sanap strong taim ol famili i birua long yu

Jisas i save olsem ol famili bilong yumi i no inap sapotim yumi long disisen bilong yumi long lotuim Jehova. Ritim Matyu 10:34-36, na stori long dispela askim:

• Wanem samting inap kamap taim wanpela long famili i kirap lotuim Jehova?

VIDIO: Jehova i Lukautim Mipela (5:13)

• Yu bai mekim wanem sapos wanpela wanblut o pren bilong yu i traim long stopim yu long lotuim Jehova?

Ritim Buk Song 27:10 na Mak 10:29, 30. Taim yupela ritim wan wan skripsa pinis, stori long dispela askim:

• Olsem wanem dispela tok promis inap helpim yu sapos ol famili o ol pren bilong yu i birua long yu?

5. Wok yet long lotuim Jehova maski ol man i mekim nogut long yu

VIDIO: Ol i Soim Olsem Ol i Gat Strongpela Bel Maski Ol Man i Mekim Nogut Long Ol (6:27)

• Pasin bilong ol manmeri long dispela vidio i strongim yu olsem wanem?

Ritim Aposel 5:27-29 na Hibru 10:24, 25. Taim yupela i ritim wan wan skripsa pinis, stori long dispela askim:

• Wai na em i bikpela samting long yumi lotuim yet Jehova maski sapos gavman i putim tambu long wok autim o ol miting bilong yumi?

6. Jehova bai helpim yu long sanap strong na karim hevi

VIDIO: Jehova God Bai Strongim Mi (3:40)

• Long dispela vidio, wanem samting i helpim ol dispela Witnes long sanap strong na karim hevi?

Ritim Rom 8:35, 37-39 na Filipai 4:13. Taim yupela ritim wan wan skripsa pinis, stori long dispela askim:

• Olsem wanem dispela skripsa i mekim gut bel bilong yu olsem yu inap sanap strong na karim wanem wanem traim i painim yu?

Ritim Matyu 5:10-12, na stori long dispela askim:

• Wai na yu ken stap amamas maski ol man i mekim nogut long yu?

OL BIKPELA POIN

Jehova i pilim tru ol samting yumi mekim bilong lotuim em maski ol man i mekim nogut long yumi. Em bai helpim yumi long sanap strong na karim hevi!

Riviu

• Wai na ol Kristen i mas save olsem ol man bai mekim nogut long ol?

• Long nau yu ken mekim wanem bilong redi long taim ol man i mekim nogut long yu?

• Wanem samting i ken helpim yu long bilip tru olsem yu inap long lotuim Jehova maski wanem wanem traim i painim yu?

MEKIM WOK PAINIMAUT

Lukim wanpela yangpela brata i stori long olsem wanem Jehova i helpim em long sanap strong taim ol i kalabusim em bikos em i no laik joinim ami.

Mi Sanap Strong na Karim Hevi Maski Ol i Mekim Nogut Long Mi (2:34)

Skelim wanem samting i helpim tupela marit long mekim yet wok bilong Jehova inap planti yia maski i gat pasin birua.

Mekim Yet Wok Bilong Jehova Long Taim Bilong Planti Senis (7:11)

Kisim save long olsem wanem yu inap strongim bel taim ol man i mekim nogut long yu.

“Redi Nau Long Ol Birua i Mekim Nogut Long Yumi” (Wastaua, Julai 2019)

Yumi mas i gat wanem tingting taim ol famili i birua long yumi? Na yumi ken mekim wanem bilong i stap bel isi wantaim ol na stap gut yet long Jehova?

“Tok i Tru i ‘No Kamapim Bel Isi, Em i Bringim Bainat i Kam’” (Wastaua, Oktoba 2017)