Kingdom Bilong God em i bikpela astok bilong Baibel. Jehova bai yusim Kingdom bilong mekim ol samting em i tingting pinis long mekim long pastaim long dispela graun. Kingdom em i wanem samting? Olsem wanem yumi save em i mekim wok long nau? Em i mekim pinis wanem ol samting? Na em bai mekim wanem long bihain? Dispela lesen na tupela neks lesen bai bekim ol dispela askim.

1. Kingdom Bilong God em i wanem samting, na husat i stap King bilong en?

Kingdom em i wanpela gavman em Jehova God i kamapim. King bilong en, Jisas Krais, em i mekim wok king long heven. (Matyu 4:17; Jon 18:36) Baibel i tok long Jisas olsem: “Em bai stap King . . . inap oltaim oltaim.” (Luk 1:32, 33) Jisas em i King bilong Kingdom Bilong God, so em bai bosim olgeta man long graun.

2. Husat bai mekim wok king wantaim Jisas?

Jisas wanpela tasol i no inap mekim wok king. Wan wan man na meri bilong ‘olgeta traib, tokples, lain pipol, na kantri bai stap king na bosim graun.’ (Revelesen 5:9, 10) Hamas manmeri bai wok king wantaim Krais? Taim Jisas i kam long graun, planti milion Kristen i kamap disaipel bilong em. Tasol 144,000 tasol bai go long heven bilong wok king wantaim Jisas. (Ritim Revelesen 14:1-4.) Olgeta narapela Kristen bai stap long graun aninit long Kingdom.—Buk Song 37:29.

3. Olsem wanem Kingdom Bilong God i winim ol gavman bilong ol man?

Tru ol lida i traim bes long mekim ol gutpela samting, tasol ol i no gat strong long mekim olgeta samting ol i laik. Bihain ol narapela lida i senisim ol, ol i no mekim ol samting bilong helpim lain bilong ol. Tasol i no gat wanpela man bai senisim Jisas, em King bilong Kingdom Bilong God. God i bin “kamapim wanpela kingdom we i no inap bagarap.” (Daniel 2:44) Jisas bai bosim graun olgeta, na em bai no inap mekim wansait pasin. Em i gat pasin laikim, pasin helpim, pasin i fea, na em bai skulim ol man long mekim wankain pasin long narapela narapela—ol bai mekim pasin laikim, pasin helpim, na pasin i fea.—Ritim Aisaia 11:9.

4. Wanpela strongpela gavman bai bosim graun olgeta

Jisas Krais i gat bikpela strong moa long bosim ol man, winim ol narapela lida long bipo yet na i kam. Ritim Matyu 28:18, na stori long dispela askim:

• Olsem wanem namba Jisas i holim i winim tru namba bilong ol lida bilong graun?

Ol gavman bilong ol man i save senis senis, na wan wan i save bosim wanpela hap tasol bilong graun. Olsem wanem long Kingdom Bilong God? Ritim Daniel 7:14, na stori long ol dispela askim:

• Bilong wanem i gutpela olsem Kingdom Bilong God bai “i no inap bagarap”?

• Bilong wanem i gutpela olsem em bai bosim graun olgeta?

5. I mas i gat senis bilong ol gavman bilong ol man

Wai na Kingdom Bilong God i mas senisim ol gavman bilong ol man? Pilaim VIDIO, na stori long dispela askim.

VIDIO: Kingdom Bilong God Em i Wanem Samting?—Hap Bilong En (1:41)

• Wanem samting i kamap long wok bos bilong ol man?

Ritim Eklisiastis 8:9, na stori long ol dispela askim:

• Yu ting Kingdom Bilong God i mas senisim ol gavman bilong ol man? Wai na yu tok olsem?

6. Kingdom Bilong God i gat ol lida em ol i kliagut long yumi

King bilong yumi, Jisas, i bin stap olsem man long graun, olsem na em inap “pilim tru ol samting i save traim yumi.” (Hibru 4:15) Dispela 144,000 man na meri bai wok king wantaim Jisas em Jehova yet i kisim ol namel ‘long olgeta traib, tokples, lain pipol, na olgeta kantri.’—Revelesen 5:9.

• Bel bilong yu i stap isi taim yu save olsem Jisas na lain i wok king wantaim em ol i bin stap olsem ol man long graun? Bilong wanem?

7. Ol lo bilong Kingdom Bilong God i gutpela moa

Ol gavman i save putim ol lo bilong helpim na lukautim ol manmeri i stap aninit long ol. Kingdom Bilong God tu i gat ol lo bilong ol manmeri i stap aninit long en i mas bihainim. Ritim 1 Korin 6:9-11, na stori long ol dispela askim:

• Yu ting graun bai stap olsem wanem sapos olgeta man i bihainim ol lo bilong God?a

• Yu ting i stret Jehova i laik bai ol man i stap aninit long Kingdom i rispektim ol dispela lo? Bilong wanem?

• Wanem samting i soim olsem ol manmeri i no bin bihainim ol dispela lo, ol inap senisim pasin bilong ol?—Lukim ves 11.

OL BIKPELA POIN

Kingdom Bilong God em i wanpela gavman tru i stap long heven na em bai bosim graun olgeta.

Riviu

• Husat ol bai stap king long Kingdom Bilong God?

• Olsem wanem Kingdom Bilong God i gutpela moa winim ol gavman bilong ol man?

• Wanem sampela samting em Jehova i laik ol man i stap aninit long Kingdom i mekim?

MEKIM WOK PAINIMAUT

Skelim tok Jisas i mekim long ples we Kingdom bai stap long en.

“Yu Ting Kingdom Bilong God i Stap Long Bel Bilong Yu?” (Atikol long websait)

Wai na ol Witnes Bilong Jehova i mekim disisen long stap gut long Kingdom Bilong God winim ol gavman bilong ol man?

Givim Bel Tru Long Kingdom Bilong God (1:43)

Skelim tok Baibel i mekim long 144,000 em Jehova i makim bilong wok king wantaim Jisas.

“Husat Bai Go Long Heven?” (Atikol long websait)

Wanem samting i mekim na wanpela meri i stap long kalabus i bilip olsem God tasol bai stretim olgeta samting long graun?

“How I Found the Answer to Injustice” (Awake!, November 2011)

Jisas i skulim ol disaipel bilong em olsem ol “i no insait long ol samting bilong dispela graun.” (Jon 15:19) Dispela i makim olsem yumi no ken insait long ol wok politik na ol woa samting bilong dispela graun. Tru, em i no isi long mekim olsem. Ating ol man bai tok bilas long yumi bikos yumi no insait long ol dispela samting. Hau yumi ken stap longwe long ol samting bilong dispela graun na stap gut yet long Jehova God?

1. Ol Kristen tru i gat wanem tingting long ol gavman bilong ol man?

Ol Kristen i save rispektim ol gavman. Mipela i bihainim tok bilong Jisas na givim “ol samting bilong Sisar . . . long Sisar”​—dispela i makim olsem mipela i bihainim ol lo bilong kantri, olsem mipela i baim ol takis em gavman i askim long en. (Mak 12:17) Baibel i skulim mipela olsem ol gavman bilong ol man i stap bikos Jehova i larim ol long mekim wok bos. (Rom 13:1) So mipela i luksave olsem wok bos bilong ol gavman i gat mak bilong em, na i aninit moa long wok bos bilong God. Mipela i wet long God bilong mipela na Kingdom bilong em long heven long stretim olgeta hevi bilong ol man.

2. Hau yumi ken soim olsem yumi no insait long ol samting bilong dispela graun?

Olsem Jisas, yumi no insait long ol wok politik. Taim ol manmeri i lukim ol mirakel bilong Jisas na traim long mekim em i kamap king bilong ol long graun, em i no larim ol. (Jon 6:15) Bilong wanem? Bikos bihain em i tok, “Kingdom bilong mi i no bilong dispela graun.” (Jon 18:36) Yumi disaipel bilong Jisas, olsem na yumi soim olsem yumi no insait long ol samting bilong dispela graun. Olsem, yumi no insait long woa. (Ritim Maika 4:3.) Yumi rispektim ol bikpela mak bilong kantri​—olsem fleg​—tasol yumi no salutim bikos em i wankain olsem pasin bilong lotuim fleg. (1 Jon 5:21) Na yumi no save sapotim o agensim wanpela sait bilong wanpela politikol pati o kendidet. Long ol dispela samting na ol narapela samting, yumi soim olsem yumi stap gut long gavman bilong God​—Kingdom bilong em.

KISIM SAMPELA SAVE MOA

3. Ol Kristen tru i no insait long ol samting bilong dispela graun

Jisas na ol disaipel bilong em i stap gutpela eksampel bilong yumi. Ritim Rom 13:1, 5-7 na 1 Pita 2:13, 14. Na pilaim VIDIO na stori long ol dispela askim.

VIDIO: Ol Kristen Tru i No Insait Long Ol Samting Bilong Dispela Graun​—Hap 1 (4:28)

• Wai na yumi mas soim rispek long ol gavman?

• Wanem sampela rot yumi ken soim olsem yumi daun long ol?

Long taim bilong woa, ating sampela kantri bai tok ol i no insait long dispela woa, tasol ol i givim ol samting bilong helpim ol lain i insait long dispela woa. Pasin bilong i no insait long ol samting bilong dispela graun i makim wanem samting? Ritim Jon 17:16. Na pilaim VIDIO na stori long dispela askim.

VIDIO: Ol Kristen Tru i No Insait Long Ol Samting Bilong Dispela Graun​—Hap 2 (3:11)

• Pasin bilong i no insait long ol samting bilong dispela graun i makim wanem?

Olsem wanem sapos gavman i tokim yumi long mekim samting we i pait wantaim lo bilong God? Ritim Aposel 5:28, 29. Na pilaim VIDIO na stori long ol dispela askim.

VIDIO: Ol Kristen Tru i No Insait Long Ol Samting Bilong Dispela Graun​—Hap 3 (1:18)

• Sapos lo bilong ol man na lo bilong God i pait wantaim, bai yumi bihainim lo bilong husat?

• Yu inap tingim sampela samting inap kamap we ol Kristen i no ken bihainim tok bilong ol gavman?

4. Long tingting na long pasin bilong yumi tu, yumi no ken insait long ol samting bilong dispela graun

Ritim 1 Jon 5:21. Na pilaim VIDIO na stori long ol dispela askim.

VIDIO: Wai na Ol Kristen Tru i Mas Strongim Bel​—Long i No Insait Long Wok Politik (2:49)

• Long vidio, wai na Ayenge i no sapotim politikol pati o i no insait long bung bilong litimapim kantri, olsem salutim fleg?

• Yu ting em i mekim gutpela disisen?

Wanem ol narapela samting inap traim pasin bilong yumi long i no insait long ol samting bilong graun? Pilaim VIDIO, na stori long ol dispela askim.

VIDIO: Skul Yumi Kisim Long Wastaua​—Stap Narapela Kain Maski Ol Lain i Bruk (5:16)

• Hau bai yumi soim olsem yumi stap narapela kain taim ol tim bilong ol kantri i salens long ol spot?

• Sapos sampela disisen bilong lain politik i mekim sampela samting long yumi, hau bai yumi soim olsem yumi stap narapela kain?

• Ol nius ripot o ol poroman bilong yumi inap mekim wanem long pasin bilong yumi long i no insait long ol samting bilong graun?

OL BIKPELA POIN

Long tingting, toktok, na pasin bilong ol, ol Kristen i wok strong long i no sapotim wok politik.

Riviu

• Yumi mas givim wanem samting long ol gavman?

• Wai na yumi no insait long ol samting bilong wok politik?

• Wanem ol samting inap kamap na i traim pasin bilong yumi long i no insait long ol samting bilong dispela graun?

MEKIM WOK PAINIMAUT

Wanem sampela samting yumi mas lusim na bai yumi no insait long ol samting bilong graun?

Jehova i No Lusim Mipela (3:14)

Ol famili i ken mekim wanem paslain long ol samting i kamap we inap traim pasin bilong ol long i no insait long ol samting bilong graun?

Stap Narapela Kain Long Ol Bikpela Bung (4:25)

Wai na pasin bilong difendim kantri i no wanpela wok i givim biknem long man?

“God Inap Mekim Olgeta Samting” (5:19)

Skelim ol samting yu mekim na yu no insait long ol samting bilong dispela graun taim yu mekim ol disisen bilong yu long wok mani.

‘Olgeta Man Wan Wan Bai i Karim Hevi Bilong Ol Yet’ (Wastaua, Mas 15, 2006)