Bilong Wanem Ol Samting Nogut na Pen na Hevi i Stap?

“Bilong wanem?” em askim planti man i save mekim taim wanpela samting nogut i kamap. Yumi amamas olsem Baibel i kamapim klia ol bekim bilong dispela askim!

1. Satan i mekim wanem na ol samting nogut i stat long kamap long graun?

Satan em dispela Devil i bikhet long God. Satan i laik bosim ol narapela, so em i kirapim namba 1 man na meri, em Adam na Iv, long bihainim em long bikhet. Satan i mekim olsem long rot bilong giamanim Iv. (Stat 3:1-5) Em i mekim na Iv i ting olsem Jehova i pasim em long kisim gutpela samting. I olsem em i tok ol man bai i stap amamas sapos ol i no bihainim tok bilong God. Satan i mekim namba 1 tok giaman taim em i tokim Iv olsem em i no inap dai. Olsem na Baibel i kolim Satan “man bilong giaman na papa bilong pasin giaman.”—Jon 8:44.

2. Adam na Iv i wokim wanem disisen?

Jehova i givim planti samting long Adam na Iv. Em i tok ol i ken kaikai prut bilong ol diwai long gaden Iden, wanpela diwai tasol ol i no ken kaikai prut bilong en. (Stat 2:15-17) Tasol tupela i wokim disisen long kaikai dispela prut. Iv i “kisim prut bilong en na kaikai.” Bihain, Adam tu “i kaikai.” (Stat 3:6) Tupela i sakim tok bilong God. Adam na Iv i gutpela olgeta, na ol inap mekim samting i stret. Tasol long laik bilong ol yet, ol i sakim tok bilong God, mekim sin na sakim wok bos bilong God. Disisen bilong tupela i kamapim bikpela pen na hevi.—Stat 3:16-19.

3. Disisen bilong Adam na Iv i mekim wanem long yumi?

Taim Adam na Iv i mekim sin, ol i no gutpela olgeta moa, na sin bilong ol i kalap long olgeta tumbuna pikinini bilong ol. Baibel i tok long Adam olsem: “Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri.”—Rom 5:12.

I gat planti risen na yumi karim pen na hevi. Sampela taim yumi wokim ol rong disisen na karim hevi long dispela. Sampela taim yumi karim hevi bikos long ol rong disisen ol narapela i wokim. Sampela taim yumi karim hevi bikos yumi stap long rong ples long rong taim.—Ritim Eklisiastis 9:11.

KISIM SAMPELA SAVE MOA

4. Man i as bilong ol pen na hevi bilong yumi

Planti man i bilip olsem God i bosim graun olgeta. Yu ting dispela i tru? Pilaim VIDIO.

VIDIO: Husat i Bosim Dispela Graun? (1:24)

Ritim Jems 1:13 na 1 Jon 5:19, na stori long dispela askim:

• Yu ting God i as bilong ol samting nogut na pen na hevi?

5. Skelim ol samting i kamap long wok bos bilong Satan

VIDIO: Bilong Wanem God i Larim Pen na Hevi i Stap?—Hap Bilong En (3:07)

Ritim Stat 3:1-6, na stori long ol dispela askim:

• Satan i mekim wanem tok giaman?—Lukim ves 4 na 5.

• Olsem wanem Satan i kamapim olsem Jehova i pasim ol man long kisim ol gutpela samting?

• Satan i tok wanem na i olsem em i tok ol man i no nidim Jehova olsem Bos bilong ol na bai ol i stap amamas?

Ritim Eklisiastis 8:9, na stori long dispela askim:

• Long dispela haptaim we Jehova i no bosim dispela graun, wanem samting i kamap?

1. Adam na Iv i gutpela olgeta na ol i stap long Paradais. Tasol tupela i bihainim tok bilong Satan na ol i bikhet long Jehova

2. Bihain long tupela i bikhet, olgeta man i kisim sin, pen na hevi, na dai

3. Jehova bai pinisim sin, pen na hevi, na dai. Na olgeta man bai kamap gutpela olgeta na stap long Paradais

6. Jehova i save tingim pen na hevi yumi karim

Yu ting Jehova i save tingim pen na hevi yumi karim? Skelim tok King Devit na aposel Pita i mekim. Ritim Buk Song 31:7 na 1 Pita 5:7, na stori long dispela askim:

• Yu pilim olsem wanem taim yu save olsem Jehova i lukim na tingim ol pen na hevi yumi karim?

OL BIKPELA POIN

Satan dispela Devil na namba 1 man na meri i as bilong ol samting nogut i kamap long graun. Jehova i tingim tru ol pen na hevi yumi karim, klostu nau em bai pinisim ol pen na hevi.

Riviu

• Satan dispela Devil i tokim Iv long wanem tok giaman?

• Pasin bikhet bilong Adam na Iv i mekim wanem long yumi?

• Olsem wanem yumi save Jehova i tingim ol pen na hevi yumi karim?

MEKIM WOK PAINIMAUT

Kisim save long mining bilong dispela tok sin long Baibel.

“Sin Em Wanem Samting?” (Atikol long websait)

Kisim sampela save moa long dispela bikpela tok em Satan dispela Devil i kamapim long gaden Iden.

“Wai na God i Larim Pen na Hevi i Stap?” (Wastaua, Janueri 1, 2014)

Skelim ol gutpela bekim bilong wanpela askim em planti i hatwok long bekim.

“Wai na Ol Natsi i Laik Pinisim Wanpela Lain Olgeta? Wai na God i No Stopim Dispela Samting?” (Atikol long websait)

Lukim ol samting wanpela man i lainim long ol pen na hevi i painim em.

Mi No Stap Wanpis Moa (5:09)

Yumi gat sin, karim pen na hevi, na dai bikos namba 1 man na meri, em Adam na Iv, i sakim tok bilong God.a Tasol i gat gutpela samting yumi inap wetim. Jehova i wokim rot long kisim bek yumi long kalabus bilong sin na dai long rot bilong Pikinini bilong em, Jisas Krais. Baibel i tok long rot bilong dai bilong Jisas, em i givim pe bilong baim bek ol man. Pe bilong baim bek man i opim rot na man i ken kamap fri. Pe Jisas i givim em laip bilong em i gutpela olgeta. (Ritim Matyu 20:28.) Jisas i gat rait long stap oltaim oltaim long graun, tasol em i redi long givim laip bilong em bilong opim rot long yumi kisim ol gutpela samting em Adam na Iv i bin lusim. Jisas i kamapim klia tu olsem em na Jehova i laikim tru yumi. Dispela lesen bai helpim yu long pilim tru ol samting dai bilong Jisas i kamapim.

1. Dai bilong Jisas i helpim yumi olsem wanem long nau?

Yumi gat sin, olsem na yumi save mekim planti samting em Jehova i no amamas long en. Tasol sapos yumi sori tru long ol sin yumi mekim, na long rot bilong Jisas Krais yumi askim Jehova long fogivim yumi, na sapos yumi traim bes long no ken mekim gen ol dispela sin, yumi inap pas gut wantaim God. (1 Jon 2:1) Baibel i tok: “Krais yet em i stretpela man na em i bin i dai wanpela taim tasol bilong kisim bek ol man nogut long ol sin bilong ol. Em i mekim olsem bilong bringim ol i go long God.”—1 Pita 3:18.

2. Dai bilong Jisas bai helpim yumi olsem wanem long bihain?

Jehova i salim Jisas i kam bilong givim laip bilong em i gutpela olgeta olsem ofa na “bai olgeta man husat i bilip long [Jisas] ol inap abrusim bagarap na kisim laip oltaim.” (Jon 3:16) Yumi tenkyu long samting Jisas i bin mekim, klostu nau Jehova bai pinisim ol samting nogut em pasin bikhet bilong Adam i bin kamapim. Dispela i makim olsem sapos yumi bilip long sakrifais bilong Jisas, rot bai i op long yumi inap stap amamas oltaim long paradais long graun!—Aisaia 65:21-23.

KISIM SAMPELA SAVE MOA

3. Dai bilong Jisas i opim rot na yumi inap lusim kalabus bilong sin na dai

VIDIO: Bilong Wanem Jisas i Dai?—Hap 1 (2:01)

• Taim Adam i sakim tok bilong God em i lus long kisim wanem gutpela samting?

Ritim Rom 5:12, na stori long dispela askim:

• Sin bilong Adam i mekim wanem samting long yu?

Ritim Jon 3:16, na stori long dispela askim:

• Bilong wanem Jehova i salim Pikinini bilong em i kam long graun?

1. Adam i gutpela olgeta tasol em i sakim tok bilong God olsem na olgeta man i kisim sin na dai

2. Jisas i gutpela olgeta na em i bihainim tok bilong God, na dispela i opim rot long ol man inap kamap gutpela olgeta na stap laip oltaim oltaim

4. Dai bilong Jisas inap helpim olgeta man

VIDIO: Bilong Wanem Jisas i Dai?—Hap 2 (2:00)

• Olsem wanem indai bilong wanpela man inap helpim olgeta manmeri?

Ritim 1 Timoti 2:5, 6, na stori long dispela askim:

• Adam i gutpela olgeta, tasol em i bin mekim sin olsem na olgeta man i kisim sin na dai. Jisas tu i gutpela olgeta. Long wanem rot em i givim “pe i stret bilong baim bek olgeta man”?

5. Pe bilong baim bek man em presen Jehova i givim long yu

Ol pren bilong Jehova i tingim pe bilong baim man olsem presen em i givim long ol. Olsem, ritim Galesia 2:20, na stori long dispela askim:

• Olsem wanem tok bilong aposel Pol i kamapim olsem em i tingim pe bilong baim bek man i olsem presen i kam long em?

Taim Adam i mekim sin, em i bringim dai long em yet na ol tumbuna pikinini bilong em. Tasol Jehova i salim Pikinini bilong em i kam dai na rot i op long yu inap stap laip oltaim oltaim.

Taim yu ritim ol dispela ves, traim long piksaim hau Jehova i mas pilim taim Pikinini bilong em i karim pen. Ritim Jon 19:1-7, 16-18, na stori long dispela askim:

• Yu pilim olsem wanem long samting Jehova na Jisas i mekim bilong helpim yu?

OL BIKPELA POIN

Dai bilong Jisas i as na Jehova i fogivim ol sin bilong yumi, na i opim rot long yumi inap stap oltaim.

Riviu

• Bilong wanem Jisas i dai?

• Long wanem rot laip bilong Jisas i gutpela olgeta i olsem pe i stret bilong baim bek olgeta man?

• Olsem wanem dai bilong Jisas inap helpim yu?

MEKIM WOK PAINIMAUT

Kisim save long wai na Baibel i tok laip bilong Jisas i gutpela olgeta i olsem pe bilong baim bek ol man.

“Olsem Wanem Sakrifais Jisas i Givim i ‘Baim Bek Planti Man’?” (Atikol long websait)

Kisim save long samting yumi mas mekim na bai Jisas i ken kisim bek yumi.

“Olsem Wanem Jisas i Kisim Bek Ol Man?” (Atikol long websait)

Yu ting Jehova inap fogivim tu ol bikpela rong?

“Bekim Ol Askim Bilong Baibel” (Wastaua, Me 1, 2013)

Ritim stori bilong wanpela man i bin kisim save long sakrifais Krais i bin givim, na dispela i helpim em long senisim pasin bilong em.

“I Am No Longer a Slave of Violence” (Atikol long websait)