7, 8. Olsem wanem samting tupela man i gutpela olgeta i mekim, i kamapim narapela narapela samting?

⁷ Jehova i stretim rot na bai ol man inap winim hevi bilong sin. Pol i tok dispela inap kamap long wok narapela man i mekim, em man i gutpela olgeta na i kamap bihain, em namba 2 Adam. (1 Kor. 15:45) Tasol samting dispela tupela man i gutpela olgeta i mekim, i kamapim narapela narapela samting. Bilong wanem i olsem?​—Ritim Rom 5:​15, 16.

⁸ Pol i tok: “Samting dispela presen i kamapim i no wankain olsem samting dispela rong i kamapim.” Adam i gat asua long dispela rong, na em i kisim strafe i stret long rong em i bin mekim​—em i dai. Tasol i no olsem em wanpela tasol i dai. Baibel i tok: “Rong bilong wanpela man i mekim na planti manmeri i dai.” Strafe Adam i kisim i stret tu long ol pikinini bilong em i no gutpela olgeta, na yumi tu i insait long dispela. Tasol yumi amamas long save olsem man i gutpela olgeta, Jisas, em inap kamapim samting i narapela olgeta. Dispela i kamapim wanem samting? Yumi lukim bekim bilong dispela askim long tok Pol i mekim, em i tok: “God i kolim olgeta kain man stretpela man na ol inap kisim laip.”​—Rom 5:18.

9. Rom 5:​16, 18 i tok God i save kolim ol man stretpela man. Dispela tok i makim wanem samting?

⁹ Wanem as bilong tok Grik ol i tanim olsem “kolim planti olsem stretpela manmeri” na “kolim olgeta kain man stretpela man”? Wanpela man bilong tanim tok bilong Baibel i tok: “Em pasin bilong kolim ol tok long sait bilong lo. Em i makim olsem i stap bilong man long ai bilong God i senis, i no olsem pasin bilong man i senis . . . Dispela tok i kamapim olsem God em i jas na wanpela man i sanap long kot bilong em, long wanem, em i man nogut. Tasol long dispela kot God i tok olsem man i no gat asua.”

14, 15. Ol man em God i kolim ol stretpela man, wanem gutpela samting bai painim ol? Tasol ol i mas mekim yet wanem samting?

¹⁴ Em i wanpela gutpela presen tru i kam long God i Gat Olgeta Strong, long em i lusim sin man i kisim long Adam na ol rong man i bin mekim! Yumi no inap kaunim hamas sin man i bin mekim paslain long em i kamap wanpela Kristen, tasol long rot bilong pe bilong baim bek man, God i fogivim ol dispela sin. Pol i tok: “Dispela presen God i givim, em i givim long wanem, ol manmeri i mekim pinis planti rong, dispela i opim rot long em i kolim planti olsem stretpela manmeri.” (Rom 5:16) Ol aposel na ol narapela husat i kisim dispela gutpela presen​—olsem God i kolim ol stretpela man​—ol i mas wok yet long bilip na lotuim God tru. Wanem gutpela samting bai painim ol bihain? Baibel i tok: “Bikpela pasin helpim na dispela presen bilong stretpela pasin ol i bikpela moa na i win tru. Ol man i kisim dispela samting ol bai stap laip na mekim wok king long rot bilong wanpela man, em Jisas Krais.” Tru tumas, presen bilong stretpela pasin i mekim narapela kain wok olgeta. Dispela presen i givim laip.​—Rom 5:17; ritim Luk 22:​28-30.