Savetingting Bilong God i Kamap Klia Long Ol Samting Em i Wokim

“Em i save skulim yumi na yumi kisim planti save. Na save bilong yumi i winim tru save bilong ol wel animal na ol pisin.”​—JOP 35:11.

OL PISIN inap mekim kain kain samting. Taim ol i flai ol i save tantanim nabaut na sut i kam daun na go antap gen, na ol lain bilong wokim balus ol i kirap nogut long dispela. Sampela pisin i save flai i go inap planti tausen kilomita na brukim ol bikpela solwara i no gat wanpela mak bilong soim rot long ol, tasol ol i save kamap stret long ples ol i laik i go long en.

Na i gat narapela samting ol pisin inap mekim na i kamapim klia savetingting bilong Man i bin wokim ol​—ol i save salim tok long ol wanlain pisin long rot bilong krai na singsing bilong ol. Yumi ken tingim sampela.

Toktok Bilong Ol Pisin

Sampela lain pisin i save kirap toktok taim ol i stap yet insait long kiau. Wanpela kain pisin (quail) i save putim 8-pela kiau, olsem wanpela kiau long wanpela de. Sapos ol pikinini insait long ol kiau i wok long kamap bikpela long wankain spit, orait ol kiau bai bruk long ol narapela narapela de insait long 8-pela de. Mama bai i hatwok tru long lukautim ol pikinini i gat wanpela wik pinis na ol i wokabaut, na em i mas sindaun yet long kiau i no bruk. Tasol gutpela tru na olgeta 8-pela kiau wantaim bai bruk insait long 6-pela aua. Olsem wanem dispela inap kamap? Sampela saveman i ting ol pikinini i stap yet insait long kiau ol i save toktok wantaim narapela, na i luk olsem dispela i mekim na olgeta kiau i save bruk long klostu wankain taim.

Taim ol pisin i go bikpela, ol pisin man i save singsing. Na ol i save singsing moa yet long taim bilong painim poroman o bilong makim hap bilong ol yet. I gat planti tausen kain kain pisin, na ol i gat krai bilong ol yet, olsem tok ples, na dispela i helpim ol pisin meri long painim poroman insait long lain bilong ol yet.

Ol pisin i save singsing long bikmoning na long taim san i laik go daun, na i gat as na ol i mekim olsem. Long dispela taim i no gat bikpela win o planti pairap. Ol saveman i bin kisim save olsem, taim pisin i singsing, krai bilong en i save go longwe long moningtaim na long apinun, winim taim bilong belo.

Tru, long planti lain pisin ol man i save singsing, tasol ol man na meri wantaim i save mekim kain kain krai, na olgeta wan wan krai i gat mining bilong en. Wanpela kain liklik pisin (chaffinch) em i gat 9-pela kain krai. Wanpela kain krai i bilong tok lukaut long birua olsem tarangau samting i flai antap na i wok long painim abus, tasol em i mekim narapela kain krai bilong tok lukaut long wanpela birua i stap long graun na i kam klostu.

Wanpela Presen i Win Tru

Tru tumas, yumi kirap nogut long gutpela savetingting Jehova i bin putim long ol pisin. Tasol yumi ol manmeri i win tru long pasin bilong toktok wantaim narapela. Jop 35:11 i tok, God i bin wokim ol manmeri na i mekim “save bilong [ol] i winim tru save bilong ol wel animal na ol pisin.” Ol manmeri inap kamapim ol kain kain tingting na save long rot bilong toktok i kamap long nek o long pasin bilong wokim han.

Ol liklik bebi bilong yumi man i narapela kain tru long ol pisin na animal​—ol inap lain long ol tok ples i hatwok tru long kisim. Nius American Scientist i tok: “Ol liklik pikinini i save lain long mekim tok ples maski papamama i no save toktok wantaim ol; sampela pikinini i yaupas ol i save lain long mekim tok long han maski ol i no bin lukim papamama i mekim.”

Dispela i Mekim Wanem Long Yu?

Taim yu harim gutpela singsing bilong pisin o yu harim liklik pikinini i lain long mekim namba wan tok bilong em, dispela i save mekim wanem long yu? Yu pilim tru gutpela savetingting bilong God long ol samting em i bin wokim?

Devit, man bilong raitim song, em i tingim tingim pasin bilong God long wokim em na em i tokaut long God olsem: “Mi pret long yu, olsem na mi save litimapim nem bilong yu. Olgeta samting yu wokim i narakain na i nambawan tru. Mi save gut long dispela samting na mi pilim tru.” (Song 139:14) Taim yu wok long skelim savetingting bilong God i kamap ples klia long ol samting em i bin wokim, bai yu bilip moa yet olsem em inap tru long givim yu ol gutpela tok bilong soim rot long yu.

Strong Bilong God i Kamap Klia Long Ol Sta

“Yupela lukluk i go antap long skai na lukim ol sta samting i stap antap. Husat tru i bin wokim ol? Em Bikpela tasol. Ol dispela samting i olsem lain ami bilong Bikpela. Em i save long namba bilong ol, na em i save long nem bilong wan wan bilong ol, na em i save kolim ol long nem bilong ol. Em i gat olgeta strong, olsem na i no gat wanpela bilong ol dispela samting inap lus.”​—AISAIA 40:26.

SAN bilong yumi em i wanpela sta i no bikpela olsem sampela sta. Tasol sais bilong en i winim sais bilong graun inap 330,000 taim. Ol sta i stap klostu long graun, planti bilong ol i liklik long san. Tasol sampela sta, olsem sta ol i kolim V382 Cygni, ol i bikpela moa na i winim san bilong yumi inap 27 taim.

Olsem wanem long hat bilong san? Orait tingim olsem wanpela paia i stap longwe inap 15 kilomita samting na yu inap pilim hat bilong en, ating em wanpela bikpela paia stret. Orait san i stap longwe long graun inap olsem 150 milion kilomita. Tasol long taim bilong san, hat bilong en inap kukim skin bilong yumi! Yumi kirap nogut long dispela, long wanem, liklik hap tru bilong hat bilong san i save kamap long graun. Tasol dispela liklik hap tru bilong hat bilong san em inap mekim na ol samting i save stap laip long graun.

Ol saientis i tok, hat bilong san bilong yumi i bikpela tru na em inap helpim 31 trilion planet kain olsem graun bilong yumi long i stap. O yumi ken tok, sapos ol inap bungim olgeta pawa bilong san inap wanpela seken tasol, Amerika “bai i gat pawa inap long 9 milion yia.”​—Space Weather Prediction Center (SWPC) Web site.

Hat bilong san i save kamap long insait stret bilong en​—em kain olsem traipela masin nuklia i save brukbrukim ol atom wantaim na kamapim bikpela pawa moa yet. San i traipela nogut tru na insait tru bilong en i strong tumas, olsem na pawa i save kamap insait long en i lusim planti milion yia bilong kam antap long san. SWPC Web site i tok: “Sapos long nau San i pinis long kamapim pawa, bai Graun i no inap pilim tumas dispela samting i go inap 50 milion yia!”

Orait nau tingim dispela: Sapos long nait yu lukluk i go antap long skai taim i no gat klaut, bai yu lukim planti tausen sta, na olgeta wan wan i kamapim bikpela pawa tru, wankain olsem san bilong yumi. Na ol saientis i ting i gat planti bilion bilion sta i stap!

Orait ol dispela sta i bin kamap olsem wanem? Long nau, planti saveman i ting i gat wanpela samting i bin mekim na ol i no klia long en, na ol sta samting bilong antap i bin kamap wantu tasol, inap olsem 14 bilion yia i go pinis. Baibel i tok tasol olsem: “Bipo bipo tru God i mekim kamap skai na graun na olgeta samting i stap long en.” (Stat 1:1) Tru tumas yumi ken tok, Man i bin wokim ol dispela sta i save kamapim bikpela pawa moa yet, em “i gat olgeta strong.”​—Aisaia 40:26.