7. Ol lo bilong Kingdom Bilong God i gutpela moa

Ol gavman i save putim ol lo bilong helpim na lukautim ol manmeri i stap aninit long ol. Kingdom Bilong God tu i gat ol lo bilong ol manmeri i stap aninit long en i mas bihainim. Ritim 1 Korin 6:9-11, na stori long ol dispela askim:

• Yu ting graun bai stap olsem wanem sapos olgeta man i bihainim ol lo bilong God?a

• Yu ting i stret Jehova i laik bai ol man i stap aninit long Kingdom i rispektim ol dispela lo? Bilong wanem?

• Wanem samting i soim olsem ol manmeri i no bin bihainim ol dispela lo, ol inap senisim pasin bilong ol?—Lukim ves 11.

Planti manmeri i save pilim hatwok long stori long maritpasin. Tasol taim Baibel i stori long maritpasin, em i tokaut stret na mekim long pasin rispek. Tok Baibel i mekim long dispela i bilong helpim yumi. Dispela i stret, long wanem, Baibel i kam long Jehova, em Man Bilong Wokim yumi. So em i save long wanem samting i gutpela bilong helpim yumi. Em i tokim yumi long wanem samting yumi mas mekim bilong amamasim em na wanem samting bai helpim yumi long stap amamas oltaim.

1. Jehova i gat wanem tingting long maritpasin?

Maritpasin em presen i kam long Jehova. Em i laik bai man na meri i marit i kisim amamas long dispela pasin. Dispela presen i opim rot long ol marit long kamapim ol pikinini, na tu, long soim pasin laikim long narapela narapela. Olsem na Baibel i tok: “Yu ken amamas wantaim meri yu bin maritim taim yu yangpela yet.” (Provep 5:18, 19) Jehova i laik bai ol marit Kristen i stap gut long poroman marit bilong ol, na ol i no ken mekim pasin adaltri.​—Ritim Hibru 13:4.

2. Pasin pamuk i makim wanem samting?

Baibel i tokim yumi olsem “ol man i save mekim pasin pamuk, . . . bai i no inap i go insait long Kingdom Bilong God.” (1 Korin 6:9, 10) Ol man bilong raitim Baibel long tokples Grik, ol i yusim tok Grik por·neiʹa bilong makim pasin pamuk. Pasin pamuk i makim olgeta kain pasin olsem (1) ol man na meri i no marit i slip wantaim,a (2) man i slip wantaim man o meri i slip wantaim meri, na (3) man o meri i slip wantaim animal. Taim yumi “sakim pasin pamuk,” yumi amamasim Jehova na dispela i lukautim yumi yet.​—1 Tesalonaika 4:3.

KISIM SAMPELA SAVE MOA

3. Ranawe long pasin pamuk

Josep, wanpela bilipman, i sakim wanpela meri i laik slip wantaim em. Ritim Stat 39:1-12, na stori long ol dispela askim:

• Wanem samting i kirapim Josep long ranawe?​—Lukim ves 9.

• Yu ting Josep i wokim gutpela disisen? Bilong wanem?

VIDIO: Stap Longwe Long Pasin Pamuk (5:06)

Jehova i laik bai yumi olgeta i sakim pasin pamuk. Ritim 1 Korin 6:18, na stori long ol dispela askim:

• Wanem sampela samting inap kamap na kirapim man long mekim pasin pamuk?

• Olsem wanem yu ken ranawe long pasin pamuk?

4. Yu ken sakim ol traim

VIDIO: Sakim Traim Long Rot Bilong Ritim Baibel (3:02)

• Taim brata long dispela vidio i luksave olsem tingting na pasin bilong em inap mekim na em i no stap gut long meri bilong em, em i mekim wanem?

Sampela taim ol Kristen tu i hatwok long putim tingting bilong ol long ol samting i klin. Olsem wanem yu ken abrusim pasin bilong tingting oltaim long ol samting i no klin? Ritim Filipai 4:8, na stori long ol dispela askim:

• Yumi mas tingting long wanem ol samting?

• Olsem wanem pasin bilong ritim Baibel na bisi long mekim wok bilong Jehova inap helpim yumi long sakim traim bilong mekim sin?

5. Ol lo bilong Jehova i bilong helpim yumi

VIDIO: I No Gat Gutpela Tingting (9:31)

• Wanpela yangpela man i mekim wanem na traim inap painim em?​—Lukim Provep 7:8, 9.

• Olsem Provep 7:​23, 26 i kamapim, pasin pamuk inap kamapim ol bikpela hevi. Sapos yumi bihainim pasin i klin, yumi bai abrusim wanem ol hevi?

• Taim yumi bihainim pasin i klin, olsem wanem dispela inap helpim yumi long stap amamas oltaim?

Sampela manmeri i ting olsem tok Baibel i mekim long pasin bilong man i maritim man na meri i maritim meri, em strongpela tok tumas. Tasol Jehova, em God i gat pasin laikim, em i laik bai olgeta manmeri i stap amamas oltaim. Bilong yumi inap i stap oltaim, yumi mas bihainim ol lo bilong em. Ritim 1 Korin 6:9-11, na stori long dispela askim:

• Long tingting bilong God, dispela laik bilong man i laik slip wantaim man na meri i laik slip wantaim meri, em dispela pasin tasol yumi mas sakim?

Bilong amamasim God, yumi olgeta i mas mekim ol senis. Yu ting gutpela samting inap kamap sapos yumi wok strong long mekim olsem? Ritim Buk Song 19:8, 11, na stori long ol dispela askim:

• Yu ting ol lo bilong Jehova long stretpela pasin i stret? Wai na yu ting olsem, o wai na yu ting nogat?

OL BIKPELA POIN

Maritpasin em presen i kam long Jehova. Em i laik bai man na meri marit i kisim amamas long en.

Riviu

• Wanem kain ol pasin i insait long pasin pamuk?

• Wanem samting bai helpim yumi long sakim pasin pamuk?

• Taim yumi bihainim ol stretpela lo bilong Jehova, olsem wanem dispela i helpim yumi?

MEKIM WOK PAINIMAUT

Kisim save long as na God i laik bai man na meri husat i laik sindaun wantaim ol i mas marit stret.

“Baibel i Tok Wanem Long Man na Meri i Sindaun Nating Wantaim na i No Marit?” (Atikol long websait)

Kisim save long wai na Baibel i tok olsem pasin bilong man i slip wantaim man na meri i slip wantaim meri em i no stret, tasol dispela i no makim olsem yumi mas heitim ol kain lain olsem.

“I Gat Rong Long Man i Slip Wantaim Man na Meri i Slip Wantaim Meri?” (Atikol long websait)

Kisim save long hau ol lo bilong God long maritpasin i banisim yumi.

“Yu Ting Pasin Bilong Putim Sem Long Maus Em Maritpasin?” (Atikol long websait)

Long ekspiriens “Ol i Mekim Pasin Rispek Long Mi,” lukim wanem samting i kirapim wanpela man i save slip wantaim man long senisim pasin bilong em na bai em i ken amamasim God.

“Baibel i Senisim i Stap Bilong Man” (Wastaua, Epril 1, 2011)

Tru, yu laikim tru Jehova na yu wok strong long sakim ol samting we inap mekim em i bel hevi, tasol sampela taim yu inap mekim popaia. Sampela sin i bikpela winim ol narapela sin. (1 Korin 6:9, 10) Sapos yu mekim wanpela bikpela sin, tingim olsem Jehova i laikim yu yet; em i redi long fogivim yu na helpim yu.

1. Yumi mas mekim wanem na bai Jehova i ken fogivim yumi?

Ol man i laikim Jehova, ol i bel hevi tru taim ol i luksave olsem ol i mekim wanpela bikpela sin. Tasol tok promis Jehova i mekim long lain bilong em i mekim gut bel bilong ol, olsem: “Maski ol sin bilong yupela i olsem retpela kala, ol bai kamap waitpela olsem sno.” (Aisaia 1:18) Sapos yumi tanim bel tru, Jehova bai lusim tingting olgeta long sin bilong yumi. Olsem wanem yumi soim olsem yumi tanim bel? Yumi bel hevi tru long sin yumi mekim, na yumi no moa mekim dispela sin na yumi askim Jehova long fogivim yumi. Na yumi wok strong long senisim tingting o ol pasin we i kirapim yumi long mekim sin, na yumi wok strong long bihainim ol stretpela lo bilong Jehova.​—Ritim Aisaia 55:6, 7.

2. Olsem wanem Jehova i yusim ol elda long helpim yumi taim yumi mekim sin?

Sapos yumi mekim wanpela bikpela sin, Jehova i tokim yumi long “singautim ol hetman bilong kongrigesen i kam.” (Ritim Jems 5:14, 15.) Ol dispela man Jehova i makim ol, ol i laikim em na ol sipsip bilong em. Ol i bin kisim skul long helpim yumi long stretim gen pasin pren bilong yumi wantaim Jehova.​—Galesia 6:1.

Olsem wanem ol elda i helpim yumi taim yumi mekim wanpela bikpela sin? Tupela o tripela elda bai yusim tok bilong Baibel bilong stretim yumi. Na tu, ol bai givim ol tok bilong helpim na strongim yumi long no ken mekim gen sin. Sapos wanpela i mekim wanpela bikpela sin na em i no tanim bel, ol elda bai rausim em na bai pasin bilong em i no ken bagarapim kongrigesen.

KISIM SAMPELA SAVE MOA

3. Taim yumi autim sin bilong yumi dispela bai helpim yumi

Ol sin yumi mekim i save mekim Jehova i bel hevi, olsem na yumi mas autim sin bilong yumi long em. Ritim Buk Song 32:1-5, na stori long dispela askim:

• Wai na em gutpela long autim sin bilong yumi long Jehova na yumi no haitim?

VIDIO: “Ol Man Em Jehova i Laikim, Em i Save Stretim Ol” (3:01)

• Long vidio, olsem wanem ol elda i helpim Canon long kam bek long Jehova?

Yumi mas mekim onest pasin na tokaut stret long ol samting long ol elda; ol i stap bilong helpim yumi. Ritim Jems 5:16, na stori long dispela askim:

• Wai na em isi moa long ol elda i helpim yumi taim yumi mekim onest pasin na tokaut stret long ol samting?

4. Jehova i save soim pasin marimari long ol sinman

Sapos wanpela man i mekim wanpela bikpela sin na em i no laik bihainim ol lo bilong Jehova, ol bai seperetim em long kongrigesen, na yumi no inap bung moa wantaim em. Ritim 1 Korin 5:6, 11, na stori long dispela askim:

• Wankain olsem yis i save mekim plaua i solap, olsem wanem pasin bilong bung wantaim wanpela i mekim sin na i no laik tanim bel inap bagarapim kongrigesen?

Olsem wanem pasin Jehova i mekim long ol man i mekim sin i soim olsem em i save bihainim stretpela pasin, pasin marimari, na pasin laikim?

5. Jehova i save fogivim yumi taim yumi tanim bel

Jisas i mekim wanpela tok piksa we i helpim yumi long kliagut long filings bilong Jehova taim wanpela man i tanim bel. Ritim Luk 15:1-7, na stori long dispela askim:

• Dispela tok piksa i givim wanem skul long yu long Jehova?

Ritim Esekiel 33:11, na stori long dispela askim:

• Em bikpela samting long yumi mas mekim wanem bilong soim olsem yumi sori tru long rong yumi bin mekim?

OL BIKPELA POIN

Sapos yumi mekim wanpela bikpela sin tasol yumi bel hevi tru na yumi tingting strong long no ken mekim gen dispela sin, Jehova bai fogivim yumi.

Riviu

• Wai na em gutpela long autim ol sin bilong yumi long Jehova?

• Yumi mas mekim wanem na bai Jehova i ken lusim ol sin bilong yumi?

• Sapos yumi mekim wanpela bikpela sin, wai na yumi mas go long ol elda bilong kisim helpim?

MEKIM WOK PAINIMAUT

Lukim olsem wanem Jehova i soim pasin marimari long wanpela man, em pasin marimari Aisaia 1:18 i stori long en.

Trastim Pasin Marimari Bilong Jehova (5:02)

Olsem wanem ol elda i helpim man i mekim bikpela sin?

“Hau Ol Elda i Ken Mekim Pasin Laikim na Pasin Marimari Long Ol Man i Mekim Sin” (Wastaua, Ogas 2024)

Lukim pasin laikim na pasin marimari ol bratasista i soim long meri i mekim sin na i no tanim bel.

“Hau Ol Elda i Ken Helpim Ol Manmeri Em Ol i Seperetim Ol Long Kongrigesen” (Wastaua, Ogas 2024)

Long stori, “Mi mas i go bek long Jehova,” kisim save long wai na wanpela man i bin lusim tok i tru i pilim olsem Jehova i kisim em i kam.

“Baibel i Save Senisim i Stap Bilong Man” (Wastaua, Epril 1, 2012)