“Yupela i No Ken Pas Wantaim Ol Haiden”
TUPELA bulmakau man yu lukim hia long piksa i gat bikpela strong; dispela i mekim na i no hatwok long ol long pulim ol hevipela kago. Tasol olsem wanem sapos ol i senisim wanpela bulmakau na putim wanpela donki? Donki i liklik long bulmakau na i no gat wankain strong olsem bulmakau, olsem na ating donki bai bikhet na kikim hap ain i pasim tupela wantaim. I gat gutpela as na lo God i givim long Israel i tok: “Yupela i no ken pasim bulmakau wantaim donki long hap ain bilong brukim graun na mekim tupela i wok wantaim long brukim graun long gaden.”—Lo 22:10.
Aposel Pol i mekim wankain tok olsem long ol manmeri. Em i tok: “Ol haiden ol i narakain, olsem na yupela i no ken pas wantaim ol na wok bung wantaim ol.” (2 Korin 6:14) Em bikpela samting long tingim dispela tok taim yu laik painim wanpela poroman marit. Marit em olsem tupela bai poroman wantaim inap oltaim, long wanem, Krais Jisas i tok: “Samting God i pasim pinis, em man i no ken katim.” (Matyu 19:6) Planti pen na hevi i save kamap taim tupela marit i no stap wanbel long bilip, na ol lo bilong stiaim ol, na ol mak ol i putim bilong winim. Olsem na em i gutpela tingting long bihainim tok bilong Baibel long maritim wanpela man o meri “i bilip long Bikpela.” (1 Korin 7:39) Sapos yu maritim wanpela man o meri i no wanbel long lotu bilong yu, dispela bai kamapim bikpela hevi—winim hevi i kamap taim ol i pasim bulmakau wantaim donki.
Bilip bilong tupela i narapela narapela—em wanpela samting inap mekim na tupela marit i no pas gut na wok gut wantaim. Tasol maski tupela i wanbilip, taim ol i tingting long marit, gutpela sapos ol i tingim ol askim olsem: ‘Mitupela i putim ol wankain mak bilong winim? Bai mitupela i sindaun we? Husat bai lukautim mani? Mitupela wantaim bai wok mani? Bai mitupela i kamapim pikinini o nogat? Olsem wanem? Pasin bilong sori na tingim narapela bai bosim marit bilong mitupela?
Ating pasin tupela i mekim taim ol i toktok wantaim long ol dispela askim inap makim olsem ol bai pas na wok gut wantaim o nogat. Tru yumi save, i no gat tupela manmeri em laik na tingting bilong ol i wankain olgeta. Tasol bikpela samting i olsem: Sapos tupela i ken stretim ol hevi wantaim na toktok gut wantaim paslain long ol i marit, ating taim ol i marit pinis bai tupela inap pas gut na wok gut wantaim.