Buk Bilong Baibel Namba 51​—Kolosi

Man Bilong Raitim: Pol

Ples Em i Bin Raitim: Rom

Raitim Pinis: 60–61 C.E. samting

TUPELA man i lusim Efesus na bihainim wara Miender, na ol i brukim hap bilong Esia Maina i go long hap bilong sankamap. Taim ol i kamap long hanwara ol i kolim Lukus, long distrik Frigia, ol i baut i go long hap bilong saut-is na bihainim dispela wara i go namel long ol maunten. Nau ol i lukim gutpela ples tru, i gat gutpela gras na ol bikpela lain sipsip i kaikai i stap. (Ol man long dispela hap i save wokim ol samting long gras bilong sipsip na em i nambawan rot bilong ol long kisim mani.a) Tupela i wokabaut i go insait moa long dispela ples namel long ol maunten na ol i lukim taun Laodisia i stap long han sut, em ples bilong planti wok bisnis na gavman bilong distrik, em Rom i bosim, i stap long en. Long han kais, long hapsait bilong wara, tupela inap lukim taun Hierapolis, em ples bilong planti haus lotu na ol hul wara i gat hatpela wara i kamap long en. I gat kongrigesen Kristen long dispela tupela taun na long liklik taun Kolosi tu, em i stap insait moa long dispela ples daun inap 16 kilomita.

² Tupela hia i laik go long Kolosi. Tupela wantaim i Kristen. Wanpela i save gut long dispela hap, long wanem, em i bilong Kolosi. Nem bilong em Onesimus; em wanpela wokboi nating na em i laik go bek long bosman bilong em i stap long kongrigesen bilong Kolosi. Poroman bilong Onesimus, em Tikikus, em i wanpela friman. Tupela i kisim wanpela pas bilong aposel Pol i kam, em Pol i raitim long “ol manmeri bilong God i stap long taun Kolosi, . . . ol bratasusa i bilip long Krais.” Long save yumi kisim pinis long raun bilong Pol, yumi ken ting i no gat wanpela taim em i bin kam long Kolosi. Ol man i ting Epafras i bin kamapim dispela kongrigesen, em planti bratasista long en ol i no bilong lain Juda. Epafras i bin wok strong namel long ol, na nau em i stap wantaim Pol long Rom.​—Kl. 1:​2, 7; 4:12.

³ Aposel Pol i raitim dispela pas, olsem em i tok long kirap na pinis bilong pas. (1:1; 4:18) Na long pinis bilong pas em i tok em i stap kalabus na em i raitim pas. Em i bin raitim long namba wan taim em i kalabus long Rom (59-​61 C.E.), taim em i bin raitim sampela pas bilong strongim ol brata, na em i salim pas bilong ol Kolosi i go wantaim pas bilong Filemon. (Kl. 4:​7-9; Fm. 10, 23) Ating Pol i bin raitim dispela pas long wankain taim olsem em i raitim pas long ol Efesus, long wanem, planti tok bilong tupela pas i wankain.

⁴ I no gat as na yumi ken ting Pol i no bin raitim pas bilong ol Kolosi. Dispela pas i stap wantaim ol narapela pas bilong Pol long olpela rait Chester Beatty Papyrus Namba 2 (P⁴⁶) em bilong yia 200 C.E. samting, na dispela i makim olsem ol Kristen bilong pastaim i tingim dispela pas olsem wanpela pas Pol i bin raitim. Sampela saveman bilong bipo i tokaut olsem dispela pas em bilong Pol, olsem ol i bin mekim long ol narapela pas em i raitim.

⁵ Wanem samting i kirapim Pol long raitim pas long ol Kolosi? Wanpela samting em olsem: Onesimus i laik go bek long Kolosi na em inap kisim pas i go. Na narapela samting em olsem: I no longtaim i go pinis na Epafras i kam i stap wantaim Pol na tokim em long ol samting i kamap long Kolosi. (Kl. 1:​7, 8; 4:12) Wanpela samting i laik bagarapim kongrigesen long Kolosi. Ol lotu bilong dispela taim bipo i laik bruk na pinis, na ol man i bungim sampela olpela bilip na kamapim ol nupela lotu. Na i gat olkain giaman save bilong ol haiden, em ol i save tambuim kaikai, na mekim wok marila, na lotuim ol god giaman, na pret long masalai samting. Na ol Juda tu i tambuim kaikai na ol i gat ol lo long ol bikpela de bilong lotu. I olsem ol dispela kain tingting na pasin i paulim sampela Kristen long dispela kongrigesen. Yumi no save wanem hevi i bin kamap, tasol yumi save em bikpela hevi liklik, long wanem, Epafras i kirap na wokabaut longwe tru i go long Rom bilong lukim Pol. Tasol i no olsem bilip bilong olgeta long kongrigesen i bagarap. Nogat. Long wanem, Epafras i tok ol Kristen long Kolosi i laikim tru ol narapela na ol i holimpas bilip na sanap strong. Taim Pol i harim dispela ripot, em i raitim pas long kongrigesen long Kolosi bilong kirapim ol long bihainim stretpela save na lotu i stret long ai bilong God. Pas i kamapim klia olsem maski i gat olkain giaman save bilong ol haiden, na pasin bilong lotuim ol ensel, na ol pasin tumbuna bilong ol Juda, God i bin givim bikpela namba long Krais na em i stap Het bilong olgeta samting.

HELPIM YUMI OLSEM WANEM?

¹² Taim tupela brata bilong Rom i kamap pinis long Kolosi, yumi save, kwiktaim tok bilong dispela samting i go nabaut namel long ol brata, na ol i bung wantaim, ating long haus bilong Filemon, bilong harim ol tok bilong pas Pol i raitim. (Fm. 2) Pas i kamapim ol gutpela tok i tru long wok stret Krais i holim, na long ol i mas kisim stretpela save! Pas i daunim giaman save bilong ol man, na pasin tumbuna bilong lain Juda, na em i litimapim bel isi Krais i save givim long yumi na ol tok bilong em! Dispela i strongim tru tingting na bel bilong olgeta long kongrigesen​—ol wasman, ol man marit, ol meri marit, ol papa, ol pikinini, ol bosman, na ol wokboi nating. I gat ol gutpela tok bilong helpim Filemon na Onesimus, em ol i pas gen wantaim olsem bosman na wokboi. Pas i kamapim ol gutpela tok bilong helpim ol wasman long stretim bek kongrigesen bambai ol i ken bihainim stret tok i tru! Tok bilong Pol i helpim ol Kolosi long pilim tru olsem ol i mas givim bel tru long wok bilong Jehova! Na ol gutpela tok Pol i givim long ol Kolosi olsem ol i mas lusim olkain tingting na pasin bilong dispela graun em inap kalabusim ol, ol dispela tok i gutpela bilong helpim lain Kristen long nau tu.​—Kl. 1:​9-​11, 17, 18; 2:8; 3:​15, 16, 18-​25; 4:1.

¹³ Long Kolosi 4:​6 i gat sampela gutpela tok tru bilong helpim ol wokman Kristen, olsem: “Oltaim yupela i mas mekim gutpela tok tasol, em olkain tok ol man i save laik long harim. Yupela i mas tingting gut na traim long bekim gut tok bilong olgeta man.” Sapos yumi mekim ol gutpela tok i tru, dispela bai kirapim ol man i gat gutpela bel na bai ol i gat laik long harim dispela tok, na em bai helpim ol inap oltaim oltaim. Na sapos Kristen i tingting gut, na em i gat gutpela bel na em i beten, em bai kisim planti blesing long Jehova: “Yupela i mas holim strong pasin bilong prea. Na long taim yupela i prea, yupela i mas tingting gut na yupela i mas tenkyu long God.” Na taim yumi bung wantaim ol brata Kristen, dispela i strongim yumi na yumi amamas! Pol i tok: “Yupela wan wan i mas skulim ol arapela Kristen na givim gutpela tingting na save long ol, bai ol i ken mekim gutpela pasin tasol. Yupela i mas tenkyu long God long bel bilong yupela, na yupela i mas singim ol song.” (4:2; 3:16) Taim yu stadi long ol tok bilong pas bilong ol Kolosi bai yu lukim planti narapela gutpela tok em inap givim gutpela tingting long yu.

¹⁴ Long pasin bilong bihainim Lo Bilong Moses, pas i tok: “Dispela ol samting ol i olsem ol piksa nating bilong ol samting i laik kamap bihain. Tasol Krais em i samting tru.” (Kl. 2:17) Dispela pas i kamapim klia olsem Krais em i samting tru. Planti taim pas i stori long ol gutpela samting bilong heven ol man i pas wantaim Krais i wet long kisim. (1:​5, 27; 3:4) Ol dispela man i ken tenkyu tru long Papa, long wanem, em i bin kisim bek ol long strong bilong tudak na putim ol “insait long [kingdom] bilong Pikinini bilong en, em dispela Pikinini em i save laikim tru.” Olsem na nau ol i stap aninit long dispela Man em i “piksa tru bilong dispela God yumi no inap lukim, na God i bin wokim em paslain long olgeta narapela samting; long wanem, long rot bilong em olgeta narapela samting i bin kamap long heven na long graun, ol samting yumi inap lukim na ol samting yumi no inap lukim, maski em ol man i sindaun long sia king o ol man i gat biknem o ol gavman o ol lain i gat namba na strong.” Dispela Man em inap tru long i stap King long Kingdom Bilong God na bosim ol samting long stretpela pasin. Olsem na Pol i tokim ol Kristen em God i bin makim ol: “God i kirapim yupela pinis wantaim Krais, olsem na yupela i mas wok long kisim ol samting bilong antap. Long dispela ples antap, Krais i sindaun long sia king bilong en long han sut bilong God.”​—1:​12-​16, NW; 3:1.

[Ol Futnot]