Pasin Laikim Bilong Ol “i Kamap Moa Yet”
LONG 2004, planti bagarap bilong bikpela win na ren samting i kamap long Japan. Sampela bilong ol dispela bagarap em ol bikpela saiklon, bikpela tait, na guria. Ol i bagarapim tru laip bilong planti man, na ol Witnes Bilong Jehova tu. (Saveman 9:11) Tasol ol dispela bagarap i opim rot long ol Witnes i soim pasin laikim bilong ol long narapela narapela.—1 Pita 1:22.
Olsem: Long mun Julai, bikpela ren tru i bin pundaun na wanpela wara long sentral Japan i solap na i tait. Bikpela tait i bagarapim 20 samting haus bilong ol Witnes Bilong Jehova. Long wanpela Haus Kingdom, wara i solap i go antap inap 1 mita. Wantu ol Witnes bilong ol kongrigesen i stap klostu i kam helpim ol. Planti handet volantia i klinim ol haus em graun malumalum i pulap long en. Insait long tupela wik tasol ol i klinim gut Haus Kingdom na stretim ol hap bilong en i bin bagarap.
Long Oktoba 23, bikpela guria—strong bilong en em 6.8 long skel Rikta—i bagarapim wankain ples. Sori tru, inap 40 manmeri i bin dai, na winim 100,000 manmeri i mas lusim ol haus bilong ol. I no gat wara, ges na pawa. Maski hap em bikpela bagarap i kamap long en i stap longwe olsem 50 kilomita tasol, Haus Kingdom ol i bin stretim i no bagarap. Olsem na inap liklik taim dispela Haus Kingdom i stap olsem ples bilong bungim ol kaikai samting bilong helpim ol man i kisim bagarap. Kwiktaim ol wasman Kristen i kirap long sekim ol wanbilip bilong ol sapos ol i stap orait o nogat, na ol i amamas olsem i no gat wanpela i kisim bagarap o i dai. Long de bihain, long bikmoning tru 6-pela Witnes em ol i bin kisim bagarap long bikpela tait i bin kamap long mun Julai, ol i amamas long wok volantia long bringim kaikai na wara i go long ol hap guria i bagarapim. Sampela aua tasol bihain long bikpela guria, ol klos na kaikai samting bilong helpim ol man i stap pinis.
Wanpela elda i tok: “Ol man i bin kisim bagarap long bikpela tait i tingim wok bilong helpim ol man em guria i bagarapim ol, i olsem wanpela rot bilong kamapim amamas bilong ol long helpim em ol yet i bin kisim. Ol i wok strong tru kirap long bikmoning i go inap biknait. Tasol pes bilong ol i lait na ol i amamas!”
Maski bikpela tait o guria i painim ol, dispela i no inap bagarapim pasin laikim i stap namel long lain brata Kristen bilong ol Witnes Bilong Jehova. Taim kain bagarap olsem i kamap, ol Kristen i pilim tok aposel Pol i mekim long ol wanbilip long Tesalonaika: “Yupela olgeta wan wan i save givim bel bilong yupela long ol arapela, na dispela pasin i kamap moa yet.”—2 Tesalonaika 1:3.