Buk Bilong Baibel Namba 19—Buk Song
Ol Man Bilong Raitim: Devit na sampela moa
Ples Ol i Bin Raitim: Yumi no save
Raitim Pinis: 460 B.C.E. samting
1. Wanem kain song i stap long Buk Song?
BUK Song em 150 song bilong lotu i gat musik bilong en, na lain bilong Jehova long bipo ol i save mekim long taim ol i bung long haus bilong Jehova long Jerusalem bilong lotu long em. Em ol song bilong litimapim nem bilong God Jehova, na ol beten bilong kisim marimari na helpim long God, na ol song bilong autim bilip, na bilong givim tenkyu long God na amamas tru. Sampela song i stori long ol samting i bin painim lain Israel, na ol i tokaut long pasin sori na ol strongpela wok bilong Jehova. Ol tok profet i pulap long ol dispela song na truim bilong planti i kamap pinis. Planti tok bilong ol dispela song i gutpela bilong skulim na strongim yumi. Ol man i raitim ol song ol i raitim gutpela tok tru na ol tok piksa, na taim man i kaunim, bel bilong em i pilim tru. Ol dispela song i olsem gutpela kaikai bilong spirit ol i redim gut na putim i stap bilong yumi kisim.
2. (a) Ol i bin kolim wanem ol nem long Buk Song? Wanem insait bilong en? (b) Ol sam em wanem samting?
2 Olsem wanem long nem bilong dispela buk, na husat i bin raitim? Long Baibel Hibru ol i kolim Seʹpher Tehil·limʹ, em “Buk Bilong Ol Song Bilong Litimapim Nem Bilong God,” o ol i kolim Tehil·limʹ tasol, em olsem “Ol Song Bilong Litimapim Nem Bilong God.” Tok Tehil·lahʹ i makim wanpela song tasol. (Lukim rait antap long Song 145.) I stret ol i kolim nem olsem long dispela buk, long wanem, ol dispela song i litimapim tru nem bilong God. Narapela nem bilong en, “Ol Sam,” em ol i kisim long tok Grik Psal·moiʹ long Baibel Septuagint, na dispela tok i makim ol song bilong mekim wantaim musik. Long Ol Skripsa Grik, dispela tok i stap long Luk 20:42 na Aposel 1:20. Ol sam em ol song bilong lotu bilong litimapim nem bilong God.
3. Ol het-tok i givim wanem save long yumi long ol man i bin raitim ol song?
3 Planti song i gat olsem liklik het-tok bilong en, na planti het-tok i kolim nem bilong man bilong raitim song. Inap 73 het-tok i kolim nem bilong Devit, em i bin “raitim planti gutpela song bilong ol Israel i ken singim.” (2 Sml 23:1) Yumi ken ting olsem Devit i bin raitim Song 2 na 72 na 95 tu. (Lukim Aposel 4:25, na Song 72:20, na Hibru 4:7.) Na Song 10 na 71 i olsem hap tok moa bilong skruim i go long Song 9 na 70; olsem na yumi ken ting Devit i bin raitim Song 10 na 71 tu. Na 12-pela song i tok Asap i bin raitim, tasol ating lain bilong Asap i bin raitim, long wanem, sampela i stori long samting i bin kamap taim Asap i dai pinis. (Sng 79; 80; 1 Sto 16:4, 5, 7; Esr 2:41) Inap 11-pela song em ol lain Kora i bin raitim. (1 Sto 6:31-38) Song 43 i skruim tok bilong Song 42, olsem na ating ol lain Kora i bin raitim dispela song tu. Het-tok bilong Song 88 i kolim nem bilong “ol lain Kora” na bilong Heman tu, na Etan i bin raitim Song 89. Song 90 em bilong Moses, na ating Song 91 tu. Song 127 em bilong Solomon. Planti song i kolim nem bilong man bilong raitim na yumi save, narapela narapela man i bin raitim ol song.
4. Ol i bin raitim insait long hamas yia?
4 Buk Song em i bikpela buk, winim olgeta narapela buk bilong Baibel. Ol i bin raitim insait long bikpela hap taim, olsem Song 90 na 126 na 137 i makim, kirap long taim bilong Moses (1513-1473 B.C.E.) na i kam inap long taim ol Israel i lusim Babilon na taim bilong Esra (537-460 samting B.C.E.). Em inap olsem 1,000 yia. Tasol ol samting ol song i stori long en i karamapim bikpela hap taim moa, kirap long taim God i bin wokim ol samting, na tu ol samting God i bin mekim long lain bilong em i kam inap long taim ol i raitim laspela song long Buk Song.
5. (a) Olsem wanem Buk Song i kamapim klia olsem ol i no mekim nabaut? (b) Ol het-tok i givim wanem sampela save moa long yumi? (c) Taim ol man i kaunim ol song, bilong wanem i no gat wok long kolim liklik hap tok Hibru “Seʹlah”?
5 Buk Song i kamapim klia olsem ol i save stretim gut ol wok na mekim stret. Taim Devit i tok: “God na king bilong mi, olgeta manmeri i lukim yu winim pinis dispela pait na yu amamas i kam . . . insait long haus bilong yu. Ol man i singim song ol i go pas, na ol man bilong mekim musik ol i kam bihain, na ol yangpela meri i save paitim ol liklik kundu, ol i wokabaut namel. Ol i singim song olsem, ‘Yumi manmeri bilong God, yumi bung pinis, orait yumi mas litimapim nem bilong God.’ ” (Sng 68:24-26) Olsem na sampela het-tok i stori long “man i bosim musik,” na ol tok bilong musik tu. Sampela het-tok i stori long as bilong singsing o wok bilong en, na pasin bilong mekim. (Lukim het-tok bilong Song 6, 30, 38, 60, 88, 102, 120.) Long 13 song bilong Devit, olsem Song 18 na 51, het-tok i stori liklik long ol samting i bin kamap na Devit i kirap raitim song. Inap 34 song i no gat het-tok. Long tok Hibru i gat wanpela liklik tok, em “Seʹlah,” em i kamap 71 taim long ol song na ol man i no save gut long wok bilong en. Ol i ting em i makim taim bilong malolo long mekim musik o singsing na tingim ol tok long bel. Olsem na taim ol man i kaunim tasol tok bilong ol song, i no gat wok long kolim dispela tok.
6. (a) Buk Song i gat wanem 5-pela hap? (b) Husat tru i stretim ol song na mekim i kamap wanpela buk?
6 Long bipo yet, ol i wokim Buk Song long 5-pela hap olsem: (1) Song 1-41; (2) Song 42-72; (3) Song 73-89; (4) Song 90-106; (5) Song 107-150. Ol man i ting Devit i paslain long bungim ol song. Tasol Jehova i givim wok long pris Esra bilong stretim ol song na mekim i kamap wanpela buk, em man ‘i save gut long lo God i bin givim long han bilong Moses.’—Esr 7:6.
7. I gat wanem samting moa bilong Buk Song em yumi ken tingim?
7 Ol i wok long bungim bungim ol song, olsem na sampela song i kamap gen long ol narapela narapela hap bilong buk, olsem Song 14 na 53; 40:13-17 na Sng. 70; 57:7-11 na 108:1-5. Long pinis bilong olgeta 5-pela hap bilong Buk Song i gat tok olsem, ‘Yumi mas litimapim nem bilong God.’ Long hap 1, 2, 3, na 4, ol manmeri i bekim tok, na long hap 5, Song 150 olgeta i tok yumi mas litimapim nem bilong God.
8. Stori long pasin bilong bihainim ol leta Hibru na raitim song.
8 Ol i raitim 9-pela song long narapela kain pasin, olsem: Ol i bihainim ol leta Hibru. (Song 9, 10, 25, 34, 37, 111, 112, 119, na 145) Long ol dispela song, namba wan tok bilong namba wan ves (o ol ves long namba wan hap) i kirap long namba wan leta Hibru, em ʼaʹleph (א), na namba 2 ves i kirap long namba 2 leta, em behth (ב), mekim olsem i go na inapim olgeta leta o klostu olgeta leta bilong rait Hibru. Ating ol i raitim olsem bilong helpim ol manmeri long tingim ol tok bilong song—sampela song i longpela tru, olsem Song 119, na i hatwok long ol man bilong mekim singsing long haus lotu i tingim ol tok bilong en! Long tok Hibru, long Song 96 ves 11, ol 4-pela tok long namba wan hap bilong ves i kirap long 4-pela leta bilong nem bilong Jehova, em YHWH (יהוה).
9. (a) Wanem as bilong planti song na ol tok bilong ol i kirapim tru tingting na bel bilong man? (b) Wanem samting moa i givim strong long ol dispela tok na mekim i kamap naispela?
9 Ol i raitim gut ol dispela song bilong lotu long naispela tok Hibru. Ol dispela tok i kirapim tru bel na tingting bilong ol man, long wanem, ol i stori long ol samting i save painim yumi olgeta. I gat planti tok piksa. As bilong planti tok em ol kain kain samting i bin painim Devit—em i bin lukautim ol sipsip, na pait long Goliat, na em i kamap man bilong wokim musik bilong king, na king i rausim em na em i stap namel long ol gutpela pren na ol birua, na em i king na man bilong winim pait, na em i gutpela papa i gat hevi insait long lain bilong em, na tupela taim em i mekim bikpela rong na bel bilong em i pas olgeta, tasol oltaim em i save givim bel long lotuim Jehova na em i laikim tumas Lo bilong Em. Olsem na Buk Song i kamapim gut amamas na bel hevi bilong ol man! Taim ol i raitim ol song long tok Hibru, ol i save kamapim wankain tingting long narapela narapela tok, na skelim gutpela pasin wantaim pasin nogut, na dispela tu i givim strong long ol dispela tok na mekim i kamap naispela.—Sng 1:6; 22:20; 42:1; 121:3, 4.
10. Olsem wanem yumi ken save, Buk Song em i hap tru bilong Baibel?
10 Ol dispela olpela song tru bilong litimapim nem bilong Jehova, yumi inap save ol i hap tru bilong Baibel, long wanem, ol tok bilong ol i stret wantaim ol narapela tok bilong Baibel. Ol man bilong raitim Nupela Testamen i kolim planti tok bilong Buk Song. (Sng 5:9 [Ro 3:13]; Sng 10:7 [Ro 3:14]; Sng 24:1 [1 Ko 10:26]; Sng 50:14 [Mt 5:33]; Sng 78:24 [Jo 6:31]; Sng 102:25-27 [Hi 1:10-12]; Sng 112:9 [2 Ko 9:9]) Long laspela song Devit i raitim, em i tok: “Spirit bilong Bikpela i autim tok long maus bilong mi.” Kirap long taim Samuel i putim wel long Devit, spirit bilong God i stap long em. (2 Sml 23:2; 1 Sml 16:13) Ol aposel i kamapim sampela tok bilong Buk Song. Pita i tok: “Bipo Holi Spirit i mekim Devit i autim wanpela tok, na dispela tok i stap long buk bilong God,” na man bilong raitim pas i go long ol Hibru, em i kolim ol tok bilong Buk Song na em i tok, em ol tok bilong God o “bilong Holi Spirit.”—Ap 1:16; 4:25; Hi 1:5-14; 3:7; 5:5, 6.
11. Olsem wanem tok bilong Jisas yet i strongim dispela tok olsem Buk Song em i hap tru bilong Baibel?
11 Na strongpela samting bilong makim Buk Song em i hap tru bilong Baibel, em olsem: Taim Jisas i kirap bek em i tokim ol disaipel: “Olgeta samting bipo ol i raitim long mi long lo bilong Moses na long buk bilong ol profet na long Buk Song, dispela olgeta samting i mas kamap tru.” Jisas i kolim olgeta 3-pela hap bilong Olpela Testamen olsem ol Juda i save long en. Em i kolim Buk Song bilong makim namba 3 hap (ol Rait Holi), long wanem, Buk Song em i namba wan buk long dispela hap. Yumi ken save em i tok long olgeta hap bilong Ol Skripsa Hibru, long wanem, paslain liklik em i skulim tupela disaipel long rot bilong Emeus “long as bilong olgeta hap bilong buk bilong God i toktok long em yet.”—Lu 24:27, 44.
HELPIM YUMI OLSEM WANEM?
23. (a) Wanem tok i gat laip i stap long Buk Song? (b) Olsem wanem Buk Song i litimapim nem na wok king bilong Jehova?
23 Ol man bilong raitim ol song long Baibel ol i raitim gut ol naispela tok tru. Long olgeta tok ples, i no gat planti gutpela rait olsem. Tasol ol dispela tok i no tok nating; em ol tok i gat laip i kam long God Jehova yet, em Nambawan Bikpela King bilong heven na graun. Ol dispela song i tokaut long Jehova, em i As bilong ol tok bilong Baibel, na ol i lainim yumi gut long ol as tok bilong Baibel. Ol i tokaut klia olsem God Jehova em i bin wokim skai na graun na olgeta samting i stap long en. (Sng 8:3-9; 90:1, 2; 100:3; 104:1-5, 24; 139:14) Buk Song i litimapim tru nem bilong Jehova. Long Buk Song long tok Hibru, dispela nem i stap inap 700 taim; na sotpela nem “Ja” i stap 43 taim; i olsem olgeta wan wan song i kolim nem bilong God inap 5-pela taim. Na 350 taim ol i kolim Jehova olsem ʼElo·himʹ, o God. Na sampela song i kolim Jehova olsem “God, Bikpela,” na “God, Bikpela I Gat Olgeta Strong.” Dispela i kamapim klia olsem em i Nambawan Bikpela King.—68:20; 69:6; 71:5; 73:28; 140:7; 141:8.
24. Buk Song i stori olsem wanem long ol man bilong graun? Na em i givim wanem ol gutpela tok long yumi long pasin yumi mas bihainim?
24 Ol song i stori olsem God i save stap oltaim, tasol ol man bilong graun i no olsem. Taim mama i karim ol, ol i gat sin na i mas i gat man bilong baim bek ol; ol i save dai na “kamap graun gen”; ol i go long matmat. (6:4, 5; 49:7-20; 51:5, 7; 89:48; 90:1-5; 115:17; 146:4) Buk Song i tok, yumi mas bihainim lo bilong God na bilip strong long em. (1:1, 2; 62:8; 65:5; 77:12; 115:11; 118:8; 119:97, 105, 165) Buk Song i toksave long pasin bikhet na ‘ol rong yumi no save long en’ (19:12-14; 131:1) na i tok, yumi mas poromanim ol gutpela man i save tok tru oltaim. (15:1-5; 26:5; 101:5) Sapos yumi bihainim stretpela pasin bai Jehova i laikim yumi. (34:13-15; 97:10) Yumi ken wetim gutpela samting. Buk Song i tok, “Bikpela, . . . yu save kisim bek mipela”; em i lukautim ol lain i aninit long em “bai ol i no i dai.” (3:8; 33:19) I gat ol tok profet tu.
25. (a) Wanem kain tok i pulap long Buk Song? (b) Olsem wanem Pita i mekim wok long Buk Song bilong makim Man i Winim Devit?
25 I gat planti tok profet long Buk Song i makim Krais Jisas, em pikinini bilong Devit, na ol wok em bai mekim olsem man God i makim na King.a (Mt 1:1) Lain Kristen i kamap long de Pentikos long yia 33, na long rot bilong spirit holi God i wok long givim save long ol aposel long truim bilong ol dispela tok profet. Long dispela de yet, Pita i mekim tok long “Jisas bilong Nasaret” na kamapim planti tok bilong Buk Song. Long namba 2 hap bilong tok, em i kamapim planti tok bilong Buk Song i makim olsem Krais Jisas em Man i Winim Devit, na Jehova i no ken larim Jisas i stap long ples bilong ol man i dai pinis, Em i mas kirapim bek em. “Devit i no bin i go long heven,” tasol Bikpela bilong Devit i go, olsem Devit i tok profet pinis long Song 110:1. Husat i Bikpela bilong Devit? Pita i tokaut klia olsem: “Dispela Jisas yupela i nilim em long diwai”!—Ap 2:14-36; Sng 16:8-11; 132:11.
26. Tok bilong Pita i helpim ol man olsem wanem?
26 Ol tok Pita i mekim, em Buk Song i as bilong en, em i helpim ol man olsem wanem? Long dispela de yet, inap olsem 3,000 manmeri i kisim baptais na kam insait long lain Kristen.—Ap 2:41.
27. “Holi Spirit” i makim wanem truim bilong Song 2?
27 Bihain liklik, long wanpela bung, ol disaipel i beten long Jehova na kolim tok bilong Song 2:1, 2. Ol i tok, taim ol hetman i bung wantaim bilong daunim “Jisas, dispela wokman bilong [God] yet,” dispela i truim tok bilong Song 2. Na Baibel i tok, long dispela taim “Holi Spirit i pulap long ol.”—Ap 4:23-31.
28. (a) Pol i kamapim sampela tok bilong Buk Song bilong helpim wanem ol tok long Hibru sapta 1 i go 3? (b) Olsem wanem Song 110:4 i helpim stori bilong Pol long wanpela pris i wankain olsem Melkisedek?
28 Orait, nau yumi ken lukim pas i go long ol Hibru. Sapta 1 na 2 i kamapim sampela tok bilong Buk Song i stori long biknem bilong Jisas, em i Pikinini bilong God i sindaun long sia king long heven na em i winim ol ensel. Pol i kolim tok bilong Song 22:22 na sampela tok moa na makim olsem Jisas i gat “ol brata,” ol i hap lain tumbuna pikinini bilong Abraham na God “em i bin singautim” ol bilong kisim laip long heven. (Hi 2:10-13, 16; 3:1) Na kirap long Hibru 6:20 i go inap long pinis bilong sapta 7, Pol i stori long narapela wok bilong Jisas, em i “hetpris wankain olsem Melkisedek, na em bai i stap hetpris oltaim oltaim.” God i bin mekim dispela tok promis long Song 110:4, na Pol i kamapim planti taim bilong makim olsem wok pris bilong Jisas i winim tru wok pris bilong Aron. God yet i mekim tok tru antap na makim Jisas i kamap pris long heven, i no long graun, na em bai “i stap pris oltaim oltaim”—ol gutpela samting wok pris bilong em i kamapim bai stap oltaim oltaim.—Hi 7:3, 15-17, 23-28.
29. Yumi mas tingim wanem gutpela pasin bilong givim bel long God, olsem Buk Song i kamapim na Hibru 10:5-10 i stori long en?
29 Na Hibru 10:5-10 i stori long Jisas i laik tru long bihainim laik bilong God—maski em i mas i dai olsem ofa. Ol tok bilong Devit long Song 40:6-8 i as bilong dispela tok. Jisas i givim bel tru long God na dispela inap helpim yumi. Yumi mas tingim gut dispela pasin bilong Jisas na bihainim bambai God i ken orait long yumi.—Lukim tu Song 116:14-19.
30. Buk Song i kolim wanem ol samting i mas painim Jisas? Olsem wanem ol dispela tok i strongim em?
30 Ol song i stori long planti samting Jisas i mas mekim na em i mas karim bikpela pen na dai long diwai. Ol song i stori long ol man bai givim wain nogut long em, na ol bai pilai satu bilong tilim ol klos bilong em, na sutim han lek bilong em, na tok bilas long em, na em bai karim bikpela pen long tingting na krai long God olsem: “God bilong mi, God bilong mi, bilong wanem yu lusim mi?” (Mt 27:34, 35, 43, 46; Sng 22:1, 7, 8, 14-18; 69:20, 21) Olsem Jon 19:23-30 i makim, tok bilong ol song i bin strongim Jisas long dispela taim bilong karim bikpela pen, long wanem, em i save olgeta samting ol song i tok long en i mas kamap tru. Jisas i save, ol song i tok tu long em bai kirap bek na kisim biknem. Ating em i tingim dispela samting long taim em i “singim wanpela song” wantaim ol aposel long apinun paslain long em i dai.—Mt 26:30.
31. Buk Song i tok wanem long Pikinini bilong kisim Kingdom na lain bilong Jisas?
31 Olsem na Buk Song i makim klia olsem Krais Jisas em i pikinini bilong Devit na em i Pikinini bilong kisim Kingdom, na nau em i kisim biknem olsem King na Pris long Saion long heven. I no gat spes inap long mipela i kolim olgeta tok bilong Buk Song, em Nupela Testamen i kamapim truim bilong en long Jisas, em man God i makim, tasol mipela raitim lista bilong sampela moa long hia: Sng 78:2—Mt 13:31-35; Sng 69:4—Jo 15:25; Sng 118:22, 23—Mk 12:10, 11 na Ap 4:11; Sng 34:20—Jo 19:33, 36; Sng 45:6, 7—Hi 1:8, 9. Na Buk Song i tok profet tu long lain tru bilong Krais—i no ol wan wan—em i tok long wanpela lain God i kisim namel long olgeta lain bilong mekim wok bilong litimapim nem bilong Em.—Sng 117:1—Ro 15:11; Sng 68:18—Ef 4:8-11; Sng 95:7-11—Hi 3:7, 8; 4:7.
32. (a) Taim yumi stadi long Buk Song, dispela i kamapim klia wanem samting bilong Jehova na ol samting em i laik mekim long rot bilong Kingdom? (b) Sapos yumi pilim tru gutpela wok king bilong Jehova, yumi mas mekim wanem bilong kamapim klia olsem yumi stap gut long em na tenkyu long em?
32 Yumi skelim pinis Buk Song na dispela i helpim yumi long pilim tru wok king bilong God Jehova, em i mekim long rot bilong Pikinini bilong kisim Kingdom, na dispela wok king i litimapim nem bilong Em na i kamapim klia stretpela pasin bilong Em. Oltaim yumi mas i stap namel long ol manmeri i stap gut long God na i save tokaut long ‘strong bilong God na em i bikpela king,’ olsem Devit i tok long Song 145, em “song bilong litimapim nem bilong God”: “Bai ol i tok long biknem bilong yu . . . na bai ol i stori long bikpela strong bilong yu. Olsem na bai olgeta manmeri i ken save long ol bikpela wok yu bin mekim. Na ol i ken save olsem yu stap strongpela king, na nem bilong yu i bikpela tru. Yu bai i stap king na bosim olgeta lain manmeri oltaim oltaim.” (Sng 145:5, 11-13) Truim bilong dispela tok profet i kamap long nau—ol i tokim olgeta lain manmeri, Kingdom bilong God long han bilong Krais i kamap pinis. Yumi mas tenkyu tru long God long Kingdom na King bilong en! Laspela tok bilong Buk Song i stret tru, olsem: “Yupela olgeta samting i gat laip, litimapim nem bilong Bikpela! Litimapim nem bilong Bikpela!”—150:6.
[Futnot]
a Buk Insight on the Scriptures, Vol. 2, pes 710, 711.