Planti manmeri i save pilim hatwok long stori long maritpasin. Tasol taim Baibel i stori long maritpasin, em i tokaut stret na mekim long pasin rispek. Tok Baibel i mekim long dispela i bilong helpim yumi. Dispela i stret, long wanem, Baibel i kam long Jehova, em Man Bilong Wokim yumi. So em i save long wanem samting i gutpela bilong helpim yumi. Em i tokim yumi long wanem samting yumi mas mekim bilong amamasim em na wanem samting bai helpim yumi long stap amamas oltaim.

1. Jehova i gat wanem tingting long maritpasin?

Maritpasin em presen i kam long Jehova. Em i laik bai man na meri i marit i kisim amamas long dispela pasin. Dispela presen i opim rot long ol marit long kamapim ol pikinini, na tu, long soim pasin laikim long narapela narapela. Olsem na Baibel i tok: “Yu ken amamas wantaim meri yu bin maritim taim yu yangpela yet.” (Provep 5:18, 19) Jehova i laik bai ol marit Kristen i stap gut long poroman marit bilong ol, na ol i no ken mekim pasin adaltri.​—Ritim Hibru 13:4.

2. Pasin pamuk i makim wanem samting?

Baibel i tokim yumi olsem “ol man i save mekim pasin pamuk, . . . bai i no inap i go insait long Kingdom Bilong God.” (1 Korin 6:9, 10) Ol man bilong raitim Baibel long tokples Grik, ol i yusim tok Grik por·neiʹa bilong makim pasin pamuk. Pasin pamuk i makim olgeta kain pasin olsem (1) ol man na meri i no marit i slip wantaim,a (2) man i slip wantaim man o meri i slip wantaim meri, na (3) man o meri i slip wantaim animal. Taim yumi “sakim pasin pamuk,” yumi amamasim Jehova na dispela i lukautim yumi yet.​—1 Tesalonaika 4:3.

KISIM SAMPELA SAVE MOA

3. Ranawe long pasin pamuk

Josep, wanpela bilipman, i sakim wanpela meri i laik slip wantaim em. Ritim Stat 39:1-12, na stori long ol dispela askim:

• Wanem samting i kirapim Josep long ranawe?​—Lukim ves 9.

• Yu ting Josep i wokim gutpela disisen? Bilong wanem?

VIDIO: Stap Longwe Long Pasin Pamuk (5:06)

Jehova i laik bai yumi olgeta i sakim pasin pamuk. Ritim 1 Korin 6:18, na stori long ol dispela askim:

• Wanem sampela samting inap kamap na kirapim man long mekim pasin pamuk?

• Olsem wanem yu ken ranawe long pasin pamuk?

4. Yu ken sakim ol traim

VIDIO: Sakim Traim Long Rot Bilong Ritim Baibel (3:02)

• Taim brata long dispela vidio i luksave olsem tingting na pasin bilong em inap mekim na em i no stap gut long meri bilong em, em i mekim wanem?

Sampela taim ol Kristen tu i hatwok long putim tingting bilong ol long ol samting i klin. Olsem wanem yu ken abrusim pasin bilong tingting oltaim long ol samting i no klin? Ritim Filipai 4:8, na stori long ol dispela askim:

• Yumi mas tingting long wanem ol samting?

• Olsem wanem pasin bilong ritim Baibel na bisi long mekim wok bilong Jehova inap helpim yumi long sakim traim bilong mekim sin?

5. Ol lo bilong Jehova i bilong helpim yumi

VIDIO: I No Gat Gutpela Tingting (9:31)

• Wanpela yangpela man i mekim wanem na traim inap painim em?​—Lukim Provep 7:8, 9.

• Olsem Provep 7:​23, 26 i kamapim, pasin pamuk inap kamapim ol bikpela hevi. Sapos yumi bihainim pasin i klin, yumi bai abrusim wanem ol hevi?

• Taim yumi bihainim pasin i klin, olsem wanem dispela inap helpim yumi long stap amamas oltaim?

Sampela manmeri i ting olsem tok Baibel i mekim long pasin bilong man i maritim man na meri i maritim meri, em strongpela tok tumas. Tasol Jehova, em God i gat pasin laikim, em i laik bai olgeta manmeri i stap amamas oltaim. Bilong yumi inap i stap oltaim, yumi mas bihainim ol lo bilong em. Ritim 1 Korin 6:9-11, na stori long dispela askim:

• Long tingting bilong God, dispela laik bilong man i laik slip wantaim man na meri i laik slip wantaim meri, em dispela pasin tasol yumi mas sakim?

Bilong amamasim God, yumi olgeta i mas mekim ol senis. Yu ting gutpela samting inap kamap sapos yumi wok strong long mekim olsem? Ritim Buk Song 19:8, 11, na stori long ol dispela askim:

• Yu ting ol lo bilong Jehova long stretpela pasin i stret? Wai na yu ting olsem, o wai na yu ting nogat?

OL BIKPELA POIN

Maritpasin em presen i kam long Jehova. Em i laik bai man na meri marit i kisim amamas long en.

Riviu

• Wanem kain ol pasin i insait long pasin pamuk?

• Wanem samting bai helpim yumi long sakim pasin pamuk?

• Taim yumi bihainim ol stretpela lo bilong Jehova, olsem wanem dispela i helpim yumi?

MEKIM WOK PAINIMAUT

Kisim save long as na God i laik bai man na meri husat i laik sindaun wantaim ol i mas marit stret.

“Baibel i Tok Wanem Long Man na Meri i Sindaun Nating Wantaim na i No Marit?” (Atikol long websait)

Kisim save long wai na Baibel i tok olsem pasin bilong man i slip wantaim man na meri i slip wantaim meri em i no stret, tasol dispela i no makim olsem yumi mas heitim ol kain lain olsem.

“I Gat Rong Long Man i Slip Wantaim Man na Meri i Slip Wantaim Meri?” (Atikol long websait)

Kisim save long hau ol lo bilong God long maritpasin i banisim yumi.

“Yu Ting Pasin Bilong Putim Sem Long Maus Em Maritpasin?” (Atikol long websait)

Long ekspiriens “Ol i Mekim Pasin Rispek Long Mi,” lukim wanem samting i kirapim wanpela man i save slip wantaim man long senisim pasin bilong em na bai em i ken amamasim God.

“Baibel i Senisim i Stap Bilong Man” (Wastaua, Epril 1, 2011)

Long sampela kantri, ol man i bilip olsem man o meri i mas marit bilong i stap amamas. Tasol i no olgeta man na meri i marit i stap amamas na i no olgeta singel man na meri i stap amamas. Baibel i tok stap singel o marit, tupela wantaim em presen.

1. Wanem sampela gutpela samting bilong i stap singel?

Baibel i tok: “Man i marit, dispela i gutpela. Tasol man i no marit, dispela i gutpela moa.” (Ritim 1 Korin 7:32, 33, 38.) Long wanem ol rot pasin bilong i stap singel i “gutpela moa”? Ol singel Kristen i no gat poroman marit bilong lukautim. Olsem na ol inap long mekim planti samting moa. Olsem, sampela inap bihainim kain kain rot bilong mekim bikpela wok moa bilong autim tok, kain olsem go long narapela kantri na autim gutnius. Bikpela samting moa, ol inap lusim bikpela haptaim moa long i go klostu long Jehova.

2. Taim man na meri i marit stret, i gat wanem sampela gutpela samting bilong en?

Marit i gat sampela gutpela samting bilong en, wankain olsem pasin bilong stap singel tu. Baibel i tok “tupela i gutpela moa winim wanpela.” (Eklisiastis 4:9) Dispela i stret long ol Kristen tru em ol i bihainim ol stiatok bilong Baibel long marit bilong ol. Ol man na meri i marit stret, ol i bin mekim tok promis long laikim, rispektim, na tingim narapela narapela. Olsem na ol i stap bel isi moa winim ol man na meri i sindaun nating wantaim. Na ol pikinini bilong ol tu bai i stap bel isi.

3. Wanem tingting bilong Jehova long marit?

Taim Jehova i kamapim namba wan marit, em i tok: “Man bai lusim papa na mama bilong em na em bai pas wantaim meri bilong em.” (Stat 2:24) Jehova i laik bai man marit na meri marit i mas laikim narapela narapela na stap wantaim long laip olgeta bilong ol. Em i orait long divos sapos wanpela poroman marit i mekim pasin adaltri. Long kain taim olsem, Jehova i givim rait long poroman marit husat i no gat asua long makim olsem em bai divos o nogat.a (Matyu 19:9) Jehova i no orait long ol Kristen long maritim planti man o planti meri.​—1 Timoti 3:2.

KISIM SAMPELA SAVE MOA

4. Yusim gut presen bilong i stap singel

Jisas i tingim pasin bilong i stap singel olsem presen. (Matyu 19:11, 12) Ritim Matyu 4:23, na stori long dispela askim:

• Olsem wanem Jisas i yusim presen bilong i stap singel long mekim wok bilong Papa bilong em na helpim ol narapela?

Ol singel Kristen inap stap amamas long rot bilong yusim laip bilong ol olsem Jisas i bin mekim. Pilaim VIDIO, na stori long dispela askim.

VIDIO: Ol Singel i Stap Gut Long Jehova (3:11)

• Ol singel Kristen inap mekim wanem ol gutpela wok?

Yu save long dispela?

Baibel i no kolim stret hamas krismas man i mas i gat na em i ken marit. Tasol Baibel i tokim yangpela long wet pastaim inap long “em i no yangpela tumas,” em haptaim we laik bilong mekim maritpasin i strong tumas na em i no inap skelim gut ol samting na wokim disisen.​—1 Korin 7:36.

5. Skelim gut na makim man o meri yu laik maritim

Bilong skelim gut na makim man o meri yu bai maritim, em wanpela bikpela disisen yu bai wokim. Ritim Matyu 19:4-6, 9, na stori long dispela askim:

• Wai na Kristen i mas tingting gut pastaim na i no marit hariap?

Baibel inap helpim yu long luksave long wanem ol pasin man o meri i mas i gat bambai em i stap gutpela poroman marit. Bikpela samting moa, em long painim wanpela i laikim Jehova.b Ritim 1 Korin 7:39 na 2 Korin 6:14. Na stori long ol dispela askim:

• Wai na yumi mas maritim tasol wanpela wanbilip Kristen?

• Yu ting Jehova bai pilim olsem wanem sapos yu maritim wanpela i no laikim Em?

6. Holim wankain tingting olsem Jehova long marit

Long Israel bilong bipo, sampela man i tingim laik bilong ol yet tasol na ol i divosim ol meri bilong ol. Ritim Malakai 2:13, 14, 16, na stori long dispela askim:

• Sapos man o meri i no mekim pasin adaltri, na poroman marit bilong em i divosim em, wai na Jehova i heitim dispela pasin?

Pilaim VIDIO, na stori long dispela askim.

VIDIO: Marit—i Bilong Stap Oltaim (4:30)

• Sapos poroman marit bilong yu i no wanpela wanbilip, yu inap mekim wanem na bai marit bilong yu i stap gut?

7. Bihainim ol lo bilong Jehova long marit

VIDIO: Yu Inap Bihainim Ol Lo Bilong Jehova Long Marit (4:14)

Ritim Hibru 13:4, na stori long ol dispela askim:

• Yu ting ol lo bilong Jehova long marit i stret? Wai na yu ting olsem o wai na yu ting nogat?

Jehova i laik bai ol Kristen i mas rejistaim marit na divos bilong ol, long wanem, long planti kantri em lo bilong kantri long ol manmeri i marit i mas rejistaim marit na divos bilong ol. Ritim Taitus 3:1, na stori long dispela askim:

• Sapos yu marit, yu save tru olsem yu bin rejistaim marit bilong yu long gavman?

OL BIKPELA POIN

Stap singel na marit em ol presen i kam long Jehova. Maski yu singel o marit, yu inap i stap amamas sapos yu mekim ol samting i stret wantaim laik bilong Jehova.

Riviu

• Olsem wanem man o meri inap yusim gut singel laip bilong em?

• Wai na Baibel i tok long maritim tasol wanpela wanbilip Kristen?

• I gat wanem wanpela as tasol em Baibel i kolim bilong ol marit i ken divos?

MEKIM WOK PAINIMAUT

Wanem mining bilong dispela hap tok maritim “man i bihainim Bikpela”?

“Askim” (Wastaua, Julai 1, 2004)

Lukim tupela sotpela vidio inap helpim yu long wokim gutpela disisen long sait bilong boipren na gelpren na marit.

Yu Mas Redi Paslain Long Marit (11:53)

Kisim save long wai na wanpela brata i pilim olsem ol samting Jehova i givim em i dia tumas winim ol samting em i lusim.

Mi Laik Bai Em i Kisim Save Long Tok i Tru (1:56)

Wanem sampela samting man i mas skelim paslain long em i tingting long divos o seperet?

“Onarim ‘Samting God i Pasim Pinis’” (Wastaua, Disemba 2018)