Kristen i Mas Sanap Strong na Karim Hevi

“Yupela i mas wok strong tru long . . . sanap strong na karim hevi.”​—⁠2 PITA 1:​5, 6.

WANPELA wasman bilong raun na meri bilong em i go lukim wanpela lapun Kristen i gat 90 krismas samting, na em i bin mekim wok painia inap planti yia. Ol i toktok wantaim, na lapun i stori long ol bikpela wok em i bin mekim, na nau aiwara bilong em i pundaun na em i tok: “Tasol nau mi no inap mekim bikpela wok moa.” Wasman i opim Baibel long Matyu 24:13 na i kaunim tok bilong Jisas olsem: “Ol manmeri i stap strong inap long las de, God bai i kisim bek ol.” Na wasman i tokim lapun: “Maski yumi inap mekim bikpela wok o liklik wok, laspela wok yumi olgeta i mas mekim, em yumi mas i stap strong i go inap long taim bilong pinis.”

² Yumi olgeta Kristen i mas i stap strong na no ken les, i go inap long taim dispela pasin nogut bilong graun i pinis o inap long yumi dai. Yumi mas mekim olsem na bai Jehova i ken orait long yumi na yumi no ken lus. Yumi stap long wanpela resis bilong kisim laip, “na yumi mas lusim olgeta kain samting i mekim yumi i no inap ran strong . . . na yumi mas strongim bel na ran strong” inap long resis i pinis, na yumi no ken les. (Hibru 12:⁠1) Aposel Pita tu i tok, yumi mas “sanap strong na karim hevi.” (2 Pita 1:​5, 6) Yumi ken mekim olsem wanem?

Sanap Strong na Karim Hevi

³ Dispela tok “sanap strong na karim hevi,” long tok Grik (hy·po·meʹno) i olsem ‘mas i stap na no ken ranawe; sanap strong. W. Bauer na F. W. Gingrich na F. Danker i tok olsem, na Baibel i kolim inap 17 taim. Na dispela tok “karim hevi,” long tok Grik (hy·po·mo·neʹ) i olsem “wet i stap na no ken les,” na Baibel i kolim inap 30 taim. Long wanpela buk (A New Testament Wordbook) William Barclay i tok: ‘Dispela tok “karim hevi” i makim man i sanap strong na wet i stap na tingim gutpela samting em bai kisim bihain. Maski em i karim bikpela pen na hevi, em i tingting long winim dispela mak.’

⁴ Sapos yumi stap strong olsem, bai yumi no inap surik o les o lusim tingting long gutpela samting yumi wetim i kamap bihain, maski i gat sampela hevi o traim i painim yumi. (Rom 5:​3-5) Bai yumi no tingim tumas ol dispela samting. Bai yumi tingting tasol long winim dispela resis na kisim prais​—⁠em laip i stap oltaim long graun, na remnan bai stap long heven.​—⁠Jems 1:⁠12.

Bilong Wanem Yumi Mas Sanap Strong?

⁵ Yumi olgeta Kristen “i mas sanap strong.” (Hibru 10:36) Long wanem, Jems 1:2 i tok, “ol kain kain traim i kamap” long yumi. Dispela tok long tok Grik em i toktok long samting nogut i painim yumi wantu, olsem stilman i hansapim yumi o kain samting olsem. (Lukim Luk 10:30.) I gat tupela kain traim i save painim yumi, na as bilong wanpela, em sin yumi bin kisim long namba wan tumbuna, em Adam; na as bilong narapela traim, em yumi bihainim tok bilong Jehova na mekim wok bilong em nau long dispela taim nogut. (1 Korin 10:13; 2 Timoti 3:12) Wanem sampela traim yumi mas karim?

⁶ Bikpela sik. “Sik oltaim i save kamap” long ol Kristen tu olsem long Timoti. (1 Timoti 5:23) Yumi mas “sanap strong na karim hevi” sapos yumi gat bikpela sik na pen, na God i ken helpim yumi long mekim, na yumi ken tingting long gutpela samting bihain bai yumi inap kisim sapos yumi sanap strong na karim dispela hevi. Wanpela Witnes i gat 50 krismas samting na em i gat wanpela kain sik kensa, na ol dokta i katim em tupela taim, na ol i laik givim blut long em, tasol em i sakim. (Aposel 15:​28, 29) Kensa i go kamap long bel na long baksait bilong em. Em i gat bikpela pen tru, na no gat wanpela marasin inap kilim dispela pen. Tasol em i wok long tingim gutpela pe em bai kisim long nupela taim bihain, em laip oltaim. Em i autim tok i tru long ol dokta na nes na ol manmeri i kam lukim em, na em i mekim olsem i go inap long taim em i dai. Ating sik bilong yu i no bikpela olsem sik bilong dispela brata, tasol yu tu yu mas i stap strong na karim hevi bilong dispela sik bilong yu.

⁷ Bel hevi. Sampela bilong lain bilong Jehova tu em ‘bel bilong ol i hevi, na tingting bilong ol i bagarap.’ (Sindaun 15:13) Long nau “planti hevi nogut tru” i kamap, na dispela i mekim na sampela i stap bel hevi. (2 Timoti 3:⁠1) Wanpela nius (Science News) bilong Disemba 5, 1992 i tok: ‘Bihain long 1915 bel hevi i wok long kamap bikpela tru long ol nupela nupela lain man na i bagarapim ol.’ Sampela em tingting bilong ol i bagarap, o sampela samting nogut i bin painim ol na tingting wantaim bel bilong ol i no stap isi. Kain bel hevi olsem i bungim sampela Kristen long olgeta de na ol i mas karim, tasol ol i no les na surik. Ol i sanap strong yet na holimpas bilip na stap gut long Jehova, maski aiwara i pundaun.​—⁠Lukim Song 126:​5, 6.

⁸ Na sapos yumi sot tru long ol samting bilong skin em narapela kain traim. Wanpela brata long Nu Jesi long Amerika ol i pinisim em long wok, na nau em i tingting planti long olsem wanem em i ken lukautim famili bilong em long ol samting bilong skin, na nogut ol i rausim em long haus bilong em tu. Tasol em i no lusim tingting long ol gutpela samting Kingdom bai kamapim. Taim em i raun long painim narapela wok mani em i mekim wok painia haptaim tu, na bihain em i kisim wanpela wok bilong skin.​—⁠Matyu 6:​25-34.

⁹ Sapos wanpela bilong famili i dai pinis, hevi bilong dispela i save stap longpela taim. Na ating long olgeta yia, long taim em i bin dai, bai yu tingim yet na bai yu hevi gen. Na i no gat rong long krai long dispela samting. Ol manmeri i save krai long sampela i bin dai. Sapos yu krai, i no olsem yu no bilip long em bai kirap bek gen. (Stat 23:2; lukim tu Hibru 11:19.) Taim Lasarus i dai, Jisas i tokim Marta: “Brata bilong yu bai i kirap bek,” tasol taim ol narapela i krai, bel bilong Jisas “i sori tru na em tu i laik krai,” na bihain “Jisas i krai.” Tasol bihain moa Lasarus i kirap bek tru!​—⁠Jon 11:​23, 32-35, 41-44.

¹⁰ Yumi mas karim ol hevi i save painim yumi ol man, tasol i gat narapela samting tu na lain bilong Jehova i mas sanap strong na karim hevi. Jisas i tok, ol man “bai ol i bel nogut tru long yupela, long wanem, nem bilong mi em i stap long yupela.” (Matyu 24:⁠9) Na em i tok: “Sapos ol i bin mekim nogut long mi, orait ol bai i mekim nogut long yupela tu.” (Jon 15:20) Ol i birua long yumi, long wanem, maski yumi stap we long graun, yumi save mekim wok bilong Jehova, na Satan i laik bai yumi lusim Jehova. (1 Pita 5:8; lukim tu KTH 12:17.) Olsem na Satan i save kirapim ol man long birua long yumi na mekim nogut long yumi, na dispela inap putim bikpela traim long yumi, bai yumi sanap strong o nogat.

¹¹ Long 1936 i go inap 1943 ol man i mekim nogut long ol Witnes Bilong Jehova wantaim ol pikinini bilong ol long Yunaitet Stets na Kanada, long wanem, ol Witnes i no laik salut long plak; bel bilong ol i gat tok long dispela pasin. Ol i no bikhet long plak bilong kantri ol i sindaun long en, tasol ol i bihainim lo bilong God long Kisim Bek 20:​4, 5 i tok: “No ken wokim piksa bilong wanpela samting i stap long heven o i stap long graun . . . Yupela i no ken brukim skru long . . . piksa na lotuim em, long wanem, mi Bikpela, mi God bilong yupela, na mi no inap larim wanpela giaman god i senisim mi.” Ol i rausim sampela pikinini Witnes long skul, long wanem, ol i laik lotuim God Jehova wanpela tasol. Olsem na ol Witnes i kirapim skul bilong ol yet, ol i kolim Skul Bilong Kingdom, na bai ol dispela pikinini i ken skul. Bihain Sprim-Kot bilong Yunaitet Stets i orait long ol dispela pikinini i ken bihainim bilip bilong ol na no ken salut long plak, na ol i go bek gen long skul bilong gavman. Sapos wankain traim i painim sampela yangpela Kristen bilong nau na ol man i mekim nogut long ol, long wanem, ol i laik bihainim ol lo bilong Baibel, ol i ken tingim ol dispela yangpela bilong bipo em ol i bin strongim bel na sanap strong.​—⁠1 Jon 5:⁠21.

¹² Ol hevi i painim ol man, ol i painim yumi tu, na i gat sampela hevi moa i save painim yumi ol Kristen tasol. Olsem na yumi mas sanap strong na karim ol dispela hevi. Yumi ken mekim olsem wanem?

Karim Hevi Inap Long Pinis

¹³ Yumi lain bilong Jehova inap mekim wanpela samting ol narapela lain i no save lotu long em ol i no inap mekim: Yumi ken beten askim Jehova long helpim yumi. Em “i save mekim yumi sanap strong” na no ken les. (Rom 15:⁠5) Olsem wanem Jehova i save helpim yumi long sanap strong? Baibel i gat stori bilong ol man i bin sanap strong, na Jehova i bin putim long Baibel bilong helpim yumi long mekim olsem. (Rom 15:⁠4) Sapos yumi tingim ol dispela stori, em bai kirapim yumi na strongim yumi bambai yumi no ken les, na em bai lainim yumi long pasin bilong sanap strong. Yumi ken tingim tupela man​—⁠em Jop, em i no bin les long karim hevi, na Jisas, em i bin sanap strong tru.​—⁠Hibru 12:​1-3; Jems 5:⁠11.

¹⁴ Planti hevi i painim Jop. Olgeta samting bilong em i bin lus. (Jop 1:​14-17; lukim tu Jop 1:⁠3.) Bikpela win i mekim na olgeta 10-pela pikinini bilong em i bagarap. (Jop 1:​18-21) Bikpela sik na pen i kisim em. (Jop 2:​7, 8; 7:​4, 5) Meri bilong em i wok long subim em long lusim Jehova. (Jop 2:⁠9) Ol pren bilong em i mekim tok i givim pen long em na ol i tok giaman long em. (Lukim Jop 16:​1-3 na Jop 42:⁠7.) Tasol Jop i sanap strong na karim ol dispela hevi na em i no pundaun na lusim Jehova. (Jop 27:⁠5) Wankain hevi i save painim lain bilong Jehova long nau tu.

¹⁵ Olsem wanem na Jop inap karim ol dispela hevi? Em i tingting long gutpela samting em inap kisim bihain. Em i tok: “Mi save, sapos man i katim diwai, i gat rot long nupela kru inap kamap gen long en.” (Jop 14:⁠7) Wanem gutpela samting Jop inap tingting long kisim bihain? Em i beten olsem: “God, i gutpela sapos yu haitim mi long ples bilong ol man i dai pinis, . . . na yu ken makim wanpela taim bilong tingim mi gen. . . . Na bai yu singautim mi na bai mi lusim dispela ples na kam long yu.” (Jop 14:​14, 15) Jop i save, pen na hevi bilong em bai pinis na i no inap i stap olgeta taim, na sapos Jop i dai, dispela hevi bilong em bai pinis. Na Jop i save, Jehova i gat laik long kirapim bek ol man i dai pinis, na Jop i bilip olsem Jehova bai kirapim bek em tu.​—⁠Aposel 24:⁠15.

¹⁶ Orait, yumi ken kisim wanem save long pasin bilong Jop long sanap strong na karim hevi? Bilong sanap strong olsem, yumi no ken lusim tingting long gutpela samting yumi wetim i kamap long bihain. Na ol gutpela samting yumi wetim Kingdom i kamapim, ol bai kamap tru, olsem na “ol dispela hevi na pen . . . bai i stap sotpela taim tasol.” (2 Korin 4:​16-18) Tok promis bilong Jehova i as bilong bilip bilong yumi long nupela taim bai kamap bihain, na “em bai i mekim drai wara i stap long ai bilong olgeta [man] . . . Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” (KTH 21:​3, 4) “Na sapos yumi wetim God i helpim yumi, orait yumi no save wet nating. Nogat.” Olsem na yumi mas holim strong dispela tingting. (Rom 5:​4, 5; 1 Tesalonaika 5:⁠8) Yumi mas inap long lukim long tingting bilong yumi dispela gutpela samting bilong bihain, olsem lukim piksa bilong en long tingting bilong yumi, olsem lukim long ai bilong bilip, na yumi stap long nupela taim, na no gat sik o hevi moa, na yumi kirap long moningtaim na yumi gat strong, na tingting i wok gut, na no gat hevi long mani o samting bilong skin, na no ken pret long wanpela samting, na no gat man i dai moa, na yumi lukim ol man i bin dai ol i kirap bek gen. (Hibru 11:⁠1) Sapos yumi no gat dispela tingting long gutpela samting bai kamap bihain, ol hevi inap daunim yumi na yumi no sanap strong moa, tasol dispela gutpela tingting bai strongim yumi long karim ol hevi na sanap strong i go inap long pinis!

¹⁷ Baibel i tok: “Yumi mas lukluk i go long Jisas,” na “tingim gut” ol hevi em i bin karim. Sin na pasin kranki bilong ol narapela i as bilong sampela hevi bilong em. Na ol man “i birua nogut” long em. Na sampela hevi na kros i kamap namel long lain disaipel bilong em, na wanpela taim ol i tok pait long husat namel long ol i stap nambawan, na ol dispela samting i givim hevi long em. Na i gat wanpela bikpela traim tru i kamap long em na i traim bilip bilong em. “Em i karim pen na i dai long diwai.” (Hibru 12:​1-3; Luk 9:46; 22:24) I hatwok long yumi pilim dispela bikpela pen tru em i bin kisim taim ol i nilim na hangamapim em long dispela pos, na ol i semim em long ai bilong ol manmeri na mekim em i kamap olsem man i bin mekim bikpela rong.a

¹⁸ Pol i kolim 2-pela samting i bin helpim Jisas long karim dispela pen na sanap strong i go inap long taim em i dai: Em i bin “mekim prea na beten long God,” na em i tingting long “bihain em bai i stap gut na amamas moa yet.” Em i gutpela olgeta, na em i Pikinini bilong God, tasol em i no sem long singaut na askim God long helpim em. Em i bin “beten strong long God, na em i singaut strong na i krai planti.” (Hibru 5:7; 12:⁠2) Klostu long taim ol i laik bagarapim em, em i mekim dispela samting moa yet. (Luk 22:​39-44) Tru, Jehova i no tekewe dispela traim na hevi long Jisas. Nogat. Tasol Jehova i strongim em na bai em inap long karim. Na Jisas i bin tingim tu gutpela pe em bai kisim bihain long dispela pen​—⁠em bai amamas long wok em i bin mekim long mekim gut nem bilong Jehova, na wok bilong baim bek ol man na bai ol i no ken lus.​—⁠Matyu 6:9; 20:⁠28.

¹⁹ Yumi tingim ol samting i bin painim Jisas, na nau yumi save, i hatwok long sanap strong na karim hevi. Sapos yumi hatwok long karim hevi, yumi ken save Jisas tu i bin hatwok olsem, na sapos yumi laik i stap strong inap long pinis, oltaim yumi mas beten askim Jehova long strongim yumi. Na yumi no ken ting Jehova i no inap harim beten bilong yumi, long wanem, em ‘i save wari long yumi, olsem na olgeta hevi yumi karim, yumi mas putim long han bilong em.’ (1 Pita 5:⁠7) Long Baibel Jehova i bin tok promis long givim ‘strong bilong em’ long ol man i bilip na i singaut long em.​—⁠2 Korin 4:​7-9.

²⁰ Sampela taim aiwara i kamap long taim yumi karim hevi. I no dispela pen i mekim na Jisas i bin amamas, nogat; em i tingim gutpela pe em bai kisim bihain, na em i amamas long dispela. Na yumi tu i no ken ting bai yumi belgut na amamas long taim yumi gat pen na hevi. (Lukim Hibru 12:11.) Tasol sapos yumi tingim gutpela samting yumi bai kisim bihain, yumi ken tok, ol hevi bilong nau “em i samting bilong amamas tasol.” (Jems 1:​2-4; Aposel 5:41) Tasol yumi mas i stap strong, maski hevi i bikpela na aiwara i pundaun, long wanem, Jisas i tok: “Ol manmeri i stap strong inap long las de, God bai i kisim bek ol.”​—⁠Matyu 24:⁠13.

²¹ Yumi mas karim hevi na sanap strong na bai yumi ken kisim laip oltaim. Na 2 Pita 1:​5, 6 i tok, yumi mas wokabaut long pasin bilong God tu. Em wanem kain pasin? Olsem wanem em i samting bilong karim hevi tu na sanap strong? Yumi ken kisim dispela pasin olsem wanem? Narapela tok i kam bihain bai stori long dispela samting.

[Ol Futnot]

Sanap Strong na Bihainim Pasin Bilong God

“Yupela i mas . . . sanap strong na karim hevi, na . . . wokabaut long pasin bilong God.”​—⁠2 PITA 1:​5, 6.

TAIM NOGUT i bin kamap long 1934 long ol hap em ol Natsi i bosim. Ol dispela Natsi i bin biruaim ol Witnes Bilong Jehova na kalabusim planti tausen, long wanem, ol i no laik insait long pait o litimapim nem bilong Hitler. Ol dispela Natsi i mekim wanem kain pasin long ol long banis kalabus? Karl Wittig, em wanpela bikman bilong gavman long Jemani bipo, em i tok: ‘Ol soldia i bagarapim nogut tru ol dispela Sumatin Bilong Baibel [em olpela nem bilong ol Witnes Bilong Jehova] na givim bikpela pen nogut tru long ol na bagarapim ol nogut.’

² Olsem wanem long ol dispela Witnes? Long wanpela buk (The Nazi State and the New Religions: Five Case Studies in Non-Conformity) Christine E. King i tok: “Gavman i win long daunim lain bilong ol narapela lotu, tasol ol Witnes nogat.” Tru tumas, lain Witnes Bilong Jehova i bin i stap strong na holimpas bilip bilong ol, maski ol man i bin kilim i dai planti handet bilong ol.

³ Wanem samting i bin helpim ol Witnes long sanap strong olsem long Jemani na ol narapela hap tu na ol i no bin pundaun? Ol i bin wokabaut long pasin bilong Papa bilong ol long heven, olsem na em yet i bin helpim ol. Pita i tok: “Sapos traim i kamap long ol man i bihainim God, orait Bikpela i save long rot bilong kisim bek ol long dispela traim.” (2 Pita 2:⁠9) Na Pita i tok, ol Kristen i mas bilip na “sanap strong na karim hevi, na . . . wokabaut long pasin bilong God.” (2 Pita 1:​5, 6) Pasin bilong sanap strong na karim hevi, na wokabaut long pasin bilong God, dispela tupela pasin i poroman wantaim. Na bilong yumi ken i stap strong inap long pinis, yumi “mas wok long kisim stretpela pasin na pasin tru bilong God.”​—⁠1 Timoti 6:⁠11.

Wokabaut Long Pasin Bilong God

⁴ Long tok Grik, insait bilong dispela tok “wokabaut long pasin bilong God” i olsem, givim bel long God (eu·seʹbei·a), na W. E. Vine i tok, i olsem bel bilong man i kirap tru taim em i tingim God, na em i daun long God na i wok strong long givim bel long em na mekim wok bilong em.​—⁠2 Pita 1:6; 2:⁠9.

⁵ Olsem na dispela tok, “wokabaut long pasin bilong God,” i olsem givim bel long Jehova na mekim ol samting em i save laikim. Maski ol hevi na traim i painim yumi, yumi mekim olsem, long wanem, yumi save laikim tumas Jehova. Bel na tingting bilong yumi i pas strong long Jehova na dispela samting i bosim na stiaim wokabaut bilong yumi. Yumi ol Kristen i mas beten na “bai yumi olgeta i ken sindaun gut na i stap bel isi, na yumi ken bihainim tru olgeta pasin God i laikim.” (1 Timoti 2:​1, 2) Saveman J. P. Louw na E. A. Nida i tok: “Long sampela tok ples, taim ol i tanim dispela tok Grik (eu·seʹbei·a) long 1 Ti 2:2 ol i raitim olsem, ‘i stap olsem God i laik bai yumi stap,’ o ‘i stap olsem God i tok pinis long yumi mas mekim.’ ”

⁶ Nau yumi ken save, yumi mas sanap strong na bai yumi ken wokabaut long pasin God i save laikim, long wanem, taim yumi bihainim dispela gutpela pasin, ol man bai birua long yumi na dispela i save putim ol hevi long yumi na i traim bilip bilong yumi. (2 Timoti 3:12) Tasol sapos yumi pas gut long Papa bilong yumi long heven, em bai helpim yumi long sanap strong na karim dispela hevi. Em i stap antap na i lukluk i kam daun na lukim husat ol man i givim bel long em na i wok strong long bihainim laik bilong em maski ol i kisim hevi, na em i amamas long ol, na em “i save long rot bilong kisim bek ol long dispela traim.”

⁷ Taim mama i karim yumi, yumi no save long wokabaut long pasin bilong God, na yumi no kisim tu long papamama bilong yumi em ol i givim bel long God. (Stat 8:21) Yumi mas lain long kisim dispela pasin. (1 Timoti 4:​7, 10) Yumi mas wok long bungim dispela pasin bilong wokabaut long pasin bilong God wantaim pasin bilong sanap strong na karim hevi, na nau bungim dispela tupela pasin wantaim pasin bilong bilip. Pita i tok, yumi “mas wok strong tru long mekim.” (2 Pita 1:⁠5) Orait, yumi ken mekim wanem na bai yumi ken “wokabaut long pasin bilong God”?

Olsem Wanem Yumi Ken Lain Long Wokabaut Long Pasin Bilong God?

⁸ Pita i tok: “Nau yupela i kisim gutpela save long God na long Jisas . . . na bel isi i ken kamap bikpela moa long laip bilong yupela. . . . Jisas . . . i bin givim yumi olgeta samting bilong strongim laip bilong yumi na bilong helpim yumi long wokabaut long pasin bilong God.” (2 Pita 1:​2, 3) Olsem na yumi mas kisim planti stretpela save moa long God Jehova na long Krais Jisas, olsem save gut long tupela, na bai yumi ken bungim pasin bilong wokabaut long pasin bilong God wantaim pasin bilong sanap strong na karim hevi, na bungim dispela tupela pasin wantaim pasin bilong bilip strong.

⁹ Sapos yumi laik save gut long God na long Krais, nogut yumi save long nem tasol bilong tupela na em tasol; dispela i no inap. Sapos yu save long nem tasol bilong wanpela man bilong graun, na yu no save long sampela samting moa bilong em, bai yu larim em i dinau long yu long sampela bikpela mani? Nogat, a? Yu mas save gut pastaim long olgeta pasin bilong em. (Lukim Sindaun 11:15.) Na i olsem long Jehova na Jisas​—⁠yumi mas save gut tru long pasin na tingting na laik bilong tupela. Nogut yumi bilip olsem tupela i stap na yumi save long nem bilong ol, na em tasol. Yumi mas save long planti samting moa bilong tupela na bai yumi inap karim hevi na i dai tu bilong bihainim laik bilong tupela. (Jon 17:⁠3) Olsem wanem yumi ken save gut long tupela?

¹⁰ I gat tupela samting yumi mas mekim na bai yumi ken save gut long Jehova na Jisas. (1) Yumi mas save gut long ol pasin na tingting na laik bilong tupela. (2) Na yumi mas bihainim pasin bilong tupela. Yumi mas laikim tumas Jehova na pas gut wantaim em, na kamapim dispela long ples klia long pasin na wokabaut na i stap bilong yumi. Na bilong mekim olsem, yumi mas save gut long Jehova na long laik na pasin bilong em. Na dispela save i mas kirapim yumi long bihainim pasin bilong em, long wanem, em i bin wokim yumi i kain olsem em yet. (Stat 1:​26-28; Kolosi 3:10) Na Jisas i bin bihainim stret Jehova long ol tok na pasin bilong em, olsem na yumi mas save gut long em na bai yumi ken wokabaut long pasin bilong God.​—⁠Hibru 1:⁠3.

¹¹ Olsem wanem yumi inap kisim dispela save? Yumi mas stadi long Baibel na long ol buk em Baibel i as bilong tok bilong en na bai yumi ken kisim stretpela save long God na long Krais.a Ol dispela stadi yumi mekim i mas helpim yumi long wokabaut long pasin God i save laikim, olsem na yumi mas tingim gut long bel ol samting yumi stadi long en o kaunim. (Lukim Josua 1:⁠8.) Em i bikpela samting, long wanem, bilong givim bel long Jehova, bel na tingting i mas i stap klostu long em. Planti taim Baibel i tok, man i mas mekim wok long tingting na bel na bai em i ken tingim na skelim gut ol samting. (Song 19:14; 49:3; Sindaun 15:28) Sapos yumi tingting gut long ol samting yumi stadi long en na yumi laikim na amamas long en, dispela save yumi bin kisim long taim yumi stadi em bai go daun long bel na kirapim bel na stiaim tingting bilong yumi, na nau yumi inap tok, stadi i helpim yumi long pas gut long Jehova na mekim ol samting em i amamas long en, maski planti hevi na traim i painim yumi.

Bihainim Pasin Bilong God Long Haus

¹² Yumi mas bihainim pasin bilong God taim yumi stap long haus. Pol i tok, ol pikinini i mas mekim gut long papamama na long bubu bilong ol, em “namba wan wok bilong ol long ai bilong God em . . . God i laikim tumas dispela kain pasin.” (1 Timoti 5:⁠4) Sapos yumi wokabaut long pasin bilong God yumi mas lukautim lapun papamama bilong yumi. Em wok bilong Kristen tru, na em i mekim tu, long wanem, em i sori long ol na tingim ol, na em i save Jehova i ting em i bikpela samting long Kristen i mas lukautim famili bilong em. Kristen i save sapos em i no tingim papamama long taim ol i sot long ol samting o ol i gat hevi em i olsem “man i lusim pinis bilip bilong em, na em i man nogut.”​—⁠1 Timoti 5:⁠8.

¹³ Sampela taim i hatwok long wokabaut long pasin bilong God long haus bilong yumi. Sapos Kristen i stap long narapela hap i longwe long papamama, o em i marit na em i gat famili bilong em yet o em i sot long ol samting bilong skin, bai em i hatwok. Sampela taim i gat bikpela wok long lukautim lapun, na skin na tingting bilong yumi i laik les, tasol dispela wok i olsem bekim hatwok papamama i bin mekim long yumi long taim yumi i bin i stap pikinini, na Jehova i amamas long wok yumi mekim, “em i Papa bilong olgeta lain . . . na em yet i givim nem long olgeta dispela lain.”​—⁠Efesus 3:​14, 15.

¹⁴ Em hia stori bilong wanpela famili: Ellis wantaim 5-pela brata susa bilong em i hatwok long lukautim papa. Ellis i tok: “Long 1986 sik strok i kisim papa, na skin bilong em olgeta i dai.” Ol 6-pela pikinini i senis senis long lukautim em. Ol i mas wasim em, na tanim em long bet na bai sua i no ken kamap long skin bilong em. Ellis i tok: “Mipela kaunim ol buk long em, na toktok wantaim em, na pilaim musik, tasol em i harim o nogat, mipela i no save, tasol mipela i mekim olsem em inap save long ol samting, maski hap tingting bilong em i dai.”

¹⁵ Bilong wanem ol i lukautim papa olsem? Ellis i tok: “Mama i dai pinis long 1964, na papa wanpela i bin mekim bikpela long mipela. Long dispela taim mipela ol pikinini i gat 5-pela krismas i go inap 14-pela krismas, na papa i stap bilong helpim mipela, na nau mipela i stap bilong helpim papa.” I hatwok long ol long lukautim papa, na sampela taim ol i hevi long mekim olsem, tasol Ellis i tok: “Mipela save papa i no ken i stap longpela taim, na mipela i tingim taim skin bilong papa bai kamap gutpela gen, na mipela i ken bung gen wantaim mama.” (Aisaia 33:24; Jon 5:​28, 29) Jehova i amamas long dispela kain gutpela pasin long lukautim papa o mama. Em i bin tok, yumi mas aninit long ol na bihainim tok bilong ol.b​—⁠Efesus 6:​1, 2.

Givim Bel Long God na Autim Tok

¹⁶ Jisas i tok, yumi mas bihainim pasin bilong em, olsem na yumi mas bihainim lo i kam long God long autim tok bilong Kingdom na kamapim ol disaipel. (Matyu 16:24; 24:14; 28:​19, 20) Ol Kristen i gat wok long autim tok nau long “taim bilong las de.” (2 Timoti 3:⁠1) Tasol i no olsem yumi ting em wanpela wok yumi mas mekim na long dispela as tasol yumi autim tok, nogat. Yumi laikim tumas Jehova, na dispela i kirapim yumi long mekim ol wok bilong autim tok. Jisas i tok: “Maus bilong man em i save autim kain tingting i pulap long bel bilong dispela man.” (Matyu 12:34) Sapos bel bilong yumi i gat bikpela laik long Jehova, dispela bai kirapim yumi long autim tok long ol narapela man, na yumi kamapim bel bilong yumi, yumi givim bel long Jehova.

¹⁷ I gat 3-pela as na yumi save laikim tumas Jehova. (1) Yumi laikim em, long wanem, em i bin mekim planti gutpela samting long yumi. Em i gat bikpela sori long yumi na em salim Jisas i kam bilong baim sin bilong yumi long blut bilong em. (Matyu 20:28; Jon 15:13) (2) Na yumi laikim Jehova, long wanem, nau em i mekim planti gutpela pasin long yumi. Nau yumi gat rot long toktok wantaim Jehova, na em i ken harim dispela beten bilong yumi. (Song 65:2; Hibru 4:​14-16) Sapos yumi givim bel long wok bilong Kingdom, em bai lukautim yumi long ol samting bilong skin. (Matyu 6:​25-33) Em i givim planti samting bilong spirit olsem kaikai long yumi na bai yumi inap karim ol hevi bilong nau. (Matyu 24:45) Na yumi insait long wanpela bikpela lain brata Kristen i stap long olgeta hap bilong graun, na dispela i kamapim long ples klia olsem yumi narapela kain long ol lain bilong dispela graun. (1 Pita 2:17) (3) Na yumi laikim Jehova, long wanem, em bai mekim planti gutpela samting moa long yumi long bihain. Jehova i gat bikpela sori long ol Kristen, na dispela i “samting bilong helpim ol bihain, na ol bai i kisim dispela laip em i laip tru,” olsem i stap laip oltaim. (1 Timoti 6:​12, 19) Ol dispela samting i kirapim yumi long tokim ol man long ol gutpela samting Jehova bai mekim! Olsem na ol narapela i no gat wok long tokim yumi long i go autim tok, o hamas aua yumi mas lusim long dispela wok, nogat. Bel bilong yumi i kirapim yumi long mekim.

¹⁸ Maski i hatwok, sapos yumi laikim tumas Jehova, dispela bai kirapim yumi long autim tok. (Lukim Jeremaia 20:⁠9.) Yumi ken tingim Stella, em i meri bilong sem tru. Taim em i kirap long stadi long Baibel em i ting, ‘Mi no inap raun autim tok!’ Em i tok: “Mi no meri bilong toktok. Mi save sem tumas. Mi no inap toktok long ol manmeri.” Tasol taim em i stadi moa i go, em i lain long laikim tumas Jehova, na nau bel bilong em i kirapim em long tokim ol narapela manmeri long ol samting bilong Jehova. Em i tok, “Mi tingim yet wanpela tok mi bin mekim long meri i stadi wantaim mi, ‘Mi gat laik long autim tok, tasol mi no inap, na mi bel hevi long dispela.’ Tasol em i tokim mi, ‘Yu ken amamas, long wanem, yu gat laik long autim tok, na dispela i namba wan samting.’ ”

¹⁹ Bihain Stella i kirap autim tok long meri i stap klostu long em, na bihain moa em i strongim bel na i raun autim tok long ol haus, em namba wan taim bilong em. (Aposel 20:​20, 21) Em i tok: “Mi bin raitim long hap pepa ol tok mi laik autim, tasol mi pret tumas, na maski mi holim dispela pepa, mi no lukluk long en.” Em bilong bipo, tasol 35 yia i go pinis, na long nau Stella i amamas tru long autim tok, maski em i meri bilong sem.

²⁰ Na sapos ol man i mekim nogut long ol Witnes Bilong Jehova o kalabusim ol, dispela tu i no inap pasim ol long autim tok. Ol i bin mekim olsem long Ernst na Hildegard Seliger bilong Jemani. Tupela i bilip strong, olsem na ol Natsi na Komyunis i kalabusim ol inap planti yia, tasol ol i wok yet long autim tok long ol narapela kalabus. Hildegard i tok: ‘Wanpela bosmeri i tokim ol bosman long mi save kamapim tok bilong Baibel long olgeta de, olsem na ol i kalabusim mi long wanpela liklik rum.’ Taim Brata na Sista Seliger i lusim kalabus ol i kirap gen long wok olgeta de long autim tok. Ol i stap strong olsem i go inap long taim ol i dai; brata i dai long 1985, na sista i dai long 1992.

²¹ Sapos yumi stadi gut long Baibel na yumi tingim gut long bel bilong yumi ol tok na save yumi bin lainim, bai yumi kisim planti stretpela save long God Jehova na long Krais Jisas. Na sapos yumi mekim olsem, bai yumi save gut long wokabaut long pasin bilong God, em wanpela gutpela pasin tru yumi mas mekim. Sapos yumi no save wokabaut long pasin bilong God, yumi no inap tru long sanap strong na karim ol hevi i save bungim yumi ol Kristen. Olsem na yumi mas bihainim tok bilong aposel Pita long “sanap strong na karim hevi” na bungim dispela wantaim pasin bilong “wokabaut long pasin bilong God.”​—⁠2 Pita 1:​5, 6.