Mekim Pasin Sori Long Ol Man i Sot
OL KRISTEN i gat wok long mekim pasin sori long ol brata sista bilong ol i sot long ol samting na em i wanpela gutpela wok ol i kisim. (1 Jon 3:17, 18) Aposel Pol i tok: “Wanem taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.” (Galesia 6:10) I no longtaim i go pinis, wanpela brata i bin mekim wok bilong Jehova inap 40 yia em i pilim gutpela pasin sori ol brata Kristen i mekim long taim meri bilong em i kisim sik na bihain meri i dai. Em i tok:
“Mi no bin wok mani inap tupela mun, long wanem, mi mas lukautim meri bilong mi long haus taim em i sik. Hevi bilong mi i pinis liklik taim ol pren long kongrigesen long laik bilong ol yet ol i givim ol samting bilong helpim mipela! Ol i givim planti mani olsem presen—na ol kat ol i raitim na salim wantaim ol presen i toksave olsem, ‘mipela i givim bilong yupela i ken baim ol narapela samting’—baim haus long mun, baim ol samting bilong haus, na baim ol narapela samting.
“Tupela wik paslain long taim meri bilong mi i dai, wasman sekit bilong mipela i kam lukim mipela bilong strongim mipela. Em i soim piksa slait long mipela, em dispela piksa slait em i laik soim long kongrigesen long pinis bilong wik. Mipela i harim ol miting long rot bilong telefon i gat masin bikmaus long en—mipela i harim tu ol bung bilong wok autim tok em wasman sekit i lukautim. Long wanpela bilong ol dispela bung, em i askim ol brata sista i kam bilong autim tok, olgeta wantaim, long tok ‘gude’ long meri bilong mi. Olsem na maski em i stap longwe, em i no pilim olsem em i stap wanpis.
“Wanpela aua bihain long em i dai, klostu olgeta elda i stap long haus bilong mi. Planti brata sista, winim 100 samting, ol i kam lukim mi long dispela de yet. Ol brata sista i kisim planti kaikai tru i kam na em inap long olgeta i ken kaikai. Mi no inap kolim olgeta presen, pasin sori, gutpela tok bilong strongim bel, na beten ol i mekim bilong helpim mi. Ol i bin strongim mi tru! Bihain mi mas kirap tokim ol brata long ol i no ken kukim moa kaikai bilong mi na helpim mi long klinim haus!
“Kain gutpela pasin olsem bilong mekim pasin sori, tingim narapela, na laikim tru narapela, yumi no inap lukim namel long ol narapela lain, nogat, tasol long oganaisesen bilong Jehova yumi inap lukim dispela pasin i stap. Planti man long nau i gat wan wan gutpela pren tasol. Jehova i bin mekim gut long yumi na yumi gat bikpela lain famili i stap, em ol brata sista bilong yumi long spirit!”—Mak 10:29, 30.