“Dispela Meri Jesebel”
“TASOL mi gat dispela tok long yu. Yu save larim dispela meri Jesebel i stap wantaim yu. Dispela meri i save tok olsem em i profet, tasol em i save giamanim ol wokman bilong mi na em i lainim ol long mekim pasin pamuk na long kaikai abus ol i bin ofaim long ol giaman god.” (Kamapim Tok Hait 2:20) Dispela em i tok Jisas i bin mekim long ol elda Kristen long taun Taiataira. Kongrigesen long dispela taun i wok strong, na ol i laikim tru ol manmeri, na ol i bilip, na sanap strong long olgeta hevi i kamap long ol. Tasol kongrigesen i larim pasin nogut bilong Jesebel i stap. Bilong wanem ol i larim i stap? Inap kain pasin olsem i kamap long nau tu?—Kamapim Tok Hait 2:19.
Ating i no gat wanpela man o meri long Taiataira i gat nem Jesebel. Tasol Jisas i mekim wok long dispela nem bilong helpim yumi long tingim Kwin Jesebel bilong bipo, em meri bilong King Ahap. Dispela meri i gat strongpela het na em i bagarapim tru lain bilong God, long wanem em i kamapim pasin bilong lotuim god Bal namel long lain Israel. Em i wok strong tru long pinisim lotu i tru.—1 King 16:31-33; 21:1-7.
Dispela Jesebel long Taiataira—ating em wanpela meri tasol o wanpela lain meri—em i kirapim ol manmeri bilong God long mekim pasin pamuk na lotuim ol god giaman, kain olsem Jesebel i bin mekim long bipo. Yumi save sampela long kongrigesen i harim tok bilong em na bihainim em, long wanem Jisas i stori long “ol pikinini bilong em.” (Kamapim Tok Hait 2:22, 23) Pasin em i mekim i laik bagarapim pasin bilong kongrigesen long Taiataira wankain olsem pasin bilong ol Israel i bagarap long taim bilong Ahap.
Olsem wanem Jesebel long Taiataira i gat strong bilong pulim ol narapela i go bihainim em? Sampela man i tingim Kwin Jesebel na ol i ting dispela meri long Taiataira em i meri bilong namba wan elda bilong kongrigesen. Tasol Baibel i no tok olsem. Tasol dispela meri i gat strongpela pasin na em yet i tok em i wanpela profet, na ating dispela i givim namba long em insait long kongrigesen.
Sampela man i ting olsem pasin nogut Jesebel i kirapim em i samting bilong ol asosiesen bilong ol man bilong wok. Wanpela saveman bilong lotu (em Dr. W. M. Ramsay) i tok, “long taun Taiataira i gat planti asosiesen bilong ol man bilong wok, winim ol narapela taun long hap bilong Esia.” Wanpela buk (The Interpreter’s Dictionary of the Bible) i tok, “olgeta wan wan asosiesen i gat god bilong en, na ol taim bilong wokim bikpela kaikai, na ol bung bilong amamas, na sampela taim ol dispela bung i kamap olsem pati nogut i gat pasin pamuk samting long en. Ating ‘Jesebel’ i ting olsem . . . ol dispela bung bilong amamas i no nogut, long wanem, olgeta man bilong wok i mas bung wantaim ol wanwok insait long asosiesen bilong helpim wok bilong ol.” Narapela buk (The Expositor’s Greek Testament) i wanbel long dispela na i tok olsem, ol lain i bihainim Jesebel ‘i hambak, long wanem ol i ting nau ol i stap gutpela, olsem i stap fri.’
Pasin bilong Jesebel long kongrigesen bilong Taiataira i wankain long “pasin bilong Balam” long kongrigesen bilong Pergamum. (Kamapim Tok Hait 2:14) Kongrigesen long Pergamum i karim planti hevi na sanap strong, tasol sampela i bihainim pasin bilong Balam bilong bipo, em i bin kirapim ol man long mekim pasin pamuk na long lotuim ol god giaman. Sampela man i tok, long Pergamum pasin bilong Balam i pulim ol man long lusim lo bilong God bambai ol i ken abrusim hevi. Tasol long Taiataira, Jesebel i pulim ol manmeri long lusim lo bilong God bilong helpim ol long wok mani bilong ol. Maski i gat wanem as na ol i bihainim pasin bilong Balam o pasin bilong Jesebel, tasol dispela tupela pasin wantaim i pulim ol long sakim lo bilong God tru na lotuim ol god giaman, na bai ol i bagarap.
Olsem wanem? Pasin bilong Jesebel—o Balam—i stap nau? Tru tumas, planti bikman long ol misin ol i kolim Kristen ol i bihainim pasin bilong Jesebel—ol i orait long kongrigesen bilong ol i mekim kain kain pasin sem, olsem pasin bilong Sodom, na pasin pamuk, na bagarapim marit, na rausim bel, na ol narapela pasin i nogut tru long ai bilong God. Na insait long lain Kristen tru, wan wan brata sista i laik “i stap fri,” ol i no laik aninit long lo bilong lotu i tru, na ol i pulim ol Kristen bambai ol i no ken strong tumas long bihainim ol lo bilong Baibel, na sampela i pulim ol narapela long mekim pasin pamuk.
Olgeta manmeri i laik bai God Jehova i amamas long ol, ol i mas klia long ol kain tingting na pasin olsem, maski man o meri i kirapim dispela tingting o pasin em i gat strongpela pasin o strong bilong pulim ol narapela i go bihainim em. Dispela kain tingting na pasin inap bagarapim ol man long nau olsem em i bin bagarapim ol man long taim bilong ol aposel.—Kamapim Tok Hait 2:22, 23.