Wara Bilong Givim Laip

“OLGETA man i harim dispela tok, em . . . i mas tok, ‘Yu kam.’ Na wanem man nek bilong en i drai, . . . em i mas kam na kisim wara bilong givim laip, em i olsem presen bilong God.” (KTH 22:17) “Wara bilong givim laip” em i makim olgeta samting God i putim bilong kisim bek yumi long rot bilong ofa bilong Krais Jisas. Yumi inap kisim ol dispela samting, na i no bilong baim. Tru tumas, God i mekim gut tru long yumi, a? Tasol bilong wanem Baibel i kolim olsem wara?

Wara tru i save mekim na ol kaikai na diwai samting i kamap, na yumi ol man inap kisim bilong i stap laip. Sapos i no gat wara, bai i no gat ol kaikai na diwai samting i kamap, na bai yumi ol man tu i no inap i stap. Inap 65 pesen bilong skin bilong yumi em wara tasol. Sampela dokta samting i tok, yumi mas dring inap olsem tupela lita wara long olgeta de. Skin bilong yumi i mas i gat wara na bai skin i ken mekim gut wok long ol kaikai i go daun long bel, na long rausim ol pipia bilong bodi, na planti ol narapela wok. Sapos yumi stap wanpela wik na yumi no dring wara, bai yumi dai.

Na i olsem tu long “wara bilong givim laip”​—⁠em i helpim yumi long i stap laip long ol samting bilong spirit. Sapos yumi sakim dispela wara, bai yumi no inap i stap laip long bihain. (Jon 3:36) Sapos yumi kisim, yumi inap kisim laip i stap oltaim. Olsem na meri Samaria i amamas taim Jisas i tokim em: “Sapos wanpela man i dring long dispela wara mi laik givim em, i no gat wanpela taim nek bilong en bai i drai gen. Nogat. Dispela wara . . . bai i kamap kamap oltaim na givim em laip i stap gut oltaim oltaim.” (Jon 4:14) Gutpela sapos yumi tu i amamas long kisim dispela wara bilong givim laip, em i no bilong baim.

[Piksa Kredit Lain long pes 32]

Garo Nalbandian