Tupela Man Bilong Autim Tok i Dai

19. Olsem Baibel i tok, wanem samting i kamap taim tupela i pinisim wok bilong ol long autim tok?

¹⁹ Tupela man hia bilong autim tok ol i pasim klos bilong sori na ol i mekim save long kamapim ol rong na giaman bilong ol misin inap 42 mun, na nau ol dispela misin i kirapim ol gavman long “kilim tupela i dai.” Jon i tok: “Taim tupela i pinisim wok bilong autim tok bilong God, orait dispela wel abus bilong hul i no gat as, em bai i lusim hul na i kam antap. Na em bai i pait long tupela. Na em bai i daunim tupela na kilim tupela i dai. Na bodi bilong tupela bai i stap long bikrot bilong dispela bikpela taun, yumi save tok bokis na kolim em olsem, Sodom na Isip. Em dispela taun tasol bipo ol i bin nilim Bikpela bilong tupela long diwai . . . na kilim em i dai. Ol man bilong olgeta kain skin na bilong olgeta kantri na bilong olgeta tok ples na bilong olgeta lain manmeri, ol bai i lukim bodi bilong tupela inap long 3 na hap de. Na ol bai i no larim ol man i planim bodi bilong tupela. Na ol manmeri bilong graun bai i amamas long lukim tupela i dai pinis, na ol bai i singsing na kaikai na givim presen long ol pren bilong ol. Long wanem, dispela tupela profet i bin givim pen nogut long olgeta manmeri i stap long graun.”​—KTH 11:​7-10.

20. “Dispela wel abus . . . i lusim hul na i kam antap,” em i wanem samting?

²⁰ Kamapim Tok Hait i kolim dispela tok “wel abus” inap 37 taim, na long KTH 11 ves 7 hia em namba wan taim. Bihain bai yumi stori moa long dispela “wel abus” na sampela animal moa. Tasol “dispela wel abus bilong hul i no gat as, em bai i lusim hul na i kam antap” em i samting bilong Satan na i makim ol wok politik.b​—Lukim Kamapim Tok Hait 13:1; Daniel 7:​2, 3, 17.

21. (a) Ol birua bilong tupela man bilong autim tok ol i mekim wanem long tupela long taim bilong pait? (b) Ol i larim skin bilong tupela i stap ples klia na ol i no planim, na dispela i makim wanem samting? (c) Olsem wanem long dispela hap taim olsem 3 na hap de? (Lukim sta i gat liklik rait, i stap long pes 168.)

²¹ Kirap long 1914 na i kam inap long 1918 ol kantri i tingting tasol long dispela Namba Wan Pait i stap long dispela taim. Olgeta man i givim bel long litimapim kantri bilong ol. Orait, long 1918 ol birua i mekim wok long dispela samting na ol i kirapim ol gavman long daunim dispela “tupela man bilong autim tok.” Ol i putim ol wasman bilong ol Sumatin Bilong Baibel long kot na sutim tok giaman long ol na tok, ol Witnes i bikhet long gavman, olsem na ol dispela brata i kalabus. Ol gutpela wanwok bilong ol i kirap nogut na ol i no strong moa long autim tok. I olsem wok bilong autim tok bilong Kingdom i dai pinis. Long bipo, sapos man i dai pinis na ol i no planim em long matmat, dispela i bagarapim nem bilong dispela man. (Song 79:​1-3; 1 King 13:​21, 22) Olsem na taim ol i larim skin bilong “tupela man bilong autim tok” i stap long ples klia na ol i no planim, dispela i semim tru tupela. Ples Palestain em i ples hat, na sapos man i dai na ol i larim skin bilong em i slip long rot na san i holim inap 3 na hap de, smel nogut bai kamap.c (Lukim Jon 11:39.) Dispela tok i makim bikpela sem “tupela man bilong autim tok” i mas karim. Ol brata i kalabus, na taim ol i apil na wetim kot, gavman i no larim ol i baim ofis, olsem beil. Ol i kalabus i stap, na olgeta man i harim, na i olsem ol i sting na smel nogut long ai bilong olgeta man “bilong dispela bikpela taun.” Dispela “bikpela taun” i makim wanem samting?

22. (a) Dispela bikpela taun i makim wanem samting? (b) Taim ol misin i “kilim” wok bilong dispela tupela man bilong autim tok na nau ol misin i amamas, ol nius i mekim wanem na i olsem ol tu i amamas? (Lukim blok.)

²² Sampela tok bilong Jon i helpim yumi long save long dispela samting. Em i tok, ol i bin kilim Jisas i dai long dispela taun, olsem na yumi tingim taun Jerusalem. Tasol Jon i tok, nem bilong taun hia em Sodom na Isip. Bipo ol i kolim Jerusalem olsem Sodom, long wanem, lain bilong en i bin mekim ol pasin i gat sem. (Aisaia 1:​8-​10; lukim tu Esekiel 16:​49, 53-​58.) Na Isip em namba wan bikpela gavman, na sampela taim em i makim pasin bilong dispela graun. (Aisaia 19:​1, 19; Joel 3:19) Olsem na “dispela bikpela taun” i makim “Jerusalem” long taim ol man bilong en i tok ol i lotuim God tasol ol i mekim pasin nogut olsem ol man bilong Sodom i bin mekim, na ol i bihainim pasin bilong dispela graun em Satan i bosim, olsem Isip. Na dispela “Jerusalem” i no bin i stap gut long God, em i makim ol lotu i holim nating nem Kristen, em ol i amamas taim ol i “kilim” wok bilong dispela tupela man bilong autim tok.