Sapta 31
Ol Gutpela Strongpela Wok Bilong Jehova
Driman 10—Kamapim Tok Hait 15:1–16:21
Stori: Jehova i stap long haus bilong em; ol i kapsaitim 7-pela dis i gat belhat bilong God
Taim bilong truim: 1919 i go inap Armagedon
1, 2. (a) Jon i lukim wanem namba 3 mak? (b) Inap longtaim pinis lain bilong Jehova i bin save long wanem wok bilong ol ensel?
WANPELA meri i karim wanpela pikinini man! Wanpela bikpela snek i laik kaikai dispela pikinini! Kamapim Tok Hait sapta 12 i stori long dispela tupela mak i bin kamap long heven, na yumi tingim dispela kros i bin stap longpela taim namel long “lain,” o pikinini, bilong meri bilong God na Satan wantaim lain pikinini nogut bilong em—nau dispela kros i laik kamap ples klia. Jon i toktok long ol dispela mak, na em i tok: “Wanpela narakain mak tru i kamap long skai. . . . Na narapela mak i kamap.” (KTH 12:1, 3, 7-12) Nau Jon i kolim namba 3 mak: “Orait mi lukim narapela narakain mak i kamap long skai, na mi kirap nogut tru. Mi lukim 7-pela ensel i stap, na ol i holim 7-pela samting nogut tru bilong bagarapim ol manmeri. Na taim dispela ol samting nogut i pinis, orait i no gat narapela moa bai i kamap. Long dispela 7-pela samting nogut, belhat bilong God bai i pinis tru.” (KTH 15:1) Dispela namba 3 mak tu em i bikpela samting long lain bilong Jehova i mas save long en.
2 Ol ensel i gat bikpela wok gen long kamapim laik bilong God. Inap longtaim pinis lain bilong Jehova i bin save long dispela samting. Wanpela man bilong raitim Song em i bin toktok long sampela ensel na em i tok: “Yupela olgeta ensel bilong Bikpela, yupela i gat bikpela strong. Yupela i save bihainim tok bilong em, yupela i save putim yau gut long tok bilong en. Orait yupela i mas litimapim nem bilong Bikpela.” (Song 103:20) Nau ol ensel i gat wok long kapsaitim 7-pela laspela samting nogut tru.
3. Dispela 7-pela samting nogut tru em i wanem samting? Taim ol ensel i kapsaitim, dispela i makim wanem samting?
3 Wanem dispela “7-pela samting nogut tru”? Ol i wankain olsem krai bilong 7-pela biugel, em i strongpela tok bilong kamapim tingting bilong Jehova long ol samting bilong dispela graun na bilong toksave long strafe bilong Jehova bai painim ol man. (KTH 8:1–9:21) Taim ol ensel i kapsaitim ol dispela “samting nogut tru” long ol man, dispela i makim taim Jehova bai givim strafe long ol man i bin mekim em i belhat, na ol i bagarap. (Aisaia 13:9-13; KTH 6:16, 17) Long rot bilong dispela 7-pela samting nogut tru, “belhat bilong God bai i pinis tru.” Tasol taim Jon i no stori yet long dispela samting, pastaim em i stori long sampela man i no ken kisim bagarap long dispela samting nogut tru. Ol dispela man i bin stap gut long Jehova na ol i no kisim mak bilong wel animal. Ol i litimapim nem bilong Jehova na ol i tokim ol man long taim bilong Jehova long kamapim belhat bilong em.—KTH 13:15-17.
Singsing Bilong Moses na Pikinini Sipsip
4. Nau Jon i lukim wanem samting?
4 Nau Jon i lukim wanpela bikpela samting tru. Em i tok: “Na mi lukim wanpela samting olsem bikpela solwara ol i bin wokim long glas na paia wantaim. Ol manmeri i bin winim pait na daunim dispela wel animal wantaim piksa bilong en na namba i makim nem bilong en, ol i sanap i stap long arere bilong dispela solwara i olsem glas, na ol i holim ol gita samting God i bin givim ol.”—KTH 15:2.
5. Dispela “solwara” i gat “paia” long en i makim wanem samting?
5 Dispela “solwara” i wankain olsem bipo Jon i lukim na i stap long ai bilong sia king bilong God. (KTH 4:6) Na em i kain olsem “bikpela tang wara” long haus lotu Solomon i bin wokim na i bilong ol pris i ken kisim wara long en bilong waswas. (1 King 7:23) Olsem na dispela “solwara” i gutpela samting bilong makim “wara,” em “tok bilong [God],” olsem Baibel, na Jisas i mekim wok long en bilong “wasim” lain pris Kristen bilong em na mekim ol “i kamap klin.” (Efesus 5:25, 26; Hibru 10:22) Na dispela “solwara” i gat “paia” long en, na dispela i makim olsem ol dispela Kristen em God i bin makim ol, ol i mas wok long winim ol traim i painim ol, na taim ol i bihainim stret ol lo bilong God, i olsem ol i kamap klin. Na yumi tingim tu olsem Baibel i gat ol strongpela tok long kot bai painim ol birua bilong Jehova, na ol dispela tok i olsem paia i kukim ol. (Lo 9:3; Sefanaia 3:8) Sampela bilong ol dispela strongpela tok em i stap long dispela “7-pela samting nogut tru” em ol ensel i laik kapsaitim long ol man, na i no gat sampela moa bai i kamap.
6. (a) Husat ol lain bilong singsing em “ol i sanap i stap long arere bilong dispela solwara”? Yumi save olsem wanem? (b) Ol i bin “winim pait” olsem wanem?
6 Ol pris tasol i bin mekim wok long “bikpela tang wara” long haus lotu Solomon i wokim, na dispela i makim olsem ol man i mekim singsing na ol i stap long arere bilong dispela “solwara” i stap long heven, ol i wanpela lain pris. “Na ol i holim ol gita samting God i bin givim ol,” na dispela i kirapim yumi long tingim ol dispela “24 hetman” na lain 144,000, long wanem ol tu i singsing wantaim gita. (KTH 5:8; 14:2) Ol dispela man bilong singsing em Jon i lukim, ol “i bin winim pait na daunim dispela wel animal wantaim piksa bilong en na namba i makim nem bilong en,” olsem na ol i hap lain bilong 144,000 ol i stap yet long graun long taim bilong las de. Long 1919 na i kam inap nau, klostu 90 yia, ol i no laik kisim mak bilong wel animal o tingim piksa bilong en i olsem samting bilong kamapim bel isi na gutaim long graun. Planti ol i bin stap strong i go inap long ol i dai, na ol i go pinis long heven, na nau ol i lukluk i kam daun long graun na ol i amamas long harim singsing bilong ol brata bilong ol em ol i stap yet long graun.—KTH 14:11-13.
7. Ol Israel bilong bipo i mekim wanem wok long gita? Taim yumi harim Jon i stori long ol gita bilong God, dispela i mas mekim wanem long yumi?
7 Ol dispela man i winim pait ol i gat ol ‘gita bilong God,’ na ol i olsem lain Livai bilong bipo ol i bin i stap long haus lotu na ol i singsing na paitim gita bilong lotuim Jehova. Na sampela i paitim gita taim ol i autim tok profet. (1 Stori 15:16; 25:1-3) Gutpela musik bilong gita i helpim singsing amamas na beten ol Israel i mekim bilong litimapim nem bilong Jehova na tenkyu long em. (1 Stori 13:8; Song 33:2; 43:4; 57:7, 8) Sapos hevi i painim ol, ol i no save paitim gita. (Song 137:2) Olsem na taim yumi harim Jon i toktok long gita, yumi mas redi long harim wanpela singsing amamas bilong winim pait na bilong litimapim nem bilong God bilong yumi.a
8. Ol i mekim singsing bilong husat? Wanem ol tok bilong singsing?
8 Nau Jon i stori long dispela samting: “Ol i singim song bilong Moses, em wokman bilong God, na song bilong Pikinini Sipsip. Dispela song i olsem, ‘Bikpela, yu God I Gat Olgeta Strong, yu save mekim ol narakain strongpela wok, na taim mipela i lukim mipela i save kirap nogut tru. King bilong olgeta lain manmeri, ol pasin bilong yu ol i stret na i tru olgeta. Bikpela, yu wanpela tasol yu stap holi. Olsem na olgeta manmeri ol i mas pret long yu na litimapim nem bilong yu. Olgeta lain man bai i kam na lotu long yu. Long wanem, stretpela pasin bilong yu i kamap ples klia pinis.’ ”—KTH 15:3, 4.
9. Bilong wanem Jon i kolim dispela singsing olsem singsing “bilong Moses”?
9 Dispela lain i winim pait ol i singsing, na Jon i kolim dispela singsing olsem singsing “bilong Moses,” long wanem, Moses wantaim lain Israel i bin winim bikpela hevi wankain olsem dispela lain, na ol tu i bin singsing olsem. Lain Israel i bin lukim 10-pela samting nogut i painim ol Isip, na ol i lukim ami bilong ol Isip i dai long solwara Retsi, na nau ol i amamas na bihainim Moses long mekim wanpela singsing bilong winim pait na litimapim nem bilong Jehova, olsem: “[Jehova], yu bai stap king oltaim oltaim.” (Kisim Bek 15:1-19) Olsem na i stret ol dispela man Jon i lukim long driman ol tu i mekim singsing long “King bilong olgeta taim,” long wanem, ol tu i bin winim pait long wel animal na ol i bin autim tok long “7-pela samting nogut tru” bilong pinisim “belhat bilong God”!—1 Timoti 1:17.
10. Wanem narapela singsing bilong Moses? Olsem wanem laspela ves bilong dispela singsing em i stret long ‘bikpela lain’ bilong nau?
10 Moses i bin mekim narapela singsing tu taim em i lapun na ol Israel i redi bilong daunim ol Kenan. Moses i tokim ol Israel: “Bai mi litimapim nem bilong [Jehova], na yupela bai i tokaut long biknem bilong en.” Na laspela ves bilong dispela singsing i strongim bel bilong ol man bilong ol narapela lain ol i stap wantaim ol Israel, na i strongim bel bilong dispela ‘bikpela lain’ bilong nau, em i tok: “Ol manmeri bilong ol arapela kantri, yupela i mas [amamas wantaim] ol manmeri bilong God.” Bilong wanem ol i mas amamas olsem? Long wanem, “God [bai] bagarapim olgeta man i save kilim i dai ol manmeri bilong en. Na em [bai] bekim rong bilong ol birua.” Na taim Jehova i mekim olsem, ol man i bilip na wetim em ol bai amamas.—Lo 32:3, 43; Rom 15:10-13; KTH 7:9.
11. Singsing Jon i harim, olsem wanem truim bilong en i wok long kamap yet?
11 Sapos Moses i stap nau long de bilong Bikpela em bai amamas long singsing wantaim dispela lain bilong heven olsem: “Olgeta lain man bai i kam na lotu long yu.” Truim bilong dispela gutpela singsing bilong heven i wok long kamap yet long graun—yumi lukim planti milion manmeri bilong “olgeta lain” i wok long kam insait long oganaisesen bilong Jehova long graun na ol i amamas.
12. Dispela singsing bilong “ol manmeri i bin winim pait,” bilong wanem Jon i kolim olsem singsing “bilong Pikinini Sipsip”?
12 Na dispela singsing “bilong Moses” em i singsing “bilong Pikinini Sipsip” tu. Olsem wanem na Jon i tok olsem? Moses em profet bilong Jehova long lain Israel, tasol Moses i tok Jehova bai kamapim wanpela profet kain olsem Moses yet, olsem na bihain Jehova i kamapim dispela profet, em dispela Pikinini Sipsip, olsem Krais Jisas. Moses “em wokman bilong God,” tasol Jisas em i Pikinini bilong God na em i olsem Man i Winim Moses. (Lo 18:15-19; Aposel 3:22, 23; Hibru 3:5, 6) Olsem na dispela lain bilong heven i mekim singsing “bilong Pikinini Sipsip” tu.
13. (a) Jisas i winim Moses, tasol olsem wanem em i wankain olsem Moses? (b) Olsem wanem yumi inap i stap wanbel wantaim dispela lain bilong singsing?
13 Olsem Moses i bin mekim, Jisas tu i litimapim nem bilong God namel long ol man, na em tu i bin tok, God bai winim pait na daunim olgeta birua. (Matyu 24:21, 22; 26:30; Luk 19:41-44) Na Jisas tu i bin tingim taim bai ol lain man i kam bilong litimapim nem bilong Jehova, na Jisas em “Pikinini Sipsip Bilong God” na em i dai bilong helpim ol man long mekim olsem. (Jon 1:29; KTH 7:9; skelim wantaim Aisaia 2:2-4; Sekaraia 8:23.) Na Moses i pilim pinis insait bilong nem bilong God, em Jehova, na em i kamapim dispela nem long ol man, na Jisas tu i mekim olsem. (Kisim Bek 6:2, 3; Song 90:1, 17; Jon 17:6) Jehova i Man bilong truim tok bilong em, na long dispela as yumi save em bai truim olgeta tok promis em i bin mekim. Olsem na yumi wanbel wantaim ol dispela lain bilong singsing long heven, na Pikinini Sipsip na Moses tu, na yumi tu i helpim dispela singsing i tok: “Olgeta manmeri ol i mas pret long yu na litimapim nem bilong yu.”
Ol Ensel i Holim Dis
14. Jon i lukim husat “i lusim haus bilong God na i kam ausait”? Ol i kisim wanem samting?
14 I stret yumi harim singsing bilong ol dispela man i bin winim pait, long wanem, taim ol i stap long graun ol i bin kamapim ol strongpela tok bilong God i stap long ol dispela dis em belhat bilong God i pulap long en. Na taim ol ensel i kapsaitim samting nogut tru i stap long ol dis, i no samting bilong ol man tasol, nogat. Olsem Jon i tok: “Bihain long dispela mi lukluk gen, na haus bilong God, em haus lotu sel long heven, em i op. Em haus lotu sel bilong God i kamapim tok tru bilong en. Na dispela 7-pela ensel i holim 7-pela samting nogut tru bilong bagarapim ol manmeri, ol i lusim haus bilong God na i kam ausait. Ol i bin pasim ol naispela laplap i klin tumas na i lait tru. Na ol i bin pasim ol let gol i raunim bros bilong ol. Na wanpela bilong dispela 4-pela samting i stap laip, em i kisim 7-pela dis gol na givim long ol 7-pela ensel. Na belhat bilong God i save stap oltaim oltaim, dispela em i pulap long ol 7-pela dis.”—KTH 15:5-7.
15. Olsem wanem na yumi no kirap nogut long 7-pela ensel i lusim “haus bilong God”?
15 Insait long haus lotu bilong ol Israel i gat ol piksa bilong ol samting bilong heven i stap, na hetpris tasol inap long i go insait long Rum Tambu Tru, em Jon i kolim “haus bilong God.” (Hibru 9:3, 7) Dispela “haus” i makim ples em Jehova i stap long en long heven. Hetpris Jisas na ol ensel tu ol inap i go long dispela hap em Jehova i stap long en long heven. (Matyu 18:10; Hibru 9:24-26) Olsem na yumi no ken kirap nogut long tok bilong Jon, em i tok em i lukim 7-pela ensel “i lusim haus bilong God na i kam ausait,” long wanem, God Jehova yet i bin givim wok long ol: Ol i mas kisim ol dis na kapsaitim belhat bilong God i go daun long ol man bilong graun.—KTH 16:1.
16. (a) Olsem wanem yumi save ol dispela ensel inap tru long mekim dispela wok? (b) Olsem wanem yumi save i gat sampela moa insait long dispela wok long kapsaitim ol samting nogut tru i stap insait long ol dis?
16 Ol dispela ensel ol inap tru long mekim dispela wok. “Ol i bin pasim ol naispela laplap i klin tumas na i lait tru,” na dispela i makim olsem ol i stap klin long ol samting bilong spirit, na pasin bilong ol tu i holi na i stret long ai bilong Jehova. “Na ol i bin pasim ol let gol i raunim bros bilong ol.” Bipo, taim man i laik mekim wanpela wok em i save pasim let. (Wok Pris 8:7, 13; 1 Samuel 2:18; Luk 12:37; Jon 13:4, 5) Olsem na ol ensel tu i pasim let bambai ol i ken redi long mekim wanpela wok. Let bilong ol em i let gol. Long haus lotu bilong bipo, gol i makim ol samting bilong God na samting bilong heven. (Hibru 9:4, 11, 12) Olsem na let gol bilong ol ensel i makim wanpela bikpela wok holi ol i mas mekim, em wok God i givim long ol. Na i gat sampela moa tu i insait long dispela bikpela wok. Wanpela bilong ol 4-pela samting i stap laip i givim ol dis long ol dispela ensel. Ating em dispela ensel i gat pes olsem bilong laion, na pes bilong em i makim olsem em i no man bilong pret, nogat; em strongpela man inap long tokaut long ol strongpela tok bilong Jehova.—KTH 4:7.
Jehova i Stap Long Haus Bilong Em
17. Jon i stori olsem wanem long haus bilong God? Na yumi tingim wanem samting bilong haus lotu bilong ol Israel bilong bipo?
17 Nau Jon i stori long laspela hap bilong dispela driman na em i tok: “Na smok bilong lait na strong bilong God, em i pulap long haus bilong en. Na i no gat wanpela inap i go insait long haus bilong en. Nogat. Ol i mas wetim ol 7-pela ensel i pinisim wok long dispela 7-pela samting nogut pastaim.” (KTH 15:8) Long taim lain Israel i bin stap, sampela taim klaut olsem smok i bin karamapim haus lotu, na smok i makim bikpela strong bilong Jehova, na smok i pasim pris na em i no inap go insait. (1 King 8:10, 11; 2 Stori 5:13, 14; skelim wantaim Aisaia 6:4, 5.) Long ol dispela taim, Jehova i laik mekim sampela bikpela wok samting long graun.
18. Wanem taim bai 7-pela ensel i go bek gen long Jehova na givim ripot long em?
18 Jehova i gat bikpela tingting long ol samting i kamap hia long graun long nau. Em i laik bai 7-pela ensel i mas pinisim wok bilong ol. Nau em taim bilong Jehova i skelim ol man, olsem Song 11:4-6 i tok: “God i stap long haus bilong em yet. Em i stap king long heven, na ai bilong en i save lukim olgeta man. Em i save long olgeta samting ol i mekim. Bikpela i save skelim ol stretpela man na ol man nogut. Em i no laikim tru ol man i sakim lo bilong em. Em i kapsaitim hatpela paia moa antap long ol man nogut. Na em i mekim save boinim skin bilong ol. Dispela em i pe bilong ol.” Ol ensel i mas kapsaitim olgeta 7-pela samting nogut tru i go daun long ol man nogut pastaim; mekim pinis, na nau ol i ken i go bek long Jehova.
19. (a) Wanpela maus i tokim ol ensel long mekim wanem? Em maus bilong husat? (b) Wanem taim ol ensel i bin kirap long kapsaitim belhat bilong God i stap long ol dis?
19 Strongpela maus i toktok, i olsem klaut i pairap, na Jon i stori olsem: “Orait mi harim maus bilong wanpela man i kamap insait long haus bilong God. Em i singaut strong long dispela 7-pela ensel olsem, ‘Yupela i mas kisim dispela 7-pela dis i gat belhat bilong God, na go kapsaitim i go daun long graun.’ ” (KTH 16:1) Husat i mekim dispela strongpela tok? Jehova yet i mekim. Lait na strong bilong em i bikpela tumas na i no inap narapela i go insait long haus bilong em. Long 1918 Jehova i kam long haus bilong em bilong skelim ol man long kot. (Malakai 3:1-5) Olsem na bihain liklik long 1918, em i bin tokim ol ensel long kirap kapsaitim belhat bilong em long ol man bilong graun. Long 1922 lain bilong God i kirap autim strong dispela tok long kot bilong God bai painim ol man, na long nau tokaut bilong dispela belhat bilong God em i go bikpela tru.
Ol Dis na Krai Bilong Biugel
20. Ol dis i gat belhat bilong Jehova i stap long en i kamapim long ples klia wanem samting? Ol i toksave long wanem samting? Wanem rot bilong ol ensel long kapsaitim ol samting i stap long ol dis?
20 Ol dis i gat belhat bilong Jehova i stap long en, na ol i kamapim long ples klia tingting bilong Jehova, em i ting olsem wanem long pasin bilong ol man bilong graun. Na ol dispela dis i gat toksave tu long strafe bilong God bai painim ol man. Lain Kristen long graun em God i bin makim ol, ol i rot bilong ol ensel long kapsaitim belhat bilong God i go long ol man. Ol dispela Kristen ol i man bilong mekim dispela singsing bilong Moses na Pikinini Sipsip. Lain em Jon i piksa bilong ol, ol i autim tok bilong Kingdom na kamapim long ples klia ol samting i stap insait long ol dis, em ol strongpela tok long belhat bilong God. (Matyu 24:14; KTH 14:6, 7) Olsem na ol i autim tupela kain tok—wanpela i stori long ol man bai kamap fri na lusim ol samting i kalabusim ol, na wanpela i toksave long ol man long belhat bilong God, em bai “mekim save long ol birua.”—Aisaia 61:1, 2.
21. Belhat bilong God i stap long 4-pela dis, ol i kapsaitim i go long wanem samting na i wankain long samting em krai bilong 4-pela biugel i go long en? Tasol olsem wanem em i narapela kain tu?
21 Ol samting i stap long namba wan i go inap namba 4 dis, ol i kapsaitim long ol wankain samting olsem krai bilong namba wan i go inap namba 4 biugel i go long en—em graun, na solwara, na ol wara na ol hul wara, na lait bilong san na mun na ol sta. (KTH 8:1-12) Krai bilong biugel i tokaut long ol samting nogut tru i mas kisim wanpela hap tasol bilong graun na solwara na ol wara na ol hul wara na lait, tasol belhat bilong God em ol ensel i kapsaitim, em i kisim olgeta hap bilong ol dispela samting. Olsem na long de bilong Bikpela, belhat bilong God i bin kisim pastaim ol misin i holim nating nem Kristen, ol i olsem “wanpela hap bilong graun.” Tasol ol strongpela toksave long kot bilong Jehova i kisim olgeta lain bilong Satan hia long graun, na bikpela hevi tru i kisim ol.
22. Olsem wanem krai bilong 3-pela laspela biugel i narapela kain? Olsem wanem ol i wankain liklik olsem 3-pela laspela dis i gat belhat bilong Jehova i stap long en?
22 Krai bilong 3-pela laspela biugel i narapela kain. Fopela i go pas, em Jon i kolim olsem 4-pela “samting nogut tru,” tasol 3-pela i kam bihain em i kolim olsem 3-pela “bikpela hevi.” (KTH 8:13; 9:12) Namba wan na namba 2 “bikpela hevi” em ol grasopa na ol soldia i sindaun long hos, tasol namba 3 “bikpela hevi” em samting i kamap long taim Kingdom bilong Jehova i bin kirap nupela. (KTH 9:1-21; 11:15-19) Tripela laspela dis i gat belhat bilong God, ol tu i gat sampela samting olsem bilong dispela 3-pela “bikpela hevi,” tasol ol i no wankain olsem dispela 3-pela “bikpela hevi,” na bihain bai yumi stori long dispela samting. Orait, nau yumi ken harim Jon i toktok long ol bikpela samting i kamap taim ol ensel i kapsaitim belhat bilong Jehova i stap long ol dis na i kam daun long graun.
[Futnot]
a Long 1921 dispela lain em Jon i piksa bilong ol, ol i wokim wanpela buk (The Harp of God) em i bilong helpim man long lainim tok bilong Baibel, na ol i tilim 5 milion samting long 20 tok ples, na dispela i helpim sampela man moa long i kam insait long lain bilong singsing, em ol man God i bin makim ol.