Gutpela Wasman na “Dispela Banis” Sipsip Bilong Em

1, 2. (a) Long Sam 23:1 King Devit i stori olsem wanem long Jehova? (b) Olsem wanem na i stret Devit i stori long Jehova i olsem wanpela wasman bilong sipsip na lain Isrel i olsem ol sipsip bilong em?

WANPELA man, taim em i stap manki yet em i wasman bilong sipsip na bihain em i kamap wanpela king bilong Isrel, em i raitim planti song o sam. Wanpela sam bilong em ol man i save laikim, i tok: “[Jehova] i wasman bilong mi. Olsem na mi no inap sot long wanpela samting. Em i mekim mi slip long gutpela gras. Na em i bringim mi i go long ol liklik wara na mi dring na mi malolo.”—Sam 23:1, 2.

² Narapela man i raitim wanpela sam ol tok bilong dispela sam tu i stret long Isrel tasol. Sam 95:6, 7 i tok: “Yupela kam, yumi daunim het na lotu long Bikpela i bin wokim yumi. Orait, yumi go klostu long em na brukim skru. Em yet i God bilong yumi. Em yet i save lukautim yumi manmeri bilong en olsem ol sipsip, na em i save givim kaikai long yumi.” King bilong lain Isrel em i olsem wasman bilong ol sipsip na ol Isrel i olsem lain sipsip. Tasol wasman tru bilong ol em God Jehova. Em i nambawan gutpela Wasman bilong ol sipsip, na ol wasman long ol kongrigesen bilong lain bilong Em long nau ol i mas bihainim pasin bilong Em.

3. Na olsem wanem Jehova i Wasman bilong Jisas?

³ King Devit em i olsem piksa na em i makim Krais Jisas. Tasol Jisas i winim tru dispela tumbuna bilong em. I stret em i ken kolim tok Bilong Devit na tok: ‘Jehova i wasman bilong mi.’ Man i kam paslain long Jisas, em Jon Bilong Baptais, em i lukim. Krais Jisas i kam long em, na em i tokim ol man i stap wantaim em: “Lukim, em i Pikinini Sipsip Bilong God. Em i tekewe sin bilong olgeta manmeri long graun.” (Jon 1:29, 36) Ating Jon i tingim tok Bilong Aisaia na em i kolim Jisas olsem “Pikinini Sipsip,” wanpela sipsip bilong dispela lain sipsip. Aisaia 53:7 (NW) i tok: “Ol i bringim em i kam olsem ol i save bringim sipsip i kam bilong kilim i dai.” Na kirap long Revelesen 5:6 i go inap long pinis bilong Revelesen, inap 28 taim Baibel i kolim Jisas olsem Pikinini Sipsip bilong God.

4. Olsem wanem Jisas i olsem wanpela sipsip long wanpela banis bilong sipsip? Wanem dispela banis bilong sipsip?

⁴ God i wokim mirakel na long yia 2 B.C.E. dispela Pikinini bilong em i kamap man long graun. Em i bilong lain Isrel, olsem na em i stap aninit long kontrak bilong Lo, em Jehova, Wasman bilong lain Isrel, i bin wokim wantaim dispela lain. Moses i namelman bilong dispela Lo wantaim Tenpela Mandato bilong en. (Galesia 4:4, 5) Jisas em i bilong dispela lain bilong God. Mama i karim em i kamap wanpela sipsip bilong dispela Nambawan Bikpela Wasman bilong ol sipsip. Olsem na Jisas yet i stap insait long dispela samting i banisim ol sipsip na lukautim ol, em dispela kontrak God i wokim wantaim ol Isrel long rot bilong Moses. Jisas i stap insait long dispela lain sipsip em God i Wasman bilong ol.

5. Bilong wanem yumi kisim narapela tingting nau long banis sipsip em Jon 10:1 i stori long en?

⁵ Olsem wanem? Mipela i tok “banis bilong sipsip” long Jon sapta 10 ves 1 i makim dispela kontrak bilong Lo, em Moses i namelman bilong en? Yes, mipela i tok olsem! Tru, bipo mipela bin tok dispela “banis bilong sipsip” i makim kontrak bilong Ebraham, tasol taim mipela i tok olsem, mipela i ting Jon sapta 10 i stori long wanpela banis tasol bilong ol sipsip. Nau mipela skelim gut ol tok bilong Jon sapta 10 na sampela tok moa bilong Baibel, na mipela i save, dispela sapta i no tok long wanpela banis tasol. Olsem na mipela stretim tok mipela i bin mekim.

6. Taim ol i stretim tingting long sampela tok bilong Baibel, yu save ting olsem wanem long dispela samting?

⁶ Sampela taim yumi mas stretim tingting, long wanem oltaim save bilong yumi i kamap strong moa. Long Provep 4:18 Baibel i tok “rot bilong ol stretpela man i lait olsem san i kamap long moningtaim, na lait i wok long kamap strong moa, inap long belo.” Taim yumi kisim sampela save moa na stretim tok, ol man i lusim bilip na ol i birua long tok i tru, ol i save ‘kaikaim tit bilong ol na belhat.’ Tasol mipela no tingting planti long dispela samting. (Aposel 7:54) Mipela save tenkyu long Jehova, long wanem em i “save givim lait long ol stretpela manmeri, na i save mekim bel bilong ol i amamas.”(Sam 97:11) Mipela save yu bai amamas long wanem nau yu inap save gut long as bilong tok piksa bilong Jisas long banis bilong sipsip.

Banis Sipsip Bilong Pastaim, Aninit long Lo

7. Olsem wanem Jisas i kisim nupela wok long banis sipsip bilong Isrel long 29 C.E.?

⁷ Orait, olsem wanem long dispela “banis bilong sipsip,” em kontrak bilong Lo? Jon i givim baptais long Jisas na spirit holi i makim Jisas na inap 40 de traim i painim em. Pinis nau na Jisas i kam long lain Isrel olsem Wasman bilong ol. Dispela samting i kamap long yia 29 C.E. Jisas i tok, God i bin salim em bilong helpim tasol “ol sipsip bilong lain Isrel, ol i lus pinis.” (Matyu 10:6; 15:24) Paslain long dispela taim, Jisas i stap tasol olsem wanpela Isrel bilong skin insait long “banis bilong sipsip,” em dispela kontrak bilong Lo Moses i namelman bilong en. Tasol nau spirit bilong God i makim Jisas na mekim em i kamap pikinini spirit bilong God, olsem na Krais Jisas inap kam long dispela “banis bilong sipsip” olsem “gutpela wasman bilong sipsip.”—Jon 10:11.

8. Wasman bilong dua long Jon 10:3 em i husat? Em i mekim wanem na em i olsem wasman bilong dua?

⁸ Jon Bilong Baptais em i namba wan man bilong save Jisas em i Wasman bilong ol sipsip na Nambawan Wasman Tru bilong ol sipsip em i bin makim em. Jisas i no kam bilong bagarapim ol sipsip; nogat; em i gat wok tru na em i kam long dispela banis bilong sipsip. I stret em i ken i go long banis sipsip bilong lain Isrel olsem Wasman bilong ol, em i wasman bilong spirit. Olsem Malakai 4:5 i tok (skelim wantaim Matyu 11:12-14 na Luk 1:13-17), Jehova i makim Jon bilong Baptais i olsem “wasman bilong dua” bilong dispela banis bilong sipsip. (Jon 1:15, 17, 19-28; 10:3) Jon i luksave long Krais Jisas, em i save Jisas inap go insait long dua bilong banis, long wanem God Jehova i bin makim em i stap Nambatu Wasman bilong ol sipsip. Jon i redi long opim dua long Jisas bambai Jisas i ken singautim nem bilong ol sipsip na bringim ol i go ausait.

9, 10. Olsem wanem Jisas i mekim ol samting em i yet i tok Gutpela Wasman i mas mekim? Ol wasman bilong sipsip long Isrel i save mekim wanem kain pasin long ol sipsip bilong ol?

⁹ Jisas i mekim ol samting olsem em i Gutpela Wasman na Wasman Tru bilong ol sipsip i mas mekim. Long Jon 10:1-5 Jisas i tok: “Tru tumas mi tokim yupela: Man i no save go insait long dua bilong banis bilong sipsip, tasol em i kalapim banis long narapela hap, na i go insait, kain man olsem em i stilman na man bilong pulim samting. Tasol man i save go insait long dua, em i wasman bilong sipsip. Wasman bilong dua em i save opim dua long dispela man. Na ol sipsip ol i save harim maus bilong em. Em i save singautim nem bilong ol sipsip bilong em yet. Na em i kisim ol i go ausait. Em i bringim olgeta sipsip bilong em i go ausait pinis, orait em i save wokabaut i go pas long ol. Na ol sipsip ol i save long maus bilong em, olsem na ol i bihainim em. Ol i no save bihainim narapela man. Nogat. Ol i save ranawe long em. Long wanem ol i no save long maus bilong ol arapela man.”

¹⁰ Long Isrel, long bipo, wasman bilong sipsip i save tru long ol sipsip bilong em yet. Ol sipsip i save harim maus bilong em na taim em i singautim ol, ol i kam long em. Na em i save givim nem long ol. Taim em i singautim nem bilong wanpela sipsip, dispela sipsip i save harim na i kam long em. Ol sipsip i save long maus bilong wasman bilong ol yet na ol i no ken harim maus bilong ol narapela man.

11. Yumi mas ting olsem wanem long wok wasman bilong Jisas?

¹¹ Em gutpela samting tru, long wanem dispela samting i makim olsem Wasman bilong yumi em i save long nem bilong yumi olgeta wan wan na em i save tingim yumi olgeta wan wan na lukautim yumi! Planti manmeri long taim bilong Jisas, ol i harim dispela tok, tasol ol i no save long as bilong en. Jon 10:6 i tok: “Jisas i givim dispela tok bokis long ol, tasol ol i no save as bilong dispela tok em i mekim long ol.” Nogut yumi tu yumi no kisim gut as bilong dispela tok.

12. Husat i olsem “ol arapela man” em Jisas i stori long ol?

¹² Sampela Isrel ol i kirap na ol i tok ol i Krais. Ol dispela man i olsem “ol arapela man” Jisas i tok ol sipsip i no save long ol. Ol i no go long dispela “wasman bilong dua” Jehova i makim, em Jon, bambai em i ken opim dua long ol na ol i go insait long ol sipsip. Tasol Jisas i mekim pasin i stret na em i go long Jon bilong kisim baptais. (Matyu 3:1-7; Mak 1:1-7; Luk 3:1-9) Jisas i laik lukautim ol sipsip, olsem na em i tokim ol em i Wasman bilong ol na em i helpim ol long save long ol wasman giaman.

Nupela Banis Bilong Sipsip Aninit long Gutpela Wasman Bilong Ol Sipsip

13. I gat wanem senis long banis sipsip bilong Jehova?

¹³ Bikpela samting, long bipo na long nau tu, em olsem: Man i mas go insait long banis i stret. Olsem wanem? Nau i gat narapela banis bilong sipsip Jehova i orait long en? Em i stret. Ol narapela tok Jisas i mekim long Jon sapta 10 na samting i bin kamap i soim yumi, God i laik senisim olpela banis sipsip bilong ol Isrel i stap aninit long Lo, na kamapim nupela banis.

14, 15. Olsem wanem yumi ken save, long Jon 10:7-10 Jisas i toktok long nupela banis bilong sipsip?

¹⁴ “Olsem na Jisas i tok gen, ‘Mi tok tru tumas long yupela: Mi yet mi dua bilong sipsip. Olgeta man i kam paslain long mi, ol i stilman na man bilong pulim samting. Tasol ol sipsip ol i no bin harim maus bilong ol. Mi yet mi dua. Sapos wanpela man i kam long mi na i go insait long banis, bai God i kisim bek em. Na em bai i go insait na i go ausait, i go i kam na i kisim kaikai. Stilman i no save kam long narapela samting. Em i kam bilong stilim sipsip na bilong kilim ol i dai na bagarapim ol. Tasol mi, mi kam bilong ol i ken kisim laip, na laip i ken pulap tru long ol.’”—Jon 10:7-10.

¹⁵ Long dispela ves Jisas i tok em yet i dua bilong dispela banis sipsip nau em i stori long en. Em i “dua” bilong dispela banis sipsip bilong Nambawan Bikpela Wasman bilong ol sipsip, em God Jehova. Jisas em i no “dua” bilong banis sipsip bilong Isrel bilong skin, long wanem em yet i insait long dispela banis. Mama bilong em i karim em long dispela lain. Jisas em i no dua o namelman bilong kontrak bilong Lo God i wokim wantaim lain Isrel. Paslain tru long taim Jisas i kamap man long graun, God i tokim lain Isrel: “Long olgeta lain bilong graun mi save long lain bilong yupela tasol.” (Emos 3:2, NW) Ol namba wan manmeri bilong lain sipsip bilong Jisas ol i bilong sipsip bilong banis sipsip bilong lain Isrel. Olsem na Jisas i kirap long stori long nupela banis bilong ol sipsip, em i Gutpela Wasman bilong ol na em i olsem dua bilong dispela banis.

16. (a) Jehova i tok wanem long bipo na yumi inap save bai i gat nupela banis bilong sipsip? (b) Jisas i tok wanem na yumi ken save, nupela banis bilong sipsip i laik kamap?

¹⁶ Ol Juda i no laik kamap sipsip o disaipel bilong em, ol i ting lain bilong ol yet tasol i banis sipsip bilong God. Ol i ting God Jehova i tingim dispela banis bilong sipsip tasol, na dispela banis bai stap i go i go inap long taim bihain bihain. Ol i no tingim “nupela kontrak” God Jehova i laik kamapim olsem Jeremaia 31:31-34 i tok. Taim em i wokim nupela kontrak bai i gat nupela banis bilong sipsip. Jisas Krais i no dua bilong wanpela banis sipsip em bai pinis na God i no ken lukautim moa. Nogat. (Hibru 8:7-13) Taim Jisas i mekim laspela Pasova wantaim ol disaipel bilong em bilong lain Juda, Jisas i givim kap wain long ol na em i tok: “Dispela kap wain em i nupela kontrak long blut bilong mi, mi kapsaitim bilong helpim yupela.”—Luk 22:20; Matyu 26:27-29.

17, 18. (a) Wanem dispela nupela banis bilong sipsip Jisas i Gutpela Wasman bilong en? (b) Olsem wanem na i stret Baibel i tok em i dua bilong dispela banis bilong sipsip?

¹⁷ Krais Jisas em i dua bilong wanpela banis sipsip em bilong i stap oltaim. Dispela banis i senisim banis sipsip bilong ol Isrel bilong skin, em ol i stap aninit long Lo bilong Moses. Jisas i dai na kirap bek na 40 de bihain em i go antap long heven. Taim em i stap long graun em i no bin mekim wanpela rong, olsem na em inap kisim laip long graun olsem man i gutpela olgeta. (Aisaia 53:3-12; Aposel 8:30-35) Blut bilong em i makim dispela laip em inap kisim, olsem na em i karim pe bilong blut bilong em i go antap na givim long God bilong kamapim dispela nupela kontrak. Em i mekim olsem long de Pentikos, long yia 33 C.E., o paslain long dispela taim, long wanem long dispela taim God i kapsaitim spirit holi long ol disaipel long Jerusalem, em ol i bilong lain Juda.

¹⁸ Long dispela rot ol dispela disaipel i go insait long nupela kontrak na nupela banis bilong sipsip i kamap. Spirit bilong Jehova i kamapim na makim ol sipsip ol i bilong dispela nupela banis. Ol dispela sipsip i pas wantaim Jehova insait long nupela kontrak, em blut bilong Krais i as bilong en. Krais Jisas em i “dua” bilong dispela banis, na God i makim em i stap gutpela Wasman bilong ol sipsip insait long dispela banis.

19. Olsem wanem ol samting i kamap olsem Sekaraia 13:7 i bin tok long en?

¹⁹ Inap tripela de, taim ol i holim Jisas na em i stap long matmat, em i putim ol sipsip long han bilong Nambawan Wasman, em God Jehova, na Jehova i lukautim ol. Long dispela taim ol samting i kamap olsem Jehova i tok long Sekaraia 13:7 (NW): “Kilim wasman na bai lain sipsip i ranawe i go nabaut; na mi mas tanim han bilong mi i go bek long ol dispela man nating.” Ol disaipel, ol dispela man nating, ol i stap long han bilong Nambawan Wasman bilong ol sipsip inap long taim Nambatu Wasman, Krais Jisas, i kirap bek, na nau Nambawan Wasman i putim ol gen long han bilong em.—Matyu 26:31, 32.

20. Jon 10:16 i tok wanem na yumi save i gat narapela banis sipsip i mas kamap? Bilong wanem yumi mas save long dispela banis bilong sipsip?

²⁰ Tingim dispela nupela banis sipsip bilong Gutpela Wasman na lukim tok Jisas i mekim long Jon 10:16: “Mi gat arapela sipsip tu, na ol i no bilong dispela banis. Mi mas bringim ol dispela tu.” Olsem na ating i gat narapela banis sipsip moa, em Jisas i Gutpela Wasman bilong en? Sapos olsem, orait, wanem taim dispela narapela banis bilong sipsip i kamap na husat i olsem ol sipsip bilong dispela banis? Em ol gutpela askim, na bekim bilong en inap helpim yu long save long gutpela samting yu inap wetim i kamap na laip oltaim yu inap kisim. Orait, Nau yumi ken skelim dispela samting.

Banis Sipsip Bilong Nau Bilong Ol “Arapela Sipsip”

“Mi gat arapela sipsip tu, na ol i no bilong dispela banis. Mi mas bringim ol dispela tu. Na bai ol i harim maus bilong mi. Na bambai i gat wanpela lain sipsip tasol na wanpela wasman tasol bilong ol sipsip.”—Jon 10:16.

1. Husat ol i kam insait long banis sipsip bilong ol Isrel bilong spirit long yia 36 C.E.?

TAIM nupela banis bilong sipsip i kamap long Pentikos 33 C.E., em banis sipsip bilong ol Isrel bilong spirit. Olpela banis bilong ol Juda aninit long Lo bilong Moses, em i pinis. Dispela Lo o Kontrak inapim pinis wok bilong en. Tripela yia hap bihain, taim Konilias wantaim lain bilong em ol i kisim baptais, nau ol manmeri bilong ol narapela lain ol i kam insait long dispela banis bilong sipsip, em Krais Jisas i “dua” bilong en. (Aposel sapta 10) “Isrel tru bilong God,” ol Isrel bilong spirit ol i stap insait long dispela banis. Yumi no ken tok “ol i no bilong dispela banis.” Nogat. Olgeta, maski ol i bilong lain Juda o ol narapela lain, ol i bilong dispela banis; ol i insait long “nupela kontrak.”—Galesia 6:16; Jon 10:16.

2. Olsem wanem Jisas i stap yet olsem Gutpela Wasman bilong ol manmeri long nupela kontrak?

² Long nau liklik hap lain, olsem lain remnan, bilong dispela “Isrel tru bilong God,” ol i stap yet long graun. Olsem na yumi save Krais Jisas, namelman bilong nupela kontrak, em i bin mekim gutpela wok wasman. I stret Jisas i ken mekim wankain tok long nau olsem em i bin mekim taim em i no i dai yet na taim em i mekim em i no hambak. Em i tok: “Mi gutpela wasman bilong sipsip. Mi save long ol sipsip bilong mi, na ol sipsip bilong mi ol i save long mi, olsem Papa [Nambawan Wasman bilong ol sipsip] i save long mi, na mi save long Papa. Na mi lusim laip bilong mi bilong helpim ol sipsip.”—Jon 10:14, 15.

3, 4. Olsem wanem na ol “arapela sipsip” i narapela lain na “liklik lain sipsip” i narapela lain?

³ Bihain Jisas i tok em i gat ol narapela sipsip tu. Em i tok: “Mi gat arapela sipsip tu, ol i no bilong dispela banis. Mi mas bringim ol dispela tu. Na bai ol i harim maus bilong mi. Na bambai i gat wanpela lain sipsip tasol na wanpela wasman tasol bilong ol sipsip.” (Jon 10:16) Husat ol dispela “arapela sipsip”?

⁴ Ol dispela “arapela sipsip” ol i no bilong “dispela banis” bilong “Isrel tru bilong God.” Ol i no bilong lain Isrel bilong spirit. Ol i no bilong kisim laip long heven na mekim wok king long Kingdom. Lain bilong heven, olsem ol Isrel bilong spirit, ol i “liklik lain sipsip” tasol. Jisas i toktok wantaim ol disaipel bilong em ol i bilong kisim spirit holi long Pentikos na em i tok: “Yupela liklik lain sipsip, yupela i no ken pret. Papa bilong yupela em i pasim tok pinis long givim kingdom long yupela.” Luk 12:32) Dispela liklik lain sipsip, em God bai givim kingdom bilong heven long ol na ol i bilong mekim wok king wantaim Gutpela Wasman, Krais Jisas, ol inap olsem 144,000 tasol.—Revelesen 7:1-8; 14:1-5.

5. Olsem wanem Revelesen 14:4 i soim yumi ol “arapela sipsip” i narapela lain?

⁵ Revelesen 14:4 i tok: “God i bin baim bek ol namel long ol manmeri bilong graun, na ol i stap olsem namba wan lain God i kisim bek bilong em yet wantaim Pikinini Sipsip.” Ol dispela 144,000 Isrel bilong spirit, ol i “namba wan lain,” olsem na yumi save i gat narapela lain tu. I gat 144,000 Isrel bilong spirit, ol i liklik lain bilong mekim wok king na ol i stap insait long banis bilong nupela kontrak, na i gat ol “arapela sipsip” tu, em God i mas bungim ol bihain. Na olsem wanem? God i bin bungim ol dispela “arapela sipsip”? Tru tumas em i bin mekim.

6, 7. Olsem wanem ol samting i kamap olsem Revelesen 22:17 i tok long en? Ol i no singautim husat i kam?

⁶ Revelesen 22:17 i tok: “Holi Spirit wantaim meri bilong Pikinini Sipsip tupela i tok,’ ‘Yu kam!’ Na man bilong harim dispela tok, em i mas tok, ‘Yu kam!’ na man i dai long wara, em i mas kam. Man i laik dring, em i mas kam na kisim wara bilong laip.” “Meri” bilong Pikinini Sipsip i no tokim lain bilong em yet ‘Yu kam!’ bilong inapim lain bilong em, em ol 144,000. Nogat. Nau long taim bilong pinis, kirap long yia 1914 C.E., yumi bin harim “meri bilong Pikinini Sipsip” wantaim spirit holi i tok, ‘Yu kam!’—Matyu 24:3.

⁷ Ol i singautim ol manmeri bilong graun ol i laik i stap gutpela olgeta long Paradais long graun taim Kingdom bilong God na Krais i mekim graun i kamap gutpela ples gen. Ol dispela manmeri ol i singautim ol i kam, em ol “arapela sipsip” Jisas i bin tok long ol long Jon 10:16. Ol i no bilong “dispela banis,” em Gutpela Wasman Jisas i toktok long en long Jon 10:16. Tasol ol i harim dispela tok long maus bilong lain remnan bilong ol sipsip i stap long “dispela banis.” Na ol i bung wantaim lain remnan bilong ol Isrel bilong spirit na wok wantaim ol long singautim ol narapela man i kam. Ol bai mekim dispela wok i go inap long pinis bilong dispela taim nau.

8. Long 1905 ol i gat wanem tingting long ol “arapela sipsip”?

⁸ Long Wastaua (tok Inglis) bilong Mas 15, 1905 ol i putim wanpela tok, het-tok bilong en i olsem: “Wasman Tru, Ol Sipsip Tru, Banis Sipsip Tru” Dispela tok i makim ol sipsip bilong “dispela banis” ol i narapela lain na ol “arapela sipsip” i narapela lain. Wastaua i tok, ol sipsip bilong “dispela banis,” em kongrigesen Kristen God i singautim ol nau long “taim bilong Gutnius.” Bihain Wastaua i putim namba tu het-tok, olsem: “Ol Arapela Sipsip Bilong Arapela Lain” na “Ol Wanlain Ol i Kisim Dispela Wankain Promis” (pes 89, 90). Wastaua i tok:

“Lain sipsip, em Bikpela i wok long bungim long taim bilong dispela tok piksa, ol i no lain Isrel bilong skin. Nogat. Em i bungim ol Isrel bilong spirit. . . . Olsem na tingting bilong sampela olsem yumi ol manmeri bilong ol narapela lain o ol ‘arapela sipsip,’ God i bringim yumi i go insait long dispela wanpela banis, dispela tingting i no stret. . . . Ol ‘arapela sipsip’ long dispela tok piksa, em ol manmeri i kamap sipsip bilong Bikpela bihain long taim God i bungim pinis ol manmeri bilong ‘liklik lain sipsip’ long nau.”

9, 10. (a) Ol samting Jisas i tok long en long tok piksa bilong ol sipsip na ol meme, olsem wanem na ol dispela samting i no inap kamap long taim bilong 1,000 yia? (b) Wanem taim bai God i bungim ol narapela sipsip?

⁹ Na long narapela paragraf bihain Wastaua i tok, ol dispela “arapela sipsip” i olsem ol sipsip Jisas i stori long ol long tok piksa bilong ol sipsip na ol meme long Matyu 25:31-46. Long yia 1905 ol i ting ol samting bilong dispela tok piksa bai kamap long taim bilong 1,000 yia bilong Krais i stap King, bihain long taim bilong “bikpela de bilong God I Gat Olgeta Strong,” em Amagedon. (Revelesen 16:14-16) Tasol Jisas i mekim dispela tok piksa taim em i bekim tok long askim bilong em, em ol i bin tok, ‘Wanem mak bai kamap na mipela i ken save, yu kam pinis olsem king na pasin bilong dispela laik pinis?’ (Matyu 24:3) Olsem ol samting bilong dispela tok piksa, olsem truim bilong en, bai kamap long taim bilong pinis bilong dispela pasin bilong nau. Dispela taim i kirap long yia 1914.

¹⁰ Olsem na Gutpela Wasman Krais Jisas em i no kirap long bungim ol “arapela sipsip” long taim bilong ol Kristen bilong pastaim, taim ol Sameria i tanim bel na kamap Kristen o taim dispela man bilong ol narapela lain, em Konilias, em i kamap Kristen long yia 36 C.E. Nogat. Orait, wanem taim Gutpela Wasman i kirap bungim ol arapela sipsip bilong em? Planti handet yia bihain, olsem nau long taim bilong yumi.—Aposel 8:4-17;10:9-48.

11. I go inap long 1935, ol Isrel bilong spirit i tingting tasol long wanem samting?

¹¹ Paslain long yia 1935 lain remnan bilong ol Isrel bilong spirit ol i tingting tasol long bungim ol laspela manmeri bilong lain bilong ol na inapim dispela namba olsem 144,000. Ol dispela laspela* manmeri bilong dispela lain ol i kam insait long banis sipsip bilong ol Isrel bilong spirit. Ol i kam insait long nupela kontrak em Gutpela Wasman i namelman bilong en. Dispela Gutpela Wasman o “Pikinini sipsip Bilong God” em i bin givim “blut bilong dispela kontrak i stap oltaim oltaim.” (Hibru 13:20; Sam 50:5 Orait, wanem samting i kamap long yia 1935?

12. “Wanem narapela kain samting i kamap long kibung bilong 1935?

¹² Long dispela yia, ol Witnes Bilong Jehova i kibung long Wosington long Amerika. Ol i singautim ol manmeri ol i kain olsem Jonadap bilong bipo long i kam long dispela kibung. Long Me 31, presiden bilong Sosaiti Was Taua long dispela taim em i mekim wanpela tok long Revelesen 7:9-17 na olgeta manmeri long kibung i amamas long dispela tok. Em i stori long dispela bikpela lain manmeri o “planti tumas manmeri” Revelesen sapta 7 i stori long ol. Em i tok dispela ‘bikpela lain manmeri’ i olsem ol “arapela sipsip” na Jonadap bilong bipo i olsem piksa bilong ol. Jonadap i no bilong lain Isrel, em i bilong narapela lain, tasol em i go wantaim Jihu, em king bilong Isrel. Jonadap i givim bel long Jehova na daunim ol man i lotuim god giaman Bal. (2 King 10:15-23; Jeremaia 35:6-19) Jihu i no laik bai ol man i lotuim ol narapela god; em i strong long lotuim Jehova.—2 King 10:16.

13, 14. (a) Husat ol i kamap olsem ol Jonadap bilong nau? (b) Na i stret ol i mas mekim wanem? Bilong wanem i stret ol i mas mekim olsem?

¹³ Planti handet manmeri ol i laik bihainim pasin bilong Jonadap na kamap ol “arapela sipsip” bilong Gutpela Wasman, ol i go long dispela kibung long Wosington. Ol i mas bihainim tok bilong Baibel na dediket long Jehova long rot bilong Krais Jisas na kisim baptais bambai ol i ken kamap ol Jonadap bilong nau. Olsem na long Sarere, Jun 1, 1935, inap 840 ol i kisim baptais. Ol i kain olsem dispela bikpela lain ol i kisim baptais long de Pentikos long yia 33 C.E. long Jerusalem. Long dispela rot Gutpela Wasman i soim olsem em i laik bringim ol “arapela sipsip” tu i kam na bai ol i harim maus bilong em! Em i amamas long dispela samting! Bihain ol i putim dispela tok bilong kibung long Wastaua (tok Inglis) bilong Ogas 1 na Ogas 15, 1935.

¹⁴ Planti tausen ol i kaunim dispela tok long Wastaua na ol i save, ol inap kamap ol “arapela sipsip” bilong Gutpela Wasman na bai em i putim ol long banis i stret. Olsem na kwiktaim ol i kisim baptais bilong makim dediket bilong ol. Ol i save, Namba Tu Wasman bilong ol sipsip em i bin lusim laip bilong em bilong helpim olgeta sipsip. I olsem ol i “wasim klos bilong ol long blut bilong Pikinini Sipsip, na klos i kamap waitpela” bambai God i ken orait long ol.—Revelesen 7:14.

15. Ol narapela sipsip i kamap planti inap hamas? Olsem na yumi save long wanem samting?

¹⁵ Taim bilong pinis i kirap long yia 1914 na dispela taim i no pinis long yia 1935 taim Gutpela Wasman i kirap helpim ol “arapela sipsip” long kisim laip. Dispela taim i stap yet nau long 1984. Ol i mas autim gutpela tok bilong Kingdom pastaim na bihain bai pinis i kamap. Nau planti milion manmeri i stap insait pinis long banis bilong ol “arapela sipsip,” na planti moa ol i wok long i kam insait. Yumi save long dispela samting, long wanem long taim bilong Memorial, planti milion ol i bung. Ol i bikpela lain, winim tru dispela liklik lain bilong ol 144,000. em ol i stap long banis bilong ol Isrel bilong spirit na ol i bilong mekim wok king wantaim Gutpela Wasman long kingdom bilong em long heven. Ol “arapela sipsip” ol i planti, olsem na yumi save ol i no bilong “dispela banis,” ol i no bilong dispela “liklik lain.”—Luk 12:32.

16, 17. (a) Ol narapela sipsip na liklik lain sipsip ol i bruk tupela lain? (b) Jisas i tok bai i gat “wanpela lain sipsip tasol” na olsem wanem samting i bin kamap olsem em i tok?

¹⁶ Ol sipsip long “dispela banis” ol i bilong kisim laip long heven, ol “arapela sipsip” bai kisim laip long graun, ol i bilong banis sipsip i kamap nau tasol. Tasol yu tingim dispela samting i brukim ol sipsip i stap tupela lain? Nogat! Ol samting i bin kamap bihain long yia 1935 i soim yumi, tok bilong Gutpela Wasman Krais Jisas i stret, em i tok: “Bambai i gat wanpela lain sipsip tasol.” (Jon 10:16) Em i no tok ‘wanpela banis,’ em i tok, “wanpela lain.” Olsem na i gat tupela banis bilong ol sipsip, tasol ol i “wanpela lain sipsip tasol,” na ol i gat “wanpela wasman tasol,” em King Krais Jisas, em i kirap mekim wok king long heven long 1914. Na ol sipsip i gat wanpela wok tasol, em wok bilong autim ‘dispela gutpela tok bilong Kingdom long olgeta lain man’ na bihain bai “las de” bilong dispela pasin nogut bilong nau i kamap.—Matyu 24:14.

¹⁷ Ol “arapela sipsip” i no pilim olsem ol i narapela lain; nogat; ol i save ol yet wantaim “liklik lain” ol i wanpela lain tasol. Olgeta ol i bilong dispela “wanpela lain sipsip tasol” bilong “gutpela wasman bilong ol sipsip.” Ol “arapela sipsip” i amamas long bung wantaim “liklik lain sipsip” na mekim wok wantaim ol inap liklik taim. Bihain bai dispela lain i kamap king na pris long heven na bai ol i bosim ol “arapela sipsip” long Kingdom bilong 1,000 yia.

18. Olsem wanem long nupela kontrak long bihain? Olsem wanem long ol sipsip em spirit i bin makim ol na ol i stap long “dispela banis”? (b) Olsem wanem long ol narapela sipsip long bihain?

¹⁸ Long taim God i makim, lain remnan bilong ol lsrel bilong spirit bai ol i lusim graun na i go long heven bilong kisim prais bilong ol, na bai dispela nupela kontrak, em blut bilong Gutpela Wasman Krais Jisas i strongim, dispela kontrak bai pinis. Em inapim wok bilong en na i pinis. Taim dispela samting i kamap bai i no gat Memorial moa. Na bai “dispela banis” bilong ol Isrel bilong spirit i pinis. Ol “arapela sipsip,” em ol i dediket na baptais, ol bai stap long graun na kisim ol blesing bilong Kingdom bilong Krais na ol 144,000. Long dispela taim, ol “arapela sipsip,” em ol i stap wanbel, bai ol i stap olsem “lain sipsip” long graun. Bai ol i harim maus bilong Gutpela Wasman na King bilong ol, olsem na bai ol inap kisim laip i stap oltaim long Paradais long graun.

Yu Inap Bekim Ol Dispela Askim?

□ I gat wanem samting na yumi ken save, ol narapela sipsip i narapela kain long ol sipsip bilong liklik lain?

□ Olsem wanem ol samting i kamap long nau olsem Revelesen 22:17 i tok long en?

□ Wanem taim ol arapela sipsip i kirap long i kam bung? Long wanem ples dispela samting i kamap ples klia long pastaim?

□ Ol narapela sipsip ol i no bilong “dispela banis” bilong liklik lain, em spirit i bin makim ol, orait, olsem wanem ol i wanpela lain sipsip tasol?

[Piksa long pes 14]

Wanpela tok bilong Wastaua long 1935, em “Bikpela Lain,” i helpim ol brata long save long ol “arapela sipsip”

[Piksa long pes 15]

Taim wok bilong singautim “liklik lain” i laik pinis, Jisas i kirap bungim bikpela lain bilong ol “arapela sipsip”

Ol i Makim Nupela Sekreteri

Mipela amamas long tokaut olsem ol i bin makim Lyman A. Swingle bilong holim wok olsem sekreteri na man bilong lukautim mani bilong Sosaiti Was Taua bilong Pensilvenia na Sosaiti Wastaua bilong Nu Yok. Inap 54 yia pinis Brata Swingle i bin wok long namba wan ofis-bilong ol Witnes Bilong Jehova, na inap 38 yia em i stap dairekta bilong Sosaiti Was Taua bilong Pensilvenia. Mipela i save em bai mekim yet gutpela wok.