Gutpela Kaikai i Kamap Long Wok Bilong Wanpela Evanjelis Tru
LONG 1923, Wiliam R. Braun i go long Afrika long namba wan taim. Em i kisim meri pikinini na em i go long kantri Gambia, Gana, Laibiria, Naijiria, Siera Leon, bilong “mekim wok bilong autim gutnius,” em wok evanjelis. (2 Timoti 4:5) Wok em i mekim i kamapim bikpela “kaikai.”
Dispela man bilong Wes Indis em i no insait long wanpela misin i gat nem Kristen, na em i no insait liklik long wok politik. Em i bihainim pasin bilong Jisas na ol aposel—em i autim tok long nem bilong Jehova em i Nambawan Bikpela, na em i strong long tokim ol man olsem ofa bilong Jisas em i bikpela samting, na em i autim gutpela tok bilong Kingdom. (Matyu 9:35; 20:28; Jon 17:4-6) Oltaim em i kamapim ol tok bilong Baibel bilong helpim ol tok bilong bilip em i autim. (2 Timoti 3:16) Em i strong moa yet long mekim olsem, na long dispela as em i kisim nem olsem Baibel Braun.
Jehova i blesim wok bilong em, na “kaikai” em i planim i kamap na i go bikpela. Long nau, long ol kantri em i paslain long autim tok long en, klostu 200,000 Afrika i dediket pinis long Man bilong wokim ol, na ol tu ol i autim gutpela tok bilong Kingdom. (Matyu 24:14; 1 Korin 3:6-9) Ol dispela manmeri i mekim wok Kristen, planti man i save ol i man bilong bihainim stretpela pasin na ol i no save giaman. Ol i amamas long ol i stap Witnes Bilong Jehova na ol i stap aninit long Krais Jisas, em i King bilong ol.
Wok evanjelis bilong ol Kristen tru i kamapim dispela gutpela “kaikai.” Long olgeta hap gutpela “kaikai” olsem i save kamap. Long 200 kantri samting, winim 4 milion manmeri ol i autim ol tok em wanpela ensel bilong autim gutnius em i mekim, olsem: “Yupela i mas pret long [God] na litimapim nem bilong em.” (Kamapim Tok Hait 14:7) Tru tumas, long dispela taim bilong hevi, ol man i mas tanim bel i go long God na daun long Kingdom bilong em, na bai ol inap wetim gutpela samting i kamap.