stret tu, long wanem, Jehova i bin wokim olgeta samting, na em i as bilong ol stretpela save. Sapos yumi daun long God na pret long em, bai yumi inap skelim gut ol samting, na save gut long wanem samting i stret.​—⁠Sindaun 1:⁠7.

⁶ Na Pita i tok: “Yupela i mas . . . mekim gutpela pasin, na . . . kisim save long God, na . . . bosim gut laik bilong bodi . . . , na . . . sanap strong na karim hevi, na . . . wokabaut long pasin bilong God, na . . . stap pren tru bilong ol arapela manmeri bilong God, na . . . givim bel bilong yupela long ol arapela . . . Sapos yupela i kisim ol dispela kain pasin na ol i kamap strong tru long yupela, orait dispela save bilong yupela bai i no inap i stap nating. Nogat. Em bai i karim planti kaikai.” (2 Pita 1:​5-8)b Na sapta 2 i tok, sapos yumi kisim stretpela save, dispela bai helpim yumi long abrusim ol pasin nogut bilong graun. (2 Pita 2:20) Ol nupela man i wok long kamap Kristen ol i mas kisim save, na ol man i Kristen pinis ol tu i mas mekim olsem. Olsem wanem long yu?

Lain, Traim, Mekim Wok Long En

⁷ Ating yu save ol Witnes Bilong Jehova i save autim tok i tru bilong Baibel na yu save stadi wantaim ol long olgeta wik long wanpela buk i gat ol tok bilong Baibel long en, olsem buk Yu Inap i Stap Oltaim Long Paradais Long Graun. Em gutpela! Ol man i bin stadi olsem wantaim ol Witnes Bilong Jehova ol i kisim stretpela save. Na i gat sampela samting yu ken mekim na bai yu kisim gut dispela save, olsem:c

⁸ Taim yu laik stadi, pastaim yu mas kaunim ol samting yu laik stadi long en, na lukim het-tok bilong ol sapta, na ol liklik het-tok tu insait long sapta, na ol piksa tu. Na taim yu kaunim paragraf o wanpela sapta, tingim bikpela as tok bilong sapta na ol bikpela tok aninit long ol het-tok, na long ol wan wan paragraf, na lukim ol skripsa i helpim ol tok, na katim long pen dispela tok. Nau yu laik save, yu bin kisim gut o nogat. Orait, traim bekim ol askim i stap daunbilo, tasol maski kaunim tasol; yu yet yu mas tingim na bekim long tok bilong yu yet. Na taim yu stadi pinis, tingim gen ol bikpela samting yu bin lainim, na tingim sampela tok moa bilong helpim dispela tok.

⁹ Sapos yu bihainim dispela pasin bilong stadi, em bai helpim yu long kisim save. Long wanem, long taim bilong yu long stadi, nau yu gat laik long kisim save. Yu lukim wanpela bikpela hap tok olgeta, em i toktok long wanem samting, na wanem ol bikpela tok bilong en bilong strongim dispela stori, na wanem ol liklik tok i helpim as tok bilong en. Na taim yu wok long tingim gen ol samting yu bin stadi long en, ol dispela tok bai pas gut long tingting bilong yu.

¹⁰ Sapos yumi kolim kolim wanpela tok planti taim, dispela bai helpim yumi long tingim gut. Tasol dispela i no olsem yumi kolim kolim nating olsem ol pikinini long skul ol i mekim, nogat. Sapos yu mekim olsem, ating bai yu les long stadi na kwiktaim bai yu lusim tingting long en. Sapos yu gat strongpela laik long lainim wanpela samting, dispela bai helpim yu long kisim gut. Na sapos yu laik kisim gut wanpela tok yu stadi pinis long en, yu mas tingim tingim ol samting yu bin lainim, na em bai pas gut long tingting bilong yu. Tasol yu mas mekim kwik bihain long taim yu bin lain long en, nogut em i lus long tingting bilong yu. Long bipo, God i bin tokim ol Israel long “lainim ol pikinini” na “tokim ol” long ol lo bilong em. (Lo 6:​6, 7) Ol i mas kolim kolim planti taim long ol pikinini. Ating ol papa i bin kaunim ol lo bilong God long pikinini, na long narapela taim bihain ol i mekim gen, na bihain moa papa i givim askim long pikinini long ol samting em i bin lainim, em i kisim gut o nogat.

¹¹ Sapos wanpela Witnes i stadi wantaim yu long Baibel, ating sampela taim insait long stadi em bai givim askim long yu long ol samting em i lainim yu pinis long en. Em i gutpela pasin bilong kisim save, olsem na yu ken amamas long tingim gen ol dispela samting yu stadi pinis long en, na yu ken kamapim gen tok bilong en, olsem rivyu. Na taim stadi i pinis na Witnes i kamapim gen ol bikpela tok yupela i bin stadi long en, yu ken tingim na kamapim long maus bilong yu yet. Yu ken kolim na kamapim gut olsem yu laik lainim narapela long dispela samting. (1 Pita 3:15) Sapos yu mekim olsem, dispela save bai pas gut long tingting bilong yu na i no inap lus.​—⁠Lukim Song 119:​1, 2, 125; 2 Pita 3:⁠1.

¹² Na sampela de bihain yu ken tokim narapela man, olsem wanskul o wanwok, long ol dispela samting yu bin lain long en. Yu ken kolim as tok bilong en, na yu ken tokim man, yu laik traim kamapim gen sampela hap tok bilong dispela stori, na sampela skripsa bilong Baibel tu. Dispela bai kirapim tingting bilong man na bai em i ken harim tok, na maski em i bilipim o nogat, yu bin kamapim dispela nupela save yu bin kisim long taim yu bin stadi long sampela de i go pinis, na bai yu save, em i bin pas gut long tingting bilong yu o nogat, na yu “kisim planti save moa” o nogat.​—⁠2 Pita 3:18.

Mekim Wok Long Save Yumi Kisim

¹³ Sapos yumi laik lain gut long wanpela samting, i no olsem yumi mas save tasol long ol samting o tingim tasol. Ol man bilong lotu long taim bilong Jisas i bin mekim olsem long taim ol i beten na kolim kolim nating long maus. (Matyu 6:​5-7) Tasol dispela save bilong ol i bin helpim ol long kamapim gutpela wok o olsem wanem? Nogat. (Matyu 7:​15-17; Luk 3:​7, 8) Save bilong ol i no go daun long bel bilong ol na kirapim ol long mekim ol gutpela wok.

¹⁴ Tasol Pita i tok, ol Kristen i no ken i stap olsem. Em i tok, yumi mas bungim save bilong yumi wantaim bilip bilong yumi na bai yumi inap kamapim gutpela wok, nogut dispela save i lus nating. (2 Pita 1:​5, 8) Olsem na yumi mas i gat laik long kisim sampela save moa na yumi mas putim i go daun long bel bilong yumi na bai em i ken kirapim yumi long mekim wok. Tasol sampela taim ol save yumi kisim i no kirapim yumi olsem.

¹⁵ Long taim bilong Pol, dispela samting i bin painim ol Kristen Hibru. Ol i bilong lain Juda, olsem na ol i gat sampela save bilong Baibel na long Jehova na long sampela lo bilong em. Bihain ol i kisim save long Mesaia, na ol i bilip na kisim baptais na kamap Kristen. (Aposel 2:​22, 37-41; 8:​26-36) Na ol i bin go long ol miting na kaunim Baibel na mekim sampela tok long miting. Ating ol i mekim olsem inap planti mun na yia, tasol sampela i no kisim planti save na kamap strong. Pol i tokim ol: “Yupela i kamap Kristen longpela taim pinis, na inap yupela i wok long skulim ol arapela long ol tok bilong God. Tasol nogat. Yupela i sot long tingting, na ol arapela man i mas skulim yupela gen long ol namba wan hap tru bilong tok bilong God. Yupela i no redi yet long kisim strongpela kaikai. Nogat. Yupela i dring susu i stap yet.” (Hibru 5:12) Nogut yumi tu i stap olsem.

¹⁶ Yumi ken tok piksa long graun long hap bilong Aktik, em ples kol nogut tru. Long dispela hap, graun na ston na wara i tanim i kamap ais na i go daun olsem inap 900 mita na dispela ais i no save pinis, olsem na ol i kolim pemafros. Long taim bilong san, ais i pinis antap tasol, na sampela gras samting i save kamap, tasol ol i no inap putim rop i go daun tumas, long wanem, ais i stap. Na dispela hap graun em malumalum, long wanem, ais aninit i pasim wara na i no inap i go daun na lus daunbilo.

¹⁷ Dispela ais pemafros i makim Kristen i no wokim tingting bilong em na wok long kisim ol nupela stretpela save, na tingim gut, na mekim wok long en. (Lukim Matyu 13:​5, 20, 21.) Ating em inap long kisim save long ol samting, na long tok i tru bilong Baibel tu. Em i bin stadi “long ol namba wan hap tru bilong tok bilong God,” na em i bin kisim baptais, olsem ol Kristen Hibru i bin mekim. Tasol em i no wok long kamap strong. Olsem Pol i tok, “Yumi no ken pas i stap long ol dispela kain tok tasol,” em “ol skul yumi [bin] kisim pastaim long tok bilong Krais.”​—⁠Hibru 5:12; 6:​1, 2.

¹⁸ Yumi ken tingim sampela Kristen bilong bipo ol i olsem dispela graun ais. Ol i kam long miting, na ol i no slip, tasol tingting bilong ol i no wok long kisim gut ol save na tok i kamap long miting. Ating ol i bin i stap olsem nupela Kristen tasol na ol i no kamap strong, na ol i no insait tumas long ol tok samting i kamap long miting. I olsem graun ais olsem pemafros i pasim ol na ol i no inap putim rop i go daun, olsem kisim ol strongpela tok na save bilong Baibel. Ol i stap olsem tasol. Ol i olsem hap graun antap tasol, olsem skin tasol, na i no daun tumas.​—⁠Lukim Aisaia 40:⁠24.

¹⁹ Ating i gat sampela Kristen bilong nau tu i stap olsem. Ol i go long miting na sindaun i stap, tasol ol i no givim bel long kisim ol save i kamap long miting. Sapos nupela man o yangpela i kaunim tasol bekim i stap long paragraf, em i gutpela. Yumi save, em i hatwok long ol i mekim olsem. Tasol Pol i bin toktok long sampela Kristen i bin stap long tok i tru inap longpela taim, na ol i stap yet olsem pikinini o nupela man, na ol i stap olsem tasol na ol i no kamap strong na kisim ol save.​—⁠Hibru 5:⁠14.

²⁰ Kristen bilong longtaim, sapos em i go long miting na kaunim wanpela skripsa o kaunim hap tok bilong paragraf taim em i bekim tok, na em tasol, save bilong em bai i olsem dispela liklik hap graun i stap antap long strongpela ais. Em i kam oltaim long miting, tasol i olsem tingting bilong em i pas na i no wok, na i kamap olsem ais i strong olsem ston. Gutpela sapos yumi givim askim long yumi yet olsem: ‘Mi yet mi stap olsem? Mi bin kamap olsem dispela strongpela ais? Tingting bilong mi i save kirapim mi long kisim ol save?’ Sapos yumi bel hevi long bekim bilong yumi long ol dispela askim, gutpela sapos yumi kirap nau long givim bel long kisim ol save na kamap strong.

²¹ Yumi wan wan i mas bihainim ol samting yumi kolim long paragraf 8. Maski yumi bin stap longpela taim long tok i tru, yumi mas givim bel long kisim sampela save moa, na yumi mas wok long kamap strong moa. Yumi no ken malolo o les long mekim olsem. Yumi mas givim bel long redim ol tok bilong miting, na tingim wanem bikpela tok bilong dispela hap yumi redim bilong miting, na wanem tok na wanem skripsa yumi no klia gut long en, na dispela tok i bilong lainim yumi long wanem samting. Tingim wanem nupela tok i stap long samting yumi stadi long en. Na taim yu stap long miting yu mas traim mekim ol samting yumi kolim long paragraf 10 na 11. Kirapim tingting bilong yu na mekim em i wok gut, nogut tingting i olsem i dai o em i kol olsem dispela strongpela graun ais.​—⁠Sindaun 8:​12, 32-34.

Save Inap Helpim Yu Long Kamapim Gutpela Wok

²² Bikpela Krais Jisas, em Man bilong kisim bek yumi, em i mekim gutpela pasin long yumi, na sapos yumi wan wan i wok strong na givim bel long stadi gut na kisim planti save long em, dispela bai helpim yumi olsem wanem? Sapos yumi wok strong long kirapim tingting bilong yumi, na yumi redi oltaim long kisim planti save moa, orait, bai yumi inap kisim save long ol strongpela tok bilong Baibel, na dispela save bai pas gut long tingting na bel bilong yumi, olsem sampela tok piksa Jisas i bin stori long en. (Luk 8:​5-12) Em i bin toktok long pikinini wit i pundaun long gutpela graun na i putim rop i go daun na kru i kamap strong na i go bikpela na i karim kaikai.​—⁠Matyu 13:​8, 23.

²³ Jisas i tok piksa long kamapim gutpela wok, na Pita tu i tok olsem, em i tok: “Yupela i mas tingting long dispela, na yupela i mas wok strong tru long mekim gutpela pasin, na long mekim dispela kain pasin i stap strong olsem bilip bilong yupela. Na yupela i mas wok long kisim save long God . . . Yupela i save pinis long Jisas Krais, Bikpela bilong yumi. Na sapos yupela i kisim ol dispela kain pasin na ol i kamap strong tru long yupela, orait dispela save bilong yupela bai i no inap i stap nating. Nogat. Em bai i karim planti kaikai.” (2 Pita 1:​5-8) Sapos yumi kisim gutpela save, dispela bai helpim yumi long kamapim gutpela wok, olsem karim gutpela kaikai. Na bai yumi amamas long stadi na yumi ken kisim planti save moa. (Sindaun 2:​2-5) Na ol dispela save bai pas gut long tingting bilong yu na yu ken mekim wok long en long skulim ol narapela man na kamapim ol disaipel. Bai yu kamapim gutpela wok na kamapim biknem long God na long Pikinini bilong em. Pita i tok: “Yupela i mas larim marimari bilong Krais i strongim yupela, na yupela i mas kisim planti save moa long em. Em i gat biknem tru, na yumi mas litimapim nem bilong en nau na oltaim oltaim. I tru.”​—⁠2 Pita 3:⁠18.

Bosim Gut Laik Bilong Skin

“Yupela i mas bosim gut laik bilong bodi bilong yupela.”​—⁠2 PITA 1:​5, 6.

JISAS i tok: “Ol bai i ting long daunim mi, na pulim yupela i go long ol gavman na ol king. Olsem na bai yupela i ken autim gutnius long ol dispela bikman, na long ol arapela haiden tu.” (Matyu 10:18) Sapos yu mas i go sanap long ai bilong wanpela bikman o jas o presiden samting, bai yu toktok long wanem samting? Ating bai yu tokaut olsem i gat wanem as na yu mas i kam, o bai yu toktok long samting ol i bin kotim yu long en, a? Spirit bilong God bai helpim yu long mekim. (Luk 12:​11, 12) Tasol olsem wanem sapos yu mas tokim ol long pasin bilong bosim skin? Yu ting dispela em i bikpela samting na yumi ol Kristen i mas autim tok long en tu?

² Ol i holim wanpela Witnes Bilong Jehova, em aposel Pol, na ol i sanapim em long kot, na em i autim “tok long stretpela pasin, na long man i mas bosim gut laip bilong em yet, na long God bai i kotim yumi bihain.”