Pasin Nogut Tru

Stori: Em olkain pasin i gat bikpela rong. Na planti taim em pasin bilong bagarapim man, o birua long man, o tingting long mekim nogut long man.

Bilong wanem i gat planti pasin nogut?

I no asua bilong God. Em i wokim namba wan man na meri i gutpela olgeta, tasol tupela yet na ol man i kamap bihain long ol i sakim lo bilong God na ol yet i laik skelim wanem pasin i stret na wanem pasin i no stret. (Lo 32:​4, 5; Sav 7:29; Stt 3:​5, 6) Ol i mekim olsem na nau ol i stap aninit long strong bilong ol spirit nogut.​—⁠Ef 6:​11, 12.

1 Jo 5:19: “Dispela graun olgeta em i stap aninit long strong bilong Satan.”

KTH 12:​7-12: “Bikpela pait i kirap long heven. . . . Na ol ensel bilong God i tromoi . . . [Satan] i go daun long graun, na ol i tromoi ol ensel bilong en i go daun wantaim em. . . . Olsem na . . . [heven] i ken amamas. Tasol yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” (Dispela bikpela hevi i bin kamap long graun long taim Kingdom i kamap pinis long heven na ol i rausim Satan i kam daun. Lukim Re 12 ves 10.)

2 Ti 3:​1-5: “Long taim bilong las de planti hevi nogut tru bai i kamap. Ol man bai i laikim ol yet tasol, na ol bai i laikim tumas long kisim mani. Ol bai i . . . sakim tok bilong papamama, na . . . givim baksait long ol pasin bilong God. . . . Ol bai i no bosim laik bilong bodi bilong ol, na ol bai i pait na bagarapim ol man nabaut. . . . Ol bai i laikim tumas ol kain kain pasin bilong amamas bilong dispela graun, na ol bai i no laikim God. Ol bai i bihainim pasin bilong God long skin tasol na ol bai i no save liklik long bikpela strong i stap long pasin tru bilong God.” (Em kaikai nogut i kamap, long wanem, inap planti handet yia pinis ol i bikhet na lusim lotu i tru. Ol i tok ol i lotuim God, tasol ol i no bihainim tok bilong em. Ol i no givim bel tru long God, olsem na ol i no bihainim gutpela pasin.)

Bilong wanem God i larim pasin nogut i stap?

Yu ting i gutpela sapos wantu tasol God i rausim olgeta man i mekim pasin nogut? Yumi laik tru bai pasin nogut i pinis, tasol sapos yumi skelim ol dispela planti tausen yia pasin nogut i bin stap long graun, orait ol hevi yumi karim em i bilong liklik taim tasol, a? Olsem na yu ting God Jehova i pilim olsem wanem? Inap planti tausen yia ol man i bin tok, em asua bilong God na ol i karim pen na hevi, na ol i bin toknogutim em. Tasol em i no as bilong pasin nogut; Satan na ol man nogut i as bilong en. God Jehova i gat bikpela strong inap long pinisim pasin nogut. Olsem na i mas i gat gutpela as na em i no pinisim kwik, a? Yumi no ken kirap nogut sapos pasin bilong Jehova long stretim dispela hevi i narapela kain long pasin yumi ting em i gutpela. Save bilong em i winim tru save bilong yumi, na em i no tingting long ol samting bilong nau tasol​—⁠em i tingting long bihain bihain tru.​—⁠Skelim wantaim Aisaia 55:​8, 9; Esekiel 33:⁠17.

Sapos God i no bin givim rot long ol man long tingim wanem samting ol i laik mekim, bai i no gat pasin nogut long graun. God i wokim yumi bambai yumi yet i ken tingim wanem samting yumi laik mekim​—⁠yumi laik bihainim tok bilong em, long wanem, yumi laikim em tumas, o yumi laik sakim tok. (Lo 30:​19, 20; Jos 24:15) Yumi laik i stap fri olsem, a? Sapos yu gat ol pikinini, yu laik bai ol i bihainim tok bilong yu, long wanem, ol i laikim yu tumas, a? Yu no laik bai yu mas subim ol long bihainim. Yu ting i gutpela sapos God i bin subim Adam long bihainim tok bilong em? Sapos God i subim yumi long bihainim tok, yu ting bai yumi stap amamas moa, winim long nau? Nogat, a? Olsem na God i larim pasin nogut i stap bambai ol man i gat hap taim bilong kamapim klia olsem ol i laik bihainim ol stretpela lo bilong em o nogat. Na long taim stret olsem em i makim pinis, bai em i bagarapim ol man nogut.​—⁠2 Te 1:​9, 10.

Em i bihainim gutpela tingting na larim hap taim bilong stretim ol bikpela tok: (1) Long Iden bikpela tok i kamap​—⁠i stret Jehova i stap nambawan bos na em i mekim stret wok bos o nogat. (Stt 2:​16, 17; 3:​1-5) (2) Na bikpela tok i kamap tu long ol lain bilong God long heven na long graun​—⁠ol inap i stap gut long em o nogat. (Jop 1:​6-11; 2:​1-5; Lu 22:31) God inap bagarapim wantu tasol tripela bikhetman (Satan, Adam, Iv), tasol dispela i no inap stretim bikpela tok i bin kamap. Bikpela strong bilong man i no makim olsem pasin bilong em i stret. Satan i gat tok long pasin bilong God na pasin bilong lain bilong Em. God i save, pasin bilong em i stret, tasol em i larim hap taim bilong stretim ol dispela bikpela tok bambai olgeta man na ensel i ken lukim kaikai nogut i kamap long pasin bilong bikhet long wok bos bilong em, na olgeta wan wan i ken kamapim klia olsem ol i laik i stap aninit long God o Satan. Taim God i stretim pinis ol dispela bikpela tok, em i no ken larim wanpela man o wanpela ensel i kamapim gen ol dispela tok na bagarapim pasin wanbel. Bilong olgeta lain long heven na graun i ken wok gut wantaim, na i stap wanbel, na i stap gutpela, nem bilong Jehova i mas i stap holi na olgeta i mas givim bel long litimapim nem bilong em. (Lukim tu het-tok “Satan,” pes 391, 392.)

Tok piksa: Sapos long ai bilong ol man, wanpela man i sutim tok long yu na em i tok, yu no gutpela papa, na gutpela sapos ol pikinini i lusim yu na bihainim ol pasin ol yet i ting em i stret; na em i tok, ol i tingim ol samting bilong skin yu givim long ol na ol i bihainim tok bilong yu​—⁠ol i no givim bel tru long yu; orait, wanem gutpela rot bilong stretim dispela tok? Sapos yu kilim i dai dispela man bilong giaman, yu ting dispela bai stretim tok long ai bilong ol man i lukluk i stap? Nogat, a? Tasol sapos yu givim hap taim long ol pikinini bilong yu na ol i tokaut olsem yu gutpela papa na pasin bilong yu i stret, na ol i tok, ol i save stap wantaim yu, long wanem, ol i laikim yu tumas, orait dispela bai stretim gut dispela tok, a? Na sapos sampela pikinini i bilipim tok bilong dispela birua na ol i lusim yu na bihainim ol narapela kain pasin na bagarapim sindaun bilong ol, ol man i lukluk i stap na i gat stretpela tingting bai ol i save, gutpela sapos ol pikinini i bin bihainim tok bilong yu, a?

God i larim pasin nogut i stap inap long nau na dispela i bin helpim yumi o nogat?

2 Pi 3:9: “Bikpela i no . . . laik bai wanpela man i lus. Em i laik bai olgeta man i mas tanim bel, olsem na em i isi long yupela na em i wet i stap yet.” (Jehova i isi long ol man na wet inap long nau, na dispela i bin givim rot long yumi bilong kamapim klia olsem yumi tanim bel na yumi laik aninit long stretpela wok bos bilong em; yumi yet i no laik skelim wanem pasin i stret na wanem pasin i no stret.)

Ro 9:​14-24: “Olsem na bai yumi tok wanem? Ating bai yumi tok God i mekim pasin i no stret, a? Nogat tru. . . . Ol sospen bilong kisim pe nogut [ol man nogut] ol i redi pinis long bagarap, tasol em i larim ol na em i wet longtaim long brukim ol. Long wanem, em i laik bai olgeta man i ken save long bikpela lait na strong bilong en, na long gutpela sindaun tru em i laik givim long ol sospen bilong kisim marimari. Bipo yet [olsem insait long dispela hap taim bilong marimari bilong em] em i redim ol dispela sospen pinis bai em i ken givim gutpela sindaun na biknem long ol. Ol dispela sospen bilong kisim marimari, em yumi ol manmeri God i bin singautim. Na yumi no kam long lain bilong Juda tasol. Nogat. Yumi kam long ol arapela lain tu.” (Olsem na God i no bagarapim kwik ol man nogut bambai i gat taim bilong kisim ol manmeri em bai givim biknem long ol wantaim Krais long Kingdom bilong heven. God i mekim olsem na yu ting em i mekim pasin i no stret long sampela man? Nogat, a? Em hap wok bilong em long givim blesing long ol kain kain man, em ol bai kisim blesing bilong laip i stap oltaim long Paradais long graun. Skelim wantaim Song 37:​10, 11.)

Sapos Man i Tok​—⁠

‘Bilong wanem God i larim pasin nogut i stap?’

Yu ken tok: ‘Em gutpela askim. Planti gutpela wokboi bilong God i bin tingting planti long ol pasin nogut ol i lukim. (Hab 1:​3, 13)’ Na ating yu ken tok moa olsem: (1) ‘I no olsem God i no tingim. Em i tok pinis olsem em i makim taim bilong bekim nogut long ol man nogut. (Hab 2:⁠3)’ (2) ‘Tasol yumi mas mekim wanem na bai yumi inap abrusim bagarap long taim em i bekim nogut long ol? (Hab 2:4b; Sef 2:⁠3)’

O yu ken tok: ‘Gutpela yu askim olsem. Planti man i gat gutpela bel ol i tingting planti long dispela. I gat gutpela bekim long dispela buk na mi laik soim long yu. (Yutupela i ken kaunim wantaim sampela tok long pes 354-356.)’

‘Planti yia tumas i lus pinis; mi ting God i no inap pinisim pasin nogut’

Yu ken tok: ‘Gutpela yu bilip long God. Tru tumas, i gat planti pasin nogut, na i kirap paslain tru long taim bilong yumi. Tasol tingim dispela: (Kamapim sampela tok bilong paragraf 1 long pes 354, long God i bin karim dispela hevi longpela taim tru.)’

O yu ken tok: ‘Man bilong wokim wanpela haus em inap klinim tu, a? . . . Orait, God i bin wokim dispela graun, olsem na i no hatwok tumas long em i klinim, a? Tasol bilong wanem em i wet longtaim long mekim? Mi ting dispela buk i bekim gut askim bilong mi long dispela samting. Mi laik soim long yu na yu ken skelim. (Yutupela i ken kaunim wantaim ol tok bilong pes 354-356.)’

Pe Bilong Baim Bek Ol Man

Stori: Sampela man i save tromoi mani bilong baim bek wanpela man long kalabus, o bilong opim rot bilong em long lusim wanpela wok nogut. Tasol wanpela pe i bikpela moa yet, em blut bilong Krais Jisas, em i bin kapsaitim bilong baim bek ol man. Taim em i givim dispela pe long God long heven, nau rot i op bilong ol lain bilong Adam i ken lusim kalabus bilong sin na dai i kisim yumi olgeta long rong bilong tumbuna Adam.

Olsem wanem dai bilong Jisas i narapela kain long dai bilong ol narapela i bin holimpas bilip na ol man i kilim ol i dai?

Jisas i gutpela man olgeta. Taim mama i karim em, em i no gat sin, na em i stap stret inap long em i dai. “Em i no bin mekim sin.” “I no gat wanpela rong i stap long em.”​—⁠1 Pi 2:22; Hi 7:⁠26.

Em i dispela wanpela Pikinini tasol bilong God. God i stap long heven na em i tokaut olsem. (Mt 3:17; 17:⁠5) Pastaim dispela Pikinini i bin i stap long heven; long rot bilong em God i bin mekim kamap olgeta narapela ensel na ol man na olgeta samting long heven na long graun. Bilong kamapim laik bilong Em, God i putim laip bilong dispela Pikinini long bel bilong wanpela nupela meri bambai em i ken kamap man bilong graun. Bilong kamapim klia olsem tru em i kamap man bilong graun, Jisas i kolim em yet olsem Pikinini bilong man.​—⁠Kl 1:​15-20; Jo 1:14; Lu 5:⁠24.

Em i gat strong inap long abrusim ol man i laik kilim em