salim Pikinini Man bilong en i kam long graun bilong lusim ol sin bilong yumi.”

Ro 5:​7, 8: “Yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet.”

Dispela samting God i mekim bilong helpim yumi i mas kirapim yumi long mekim wanem?

1 Pi 2:24: “Krais i bin hangamap long diwai . . . na i karim sin bilong yumi long bodi bilong em yet . . . bai yumi ken lusim pasin bilong sin olgeta, . . . na bihainim ol pasin i stret.” (God na Krais i bin mekim bikpela wok tru bilong tekewe sin bilong yumi, olsem na yumi mas wok strong long lusim pasin bilong sin. Yumi mas nolaik tru long mekim pasin yumi save pinis em i pasin bilong sin!)

Ta 2:​13, 14: “Krais i lusim pinis laip bilong em yet, bilong kisim bek yumi na lusim olgeta sin bilong yumi, bai yumi . . . stap lain manmeri bilong em yet, na yumi wok strong long mekim olgeta kain gutpela pasin.” (Sapos yumi pilim dispela gutpela samting, dispela i mas kirapim yumi long wok strong long mekim ol wok em i givim long ol disaipel tru bilong em.)

2 Ko 5:​14, 15: “Krais i bin givim bel bilong en long mipela, na dispela i save kirapim mipela long wok . . . [Em] i bin kisim ples bilong yumi olgeta na i dai . . . bilong helpim yumi ol man i stap laip, bai yumi no ken tingting moa long yumi yet na wokabaut. Nogat. Yumi ken tingting long [em] . . . na wokabaut.”

Pen na Hevi

Stori: Pen na hevi inap bagarapim skin na tingting na bel. I gat planti samting inap givim pen na hevi long yumi, olsem: bikpela pait, ol bikpela bisnis i mangalim mani, sampela sik samting bilong papa o mama i kalap long yumi, olkain sik, kisim bagarap, guria o bikpela tait samting, tok nogut o pasin nogut ol narapela i mekim long yumi, ol spirit nogut, pret long bagarap i laik painim yumi, pasin longlong bilong yumi yet. Nau bai yumi stori long kain pen na hevi ol dispela samting i kamapim. Tasol i gat narapela kain pen em man i save pilim taim em i lukim ol man i stap nogut, o em i bel hevi long ol pasin nogut ol man i mekim.

Bilong wanem God i larim pen na hevi i stap?

Husat i as tru bilong en?

Ol man yet i as bilong planti pen na hevi. Ol i save pait, mekim pasin nogut, bagarapim graun, mekim wok bisnis bilong pulim mani na i no tingim ol man, mekim ol pasin ol i save pinis em inap bagarapim ol. Taim ol i mekim ol dispela samting, ol i nogutim ol yet na ol narapela man. Yu ting ol i no ken kisim hevi long pasin ol i mekim? (Ga 6:7; Snd 1:​30-33) Na taim ol i kisim hevi long pasin ol i mekim, yu ting i stret long tok em asua bilong God?

Satan na ol spirit nogut i gat hap asua. Baibel i kamapim klia olsem ol spirit nogut i as bilong planti pen na hevi i painim ol man. Ol man i sutim tok long God, tasol em i no as bilong ol dispela hevi.​—⁠KTH 12:12; Ap 10:38; lukim tu het-tok “Satan,” pes 391, 392.

Pen na hevi i kamap olsem wanem? Yumi mas tingim tupela tumbuna bilong pastaim tru, em Adam na Iv. God Jehova i wokim tupela i gutpela olgeta na putim tupela i stap long gutpela ples Paradais. Sapos tupela i bihainim tok bilong God, ol inap i stap gutpela oltaim oltaim, no ken sik o i dai. I no laik bilong Jehova na pen na hevi i painim ol. Tasol Jehova i tok klia olsem Adam i mas bihainim tok bambai em inap i stap gutpela olsem. Tru, Adam na Iv i mas pulim win na kisim kaikai na dring wara na slip bambai ol inap i stap laip. Na ol i mas bihainim ol lo bilong God tu bambai ol inap i stap gutpela oltaim oltaim. Tasol tupela yet i laik skelim wanem pasin i stret na wanem pasin i no stret na bihainim rot tupela yet i laikim​—⁠tupela i givim baksait long God, em i Man bilong givim laip long ol. (Stt 2:​16, 17; 3:​1-6) Tupela i mekim sin, na sin i kamapim dai. Tupela i kamap sinman pinis, na bihain tupela i kamapim ol pikinini. Olsem na olgeta pikinini i gat sin, na ol laik nogut i stap long skin bilong ol, na skin i no gutpela olgeta na sik inap kisim ol. Ol dispela samting nogut bilong sin ol i kisim long papamama, dispela i mekim na bihain ol i dai. Yumi olgeta manmeri long nau i gat sin i stap pinis long skin bilong yumi taim mama i karim yumi, olsem na sampela kain pen na hevi i save painim yumi olgeta.​—⁠Stt 8:21; Ro 5:⁠12.

Saveman 9:11 i tok, “taim nogut i save painim yumi olgeta.” Planti taim hevi i painim yumi, long wanem, yumi stap long wanpela hap long taim samting nogut i kamap​—⁠i no olsem Satan o wanpela man i mekim na dispela hevi i painim yumi.

Bilong wanem God i no wokim rot bilong tekewe hevi long ol man? Bilong wanem yumi mas kisim hevi long rong Adam i mekim?

Long Baibel God i tokim yumi long rot bilong abrusim planti hevi. Em i givim gutpela tingting tru long yumi. Taim yumi bihainim, dispela i helpim yumi na i stap bilong yumi i gat as bilong en, na famili i stap amamas, na yumi inap bung wantaim ol man em narapela i laikim tru narapela, na yumi klia long ol pasin ol inap givim bikpela pen na hevi long yumi. Sapos yumi sakim dispela samting bilong helpim yumi, na pasin yumi mekim i givim hevi long yumi o long narapela man, yu ting i stret yumi tok, em asua bilong God?​—⁠2 Ti 3:​16, 17; Sng 119:​97-105.

Jehova i wokim rot pinis bilong tekewe olgeta hevi. Em i wokim namba wan man na meri i gutpela olgeta, na em i wokim olgeta samting bambai tupela inap i stap amamas. Tasol laik bilong tupela yet na ol i givim baksait long em. Olsem na yu ting em wok bilong God long lukautim ol pikinini bilong tupela bambai samting nogut tupela i mekim i no ken givim hevi long ol pikinini? (Lo 32:​4, 5; Jop 14:⁠4) Yumi save, ol marit inap kamapim ol pikinini na kisim amamas long dispela rot, tasol ol i gat wok tu ol i mas mekim. Ol samting papamama i mekim, olsem tingting na pasin bilong ol, em inap helpim o nogutim ol pikinini. Tasol Jehova i mekim bikpela pasin marimari​—⁠Pikinini em i laikim tumas em i salim em i kam long graun bilong i dai olsem ofa na baim bek ol lain bilong Adam i bilip long dispela ofa, na pinisim hevi bilong ol. (Jo 3:16) Olsem na i gat rot bilong ol man long nau i ken kisim samting Adam i lusim, em laip i stap gutpela long Paradais long graun, no gat pen o hevi. Em gutpela samting tru, a?

Lukim tu “Pe Bilong Baim Bek Ol Man,” pes 358-360.

Tasol bilong wanem God bilong sori i larim pen na hevi i stap longtaim?

Em i larim i stap inap long nau na dispela i bin helpim yumi o nogat? Baibel i tok: “Bikpela i no save wok isi isi long kamapim samting em i bin promis long mekim, olsem sampela man i save tok. Nogat. Tasol em i no laik bai wanpela man i lus. Em i laik bai olgeta man i mas tanim bel, olsem na em i isi long yupela na em i wet i stap yet.” (2 Pi 3:⁠9) Taim Adam na Iv i mekim rong, sapos wantu tasol God i kilim tupela i dai, bai yumi no i stap long nau. Sapos olsem, bai yumi no amamas, a? Na sapos bihain long taim bilong tupela, God i bin kilim i dai olgeta sinman, bai yumi no i stap. God i larim pasin nogut i stap na dispela i givim rot long yumi na nau yumi stap, na yumi inap kisim save long pasin bilong em na stretim pasin bilong yumi, na yumi inap kisim laip i stap oltaim. God i givim rot long yumi long mekim olsem, na dispela i kamapim bikpela sori bilong em. Baibel i tok, God i makim pinis taim bilong pinisim pasin nogut bilong graun, na klostu nau bai em i mekim.​—⁠Hab 2:3; Sef 1:⁠14.

God inap stretim ol samting nogut i painim ol wokboi bilong em long dispela taim nau, na em bai mekim olsem. God i no as bilong ol hevi. Long rot bilong Krais Jisas em bai kirapim bek ol man i dai pinis, na oraitim olgeta sik bilong ol man i bihainim tok, na tekewe sin olgeta, na em bai mekim na bai yumi no tingim moa ol hevi bilong bipo.​—⁠Jo 5:​28, 29; KTH 21:4; Ais 65:⁠17.

God i mas wet inap long nau bambai i gat bikpela hap taim inap long stretim ol bikpela tok Satan i bin kamapim long Iden. Lukim pes 391, 392, na 354-356.

Tru, yumi laik bai hevi bilong yumi i pinis hariap. Tasol taim God i kirap na pinisim ol hevi, em i mas mekim bilong helpim olgeta manmeri i laikim tumas stretpela pasin​—⁠i no bilong helpim sampela tasol. God i save mekim wankain pasin long olgeta man.​—⁠Ap 10:⁠34.

Ol tok piksa: Sapos pikinini i gat sik, gutpela papa o mama bai larim dokta i katim em na em i karim pen pastaim, long wanem, gutpela samting bai kamap long dispela rot, a? Sapos yumi gat sik na yumi laik stretim kwiktaim, bai yumi no stretim as bilong sik, olsem na ating dispela bai helpim yumi inap liklik taim tasol. Bikpela hap taim liklik i mas lus bilong stretim as bilong sik.

Bilong wanem God i no lusim rong bilong Adam na bai dispela bikpela pen na hevi i no ken painim ol man?

Yu ting dispela inap pasim tru pen na hevi? O yu ting sapos God i lusim rong bilong Adam bai i olsem em yet i as bilong pen na hevi i kamap long dispela? Taim pikinini i bikhet na mekim rong, sapos papa i larim em tasol na i no stretim em, wanem samting i save kamap? Bai pikinini i kirap mekim ol narapela rong, na bikpela hap asua i stap long papa, a?

Olsem tasol taim Adam i bikhet na mekim rong, sapos God i lusim rong bilong em bai i olsem God i gat hap asua long en, na dispela i no inap mekim na bai gutpela pasin i ken kamap long graun. (Skelim wantaim Saveman 8:11.) Na ol pikinini bilong God long heven, em ol ensel, bai ol i no ken harim tok bilong God. Na bai i no gat as bilong wetim gutpela samting i kamap. Tasol God i no inap larim kain samting olsem i kamap, long wanem, em i save mekim stretpela pasin tasol na bosim ol samting.​—⁠Sng 89:⁠14.

Bilong wanem God i larim sampela pikinini i kamap aipas o longlong samting long taim mama i karim ol?

God i no mekim na ol i kamap nogut olsem. Em i wokim namba wan man na meri i gutpela olgeta, na tupela inap kamapim ol pikinini i gutpela olgeta kain olsem ol yet.​—⁠Stt 1:​27, 28.

Yumi kisim sin long Adam. Sin inap mekim na bai skin o tingting bilong yumi i bagarap. (Ro 5:12; lukim tu pes 364.) Sin i stap long skin bilong yumi taim yumi stap blut yet long bel bilong mama. Olsem na King Devit i tok: “Taim mi stap yet long bel bilong mama, mi man bilong mekim sin.” (Sng 51:⁠5) Sapos Adam i no bin mekim sin, bai yumi kisim ol gutpela pasin tasol. (Bilong save long tok bilong Jon 9:​1, 2, lukim pes 175, 176.)

Papa o mama inap bagarapim pikinini i stap yet long bel, olsem sapos mama i kisim drak o smok. Tasol planti taim i no asua bilong papa o mama na pikinini i kamap aipas samting o skin bilong pikinini i no strong.

Long pasin sori Jehova i larim ol pikinini tu i kisim helpim long rot bilong ofa bilong Krais. Em i save tingim ol papamama i stap gut long wok bilong em, na long ai bilong em ol pikinini bilong ol i stap holi. (1 Ko 7:14) Olsem na ol papamama i aninit long God ol i tingting long helpim ol yet na ol pikinini tu bambai ol i ken i stap gutpela long ai bilong God. Ol yangpela i gat bikpela krismas liklik inap long ol yet i bilip na bihainim ol lo bilong God, em i givim rot long ol bilong kamap wokboi em i orait long ol. (Sng 119:9; 148:​12, 13; Ap 16:​1-3) Yumi mas save, Jisas i bihainim stret ol pasin bilong Papa na em i tingim tru ol pikinini; em i kirapim bek wanpela pikinini i dai pinis. Taim em i kamap King em bai mekim yet kain gutpela wok olsem.​—⁠Mt 19:​13-15; Lu 8:​41, 42, 49-56.

Bilong wanem God i larim guria samting i kamap na i bagarapim planti samting na planti man?

God i no as bilong ol guria, na strongpela win, na bikpela tait, na bikpela san, na maunten i pairap, em planti taim yumi harim stori bilong en long nau. God i no mekim wok long ol dispela samting bilong givim strafe long sampela lain. Nogat. Planti samting olsem i kamap nating long sampela strong i bin wok i stap kirap long taim God i wokim dispela graun. Baibel i tok, long taim bilong yumi bai i gat ol bikpela guria na bikpela hangre, tasol i no olsem God o Jisas i as bilong en. Na i olsem tasol sapos wanpela man i tokaut long bikpela win samting i laik kamap​—⁠i no olsem em i as bilong dispela win, a? Ol guria samting i kamap long nau na ol narapela hevi tu, ol i hap bilong mak Jisas i kolim bilong taim bilong las de, na ol i kamapim klia olsem ol blesing bilong Kingdom bilong God i klostu.​—⁠Lu 21:​11, 31.

Planti taim ol man i gat bikpela asua long samting nogut i kamap. Long wanem, planti taim ol i no laik bihainim tok lukaut ol i kisim​—⁠ol i no klia long ples em bagarap i laik kamap long en, o ol i no mekim ol samting bilong lukautim skin bilong ol.​—⁠Snd 22:3; skelim wantaim Matyu 24:​37-39.

God inap bosim ol dispela strongpela samting bilong graun. Em i givim strong long Jisas na Jisas i mekim i dai bikpela win na si long raunwara Galili. Dispela i makim wok God bai mekim bilong helpim ol man i stap aninit long Kingdom. (Mk 4:​37-41) Adam i givim baksait long God, olsem na em i sakim wok God i laik mekim bilong pasim ol hevi na helpim em wantaim ol pikinini bilong em. Ol man God i orait long givim laip long ol aninit long Kingdom bilong Krais, God bai lukautim ol gut bambai kain samting olsem i no ken bagarapim ol. Gavman em God i givim strong long en, em tasol inap lukautim yumi olsem.​—⁠Ais 11:⁠9.

Ol man i kisim hevi, yu ting ol i bin mekim pasin nogut na God i givim strafe long ol?

Ol man i kalapim lo bilong God, hevi i save painim ol. (Ga 6:⁠7) Hevi i painim sampela kwiktaim, na sampela i stap olsem gutpela inap longtaim. Hevi i painim Jisas na ol man i kilim em i dai, tasol em i no bin mekim pasin nogut. Olsem na long dispela taim nau, yumi no ken ting man i stap gutpela em i kisim blesing long God, na man i gat hevi em i kisim strafe long God. Nogat.

Taim olgeta samting bilong Jop i lus na sik nogut i kisim em, dispela i no makim olsem God i kros long em. Baibel i tok klia olsem Satan i as bilong dispela hevi i painim Jop. (Jop 2:​3, 7, 8) Tasol ol poroman i kam lukim Jop ol i tok, hevi bilong em i makim olsem em i bin mekim pasin nogut. (Jop 4:​7-9; 15:​6, 20-24) Jehova i krosim ol na i tok: “Mi kros long [yupela]. Long wanem, yupela i no bin autim tok tru long pasin bilong mi olsem wokman bilong mi, Jop, i bin autim.”​—⁠Jop 42:⁠7.

Ol man nogut ating bai ol i stap gutpela inap liklik taim. Asap i tok: “Mi lukim ol man nogut i kamap maniman . . . Ol i no save karim ol hevi olsem ol arapela man i karim. . . . Ol i save tok bilas long ol arapela man na ol i . . . bikhet tru na ol i tok long painim rot bilong bagarapim ol arapela manmeri. Ol man nogut i olsem. Ol i gat planti samting, tasol ol i wok long kisim moa yet.”​—⁠Sng 73:​3, 5, 8, 12.

De bilong God long bekim pe nogut bai kamap. Long dispela taim bai em i givim strafe long ol man nogut; bai em i bagarapim ol olgeta. Sindaun 2:​21, 22 i tok: “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.” Long dispela taim, ol gutpela stretpela man, em planti ol i bin karim hevi, bai ol i stap gutpela, no gat sik, na bai ol i kisim planti samting em graun i kamapim.

Sapos Man i Tok​—⁠

‘Bilong wanem God i larim olgeta dispela pen na hevi i stap?’

Yu ken tok: ‘Yumi olgeta i wari long dispela. Tasol i gat wanem as na yu kamapim askim olsem long nau?’ Na ating yu ken tok moa olsem: (1) ‘(Kamapim sampela tok bilong pes 364-366.)’ (2) ‘(Kamapim sampela tok bilong Baibel i stori long kain hevi olsem bilong dispela man yet na rot bilong dispela hevi i ken pinis.)’

O yu ken tok (sapos em i tingim ol pasin i no stret ol man i mekim long narapela man): ‘Baibel i tokim yumi long as bilong ol dispela hevi i kamap long nau. (Sav 4:1; 8:⁠9) Na Baibel i stori long ol samting God bai mekim bilong pinisim ol dispela hevi. Yu save long dispela? (Sng 72:​12, 14; Dan 2:44)’

Narapela tok yu ken mekim em olsem: ‘Mi save yu bilip long God. Yu bilip olsem God i laikim tru yumi? . . . Yu ting em i gat bikpela save na olgeta strong? . . . Sapos olsem, orait i mas i gat gutpela as tru na em i larim pen na hevi i stap, a? Baibel i kamapim as bilong dispela. (Lukim pes 364-366.)’

Piksa Bilong Lotu Long En

Stori: Ol i save wokim piksa bilong man o wanpela samting na sapos ol i lotu long dispela, em i wanpela god giaman. Ol man i brukim skru samting long ol piksa, planti ol i tok, ol i no lotuim piksa yet; ol i lotuim spirit em piksa i makim. Planti lotu haiden i gat ol piksa o god giaman. Wanpela buk i stori long dispela pasin insait long lotu Katolik na i tok: “Taim ol i lotuim piksa, i olsem ol i lotuim man em piksa i makim, olsem na pasin bilong lotuim piksa i wankain olsem pasin bilong lotuim man em piksa i makim.” (New Catholic Encyclopedia, 1967, Vol. 7, p. 372) Dispela tok i no stap long Baibel.