Ol i Amamas na Sanap Strong Long Midel-Is
Dispela ripot i kam long ol Witnes Bilong Jehova long Lebanon
LONG dispela kantri i gat pait na planti taim ol man i tromoi ol bom long Beirut. Tasol long pinis bilong Septemba 1989 i go long Janueri 1990, ol i no tromoi ol bom na mipela i stap gutpela liklik.
Namel long Septemba 1988 na Ogas 1989 i gat 2,467 pablisa, tasol namel long Septemba 1989 na Janueri 1990 lain pablisa i go bikpela na (long mun Novemba) i gat 2,659 pablisa i autim tok. I gat 44 manmeri i kisim baptais, na inap olsem 65 brata sista i mekim wok painia haptaim long olgeta mun. Long namba wan taim mipela i mekim planti Baibel-stadi, winim 2,000, na mipela i tingim bikpela wok mipela inap mekim long bihain.
Tasol pait i kirap gen long Is Beirut, em hap planti kongrigesen i stap long en, na planti brata sista i ranawe i go long ol narapela hap bilong kantri. Inap planti de mipela i no gat rot bilong toktok wantaim ol kongrigesen i stap long ples i gat pait, na tu mipela i no inap kisim ripot bilong ol long wok autim tok. Ol brata i ranawe i go nabaut ol i bung wantaim kongrigesen long hap ol i go long en, na wok bilong i go long haus bilong ol man na autim tok, dispela wok i kamap gutpela long olgeta hap bilong kantri. Long dispela taim ol bom i kukim o bagarapim haus bilong planti brata, na wanpela sista i dai.
Mipela i bilip na wetim Jehova i helpim mipela na soim rot long mipela. Ol painia i strongim bel na ol i orait long kisim kaikai bilong spirit na kaikai bilong skin na wara i go long ol brata ol i stap long ples i gat pait. Ol i laikim tumas Jehova na ol brata, olsem na ol i go lukim ol brata, maski ol i mas brukim ol rot i gat bom long en. Planti man i lukim ol i kam helpim ol brata bilong ol na dispela i givim biknem long Jehova. Ol i lukim gutpela wok ol brata i mekim, long wanem narapela i laikim tru narapela, em dispela kain pasin sori tru i stap namel long ol manmeri i wanbel long lotuim Jehova, em wanpela tasol i God tru.—Jon 13:34, 35; 15:13.
Long yia bilong wok bilong 1990, ol brata i kisim olgeta magasin bilong olgeta mun. Long olgeta mun, mipela save kisim Wastaua long tok Arabik wankain olsem long tok Inglis, na kirap long Janueri 8, 1990, mipela kisim Kirap! tu olsem. Ol Witnes na ol man i bung wantaim ol Witnes i amamas tru long dispela. Na tu mipela amamas tru long kisim ol nupela buklet na ol buk long tok ples Arabik, olsem buklet Gutpela Yu Bilip long God Triwan o Nogat? na buk (tok Inglis) The Bible—God’s Word or Man’s? na buk Baibel Stori Buk Bilong Mi.
Ol i pasim planti faktori na bisnis long Beirut, tasol mipela kisim ol dispela presen bilong spirit. Gavman i no gat planti mani, olsem na long planti hap bilong kantri i no gat paua o wara o telefon. Pait i stap inap 15 yia pinis, tasol ol brata i karim dispela hevi na i stap amamas. Orait, nau yumi ken harim stori bilong sampela.
“Gutpela Samting i Kamap long Taim Bilong Pait”
Wanpela brata long Beirut i tok olsem: “Nau mi laik tok tenkyu tru long Jehova, long wanem maski mipela i stap long taim bilong hevi, em i bin helpim mipela long i stap gut insait long lain bilong em, em ol i lotu tru long em. Sampela samting i bin painim mi long taim bilong pait i givim amamas long mi, na mi tingim ol dispela samting i olsem gutpela samting i kamap long taim bilong pait.
“Taim ol i tromoi planti bom, mipela i sindaun wantaim lain i stap klostu long mipela long lata bilong haus bambai mipela ken abrusim bagarap. Mipela wok long toktok wantaim ol long Kingdom bilong God, em dispela samting tasol inap stretim hevi bilong ol man, na long olgeta taim mipela beten long God bilong mipela, em God Jehova. Olgeta i harim tok long dispela samting mipela i mekim.
“Sampela taim inap planti de ol bom i pundaun na mipela i no inap i go long ol miting. Olsem na mi kisim Wastaua na stadi long Wastaua taim mi sindaun long lata. Dispela i kirapim tingting bilong ol lain i sindaun klostu. Bipo, sampela i no save toktok wantaim mipela, long wanem mipela i Witnes Bilong Jehova. Tasol ol dispela man i kirap nogut long gutpela pasin sori ol brata i mekim long mipela taim wanpela bom i paitim haus bilong mipela. Nau ol i laik toktok wantaim mipela na rot i op long mipela bilong tilim ol sabskripsen bilong Kirap! long ol.
“Ol dispela samting i helpim mi long strong yet long tokaut long tok i tru. I stret yumi mas givim bel olgeta long lotuim Jehova na tenkyu long em na litimapim nem bilong em.”
“Nem Bilong Jehova i Helpim Mi long Abrusim Bagarap”
Wanpela brata long kongrigesen Ras, long Beirut, em i tok: “Mi wantaim meri bilong mi na tupela liklik pikinini man, mipela i go autim tok long hap long wes bilong Beirut kirap long moningtaim. Long apinun mipela mekim miting long tok Inglis long haus bilong mi. Long 6:30 samting, ples i tudak pinis. Ol man i holim gan, ol tasol i wokabaut long rot. Planti bom i wok long pundaun. Planti man i stap long bikpela haus mipela i stap long en ol i ranawe pinis. I no gat wara o paua. Orait, nau mipela harim wanpela man i paitim dua.
“Meri bilong mi i ting, wanpela man i stap klostu em i laik kisim wara o bret na em i kam paitim dua, olsem na meri i go opim dua. Taim em i opim dua, em i lukim 4-pela man i holim gan ol i stap. Ol i makim pes bilong em long gan na kolim nem bilong mi. Long dispela wik, ol i bin go long haus bilong 9-pela man na holim ol na kilim ol i dai wantu tasol. Taim ol i lukim mi, ol i putim gan long het bilong mi na tokim mi long go wantaim ol. Mi tokim ol: “Bai mi go wantaim yupela, tasol pastaim mi laik pasim siot samting.” Mi beten strong long bel na askim Jehova long helpim mi. Taim mi beten pinis, bel bilong mi i stap isi, na maski ol dispela man i holim gan na i laik pretim mi, mi save ol i man nating tasol na mi no pret long toktok wantaim ol.
“Mi askim ol: ‘Bilong wanem yupela i laik kisim mi? Gutpela sapos yumi stori liklik hia long haus na bihain yumi ken i go.’ Ol i kam insait long rum bilong sindaun na bikman bilong ol i askim mi: ‘Bilong wanem yu go long haus bilong ol man na autim tok?’ Mi bekim tok olsem: ‘Yu holim gan na subim ol man long bihainim laik bilong yu, na no gat wanpela man i pasim rot bilong yu. Mi autim gutnius bilong bel isi, em Jisas i tokim mipela long autim.’ Mi tokim ol long ol bilip na wok bilong ol Witnes Bilong Jehova. Taim mi kolim nem bilong Jehova, ol i tok: ‘Mipela bai givim askim long yu hia long haus, na no ken kisim yu i go wantaim mipela.’ Wanpela bilong ol i save long wanpela brata, na em i tok: ‘Dispela man i olsem Jarjoura.’
“Mipela autim tok long ol dispela man i holim gan, na bekim ol askim bilong ol inap wan aua hap. Ol i no putim mi long baksait bilong ka na kisim mi i go olsem ol i bin mekim long ol narapela; nogat; ol i tok sori long mi na givim kis long mi, na tokim mi sapos sampela hevi i painim mi, mi inap askim ol long helpim mi, na nau ol i lusim mipela na i go. Taim dispela samting i kamap mi pilim olsem Jehova i lukautim mi. Mi bin autim tok long moningtaim na mi bin go long miting long apinun, na dispela i helpim mi long sanap strong. Tru tumas, nem bilong Jehova i helpim mi long abrusim bagarap.”—Sindaun 18:10.
“Jehova i Lukautim Gut Mipela”
Narapela brata long Beirut i raitim pas na em i tok: “Long Trinde, Janueri 31, 1990, taim mi wok wantaim brata bilong mi long haus bilong wanpela sista, pait i kirap gen. Long olgeta hap ol bom i pairap. Mipela i no inap go bek long haus, long wanem, bikpela pait tru i kamap. Dispela sista i lukautim mipela gut tru, maski em i gat sampela liklik hap bret tasol.
“Meri bilong mi em i bilong kantri Filipin, na em i no save lukim kain bikpela pait olsem, olsem na mi tingting planti. Long namba 2 de bilong pait, mi inap go long haus bilong mi. Mi lukim ol bet na tebol na sia samting i hip i stap long ol rot na i pasim rot, tasol mi tenkyu long Jehova long wanem meri pikinini bilong mi i no kisim bagarap. Pait i pinis inap liklik taim tasol, na bihain ol bom i pairap gen. Mipela hait long haus bilong wanpela brata i stap klostu long haus bilong mipela. Mipela olgeta i 5-pela—em meri bilong mi, na pikinini man bilong mi em i gat tupela krismas, na mi yet na brata bilong mi wantaim meri bilong em. Ol bom na katres na roket-bom samting i pundaun long olgeta hap klostu long mipela, tasol Jehova i lukautim mipela. Taim ol bom i pairap inap tupela de, mipela i slip long plua bilong haus na smok bilong ol bom i kisim nus bilong mipela.
“Taim mipela harim ol bom i pairap, mipela tingim tok bilong Devit long Buk Song 18:1-9, 16-22, 29, 30. Maski i gat bikpela hevi, mipela i amamas. Mipela i beten askim Jehova long helpim mipela na sapos mipela i mas i dai, mipela i ken i dai wantu tasol na i no ken karim bikpela pen. Mipela bilip strong olsem ol man i dai pinis bai ol i kirap bek.
“Long de bihain mipela kirap nogut, long wanem, inap olsem 25 bom samting i bin pundaun klostu long haus mipela i stap long en, tasol i no gat wanpela bilong mipela i kisim bagarap. Mipela amamas tru na pilim olsem Jehova i bin lukautim mipela. Long hap tumora long moningtaim mipela pasim tok long ranawe. Ol bom i bin kukim olgeta ka i stap long rot, tasol ka bilong mi i no bagarap. Mi draivim ka i go long ol rot i gat bom long en na ol bom i wok yet long pundaun na mipela ranawe long hap i no gat bikpela pait long en olsem long hap bilong mipela. Ol brata i mekim gutpela pasin sori long mipela na givim klos na kaikai na mani long mipela.
“Maski i gat ol dispela hevi, mipela i amamas, long wanem, Jehova i stap wantaim mipela. I olsem Jehova i salim ol ensel bilong em bilong lukautim mipela na bai ol bom i no ken bagarapim mipela. (Buk Song 34:7) Mipela i amamas tru, tasol taim mipela winim Armagedon bai mipela i amamas moa yet.”
Ol i Helpim Ol Brata i Sot long Samting!
Sampela hap bilong Beirut i bagarap tru. I olsem guria i bin kamap long ol dispela hap. Haus bilong planti brata bilong yumi i bagarap liklik o ol i bagarap olgeta. Taim dispela hevi i kamap, Komiti Bilong Brens i putim wanpela komiti bilong helpim ol brata i sot long samting. Dispela komiti i kirap mekim wok long Februeri 16, 1990. Long dispela taim rot i op long mipela bilong i go long ol hap i bagarap. I gat 3-pela wok bilong dispela komiti, em olsem: Strongim ol brata long spirit, na helpim ol long mani na kaikai na wara samting, na helpim ol long stretim o wokim gen haus bilong ol.
Long olgeta de planti brata i kam na mekim wok kirap long moningtaim tru. Olsem na i no gat wok long singautim ol i kam. Yumi ken harim sampela brata i stori long wok ol brata i bin mekim bilong helpim ol:
Ol i klinim na stretim haus bilong wanpela sista, na em i tok olsem: “Mi harim tok olsem taim bagarap i kamap, ol brata i save helpim ol narapela brata, tasol nau mi yet mi lukim dispela na mi pilim tru dispela samting.” Wanpela meri bilong lotu Muslim i stap klostu long dispela sista, em i tok: “Yupela save laikim tru ol narapela long lain bilong yupela. Lotu bilong yupela i stret. Nau bai mi ranawe i go long ples bilong mi, na bai mi tokim olgeta man long gutpela pasin yupela i mekim long ol wanlotu bilong yupela.” Dispela meri i givim sampela kaikai long ol brata i mekim wok.
Wanpela lapun sista i tok olsem: “Mi save yupela bai kam lukim mi, tasol mi no save Sosaiti bai salim wanpela i kam givim wara long mi.” Em i krai na givim kis long brata i kam helpim em.
Wanpela famili, em papa na mama na liklik pikinini man bilong tupela, ol i no baptais, tasol ol i pablisa na ol brata i go lukim ol na givim wanpela bikpela katon susu long ol na sampela bret na wara bilong dring na sampela mani tu. Taim ol brata i tokim ol, ol Witnes Bilong Jehova i stretim rot bilong helpim ol olsem, dispela man i tok: “Mi stap long Sios Ivanjelik inap 11-pela yia, na mi strong long mekim ol wok bilong lotu, tasol pait i stap long Lebanon inap 15 yia nau, na dispela misin i no bin mekim wanpela samting bilong helpim lain bilong ol.” Em i tok, ol Witnes tasol ol i “lain bilong God.” Em wantaim meri bilong em i kisim baptais long wanpela kibung long Me 1990.
Wanpela elda i tok: “Mipela i no save long wanem rot bai mipela i ken tok tenkyu long yupela long ol wok sori yupela i mekim bilong helpim ol brata i sot long samting. Mi lukim ol yangpela brata i kam wokim gen haus bilong papa bilong mi, em long laik bilong ol yet ol i kam wok, na pilim tru na aiwara bilong mi i kam daun. Ol man i stap klostu long mipela, em ol i no Witnes, ol tu i tok ol i pilim tru gutpela pasin ol brata i mekim. Mipela tenkyu tru long Jehova na oganaisesen bilong em long ol dispela samting bilong helpim mipela. Tok bilong man i raitim Buk Song 144:15 i stret, em i tok: ‘Ol manmeri i putim Bikpela i stap God bilong ol, ol . . . i ken amamas.’ ”
“Yupela i Wanem Kain Lain?”
Wanpela sista i gat pikinini em i raitim pas na em i tok: “Mi laik tok tenkyu tru long pasin sori bilong Jehova na oganaisesen bilong em. Ol bom i pundaun long haus bilong mipela na haus i paia na planti man i tokim mipela, haus i bagarap olgeta na ol i no inap wokim gen. Tasol ol brata i wokim gen haus; ol i wokim gut na i olsem em i no bin bagarap. Haus bilong mipela i sanap i stap namel long ol handet handet haus long rot bilong mipela, em ol i paia pinis na i bagarap i stap.
“Ol man i stap klostu long mipela, em ol i no Witnes Bilong Jehova, ol i askim mipela olsem: “Wanem as bilong dispela pasin sori bilong yupela? Yupela i wanem kain lain? Ol dispela man i wok strong long pasin isi na long gutpela pasin, ol i husat? Litimapim nem bilong dispela God i kirapim yupela long mekim dispela gutpela pasin sori na lusim strong na taim na mani samting bilong yupela yet bilong helpim ol narapela man.” Tok bilong Buk Song 84:11, 12 i stret long yumi, em i tok: “Bikpela em i wasman bilong yumi na em i lait bilong yumi. Em i save marimari long yumi na givim biknem long yumi. Em i no save pasim wanpela gutpela samting long ol manmeri i save wokabaut stret. God I Gat Olgeta Strong, ol manmeri i save bilip long yu, ol i ken amamas oltaim.”
Wanpela man, em meri pikinini bilong em i Witnes Bilong Jehova, em i raitim pas na i tok olsem: “Mi laik tok tenkyu long wok yupela i mekim bilong stretim haus bilong mipela. Wok yupela i mekim i kamapim pasin sori bilong ol Kristen tru, dispela pasin i no save kamap planti taim long nau. God i mas blesim wok bilong yupela.”
Taim ol i stretim haus bilong wanpela elda, em i tok: “Maus bilong mipela i hevi na i no inap kamapim tingting i stap long bel bilong mipela. Mipela i sot long ol tok bilong tokim yupela olsem mipela i amamas tru long Jehova na oganaisesen bilong em. Long taim bilong dispela hevi, mipela i pilim olsem Jehova i stap klostu long mipela. Pasin sori bilong yupela i strongim olgeta long famili bilong mi long helpim ol narapela i sot long samting.”
Long mun Epril, i gat 194 manmeri long Lebanon i mekim wok painia haptaim. Long nait bilong Memorial i no gat bikpela pait olsem long ol narapela nait na inap olsem 5,034 i kam bung. Olgeta kibung mipela tingting long mekim, em mipela mekim pinis. Long dispela yia inap olsem 121 manmeri i bin kisim baptais, maski i gat pait i stap long Lebanon. Planti famili long ol kongrigesen ol i lusim Lebanon na i go sindaun long narapela kantri. Tasol planti nupela man i wok long kamap strong na ol bai kisim baptais. Inap olsem 2,726 i autim tok bilong Kingdom na planti nupela pablisa i kamap, olsem na lain pablisa i wok long go bikpela. Long yia bilong wok bilong 1990 olgeta manmeri bilong Jehova i stap long Lebanon i pilim tru gutpela pasin bilong Jehova long sambai long ol. Em i lukautim gut mipela na soim rot long mipela long dispela taim bilong hevi.—Buk Song 33:4, 5; 34:1-5.