No Ken Tok Tasol: ‘Yu Go Hatim Skin na Kisim Kaikai’

“Ating brata o susa [i sot long samting] . . . Na ating wanpela namel long yupela i tokim em, ‘Yu ken i stap bel isi. Yu go putim laplap bilong hatim skin bilong yu, na yu go kisim kaikai na pulapim bel bilong yu.’ Sapos yupela i tok olsem na yupela i no givim sampela klos na sampela kaikai bilong helpim bodi bilong em, orait bai dispela tok i helpim em olsem wanem? Bilip tu i olsem tasol. Sapos em i stap nating, na i no kamapim gutpela pasin, orait em i samting nating.”—JEMS 2:15-17.

1 Wanem hevi i painim wanpela brata bilong Naijiria na em i sot long samting?

OL I ting mama i bin karim Lebechi Okwaraocha paslain long yia 1880, olsem na em i gat bikpela krismas, winim 100. Papamama bilong em i bilong kantri Naijiria, na em i kisim na lotuim god bilong ol. Tasol taim em i winim pinis 80 krismas, em i kirap long stadi wantaim ol Witnes Bilong Jehova na lainim ol tok bilong Baibel. Em i bihainim ol dispela tok na em i kisim baptais. Olsem na nau em i stap Witnes pinis inap olsem 30 yia. Wanpela taim bikpela ren i kam daun long hap bilong em na sampela elda long kongrigesen bilong em ol i go lukim em wantaim meri bilong em, em i bilong lotu Angliken na em i gat 72 krismas. Tupela i bel hevi, long wanem wara i karamapim plua bilong haus morata bilong tupela. Tupela i no gat sampela famili bilong givim ples slip long ol o bilong helpim ol long stretim haus bilong ol. Sapos yu lukim dispela hevi i painim tupela, bai yu mekim wanem? Bihain yumi ken stori long ol samting ol elda i mekim, tasol pastaim yumi ken tingim sampela gutpela tok Baibel i givim long yumi.

2. Bilong wanem yumi tingting long mekim ol ‘gutpela wok’ o “gutpela pasin”?

² Krais Jisas “i lusim pinis laip bilong em yet, bilong . . . klinim yumi na yumi kamap lain manmeri bilong em yet, na yumi ken wok strong long mekim olgeta gutpela [wok].” (Taitas 2:14) Nambawan gutpela wok yumi mas mekim em wok bilong autim gutpela tok bilong Kingdom, em dispela wok inap helpim ol man long kisim laip. (Mak 13:10; Revelesen 7:9, 10) Ol Kristen i mas autim tok, tasol i gat ol narapela ‘gutpela wok’ o “gutpela pasin tu ol i mas mekim, long wanem Jems, em brata bilong Jisas, em i tok: “Pasin bilong Kristen i klin na i no gat asua long ai bilong God Papa bilong yumi, em i olsem: Sapos papamama bilong sampela pikinini ol i dai pinis na ol pikinini i stap nating, o sapos man i dai pinis na meri bilong en i stap wanpis, orait yumi mas helpim ol long karim hevi. Narapela samting tu: Yumi mas lukautim gut wokabaut bilong yumi, na pasin bilong dispela graun em i no ken mekim doti bel bilong yumi.”—Jems 1:27.

3, 4. Taim yumi kaunim 1 Timoti sapta 3-5, yumi kisim wanem save long ol ‘gutpela wok’? Na yumi gat wanem ol askim?

³ Ol kongrigesen long taim bilong ol aposel ol i mekim dispela tupela ‘gutpela wok.’ Long 1 Timoti sapta 3 aposel Pol i kolim ol gutpela pasin i olsem mak bilong ol man ol inap kamap wasman o wokman bilong kongrigesen, na bihain Pol i tok, ‘kongrigesen bilong God i gat laip em i olsem strongpela pos i karim tok i tru.’ (1 Timoti 3:1-15) Pol i kamapim long ples klia olsem ol Kristen i holimpas ol tok i tru, ol inap helpim ol yet na ol man i harim tok bilong ol long kisim laip. (1 Timoti 4:16) Na bihain Pol i stori long ‘gutpela wok’ bilong lukautim ol meri, em man bilong ol i dai pinis na ol i “stap wanpis tru.”—1 Timoti 5:3-5.

⁴ Olsem na yumi mas autim dispela gutpela tok, tasol yumi mas tingting tu long mekim ol ‘gutpela wok’ olsem ‘helpim ol pikinini em papamama bilong ol i dai pinis, na ol meri em man bilong ol i dai pinis.’ Ol elda na wokman bilong kongrigesen ol i olsem “hetman” na ol i mas paslain long mekim ol dispela ‘gutpela wok.’ (Hibru 13:17) Orait, ol i ken mekim wanem? Na yumi ol narapela brata sista long kongrigesen i ken mekim wanem bilong helpim ol long dispela wok? Yumi wan wan yumi ken mekim wanem na bai yumi mekim ol dispela kain ‘gutpela wok’ o “gutpela pasin”?

Ol Elda i Save Go Pas

⁵ Taim hevi i kamap long Judia na planti brata i sot long samting, Pol, em wanpela elda, em i go pas long stretim rot bilong helpim ol. Em i go pas olsem na ol brata i no longlong long ol samting ol i mas mekim, na ol i tilim stret kaikai samting long ol brata i sot. (1 Korin 16:1-3; Aposel 6:1, 2) Ol elda long nau tu i save go pas long helpim ol brata taim bikpela tait wara o graun malumalum o bikpela si o bikpela win o guria samting i bagarapim ol. Long dispela rot ol i “lukautim ol samting bilong ol arapela man tu.”—Filipai 2:3, 4.

6. Taim wanpela bagarap i kamap long Kalifonia, long Amerika, ol elda i mekim wanem?

⁶ Kirap! bilong Me 1987 i stori long kain gutpela pasin olsem ol Kristen i mekim. Taim wanpela banis bilong pasim wara i bruk long Kalifonia, long Amerika, ol elda i kirap kwik long helpim ol brata long dispela hap. Ol dispela ‘wasman bilong sipsip’ i sekim gut olsem sampela brata i lus o nogat, na ol i sot long kaikai o haus o marasin samting. Ol i ring long hetkota bilong ol Witnes Bilong Jehova bilong kisim sampela tok long ol samting ol i mas mekim. Ol i makim wanpela komiti bilong stretim rot bilong helpim ol Witnes i sindaun long hap bilong dispela wara i tait. Taim ol Witnes bilong ol narapela hap klostu ol i kam bilong helpim ol brata, dispela komiti i salim ol i go klinim na stretim ol haus i bagarap. Ol elda i lukautim wok bilong baim na tilim kaikai na ol narapela samting bilong helpim ol brata. Olsem na yumi save, taim wanpela hevi i kamap, ‘olgeta disaipel wan wan i ken skelim hamas ol inap givim’ o wanem samting ol inap mekim bilong helpim ol brata. Tasol gutpela sapos pastaim ol i toktok wantaim ol elda bilong hap em hevi i kamap long en, na ol dispela elda i ken soim rot long ol bilong helpim ol brata.—Lukim Aposel 11:27-30.

7. Tasol i gat wanem ol narapela hevi i save stap long olgeta taim na yumi mas tingim?

⁷ Sampela taim, taim kain bikpela hevi olsem i kamap, (maski yu wanpela elda o nogat) ating yu inap mekim sampela wok bilong helpim ol brata. Tasol i gat sampela wok yu ken mekim insait long kongrigesen bilong yu yet, em tu i bikpela samting bilong helpim ol brata. Hevi i painim ol brata insait long kongrigesen i no bikpela hevi olsem guria o tait wara i bagarapim planti man, olsem na ating yumi no tingim tumas o yumi no helpim gut ol brata i gat hevi. Tasol ol hevi bilong ol brata insait long kongrigesen em ol hevi Jems 2:15-17 i stori long en. Yes, insait long kongrigesen bilong yu yet i gat bikpela wok yu ken mekim bilong kamapim long ples klia olsem bilip bilong yu ‘i kamapim gutpela pasin, o i stap nating tasol.’

8. Taim ol wasman i wok long helpim ol brata insait long kongrigesen, em ol i sot long samting, olsem wanem ol i ken bihainim gutpela tingting?

⁸ Ol elda i mas go pas, tasol ol i mas bihainim “gutpela tingting na save.” (Jems 3:13) Ol i ken bihainim gutpela tingting na lukautim gut kongrigesen bambai ol man bilong giaman i no ken i go long narapela narapela brata (o long narapela narapela kongrigesen) na dinau mani, o mekim stori giaman bambai ol brata i helpim ol. Ol wasman i bihainim gutpela tingting na ol i no orait long pasin bilong les, long wanem lo bilong Baibel i tok: “Sapos man i no laik wok, orait em i no ken kaikai.” (2 Tesalonaika 3:10-15) Tasol nogut ol i pasim bel bilong ol na ol i no “sori” long man i sot long samting, na nogut ol i kirapim ol brata bilong ol long mekim olsem. (1 Jon 3:17) Na ol i mas bihainim gutpela tingting, long wanem Baibel i no kolim planti lo yumi mas bihainim bilong lukautim ol man i sot long samting o ol i gat sik o hevi. Nogat. Narapela narapela kain hevi i save kamap long narapela narapela taim na ples.

9. (a) Long taim bilong ol aposel ol i mekim wanem bilong lukautim ol gutpela meri Kristen, em man bilong ol i dai pinis na ol i sot tru? (b) I gat wanem samting bilong helpim ol kain meri olsem long nau?

⁹ Olsem: Long 1 Timoti 5:3-10 Pol i stori long rot bilong helpim ol meri, em man bilong ol i dai pinis na ol i sot tru long samting. Em i tok, sapos kain meri olsem em i gat sampela famili tru bilong em, em ol i bilip, orait em wok bilong ol long lukautim dispela meri; na sapos ol i no mekim dispela wok bilong ol, bai ol i no inap i stap gutpela long ai bilong God. Tasol, sapos meri i no inap kisim samting bilong helpim em long dispela rot, na em i gutpela meri Kristen, na em i sot tru, orait ol elda i ken stretim rot bambai kongrigesen i helpim em long samting bilong skin. Long nau tu, sampela kongrigesen i bin helpim sampela brata o sista olsem. Tasol long nau, long planti kantri, ol man i baim takis na gavman i save givim mani samting long ol man i lapun, o ol i gat sik, o ol i laik wok, tasol ol i painim painim wok, nogat. Tasol ating bai ol elda Kristen i laik helpim ol dispela man long narapela rot. Sampela ol i sot tru na i stret ol i ken kisim mani samting long gavman, tasol ol i no save olsem wanem ol i ken kisim, o ol i sem long askim gavman long givim long ol. Orait, ating ol elda i ken i go toktok wantaim lain bilong welfe samting, o ol i ken toktok wantaim sampela Witnes ol i gat save pinis long dispela samting. Na ating bai ol inap stretim rot na bai wanpela brata o sista i gat save long dispela samting, em i ken helpim man i sot na bai dispela man inap kisim ol mani samting i stret em i ken kisim.—Rom 13:1, 4.

Stretim Rot Bilong Helpim Ol

10. Taim ol elda i wok long lukautim kongrigesen, ol i mas tingting long mekim wanem?

¹⁰ Ol wasman i lukautim gut kongrigesen planti taim ol yet i kirapim tingting bilong ol gutpela brata sista i gat pasin sori na ol dispela brata sista i helpim ol man i gat sik o ol i gat hevi o ol i sot long samting. Ol elda i mas was i stap bambai ol inap save kwik long ol samting bilong skin na spirit ol brata sista i sot long en. Olsem bai ol inap lukautim gut olgeta insait long kongrigesen. Tasol ol elda i gat bikpela tingting long “wok oltaim long beten na long helpim ol manmeri long tok bilong God.” (Aposel 6:4) Olsem na bai ol i wok long stretim rot bambai ol brata sista i gat sik na ol i slip long bet o ol i slip long haus sik ol i ken kisim kaikai bilong spirit. Ating bai ol i tokim sampela brata long putim tok bilong ol miting long kaset na i go givim long ol brata ol i no inap i kam long miting. Na taim ol elda yet na ol wokman bilong kongrigesen ol i go givim kaset long ol sikman, ol inap strongim ol dispela brata sista long spirit. (Rom 1:11, 12) Na taim ol i go ol inap skelim gut wanem samting ol dispela brata sista i sot long en long dispela taim.

11. Sapos wanpela sista em i lek nogut samting o em i lapun, ating ol i ken helpim em olsem wanem?

¹¹ Ating i gat wanpela sista long kongrigesen na em i gat sik o em i lek nogut samting o em i lapun na sapos wanpela sista i helpim em long waswas na pasim laplap bai em inap i kam sampela taim long Haus Kingdom, o autim tok inap liklik taim. (Lukim Sam 23:1, 2, 5.) Ating ol wasman i ken makim wanpela long lain bilong ol bilong stretim rot bilong helpim kain sista olsem. O ol i ken tokim kongrigesen ol i laik bai sampela brata o sista i ken i go helpim dispela sista long i kam long miting long PMV o kisim em i kam long ka. Na sapos ol i wokim sedyul na makim narapela narapela brata o sista bilong helpim em olsem, bai ol i stretim gut rot bilong helpim em.

12. Olsem wanem ol narapela i ken wok wantaim ol elda long helpim ol sikman na ol lapun long kongrigesen?

¹² O ating ol elda i lukim narapela samting ol i ken mekim bilong helpim sampela brata o sista. Olsem: Ating i gat wanpela sista i stap em i gat sik o em i go lapun na em i no inap lukautim gut haus bilong em olsem bipo em i save mekim. Orait, ating sampela wokman bilong kongrigesen o narapela brata o sista i ken helpim em? Sapos ol i katim gras long banis bilong haus na stretim gut banis, ating dispela bai mekim isi bel bilong sista, long wanem nau haus na banis i no bagarap moa long ai bilong ol manmeri i stap klostu. Na ating ol i ken rausim ol gras nogut na putim wara long ol plaua samting. Na ating i gat wanpela sista taim em i go baim kaikai long stua em i ken i go lukim dispela sista pastaim, na sapos sista i sot long samting em i ken kisim bilong em long stua? Yumi no ken lusim tingting olsem ol aposel i laik helpim ol brata sista long ol samting bilong skin, na ol i stretim rot bambai sampela long kongrigesen, em ol inap long mekim dispela wok, ol i ken helpim ol brata sista—Aposel 6:1-6.

13. Taim ol elda i helpim dispela brata bilong Naijiria yumi bin stori long em pastaim, wanem samting i kamap?

¹³ Ol dispela elda pastaim yumi stori long ol, ol i mekim kain gutpela pasin Kristen olsem. Ol i go lukim Lebechi Okwaraocha wantaim meri bilong em na ol i lukim hevi i painim tupela. Kwiktaim lain elda i tingim ol samting ol i laik mekim bilong helpim tupela—ol i laik wokim gen haus bilong tupela—na ol i toksave long kongrigesen. Narapela narapela brata na sista long kongrigesen ol i givim ol samting bilong wokim haus na ol i kam mekim wok. Insait long wanpela wik tasol ol i wokim gutpela strongpela haus i gat rup kapa. Ripot i kam long Naijiria olsem:

“Ol man bilong dispela ples ol i kirap nogut na ol yet i kam givim kaikai na dring long ol brata sista, em ol i wok planti aua long olgeta de bambai ol inap wokim pinis haus paslain long taim ren i kam daun gen. Planti man bilong ples ol i sutim tok long ol narapela lain bilong lotu na ol i tok, ol i save pulim samting long ol rabisman; ol i no save helpim ol. Olgeta man long dispela hap i wok long toktok long dispela samting. Nau Planti man bilong dispela ples ol i laik harim tok na mipela kirapim planti nupela Baibel-stadi.”

Ol ‘Gutpela Wok’ Yu Ken Mekim

14. Yumi mas i gat wanem tingting long mekim ol ‘gutpela wok’ bilong helpim ol brata?

¹⁴ Tasol planti taim yumi yet yumi inap lukim hevi bilong ol lapun o ol sikman o ol man i slip long haus sik o ol narapela i stap klostu long yumi na yumi ken kirap helpim ol. Sapos yumi lukim rot bilong mekim pasin Kristen tru, gutpela sapos yumi kirap mekim na yumi helpim ol narapela man, a? (Aposel 9:36-39) Pasin sori Kristen i kirapim yumi long mekim; i no olsem ol man i subim yumi long mekim. Bilong helpim tru narapela man, nambawan bikpela samting em olsem: Yumi mas sori long em na laik long helpim em. Tru, yumi no inap helpim ol lapun i kamap yangpela gen, o wokim mirakel na oraitim sik bilong ol sikman, o helpim olgeta brata sista long kongrigesen bambai ol i gat wankain gutpela sindaun. Tasol yumi mas sori long ol narapela man na laik long helpim ol. Em bikpela samting. Sapos yumi gat kain tingting olsem na yumi kirap mekim wok bilong helpim ol brata, dispela bai strongim pasin sori namel long yumi na ol brata yumi helpim ol; bai narapela i laikim tru narapela. Kain samting olsem i kamap namel long Pol na Onisimas, em i nupela Kristen liklik, em i bin ‘helpim Pol long kalabus.’—Failimon 10-13; Kolosi 3:12-14; 4:10, 11.

15. Kolim sampela samting yumi ken mekim bilong helpim gutpela brata i sot tru.

¹⁵ Sampela taim sapos yumi lukim wanpela brata o sista i sot long samting bilong skin, yumi ken salim mani samting long em, olsem presen, na yumi no raitim nem bilong yumi long en, o yumi ken givim long em taim ol narapela man i no lukim. Olsem wanem? Ol i pinisim wanpela brata long wok na em i painim painim wok, nogat? O wanpela sista i bin kisim sik na nau em i mas baim haus sik samting? O em i bin kisim bagarap o wanpela man i bin hansapim em na stilim mani bilong em? Kain samting olsem inap kamap. Taim yumi helpim ol man i gat hevi, Papa bilong yumi long heven em i lukim “wok sori” yumi mekim na em i save amamas. (Matyu 6:1-4) O ating yumi no inap givim mani, tasol yumi inap givim laplap bilong helpim ol rabisman olsem Jop i bin mekim, o yumi inap givim kaikai o kukim kaikai bilong helpim meri, em man bilong em i dai pinis, o pikinini i no gat papamama.—Jop 6:14; 29:12-16; 31:16-22.

16. I gat wanem samting moa yu ken mekim wok long en bilong helpim narapela man? Stori long dispela.

¹⁶ Save yu kisim pinis o ol man yu save long ol, yu ken mekim wok long dispela tu bilong helpim ol narapela man. Wanpela brata i tokim Brata W——em i laik kisim dinau. Brata W——i bekim tok isi long em na em i tok: ‘Bilong wanem yu ting mi inap givim dinau long yu?’ Brata i tok, ‘Long wanem yu save skelim gut mani bilong yu.’ Planti taim Brata W——i bin givim dinau long man i sot, tasol nau em i pilim hevi tru bilong dispela brata na em i tok: ‘Ating yu no sot long mani. Ating yu sot long save bilong skelim gut mani bilong yu. Sapos yu laik, mi ken helpim yu long dispela samting.’ Sapos sampela samting i bin kamap na nau brata i no gat bikpela mani olsem bipo, o em i mas kisim narapela wok i no gat nem, tasol em i redi long wok strong long mekim, dispela kain brata bai amamas long kisim sampela save long rot bilong skelim gut mani bilong em. Tasol sapos tru brata i sot long mani na em i mas kisim dinau, gutpela sapos em i raitim long pepa hamas em i kisim na sainim nem na bai hevi i no ken kamap bihain. Tasol planti brata, em ol i no laik dinau, ol i pilim tru gutpela tok o gutpela save narapela man i givim long ol bilong helpim ol. (Rom 13:8) Samting i painim Emmanuel long Wes Afrika i kamapim long ples klia dispela samting:

Emmanuel i lain long katim gras bilong ol man, tasol i no gat planti man i kam long em. Em i bel hevi, long wanem em i no kisim mani inap long lukautim em. Wanpela elda i lukim dispela hevi bilong Emmanuel na em i tokim Emmanuel: ‘Yu laik mekim narapela wok?’ Emmanuel i tok, ‘Mi redi long mekim.’ Maski em i lain pinis long mekim wanpela wok, tasol em i no gat pasin antap; em i redi long kisim narapela wok. Dispela elda i toktok wantaim sampela man em i save long ol na em i painim pinis wanpela wok bilong Emmanuel—Emmanuel i kamap wanpela wokboi long haus sik. Em i mekim gut dispela wok na em inap helpim sampela long kongrigesen.

17. Brata i slip long haus sik, ating yu ken helpim em olsem wanem? (Sam 41:1-3)

¹⁷ Taim wanpela brata o sista i gat sik na em i slip long haus sik, i gat planti samting yu ken mekim bilong helpim em. Tasol bikpela samting em olsem: Yu mas sori long em na yu mekim. Ating yu ken i go kaunim sampela tok bilong ol gutpela buk Kristen long em, o stori long sampela samting i bin kamap na dispela inap strongim bilip bilong em. Na olsem wanem long ol samting bilong skin? I gat sampela samting yu ken mekim bilong helpim em long dispela tu? Long sampela haus sik i no gat planti nes samting na i mas i gat man bilong lukautim sikman, olsem helpim em long waswas na givim kaikai long em. Olsem na sapos ol dokta i orait long yu, ating yu ken kisim gutpela kaikai i go long em o helpim em long waswas samting. Olsem wanem? Em i sot long sampela laplap samting? (2 Timoti 4:13) O ating i gat narapela samting sikman i tingting planti long en na yu ken helpim em long en? Ating em i tingting planti long i go long ples wok na kisim pe bilong em, o long i go baim haus o aua samting. Sapos yu mekim sampela liklik wok bilong helpim em, olsem i go long pos ofis na kisim ol pas bilong em, o putim wara long gaden bilong em samting, dispela tu inap helpim em na bai em i stap bel isi.

18. Yu gat strongpela tingting long mekim wanem long ol brata i sot long samting?

¹⁸ Ating yumi olgeta wan wan i ken wok strong moa long helpim ol brata na yumi no ken tok tasol: ‘Yu go hatim skin na kisim kaikai.’ (Jems 2:16) Tingim ol brata sista long kongrigesen bilong yu. Olsem wanem? I gat sampela ol i sot long samting bilong skin, o ol i gat sik, o ol i lek nogut samting, o ol i mas slip tasol long bet? Yu ken mekim wanem bilong helpim ol dispela brata sista yu laikim tumas na Krais i dai bilong helpim ol? Sapos oltaim yu tingting long helpim ol, dispela bai helpim yu long redi gut na taim wanpela hevi i kamap, kwiktaim bai yu inap helpim ol brata.

19. (a) Bilong wanem yu mas skelim gut ol wok bilong yu? (b) Wanem nambawan gutpela wok yumi ken mekim bilong helpim ol narapela man? Bilong wanem i olsem? (Sam 72:4, 16)

¹⁹ Sapos yumi wok strong long helpim ol brata bilong yumi, bai yumi kamapim long ples klia olsem bilip bilong yumi i no i stap nating. Dispela bilip bilong yumi i kirapim yumi long wok strong tu long autim tok. Yumi mas skelim gut ol wok yumi mekim bambai yumi inap helpim ol narapela man long ol samting bilong skin, tasol yumi gat taim tu bilong mekim wok bilong autim tok. (Lukim Matyu 15:3-9; 23:23.) Jisas i givim gutpela tok long Mata na Maria bilong helpim ol long tingim gut dispela samting. Em i tok, sapos man i skelim kaikai bilong skin wantaim kaikai bilong spirit na em i kisim kaikai bilong spirit, em i kisim “gutpela samting” i no ken tekewe long em. (Luk 10:39-42) Taim pasin bilong nau i stap yet, oltaim bai ol sikman na ol rabisman i stap wantaim yumi. Tasol yumi inap mekim gutpela pasin bilong helpim ol na yumi mas mekim olsem. (Mak 14:7) Tasol nambawan gutpela wok yumi ken mekim bilong helpim ol man, em wok bilong lainim ol long Kingdom bilong God. Jisas i wok strong long mekim dispela wok. (Luk 4:16-19) Long dispela rot ol rabisman na ol sikman na ol man i karim hevi, ol inap kisim samting bilong helpim ol inap long olgeta taim bihain. Yumi ken amamas, long wanem yumi inap helpim ol brata bilong yumi na ol narapela man tu long bilip tru long God na bai ol inap “kisim laip tru.”—1 Timoti 6:17-19.

Yu Tingim?

◻ Wanem nambawan ‘gutpela wok’ kongrigesen Kristen i mas mekim?

◻ Olsem wanem ol elda bilong kongrigesen i ken tingting stret long ‘gutpela wok’ ol i mas mekim bilong helpim ol brata long samting bilong skin?

◻ Ating ol elda i ken mekim wanem samting bilong helpim ol brata?

◻ I gat wanem ol samting ating yu ken mekim bilong helpim ol brata sista bilong yu, em ol i sot long samting?

5. Pol i mekim wanem bilong helpim ol brata taim hevi i painim ol? Olsem wanem long nau?

[Blok long pes 17]

Kongrigesen i Tingim Ol

Wanpela brata wantaim meri bilong em tupela i go helpim wanpela liklik kongrigesen long hap bilong bus. Brata i stori olsem:

‘Tripela yia bipo mipela i baim haus bilong mipela i go long ol man na mipela i go long wanpela kongrigesen i stap longwe. Sampela hevi i bin kamap insait long dispela kongrigesen na ol i sot long strongpela brata bilong helpim ol. Kwiktaim mi kisim fopela wok insait long kongrigesen. Mipela laikim tru ol brata sista long dispela kongrigesen na mipela i laik wok wantaim ol. Isi isi kongrigesen i kamap gutpela na tupela gutpela elda i kam i stap long dispela kongrigesen.

‘Tasol sik i painim meri bilong mi, na long yia i go pinis ol dokta i mas katim em. Taim em i go long haus sik, long dispela taim stret sik hepataitas i kisim mi. Tupela mun bihain bos i pinisim mi long wok, long wanem long dispela hap bilong bus i no gat planti wok na ol bisnis i hatwok long baim ol wokman. Mitupela i no gat mani, na mi no gat wok, na mitupela wantaim i gat sik na mipela i no kisim bek strong long skin. Mi bel hevi, long wanem kibung distrik i laik kamap na ol i makim mi bilong mekim wanpela tok. Na tu, kibung sekit i laik kamap tupela wik bihain na ol i makim mi bilong mekim wanpela wok long kibung. Tasol mipela i no gat mani na mi no save olsem wanem bai mi inap i go long dispela tupela kibung o lukautim famili bilong mi. Wanpela de, long moningtaim, meri bilong mi i go autim tok na mi sindaun na skelim ol samting mipela mas mekim.

‘Mi lukluk long windo na mi askim skin bilong mi yet, olsem: Ating mi no bilip tru long Jehova? Mi bin tokim meri bilong mi, em i no ken tingting planti, tasol nau mi yet mi gat tupela tingting na mi no bilip tru. Mi beten tokim Jehova mi gat “liklik bilip” tasol na mi krai long em i mas helpim mi. Mi beten pinis na nau wanpela brata i kam paitim dua bilong haus. Em i laik bai mi go dring kopi wantaim em. Mi tokim em, mi no ken i go, long wanem mi mas redim tok bilong mi bilong miting long apinun. Tasol em i strong long mi mas i go wantaim em. Em i tok, em bilong liklik hap taim tasol. Olsem na mi go wantaim em. Inap hap aua samting bihain mipela i kam bek. Mi lusim ka bilong em i go daun. Nau bel bilong mi i orait liklik.

‘Mi go insait long haus na mi lukim planti kaikai bilong stua i hip i stap long tebol na mi ting olsem: “Ating meri bilong mi i go long stua na baim kaikai.” Na bihain gen mi tingting: “Em i no inap mekim olsem, long wanem mipela i no gat mani.” Nau mi lukim wanpela skin pas i stap. Rait long en i tok:

‘“Mipela ol brata sista i laikim yupela tumas, mipela i givim dispela long yupela. Yupela i no ken putim hap mani long bokis kontribiusen, long wanem mipela i putim pinis bilong yupela.”

‘Aiwara i kamap, na taim mi tingim “liklik bilip” bilong mi, mi krai moa yet. Bihain meri bilong mi i kam bek long haus. Mi soim ol dispela kaikai na ol narapela presen long em, na em tu i krai, na tupela sista i kam wantaim em, tupela tu i krai. Mipela i tokim tupela, mipela i no inap kisim olgeta dispela planti samting, tasol tupela i tok, ol brata sista i givim ol dispela samting na no gat wanpela i save husat i givim wanem wanem samting. Tupela i tok, kongrigesen olgeta i insait long dispela samting. Ol i tok ol brata sista i laik helpim mipela, long wanem mipela i bin lainim ol long pasin bilong helpim narapela man. Nau mipela i krai gen!’

Taim brata i raitim pas na stori long dispela samting, em i kisim wok gen na em wantaim meri bilong em, tupela i mekim wok painia haptaim.

[Blok long pes 18]

Ol i Mekim Pasin Sori Kristen

Narapela kain samting i kamap long wanpela kongrigesen long hap bilong wes long Amerika na ol inap kamapim long ples klia pasin sori Kristen bilong ol, olsem Baibel i tok yumi mas mekim. Long hap bilong ol, gavman i putim wanpela helt-senta o haus sik bilong lukautim ol manmeri em wanpela sik i kamap long kru bilong ol na ol i no inap wokabaut samting. Wanpela man i kam pastaim long dispela senta, em Gary. Em i gat 25 krismas na papamama i no inap lukautim em moa long haus. Dispela sik i bagarapim tru Gary; han lek bilong em i dai na em i no inap toktok gut tu.

Gary em i wanpela Witnes Bilong Jehova. Em i bin kisim baptais 7-pela yia bipo. Taim em i kam i stap long dispela nupela senta, em i laik i go long ol miting bilong kongrigesen long dispela hap. Pastaim papamama i save kisim em i go long ol miting, long wanem ol i stap klostu liklik. Tasol bihain sampela brata long kongrigesen i kirap helpim Gary, long wanem papamama bilong em i lapun. Wanpela brata i gat bas, olsem na em wantaim meri bilong em na tupela pikinini meri bilong em ol i save redi hariap na lusim haus 45 minit paslain long taim bilong miting bambai ol inap i go kisim Gary. Taim miting i pinis ol i kisim Gary i go bek long haus sik, olsem na ol i no save kamap kwik long haus.

Tasol wanpela samting i wok long kamap long dispela senta. Sampela sikman moa ol i laik harim tok i tru bilong Baibel. Kwiktaim tupela i kirap long stadi. Bihain sampela moa i laik kisim save long tok i tru. Tasol olsem wanem ol brata i ken helpim ol long i go long ol miting? Narapela famili long kongrigesen ol i baim wanpela bas, na kampani bilong sampela brata long dispela hap i givim namba tri bas bilong helpim ol dispela sikman. Tasol sampela taim ol dispela bas tu i no inap helpim gut ol dispela sikman. Olsem wanem? Kongrigesen inap mekim sampela samting moa bilong helpim ol?

Ol elda i toktok wantaim long dispela samting na bihain ol i tokaut olsem ol i ting i gutpela sapos kongrigesen i baim wanpela bas em bilong ol dispela sikman tasol bilong helpim ol long i go long ol miting. Kongrigesen i orait long dispela samting na ol i givim mani bilong baim dispela bas. Sampela Witnes moa long dispela hap i harim stori bilong dispela samting dispela kongrigesen i laik mekim na ol tu i givim sampela mani. Ol i baim wanpela bas em ol inap putim ol wilsia insait long en.

Nau ol i makim lain bilong narapela narapela Buk-Stadi bilong draivim bas inap wanpela mun na kisim ol dispela sikman i go long ol miting, na i go bek long haus sik, na i go long ol kibung tu. Faipela long dispela haus sik ol i save go long ol miting long olgeta taim; na nau fopela ol i baptais pinis. Nau planti brata sista i save long ol na laikim ol tumas, em ol dispela brata sista i save helpim ol na kisim amamas. Ol i mekim wanem bilong helpim ol dispela sikman? Sampela i save holim buk singsing bambai sikman inap lukim, na ol i opim Baibel bambai sikman i ken lukim ol skripsa long taim bilong miting. Long kibung sekit na kibung distrik, ol i save givim kaikai long ol na lukautim ol dispela sikman i no inap lukautim ol yet. Narapela i sori tru long narapela. Na olsem wanem long Gary? Em i kamap wanpela wokman long dispela kongrigesen i bin mekim gutpela sori Kristen—Aposel 20:35.