Sampela i Stap Long Ples Spirit Tasol Ol i Husat?

Long Yurop, wanpela lapun meri i go insait long haus lotu, em i holim bis rosari long han na brukim skru klostu long piksa bilong Maria. Long Afrika, wanpela famili i kapsaitim strongpela dring jin long matmat bilong wanpela long famili bilong ol husat i gat biknem. Long Amerika, wanpela yangpela man i tambu long kaikai na em i tingim tingim long bel ol samting bambai em i ken toktok wantaim wasangelo bilong em. Long Esia, wanpela pris i kukim ol samting ol i wokim long pepa i gat kain kain kala bilong mekim ofa long ol spirit bilong ol tumbuna.

WANEM samting long ol dispela manmeri i wankain? Olgeta i bilip olsem i gat sampela man long ples spirit em ol inap toktok wantaim ol, na ol dispela man inap mekim bikpela samting long i stap bilong ol man bilong graun. Dispela bilip i no nupela na yumi no kirap nogut long en. Samting yumi kirap nogut long en em olsem: I gat planti narapela narapela kain bilip long husat i stap long ples spirit, na ol dispela bilip i pait wantaim.

Ol Muslim i lotu long wanpela God tasol​—em Allah.a Sampela manmeri long Kristendom i tok God em i wanpela God Triwan, olsem God Papa, God Pikinini, na God Holi Spirit. Ol Hindu i bilip olsem i gat planti tausen god man na god meri. Sampela man i tok ol spirit i stap insait long ol animal, ol diwai, ol bikpela ston, na ol wara. Na sampela narapela i larim ol buk na muvi samting i stiaim tingting bilong ol, em ol i kamapim ol stori long ol ensel na ol dimon, ol tewel na ol masalai, ol god man na ol god meri.

I gat kain kain tingting long ol god, na kain kain tingting long pasin bilong toktok wantaim ol dispela god. Yumi ken save olsem i no olgeta dispela kain tingting i stret. Tingim: Paslain long yumi ringim wanpela man long telefon, yumi mas save long husat man yumi laik ringim na yumi mas save tru olsem dispela man i stap na em i laik harim tok yumi mekim. I no gat as long traim toktok long wanpela man i no stap tru. Na samting i nogut moa yet, yumi no ken toktok wantaim wanpela man nogut, long wanem, dispela inap nogutim yumi.

Olsem na yumi laik save, husat tru i stap long ples spirit? Baibel i bekim dispela askim, na tu, Baibel i tokim yumi long yumi ken toktok wantaim husat na wanem bekim yumi bai kisim. Mipela i laik kirapim yu long ritim ol stori i kamap bihain long dispela. Ating bai yu kirap nogut long kisim save long ol tok bilong Baibel long dispela samting.

[Futnot]

Sampela Driman Bilong Ples Spirit

YU KEN lukluk strong i go antap long skai inap longpela taim, tasol yu no inap lukim wanpela spirit. Yu ken putim gut yau, tasol yu no inap harim wanpela samting. Tasol yu ken save olsem ol spirit i stap. Ol i gat bikpela save na bikpela strong, na ol i gat nem na pasin bilong ol yet. Sampela i mekim gut long yumi; sampela i laik bagarapim yumi. Tasol olgeta i save tingim ol samting i painim yumi.

God tru, em tu i wanpela Spirit. (Jon 4:24) Em i gat nem bilong em yet, na em i narapela kain olgeta long ol god giaman. Nem bilong em Jehova. (Song 83:​18, NW) Man bilong raitim song i tok: “Bikpela [“Jehova,” NW] em i namba wan tru na yumi mas litimapim nem bilong em moa yet. Ol arapela god i no olsem Bikpela. Olsem na yumi mas aninit long Bikpela. Olgeta god bilong ol arapela lain manmeri, ol i giaman god tasol. Tasol Bikpela i bin wokim skai. Bikpela i stap long haus bilong en na em i gat biknem na i stap king. Na em i as bilong olgeta strong na bilong olgeta naispela samting.”​—Song 96:​4-6.

Sampela Driman Long God Tru

Baibel i tok: “I no gat wanpela man i bin lukim God. Nogat tru.” (Jon 1:18) Yumi ol man i no inap kliagut long lukluk na biknem bilong God, wankain olsem man i aipas i no inap kliagut long ol kala. Tasol olsem gutpela tisa i eksplenim gut insait bilong sampela strongpela tok long rot em ol sumatin inap kisimgut, olsem tasol long Baibel God i kamapim klia ol samting yumi no inap lukim long ai long rot bilong ol samting yumi ken lukim. Long rot bilong ol driman em Jehova i bin givim long ol gutpela wokman bilong em, em i helpim yumi long piksaim long tingting ol samting i stap long heven, na i helpim yumi long kliagut long wok bilong ol ensel.

Olsem: Long wanpela driman Esekiel i lukim bikpela glori bilong Jehova i olsem paia, bikpela lait, blupela ston i dia tumas, na renbo. Long narapela driman, aposel Jon i lukim Jehova i sindaun long sia king bilong em na Jon i tok, God “i lait olsem ston jaspa na retpela ston konilian.” Em i tok moa olsem “wanpela renbo i raunim sia king, na . . . dispela renbo i lait olsem grinpela ston emeral.” Ol dispela tok i soim yumi olsem hap Jehova i stap long en i gat narakain gutpela bilas tru na olgeta samting i stap bel isi.​—KTH 4:​2, 3; Esekiel 1:​26-28.

Profet Daniel tu i kisim wanpela driman long Jehova, na em i lukim “planti milion manmeri [“ensel,” NW] i sanap klostu long [God].” (Daniel 7:10) Man! Em narakain samting tru em i lukim! Sapos yu kisim driman na yu lukim wanpela ensel, dispela em i bikpela samting tru, tasol piksaim long tingting planti milion ensel i gutpela olgeta, ating bai yu kirap nogut tru long en, a?

Baibel i stori long ol ensel inap olsem 400 taim, sampela em ol serafim na sampela em ol serap. Tok Grik na tok Hibru ol i tanim long Baibel olsem “ensel,” insait bilong dispela tok em “man bilong bringim tok.” Olsem na ol ensel inap toktok wantaim ol narapela ensel, na bipo ol i bin toktok wantaim ol man tu. Ol ensel i no ol manmeri husat i bin stap long graun bipo, nogat. Jehova i bin wokim ol ensel paslain tru long em i wokim ol man.​—Jop 38:​4-7.

Long driman bilong Daniel, planti milion ensel i bung bilong lukim wanpela bikpela samting i kamap. Daniel i lukim “wanpela man i wankain olsem yumi man bilong graun” i kam long sia king bilong Jehova, na Jehova “i givim em strong na biknem. Na em bai i stap king i gat strong oltaim oltaim, na wok king bilong en bai i no inap pinis. Na olgeta manmeri bilong olgeta kantri na olgeta lain na olgeta tok ples bai i stap aninit long en.” (Daniel 7:​13, 14) Dispela “man i wankain olsem yumi man bilong graun,” em Jisas Krais husat i kirap bek pinis​—em i gat bikpela namba long ples spirit, na em i kisim wok king bilong bosim graun olgeta. Wok king bilong em bai senisim olgeta gavman bilong graun na pinisim sik, krai, pasin bilong daunim narapela, pasin bilong stap rabis, na dai.​—Daniel 2:44.

Taim God i makim Jisas i kamap king, dispela i givim bikpela amamas long planti milion ensel husat i stap gut long God, em ol ensel husat i gat laik long helpim ol man. Tasol sori tru, i no olgeta spirit i gat dispela tingting.

Ol i Birua Long God na Ol Man

Long pastaim tru, wanpela ensel i laik ol narapela i mas lotuim em, na em i sakim Jehova na mekim em yet i kamap Satan, mining bilong en “Birua.” Satan em i as bilong ol pasin nogut tru, na em i birua tru long Jehova husat i as bilong pasin laikim. Sampela narapela ensel i joinim Satan long pasin bikhet bilong em. Baibel i kolim ol olsem ol spirit nogut. Olsem Satan, ol spirit nogut i kisim pasin bilong birua tru long ol manmeri. Ol dispela spirit nogut i as bilong planti pen na hevi i stap long nau, olsem pasin i no stret, sik, stap rabis, na ol woa.

Planti lotu Kristen long nau i no save toktok tumas long ol wok bilong Satan olsem ol i bin mekim bipo, tasol Buk Jop i helpim yumi long save long ol pasin na laik bilong dispela bikhet ensel. Em i tok: “Wanpela taim ol ensel i kam bung long ai bilong Bikpela, na Satan tu i bung wantaim ol.” Long toktok i kamap long dispela bung, Satan i sutim tok olsem Jop i mekim wok bilong God, long wanem, God i givim planti samting long em. Bilong truim tok bilong em, Satan i kamapim bikpela hevi long Jop, kilim ol animal na 10-pela pikinini bilong em. Bihain long dispela, em i kamapim ol strongpela sua long olgeta hap bilong bodi bilong Jop. Tasol olgeta dispela hevi Satan i kamapim i no mekim na Jop i lusim Jehova, nogat.​—Jop 1:​6-19; 2:7.

I gat as na Jehova i larim Satan i stap inap longpela taim, tasol Jehova bai i no inap larim em i stap oltaim. Klostu nau Jehova bai pinisim Satan. Buk Kamapim Tok Hait i stori olsem Jehova i mekim pinis sampela samting bilong pinisim Satan, em narapela bikpela samting i kamap long ples spirit na yumi no lukim long ai. Baibel i tok: “Bikpela pait i kirap long heven. Maikel [em Jisas Krais i kirap bek pinis] wantaim ol ensel bilong en ol i pait long dispela traipela snek [Satan]. Na snek wantaim ol ensel bilong en ol i bekim pait long ol, tasol ol i no gat strong bilong winim pait. Olsem na ol i no inap i stap moa long heven, na ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em.”​—KTH 12:​7-9.

Baibel i tok Satan i “giamanim olgeta manmeri bilong graun.” Long rot bilong kamapim ol bilip giaman bilong lotu, Satan i save paulim ol man na ol i lusim Jehova na Tok bilong em. Wanpela tok giaman olsem em taim ol man i dai pinis ol i go long ples spirit. Ol man i gat narapela narapela tingting long dispela bilip. Olsem: Long Afrika na Esia, planti man i bilip olsem taim ol man i dai pinis ol i go i stap long ples spirit wantaim ol tumbuna bilong ol i dai pinis. Na tu, tingting olsem man i stap laip bihain long em i dai pinis, dispela tingting em i as bilong bilip bilong klinpaia na hel.

Yu Ting Taim Man i Dai Pinis Em i Go Long Heven?

Tasol olsem wanem long dispela bilip bilong planti milion manmeri olsem olgeta gutpela man bai i go long heven? Tru, sampela gutpela man bai i go long heven, tasol namba bilong ol i liklik taim yumi skelim wantaim planti bilion manmeri i dai pinis. Baibel i kamapim klia olsem “God i bin baim bek ol [144,000 manmeri] namel long olgeta manmeri bilong graun,” na ol bai mekim wok “pris” na “king na bosim ol manmeri bilong graun.” (KTH 5:​9, 10; 14:​1, 3) Ol bai mekim wok king wantaim Pikinini bilong man, em Jisas Krais, long wanpela gavman long heven em Kingdom Bilong God. Dispela gavman bai pinisim Satan na ol spirit nogut bilong em na em bai mekim graun i kamap wanpela ples paradais. Planti bilong ol manmeri em ol i dai pinis bai kirap bek long dispela taim na bai ol i kisim laip i stap gut oltaim long Paradais long graun.​—Luk 23:43.

Orait nau yumi save olsem i gat planti milion spirit i stap long ples spirit. Nambawan tru bilong ol em God Jehova, Man Bilong Wokim olgeta samting. Planti milion ensel i mekim gut wok bilong em. Ol narapela ensel em ol i bihainim Satan, ol i birua long Jehova na mekim wok bilong paulim ol man. Na tu, i gat liklik lain manmeri em God i bin “baim bek ol,” olsem makim ol, namel long olgeta manmeri bilong graun bambai ol i ken mekim wok long heven. Orait nau yumi laik skelim yumi inap toktok wantaim husat long ples spirit, na olsem wanem yumi ken mekim olsem.

Yumi Inap Toktok Wantaim Husat Long Ples Spirit?

GOD I GAT OLGETA STRONG i bin givim sampela wok long ol ensel. Olsem: Em i givim wok bilong bosim graun long Jisas Krais, na em i makim ol gutpela ensel long helpim na stiaim wok bilong autim gutnius. (KTH 14:6) Tasol wok bilong harim beten i bilong em yet. Ol beten bilong yumi i mas i go stret long God wanpela tasol.

Jehova em i Man bilong “harim beten.” (Song 65:2) Em i save harim na bekim ol beten bilong yumi. Long ol samting bilong beten, aposel Jon i raitim pas long ol wanwok bilong em i lotuim Jehova olsem: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi. . . . Yumi save, em i save harim olgeta beten bilong yumi. Olsem na taim yumi askim em long givim wanpela samting long yumi, yumi save olsem yumi kisim tru dispela samting.”​—1 Jon 5:​14, 15.

Ol gutpela ensel i no laik yumi beten long ol. Ol i kliagut na bihainim rot God i putim bilong harim beten, em sampela taim ol tu i insait long en. Olsem wanem ol i insait long en? Taim profet Daniel i beten long Jehova long Jerusalem i bin bagarap, God i harim beten bilong Daniel na em i salim ensel Gebriel i kam long Daniel na givim tok bilong strongim em.​—Daniel 9:​3, 20-22.

Toktok i Kam Long Ol Daiman?

Olsem wanem? I gutpela yumi traim long toktok wantaim ol man i dai pinis? I gat planti stori i tok olsem ol man i bin toktok wantaim spirit bilong ol daiman. Olsem: Wanpela glasmeri i go lukim narapela meri long Aialan, na i tokim em olsem long nait paslain em i bin toktok wantaim Fred, em man bilong dispela meri. Tasol Fred i bin dai sampela wik i go pinis. Dispela glasmeri i stori long ol samting “Fred” i tokim em long en, em ol samting dispela meri bilong Fred tasol i save long en. Em i isi long meri i bilip olsem Fred i stap laip yet long wanpela ples spirit, na em i traim long toktok wantaim em long rot bilong dispela glasmeri. Tasol dispela tingting i pait wantaim ol tok bilong Baibel i stori long ol samting i painim ol man i dai pinis.​—Lukim blok daunbilo.

Olsem wanem yumi ken eksplenim gut insait bilong kain stori olsem? Wanpela rot bilong ol spirit nogut long giamanim ol man em long rot bilong mekim olsem man i dai pinis i stap laip yet, olsem long dispela stori bilong Fred. Bilong wanem ol i mekim olsem? Em bilong pulim ol man na ol i no ken bilip long ol tok bilong Baibel, na bai bilip na pasin bilong ol long trastim Jehova i go slek. Satan na ol spirit nogut i giamanim ol man long “olgeta kain strongpela wok na ol kain kain giaman mirakel. Na long olgeta giaman bilong pasin nogut em bai i giamanim ol dispela manmeri i wokabaut long rot bilong bagarap.”​—2 Tesalonaika 2:​9, 10.

Yumi ken save tru olsem i gat ol glasman na ol manmeri husat i save go lukim ol, em ol i bilip olsem ol i save toktok wantaim ol man i dai pinis. Tasol tru tru, ol i save toktok wantaim ol spirit em ol i birua bilong Jehova. Na tu, i gat ol manmeri i ting olsem God i orait long lotu bilong ol, tasol God i no orait long en. Holi spirit i kirapim aposel Pol long mekim tok lukaut olsem: “Samting ol haiden i save ofaim, em ol i ofaim long ol spirit nogut. Ol i no ofaim long God.”​—1 Korin 10:​20, 21.

Yumi save olsem yumi ken beten long Nambawan Bikpela husat i laikim tru yumi na i tingim yumi, olsem na i no gat as long beten long ol narapela, a? Baibel i tok promis olsem: “Oltaim Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.”​—2 Stori 16:9.

[Blurb long pes 9]

Yumi save olsem yumi ken beten long Nambawan Bikpela husat i laikim tru yumi na i tingim yumi, olsem na i no gat as long beten long ol narapela, a?

[Blok/Piksa long pes 8, 9]

Samting Tru na Bilip Nating

SAMTING TRU: SATAN EM I WANPELA MAN I STAP TRU

“Satan yet i save senisim pasin bilong en na kamap olsem ensel bilong lait.”​—2 Korin 11:14.

“Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai.”​—1 Pita 5:8.

“Stat long bipo tru, Satan i save mekim sin oltaim, olsem na man i save mekim sin, em i man bilong Satan.”​—1 Jon 3:8.

“Yupela i mas daunim yupela yet na i stap aninit long God. Yupela i mas sakim Satan, na em bai i lusim yupela na ranawe.”​—Jems 4:7.

“Satan . . . bipo yet em i stap man bilong kilim ol man i dai. Na em i no bihainim pasin i tru, long wanem, pasin i tru em i no i stap long em. Tok giaman em i save mekim, dispela em i tok bilong em stret. Em i man bilong tok giaman, na em i papa tru bilong pasin bilong tok giaman.”​—Jon 8:44.

BILIP NATING: TAIM OL MAN I DAI OL I GO LONG PLES SPIRIT

“Bai yu wok hat tru long kisim kaikai bilong yu na tuhat bai i kamap long pes bilong yu. Na bai yu hatwok oltaim inap yu dai na yu go bek long graun. Long wanem, mi bin wokim yu long graun, na bai yu go bek gen long graun.”​—Stat 3:​18, 19.

“Ol man i gat laip . . . ol i save bai ol i dai. Tasol ol man i dai pinis, ol i no inap save long wanpela samting.”​—Saveman 9:​4, 5.

“Sapos yu mekim wanpela wok, orait taitim bun na mekim save tru. Long wanem, bai yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.”​—Saveman 9:10.

“Taim ol i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.”​—Song 146:4.

SAMTING TRU: OL GUTPELA ENSEL I SAVE TINGIM YUMI

“Ensel bilong Bikpela i save stap klostu long ol manmeri i aninit long Bikpela, na em i save helpim ol bai ol i no kisim bagarap.”​—Song 34:7; 91:11.

“Ol ensel ol i spirit, na ol i save mekim wok bilong God. God i save salim ol i go bilong helpim ol man em i laik kisim bek ol.”​—Hibru 1:14.

“Mi lukim narapela ensel i flai i go namel long skai. Em i gat gutnius bilong i stap oltaim oltaim. . . . Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin. Em i singaut strong olsem, . . . ‘Yupela i mas pret long em na litimapim nem bilong em.’”​—KTH 14:​6, 7.

BILIP NATING: JISAS I WANKAIN OLSEM GOD

“Mi laik bai yupela i save . . . het bilong olgeta man em Krais, na het bilong meri em man bilong en, na het bilong Krais em God.”​—1 Korin 11:3.

“Taim olgeta samting i stap aninit long Krais pinis, orait Pikinini Bilong God bai i putim em yet aninit long God. . . . Taim Pikinini Bilong God i putim em yet aninit long God, orait God bai i stap het tru bilong olgeta samting.”​—1 Korin 15:28.

“Tru tumas mi tokim yupela, Pikinini em i no inap mekim wanpela samting long tingting bilong em yet. Nogat. Em i mekim tasol ol samting em i lukim Papa i mekim.”​—Jon 5:19.