Sapta 117

Long Gaden Em i Pilim Hevi Nogut Tru

JISAS i beten pinis, orait em wantaim 11-pela gutpela aposel i mekim singsing bilong litimapim nem bilong Jehova. Bihain ol i lusim rum antap na i go ausait. Em i nait pinis na i tudak na i kol liklik. Ol i wokabaut i go brukim ples daun bilong Kidron na ol i laik go bek long ples Betani. Ol i kamap long gaden Getsemani, em i stap long hap bilong maunten Oliv. Planti taim Jisas i bin bung wantaim ol aposel long dispela gaden namel long ol diwai oliv.

Nau Jisas i lusim 8-pela aposel​—ating klostu long ples bilong go insait long gaden​—na em i tokim ol: “Yupela sindaun i stap hia, na bai mi go long hap na mi beten.” Em i kisim 3-pela aposel, em Pita na Jems na Jon, na ol i go insait tru long gaden. Nau Jisas i pilim nogut tru. Em i tokim ol: “Bel bilong mi em i hevi tumas, na klostu mi laik i dai. Yupela stap hia na was wantaim mi.”

Em i go liklik na i pundaun na putim pes bilong em i go daun long graun na em i beten olsem: “Papa bilong mi, sapos inap, orait mi laik bai yu tekewe dispela kap long mi. Tasol yu no ken bihainim laik bilong mi. Nogat. Yu mas bihainim laik bilong yu tasol.” Bilong wanem Jisas i tok, bel bilong em i hevi tumas na klostu em i laik i dai? Ating em i senisim tingting bilong em na em i no laik lusim laip bilong em olsem ofa bilong baim bek ol man?

Nogat tru! Jisas i no laik abrusim i dai. Wanpela taim Pita i bin tokim em, em i mas abrusim i dai, tasol dispela tok bilong Pita i samting nogut tru long tingting bilong Jisas. Insait bilong dispela tok bilong Jisas i olsem: Em i pilim nogut tru, long wanem, ol bai kilim em i dai olsem wanpela man nogut tru, na em i tingting planti, nogut dispela i bagarapim nem bilong Papa bilong em. Em i save, inap sampela aua moa na bai ol i nilim em long pos olsem wanpela man i bin mekim pasin nogut tru, olsem tok bilas long God! Em i tingim dispela samting na bel bilong em i hevi tru.

Jisas i beten longtaim liklik na bihain em i go bek long 3-pela aposel na em i lukim ol i slip i stap. Em i tokim Pita: “Olsem wanem? Yupela i no inap was wantaim mi inap long wan aua, a? Yupela i mas was na [beten] i stap. Nogut traim i kamap long yupela na yupela i pundaun.” Tasol Jisas i save ol i bel hevi, na tu, em i biknait pinis na ai bilong ol i hevi, olsem na em i tok: “Tru, bel em i gat laik bilong mekim samting, tasol bodi em i no gat strong.”

Em i go namba 2 taim na beten askim God long tekewe “dispela kap” long em. Dispela “kap” i makim samting Jehova i laik bai em i mekim. Orait em i kam bek gen long 3-pela aposel na em i lukim ol i slip i stap na ol i no beten bambai ol i no ken pundaun long traim. Taim Jisas i kirapim ol, ol i no inap mekim wanpela tok long em.

Orait Jisas i lusim ol namba 3 taim na em i go liklik na i brukim skru na em i krai na singaut strong na i beten olsem: “Papa, sapos yu laik, yu ken tekewe dispela kap long mi.” Jisas i pilim nogut tru, long wanem em i save, taim ol i kilim em i dai olsem wanpela man nogut, dispela bai bagarapim nem bilong Papa bilong em. Bai ol i putim em long kot na tok em i bin tok bilas long God, olsem na em i pilim nogut tru na bel bilong em i bagarap stret!

Tasol Jisas i beten moa olsem: “Yu no ken bihainim laik bilong mi. Nogat. Yu mas bihainim laik bilong yu tasol.” Jisas i daunim laik bilong em na i bihainim laik bilong God. Orait nau wanpela ensel i kam na givim sampela tok long em bilong strongim em. Ating ensel i tokim em, Papa bilong em i amamas long em.

Em bikpela samting tru Jisas i mas mekim, na em i pilim tru hevi bilong en! Em i mas tingting gut, long wanem, samting em i mas mekim inap helpim em yet wantaim olgeta manmeri long kisim laip oltaim. Olsem na bel bilong em i mas strong. Em i pilim tru dispela samting. Olsem na em i beten strong moa, na tuhat bilong em i kamap olsem blut na i pundaun long graun. Wanpela buk (The Journal of the American Medical Association) i stori long dispela na i tok, ‘Taim bel bilong man i pilim nogut tru, tuhat bilong em inap kamap olsem blut, tasol dispela samting i no bin kamap planti taim.’

Orait Jisas i kam bek namba 3 taim long ol aposel na i lukim ol i slip i stap, long wanem, ol i bel hevi tumas na skin bilong ol i les olgeta. Em i tok: “Yupela i slip yet na malolo, a? Harim. Taim i kamap pinis, na nau ol i givim Pikinini Bilong Man long han bilong ol man bilong mekim sin. Yupela kirap, na yumi go. Lukim, man i laik givim mi long han bilong ol, em i kamap klostu nau.”

Jisas i toktok yet na Judas Iskariot i kam. Bikpela lain tru i kam wantaim em, na ol i holim ol bombom na lam na ol bainat na stik. Matyu 26:30, 36-47; 16:​21-23; Mak 14:​26, 32-43; Luk 22:​39-47; Jon 18:​1-3; Hibru 5:7.

▪ Ol i lusim rum antap pinis na Jisas i bringim ol aposel i go we? Em i mekim wanem long dispela hap?

▪ Taim Jisas i beten, ol aposel i mekim wanem?

▪ Bilong wanem Jisas i pilim nogut tru? Em i beten askim God long mekim wanem?

▪ Ating wanem samting i mekim na tuhat bilong Jisas i kamap olsem blut?

Sapta 118

Judas i Kamapim Em na Ol i Holim Em

EM I biknait pinis na Judas i bringim bikpela lain soldia na ol bikpris na Farisi na sampela man moa i kam insait long gaden Getsemani. Ol bikpris i pasim tok pinis long ol bai givim 30 mani silva long Judas sapos em i putim Jisas long han bilong ol.

Taim Jisas wantaim ol aposel i bin mekim Pasova na Jisas i salim Judas i go, em i go stret long ol bikpris. Ol i bungim sampela plisman bilong ol na planti soldia. Ating pastaim Judas i bringim dispela bikpela lain i go long haus em Jisas na ol aposel i bin i stap long en na mekim Pasova. Tasol ol i lukim olsem Jisas i lusim pinis haus, olsem na ol i bihainim Judas i go lusim Jerusalem na ol i brukim wara Kidron. Ol i karim ol lam na bombom na ol samting bilong pait.

Judas i bringim dispela bikpela lain i go antap long maunten Oliv. Em i ting em i save pinis long ples Jisas bai stap long en, long wanem, long dispela wik Jisas wantaim ol aposel i bin wokabaut i go i kam long Betani na Jerusalem, na planti taim ol i kam long gaden Getsemani bilong malolo na toktok wantaim. Tasol nau em i biknait pinis na ating Jisas wantaim ol aposel i stap long ples tudak aninit long ol diwai oliv. Olsem wanem ol soldia inap luksave long em? Na ating ol i no save long em tu. Olsem na Judas i givim wanpela mak long ol. Em i tokim ol: “Bai mi givim kis long wanpela man. Dispela man em Jisas. Yupela holimpas em.”

Judas i bringim dispela bikpela lain i go insait long gaden na em i lukim Jisas wantaim ol aposel, na wantu em i go long Jisas na i tok: “Gutnait, Tisa.” Na em i givim kis long Jisas.

Jisas i tokim em, ‘Yu laik mekim wanem na yu kam?’ Na Jisas i tok moa olsem: “Judas, yu laik givim kis long Pikinini Bilong Man na long dispela pasin yu ting long givim em long han bilong ol man, a?” Orait nau Jisas i kam sanap long lait bilong ol bombom na lam na em i askim ol dispela lain: “Yupela i painim husat?”

Ol i tok: “Mipela i kam bilong painim Jisas bilong Nasaret.”

Jisas i no pret. Em i sanap long ai bilong ol na em i tok: “Em mi tasol.” Ol i kirap nogut long Jisas i tokaut olsem na em i no pret, na ol i surik i go bek na ol i pundaun long graun.

Bel bilong Jisas i stap isi na em i tok: “Mi tokim yupela pinis, em mi tasol. Na sapos yupela i painim mi, orait larim ol dispela man i go.” Taim Jisas na ol aposel i stap yet long dispela rum antap, em i bin beten long Papa bilong em na i tok, “Mi bin was gut long ol na i no gat wanpela bilong ol i lus. Man bilong lus, em wanpela tasol i lus.” Em i mas inapim dispela tok bilong em, olsem na em i tokim ol man long larim ol disaipel bilong em i go.

Orait ol soldia i kirap sanap gen na ol i holimpas Jisas na pasim em long rop. Ol aposel i lukim samting i laik kamap na ol i askim Jisas: “Yu laik bai mipela i kilim ol long bainat?” Ol i tok olsem, long wanem ol i bin karim tupela bainat i kam. Tasol Jisas i no bekim tok yet na Pita i kisim bainat na i paitim wokboi bilong hetpris, nem bilong wokboi em Malkus. Tasol bainat i abrus na i katim yau long han sut bilong dispela wokboi na yau i pundaun.

Jisas i tokim ol aposel: “Lusim dispela pasin nau.” Na em i putim han long yau bilong Malkus na yau i kamap gutpela gen. Orait nau Jisas i laik skulim ol aposel long wanpela bikpela samting, olsem na em i tokim Pita: “Putim bainat bilong yu i go bek long paus bilong en. Olgeta man i pait long bainat, bainat bai i bagarapim ol. Ating yu no save, mi inap askim Papa bilong mi, na em bai i salim planti ensel . . . i kam helpim mi?”

Tasol Jisas i no laik mekim olsem. Em i tok: “Sapos mi mekim olsem, orait tok i stap long buk bilong God em bai i no inap kamap tru.” Olsem na Jisas i larim ol i holimpas em. Na em i tok: “Olsem wanem? Yu ting mi no inap dring long dispela kap Papa i bin givim mi?” Em i wanbel tru long olgeta samting God i laik bai em i mekim!

Nau Jisas i tokim dispela bikpela lain: “Yupela i kisim ol bainat na stik na yupela i kam bilong holimpas mi, olsem yupela i laik holimpas wanpela man bilong pait na stil, a? Olgeta de mi bin sindaun insait long banis bilong tempel na mi skulim ol manmeri. Yupela i no laik holimpas mi long dispela taim? Tasol dispela olgeta samting i kamap bilong inapim tok ol profet i bin raitim.”

Nau ol soldia na kepten bilong ol na ol plisman bilong ol Juda i holimpas Jisas na pasim em long rop. Ol aposel i lukim dispela na ol i lusim Jisas na ranawe. Tasol wanpela yangpela man​—ating em disaipel Mak​—em i stap yet namel long dispela bikpela lain. Ating em i bin i stap long haus Jisas i mekim Pasova long en na em i bihainim dispela bikpela lain i kam. Tasol nau ol i luksave long em na ol i laik holimpas em tu, tasol em i lusim laplap na i ranawe. Matyu 26:​47-56; Mak 14:​43-52; Luk 22:​47-53; Jon 17:12; 18:​3-12.

▪ Bilong wanem Judas i ting em bai painim Jisas long gaden Getsemani?

▪ Jisas i mekim wanem na yumi save em i tingim tru ol aposel?

▪ Pita i laik helpim Jisas na em i kirap mekim wanem? Tasol Jisas i tok wanem long Pita long dispela samting?

▪ Olsem wanem Jisas i kamapim long ples klia olsem em i wanbel tru long olgeta samting God i laik bai em i mekim?

▪ Taim ol aposel i lusim Jisas na ranawe, husat i stap yet? Wanem samting i painim em?

Sapta 119

Ol i Kisim Em i Go Long Anas, na Bihain Long Kaiafas

OL I holimpas Jisas olsem wanpela man nogut na bringim em i go long hetpris bilong bipo, em Anas. Taim Jisas i gat 12-pela krismas na em i givim askim long ol tisa long tempel, Anas i stap hetpris. Bihain sampela pikinini man bilong Anas i kamap hetpris, tasol long dispela yia tambu pikinini bilong em i stap hetpris, em Kaiafas.

Ol i kisim Jisas i go long Anas pastaim, long wanem inap longtaim pinis Anas i gat biknem long lotu bilong ol Juda. Ol i mekim olsem na Hetpris Kaiafas i gat taim bilong singautim olgeta 71 kaunsil i kam bung, na em i singautim tu sampela man bilong sutim tok giaman long Jisas long kot.

Hetpris Anas i askim Jisas long ol disaipel bilong em na long ol tok em i autim. Tasol Jisas i tok: “Mi bin skulim ol manmeri insait long ol haus lotu na insait long banis bilong tempel, long ol ples olgeta Juda i save bung long en. Mi no bin mekim wanpela tok long ples hait. Olsem na bilong wanem yu askim mi? Yu mas askim ol man i bin harim dispela tok. Ol i save long tok mi bin mekim.”

Em i tok olsem na wanpela plisman i sanap klostu i solapim em na i tok: “Olsem wanem tru na yu bekim tok bilong hetpris long dispela kain pasin?”

Jisas i tok: “Sapos mi mekim tok nogut, orait yu mas tokaut klia long dispela . . . Tasol sapos mi mekim gutpela tok, orait watpo yu paitim mi?” Nau Anas i salim Jisas i go long Kaiafas.

Olgeta bikpris na ol hetman na saveman bilong lo na olgeta kaunsil ol i wok long i kam bung long haus bilong Kaiafas. Ol i kalapim lo bilong lotu Juda na ol i wokim dispela kot long apinun klostu tru long taim de Pasova i laik kirap. Tasol dispela i no pasim ol hetman bilong lotu long mekim dispela wok nogut.

Bipo liklik, taim Jisas i kirapim bek Lasarus, ol kaunsil i bin pasim tok long kilim Jisas i dai. Na long hap asde tasol, em Trinde, ol hetman bilong lotu i bin wokim toktok bilong painim rot long trikim Jisas na holimpas em na bai ol i ken kilim em i dai. Em i no kot yet na ol i tingting pinis long kilim em i dai!

Nau ol i wok long painim sampela man bilong sutim tok giaman long Jisas, tasol tok bilong ol i no wankain. Bihain tupela man i kam na i tok: “Mipela i harim em i tok olsem, ‘Bai mi yet mi brukim dispela tempel ol man i bin wokim long han. Na bihain long tripela de bai mi sanapim narapela, tasol bai mi no wokim long han.’ ”

Orait, Kaiafas i tokim Jisas: “Yu no laik bekim wanpela tok, a? Olsem wanem long dispela tok ol i sutim long yu?” Tasol Jisas i pasim maus. Long dispela tok giaman tu, ol man i no mekim wankain tok, na ol kaunsil i sem. Olsem na hetpris i traim narapela rot bilong painim rong long Jisas na bai ol i ken kilim em i dai.

Kaiafas i save, ol Juda i save bel nogut sapos man i tok em i Pikinini Bilong God. Tupela taim bipo ol i bin kros long Jisas long dispela samting na ol i tok, em i man bilong tok bilas long God na em i mas i dai​—wanpela taim ol i kranki na ol i ting em i tok, em i bikpela olsem God. Kaiafas i tingim dispela samting na em i tok: “Mi askim yu long nem bilong God i gat laip, na yu mas tok tru antap nau. Yu dispela man God i makim bilong kisim bek ol manmeri bilong en? Yu Pikinini Bilong God, o nogat?”

Maski ol Juda i ting olsem wanem, Jisas em i Pikinini tru bilong God. Orait, nogut em i pasim maus na bai i olsem em i no dispela man God i makim. Olsem na em i tokaut klia olsem: “Em mi tasol. Na bai yupela i lukim Pikinini Bilong Man i sindaun long han sut bilong God i Gat Olgeta Strong. Na em bai i stap long ol klaut bilong heven na i kam.”

Kaiafas i kirap brukim klos bilong em yet na em i tok: “Em i tok bilas long God. Yumi no ken singautim sampela man moa bilong tokaut long pasin bilong dispela man. Nogat. Nau tasol yupela i harim em i tok bilas long God. Yupela i ting bai yumi mas mekim wanem long em?”

Ol kaunsil i tok: “Em i gat rong, na em i mas i dai.” Na ol i kirap long tok bilas long em na ol i paitim pes bilong em na spet long en. Sampela i pasim ai bilong em na ol i paitim em na i tok: “Yu man God i makim, yu mekim tok profet nau. Dispela man i paitim yu, em husat?” Ol i wokim dispela kot long nait na ol i mekim ol dispela pasin nogut. Matyu 26:​57-68; 26:​3, 4; Mak 14:​53-65; Luk 22:​54, 63-65; Jon 18:​13-24; 11:​45-53; 10:​31-39; Jon 5:​16-18.

▪ Ol i kisim Jisas i go long husat pastaim? Na wanem samting i kamap?

▪ Bihain ol i kisim em i go we? Bilong wanem ol i kisim em i go?

▪ Kaiafas i mekim wanem na em inap kirapim ol kaunsil long tok Jisas i gat rong na em i mas i dai?

▪ Taim ol i wokim kot ol i kalapim wanem lo na mekim wanem ol pasin nogut?

Sapta 120

Pita i Tok Em i No Save Long Jisas

PITA tupela Jon i ranawe wantaim ol narapela aposel taim ol man i kam holim Jisas long Getsemani. Tasol taim ol man i kisim Jisas i go long haus bilong Anas, ating tupela tu i go. Tupela i pret, nogut ol dispela lain i holim ol tu na kilim ol i dai, tasol tupela i wari tru long Bikpela bilong ol, olsem na taim Anas i salim em i go long Hetpris Kaiafas, tupela i stap longwe liklik na bihainim em i go.

Ol i kamap long bikpela haus bilong Kaiafas na Jon inap go insait long banis bilong haus, long wanem hetpris i save long em. Tasol Pita i sanap ausait klostu long dua. Bihain Jon i go tokim meri i bosim dua, na em i bringim Pita i kam insait.

Ples i kol, olsem na ol wokboi bilong hetpris na ol plisman i bin wokim wanpela paia. Pita i go sanap wantaim ol na hatim skin na em i wet i stap bilong lukim ol samting bai kamap long kot bilong Jisas. Nau meri i bosim dua i lukim gut Pita long lait bilong paia na em i tok: “Yu tu yu bin i stap wantaim Jisas bilong Galili.”

Pita i pret na long ai bilong olgeta em i tok, em i no save long Jisas. Em i tok: “Mi no save tru long dispela tok yu mekim.”

Em i tok olsem na em i go sanap klostu long dua, na nau narapela wokmeri i lukim em na em tu i tokim ol man i sanap klostu: “Dispela man i bin i stap wantaim Jisas bilong Nasaret.” Na Pita i tok tru antap na i tok gen olsem: “Mi no save long dispela man.”

Pita i stap yet insait long banis na em i wok long hait long ai bilong ol man. Tulait i no yet na nau wanpela kakaruk i krai na ating Pita i kirap nogut. Em wantaim ol narapela i stap long banis bilong haus ol i stap daunbilo na ol inap lukim ol man insait long haus ol i wokim kot bilong Jisas long wanpela hap bilong haus antap. Ol i lukim narapela narapela man i kam sutim tok long Jisas.

Ol meri i tok Pita i bin stap wantaim Jisas na bihain liklik, inap olsem wanpela aua, ol man i sanap i stap klostu ol i kam tokim Pita: “Tru tumas, yu man bilong lain bilong ol. Nek bilong yu i kamapim yu pinis.” Wanpela em i wanlain bilong dispela man Pita i bin katim yau bilong em, em Malkus, olsem na em i tok: “Ating mi bin lukim yu i stap wantaim [Jisas] long gaden, a?”

Nau Pita i tok strong tru olsem: “Tru antap, mi no save long dispela man.” Na bilong kirapim ol long bilipim tok bilong em, em i tok: “Sapos mi no tok tru, orait God i ken bagarapim mi.”

Em namba 3 taim Pita i tok em i no save long Jisas, na wantu wanpela kakaruk i krai. Jisas i sanap long veranda antap na em i lukluk i kam long Pita. Na Pita i tingim tok Jisas i bin mekim long em sampela aua bipo long rum antap, em i tok: “Taim kakaruk i no krai tupela taim yet, yu bai tok tripela taim olsem yu no save long mi.” Pita i save em i mekim bikpela rong tru, na em i go ausait na em i krai nogut.

Pita i ting em i stap strong tru long spirit, tasol nau 3-pela taim em i tok em i no save long Jisas. Olsem wanem em inap pundaun kwik olsem? Long wanem, em i no save ol dispela hevi bai kamap. Ol man i paulim tok i tru na mekim olsem Jisas i wanpela man nogut tru. Pasin i stret, ol i tok em i kranki. Man i no gat asua, ol i tok em i gat rong. Ol dispela samting i kamap i paulim tingting bilong Pita na em i no tingting stret. Em i save, i stret em i mas i stap gut long Jisas, tasol em i pret long ol man, na em i bel hevi tru. Nogut yumi mekim kain pasin olsem Pita i bin mekim! Matyu 26:​57, 58, 69-75; Mak 14:​30, 53, 54, 66-72; Luk 22:​54-62; Jon 18:​15-18, 25-27.

▪ Olsem wanem Pita tupela Jon inap go insait long banis bilong haus bilong hetpris?

▪ Taim Pita tupela Jon i stap insait long banis, ol man i mekim wanem insait long haus?

▪ Kakaruk i krai hamas taim? Na hamas taim Pita i tok, em i no save long Jisas?

▪ Bilong wanem Pita i tok tru antap na em i tok, “Sapos mi no tok tru, God i ken bagarapim mi”?

▪ Wanem samting i mekim na Pita i tok, em i no save long Jisas?