Sapta 121

Em i Kot Long Kaunsil, na Bihain Long Pailat

TULAIT i laik bruk. Long namba 3 taim Pita i bin tok em i no save long Jisas, na ol kaunsil i pinis long mekim kot giaman bilong ol long Jisas na ol i go nabaut. Tasol long moningtaim tru, long Fraide, ol i bung gen. Dispela taim ol i bung long haus kaunsil. Ating ol i mekim olsem bambai kot ol i bin wokim long nait i ken kamap olsem stretpela kot. Taim ol man i kisim Jisas i kam, ol kaunsil i tok gen, olsem: “Yu tokim mipela, yu dispela man God i makim bilong kisim bek ol manmeri bilong en, o nogat?”

Jisas i tok: “Sapos mi tokim yupela, bai yupela i no bilip. Na sapos mi askim yupela long sampela tok, bai yupela i no bekim tok bilong mi.” Tasol Jisas i no pret long ol​—em i tokim ol stret olsem: “Tasol nau na long olgeta taim bihain Pikinini Bilong Man bai i sindaun long han sut bilong God I Gat Olgeta Strong.”

Orait, olgeta kaunsil i tok: “Olsem na yu yet yu Pikinini Bilong God, a?”

Jisas i bekim tok olsem: “Yupela yet i tok. Em mi tasol.”

Jisas i tok olsem, na long ol birua i olsem em i tok bilas long God. Ol i tok: “Yumi no ken singautim ol man i kam bilong tokaut long pasin bilong dispela man. Maus bilong em yet i mekim dispela tok, na yumi harim pinis.” Olsem na ol i pasim em long baklain na kisim em i go long namba wan gavman, em Pailat.

Man bilong kamapim Jisas long ol birua, em Judas, em i lukim ol i daunim Jisas long kot na nau em i pilim rong bilong em. Em i go bekim 30 mani silva long ol bikpris na ol hetman. Em i tok: “Mi bin mekim sin. Dispela man mi givim long han bilong yupela, em i no bin mekim rong. Na yupela bai i kilim em i dai.”

Ol i no bel sori liklik. Ol i tok: “Em i no samting bilong mipela. Em wari bilong yu tasol.” Olsem na Judas i tromoi dispela mani insait long banis bilong tempel na em i go bilong hangamapim em yet. Tasol han bilong diwai em i pasim baklain long en i bruk, na skin bilong em i go pundaun long ol bikpela ston na i bruk olgeta.

Ol bikpris i tingting planti long dispela mani. Ol i tok: “Em i pe bilong kilim man i dai. Yumi no ken putim wantaim mani bilong tempel.” Olsem na ol i pasim tok, na long dispela mani ol i baim hap graun long man bilong wokim sospen graun. Ol i laik bai dispela graun i stap ples matmat bilong ol man bilong ol longwe ples. Olsem na dispela hap graun i kisim nem, “Graun Bilong Blut.”

San i no kam antap gut yet na ol i kisim Jisas i go long haus bilong namba wan gavman. Tasol ol Juda i go wantaim em ol i no laik go insait long haus, long wanem ol i ting, sapos ol i go bung wantaim ol man bilong ol narapela lain, bai ol i kamap doti long ai bilong God. Olsem na Pailat i kam ausait. Em i tok: “Yupela i laik kotim dispela man long wanem samting?”

Ol i tok: “Sapos em i no man bilong mekim pasin nogut, orait mipela i no inap bringim em i kam long yu.”

Pailat i no laik insait long dispela kros, olsem na em i tok: “Yupela kisim em i go na kotim em long lo bilong yupela yet.”

Tasol ol Juda i laik kilim Jisas i dai, olsem na ol i tok: “I tambu long mipela i kilim wanpela man i dai.” Na sapos ol i kilim Jisas i dai long taim bilong bikpela bung bilong Pasova, bai bikpela kros pait i kamap, long wanem planti manmeri i save tingim Jisas i gutpela man. Tasol sapos ol inap kirapim ol Rom long ting olsem Jisas i bikhet long gavman na ol Rom i kilim em i dai, bai ol yet i no gat asua long ai bilong ol manmeri.

Olsem na ol dispela hetman bilong lotu i no tokim Pailat long kot ol i wokim pinis, em ol i tok Jisas i tok bilas long God na em i mas i dai. Nau ol i sutim tok long em long 3-pela narapela samting. Ol i tok: “Dispela man [1] i paulim pasin bilong ol manmeri bilong mipela. [2] Em i tambuim mipela long givim takis long Sisar. Na [3] em i save tok olsem em yet em dispela king God i makim.”

Pailat i tingting planti, long wanem ol i tok Jisas i save tok em yet i wanpela king. Olsem na em i go bek insait long haus, na em i singautim Jisas i kam long em. Em i askim Jisas: “Yu king bilong ol Juda, a?” I olsem em i laik tok, ‘Yu brukim lo bilong gavman na yu bikhet long Sisar na yu tok yu yet yu king, a?’

Jisas i laik save, Pailat i bin harim wanem ol tok long em, olsem na em i askim Pailat: “Yu yet yu tingim na yu mekim dispela tok, o ol arapela man i bin tokim yu long mi?”

Pailat i tok olsem em i no save long Jisas, tasol em i laik save wanem samting tru Jisas i bin mekim. Em i tok: “Olsem wanem? Mi wanpela Juda, a? Lain bilong yu yet wantaim ol bikpris ol i bringim yu i kam long mi. Yu bin mekim wanem?”

Jisas i no haitim tok liklik long dispela askim long em i wanpela king o nogat. Tasol ating Pailat i kirap nogut long tok nau Jisas i bekim long em. Luk 22:66–23:3; Matyu 27:​1-11; Mak 15:1; Jon 18:​28-35; Aposel 1:​16-20.

▪ Long moningtaim tru ol kaunsil i bung gen bilong mekim wanem?

▪ Judas i dai olsem wanem? Ol i mekim wanem long dispela 30 mani silva?

▪ Bilong wanem ol Juda i laik kirapim ol Rom long kilim i dai Jisas na bai ol yet i no ken mekim?

▪ Ol Juda i sutim wanem ol tok long Jisas?

Sapta 122

Lusim Pailat i Go Long Herot na Kam Bek Gen Long Pailat

TRU Jisas i no haitim tok long Pailat olsem em i wanpela king, tasol em i laik bai Pailat i save, Kingdom bilong em i no ken bagarapim gavman bilong Rom, olsem na em i tok: “Kingdom bilong mi em i no bilong dispela graun. Sapos kingdom bilong mi em i bilong dispela graun, orait inap ol wokman bilong mi i pait, na i no gat wanpela man inap putim mi long han bilong ol Juda. Tasol kingdom bilong mi em i no bilong dispela graun.” Em nau, 3-pela taim Jisas i tok em i gat wanpela Kingdom, tasol i no bilong dispela graun.

Tasol Pailat i askim em gen: “Olsem na i tru yu wanpela king, a?” I olsem em i laik tok, ‘Tru, kingdom bilong yu i no bilong dispela graun, tasol yu wanpela king, a?’

Jisas i tok olsem dispela tingting bilong Pailat i stret. Jisas i tok: “Dispela tok bilong king, em tok bilong yu yet. Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim. Na olgeta man i bihainim tok tru, ol i save harim tok bilong mi.”

Tru tumas, Jisas i bin kam long graun bilong autim “tok tru,” em tok i tru bilong Kingdom bilong em. Jisas i redi long i stap gut long dispela tok i tru, maski em i mas i dai. Pailat i tok: “Tok tru, em wanem samting tru?” Tasol em i no wet long harim bekim. Ol tok em i harim pinis em inap long em i skelim pasin bilong Jisas.

Em i go ausait, na Jisas tu i go na em i sanap wantaim Pailat, na Pailat i tokim ol bikpris na ol manmeri: “Mi no painim wanpela rong long dispela man.”

Ol manmeri i kros long dispela tok na ol i tok strong moa olsem: “Em i save go nabaut long olgeta hap bilong Judia, stat long distrik Galili na i kam inap long taun bilong yumi, na em i wok long skulim ol manmeri na kirapim bel bilong ol.”

Ol i strong tumas long biruaim Jisas na ating Pailat i kirap nogut long dispela. Ol bikpris na hetman i singaut yet na Pailat i askim Jisas: “Ating yu no harim olgeta dispela toktok ol i sutim long yu?” Jisas i no bekim wanpela tok. Em i stap isi, na Pailat i tingting planti.

Bihain Pailat i save olsem Jisas em i man bilong Galili, em hap graun Herot Antipas (pikinini bilong King Herot) i bosim, na dispela Herot i kam i stap long Jerusalem bilong lukim Pasova. Olsem na Pailat i salim Jisas i go long Herot bambai em yet i no gat wok long mekim kot long Jisas. Dispela Herot i bin kilim i dai Jon Bilong Baptais, na bihain, taim em i harim stori bilong ol mirakel Jisas i wokim, em i pret na em i ting olsem Jisas em Jon Bilong Baptais i kirap bek long matmat.

Nau em i amamas tumas long lukim Jisas. I no olsem em i laik helpim Jisas, o em i laik save ol tok ol man i sutim long Jisas i stret o nogat. Em i laik save tasol long Jisas, na em i laik lukim Jisas i wokim wanpela mirakel.

Tasol Jisas i no mekim wanpela samting, na taim Herot i givim ol askim long em, em i no bekim wanpela tok. Herot i les, na em wantaim ol soldia bilong em i rabisim Jisas. Ol i kisim wanpela naispela klos na pasim long em, na ol i tok bilas long em. Na ol i salim em i go bek long Pailat. Bipo Herot i save birua wantaim Pailat, tasol nau long dispela taim tupela i kamap pren.

Jisas i kam bek na Pailat i singautim ol bikpris na ol hetman bilong ol Juda na ol manmeri tu, na em i tokim ol: “Yupela i bin kisim dispela man i kam long mi, na yupela i tok, em i paulim pasin bilong ol manmeri. Na long taim yupela i stap, mi bin askim em gut long ol dispela samting. Orait harim. Mi no painim wanpela rong long dispela man. Mi no ting em i bin mekim wanpela bilong ol dispela samting yupela i kotim em long en. Na Herot tu i gat wankain tingting, na em i salim dispela man i kam bek long yumi. Harim. Dispela man i no bin mekim wanpela rong inap long mi ken tok long em i mas i dai. Olsem na bai mi wipim em na lusim em i go.”

Tupela taim Pailat i tokaut olsem Jisas i no gat rong. Em i laik lusim Jisas i go, long wanem em i save i no gat as na ol pris i kotim Jisas​—ol i bel nogut long em na ol i mekim. Narapela samting tu i kamap na Pailat i laik tru long lusim Jisas i go. Em i sindaun i stap long sia bilong jas na meri bilong em i salim tok i kam, olsem: “Yu no ken mekim wanpela samting long dispela stretpela man. Long nait mi lukim em long wanpela driman [ating God i as bilong en], na mi pilim bikpela hevi.”

Pailat i save Jisas i no gat rong na em i laik lusim Jisas i go, tasol em i ken mekim olsem wanem? Jon 18:​36-38; Luk 23:​4-16; Matyu 27:​12-14, 18, 19; 14:​1, 2; Mak 15:​2-5.

▪ Askim bilong Pailat long Jisas em i wanpela king o nogat, em Jisas i bekim olsem wanem?

▪ Jisas i kam long graun bilong autim wanem “tok tru”?

▪ Pailat i mekim kot long Jisas na em i tok wanem? Orait, ol manmeri i mekim wanem? Na Pailat i mekim wanem long Jisas?

▪ Herot Antipas em husat? Bilong wanem em i amamas tumas long lukim Jisas? Em i mekim wanem long Jisas?

▪ Bilong wanem Pailat i laik lusim Jisas i go?

Sapta 123

‘Lukim! Em Hia Dispela Man!’

PAILAT i pilim tru pasin bilong Jisas na em i save Jisas i no gat rong, olsem na em i bihainim narapela rot bilong lusim em i go. Em i tokim ol manmeri: “Yupela i save long . . . olgeta yia long dispela bikpela de bilong lotu, mi save larim yupela i makim wanpela man i ken lusim kalabus.”

Barabas em man bilong kilim man i dai na em i stap kalabus long dispela taim, olsem na Pailat i tok: ‘Yupela i laik bai mi lusim husat i go? Bai mi lusim Barabas, o bai mi lusim dispela Jisas ol i tok God i bin salim em i kam?’

Ol bikpris i kirapim ol manmeri long tok, Pailat i mas lusim Barabas i go, na kilim i dai Jisas. Tasol Pailat i wok yet long painim rot bilong lusim Jisas i go, olsem na em i askim ol gen: “Yupela i laik bai mi lusim husat bilong dispela tupela man?”

Ol i singaut strong na i tok: “Barabas.”

Pailat i bel hevi na em i tok: “Na yupela i laik bai mi mekim wanem long dispela Jisas ol i tok God i bin salim em i kam?”

Olgeta wantaim i singaut strong olsem: “Nilim em long diwai.”

Pailat i save ol i laik kilim i dai wanpela man i no gat rong, olsem na em i tokim ol: “Bilong wanem? Em i mekim wanem rong? Mi no painim wanpela rong long em inap long mi ken tok long em i mas i dai. Olsem na bai mi wipim em na lusim em i go.”

Tasol ol manmeri i no laik, na ol hetman bilong lotu i kirapim ol long singaut strong moa olsem: “Nilim em long diwai.” Ol pris i kirapim tru bel bilong ol manmeri na ol i laik bai Jisas i dai. Tasol 5-pela de bipo ating sampela i bin bung wantaim ol narapela man na amamas long Jisas i kam insait long Jerusalem olsem King! Sapos ol disaipel i stap long taim Jisas i kot, ol i no stap ples klia na ol i no mekim wanpela tok.

Pailat i save nau, ol manmeri bai i no inap harim tok bilong em, na bikpela pait i laik kamap. Olsem na em i kisim sampela wara na wasim han bilong em long ai bilong ol, na em i tok: “I no asua bilong mi sapos dispela man i dai. Em i samting bilong yupela tasol.” Na ol i bekim tok olsem: “Dispela asua i ken i stap long mipela na long ol pikinini bilong mipela.”

Olsem na Pailat i laik amamasim ol na em i lusim Barabas i go, maski em i save dispela samting i no stret. Na em i tokim ol soldia long wipim Jisas. Dispela tok “wipim” i makim wanpela pasin bilong ol Rom long paitim man bilong givim strafe long em. Wanpela buk (The Journal of the American Medical Association) i stori long dispela pasin olsem:

“Ol i save paitim man long planti hap let ol i pasim wantaim long wanpela arere bilong en, . . . Na long ol dispela hap let i gat ol liklik bal ain o ol liklik hap bun bilong sipsip i sap tru. . . . Taim ol soldia bilong Rom i paitim paitim baksait bilong man long dispela samting, ol liklik bal ain i bagarapim skin, na ol hap let na hap bun bilong sipsip i katkatim skin i go insait. Ol i paitim paitim em na katim skin nogut tru i go insait inap long mit i pas long bun, na nau ol hap mit i bruk bruk na blut i kapsait.”

Ol i paitim Jisas nogut tru olsem, na bihain ol i kisim em i go insait long haus gavman, na ol i singautim olgeta soldia i kam. Na ol soldia i mekim sampela samting moa i bagarapim skin bilong em​—ol i kisim ol rop i gat nil na wokim samting olsem hat bilong king na ol i pasim strong long het bilong em. Na ol i putim wanpela stik long han sut bilong em, na putim wanpela retpela klos long em, olsem klos bilong king. Na ol i tok bilas long em olsem: “Gude, king bilong ol Juda.” Na ol i spet long em na paitim pes bilong em. Ol i kisim stik long han bilong em na paitim het bilong em na ol nil bilong rop ol i pasim long het i go insait moa long skin.

Pailat i lukim gutpela pasin isi na strong bilong Jisas long karim ol hevi ol i putim long em na Pailat i kirap nogut. Olsem na wanpela taim moa em i wok long kirapim ol manmeri long lusim Jisas i go. Em i tokim ol: “Lukim, mi bai bringim em i kam ausait long yupela, na bai yupela i ken save, mi no painim wanpela rong long em.” Ating em i ting, sapos ol manmeri i lukim bikpela pen Jisas i karim bai ol i sori long em. Orait, Jisas i kam sanap long ai bilong ol. Dispela hat ol i wokim long rop i gat nil i stap yet long het bilong em, na dispela retpela klos tu i stap long em. Blut i ran i kam daun long pes bilong em na ol inap lukim olsem em i gat bikpela pen. Nau Pailat i tok: “Lukim. Em hia dispela man.”

Skin bilong Jisas i bagarap, tasol dispela man i winim tru olgeta narapela man​—em i nambawan man tru i bin i stap long graun! Gutpela pasin isi na strong bilong Jisas i kamapim klia biknem bilong em. Pailat i pilim dispela samting, na em i sori tu long Jisas, olsem na em i mekim dispela tok. Jon 18:39–19:5; Matyu 27:​15-17, 20-30; Mak 15:​6-19; Luk 23:​18-25.

▪ Pailat i mekim wanem bilong kirapim ol manmeri long lusim Jisas i go?

▪ Pailat i mekim wanem bilong makim olsem em i no gat asua long kilim Jisas i dai?

▪ Pasin bilong “wipim” man em wanem kain pasin?

▪ Ol i paitim Jisas pinis na bihain ol i mekim wanem bilong tok bilas long em?

▪ Pailat i mekim wanem samting moa bilong kirapim ol long lusim Jisas i go?

Sapta 124

Pailat i Givim Jisas Long Han Bilong Ol

PAILAT i lukim Jisas i stap isi, maski em i gat bikpela pen tru, na em i traim gen long lusim Jisas i go, tasol ol bikpris i kros moa. Ol i strong long bihainim tingting nogut bilong ol na ol i singaut olsem: “Nilim em long diwai.”

Pailat i tok: “Yupela yet kisim em na nilim em long diwai.” (Ol inap mekim olsem sapos man i mekim bikpela rong long ol samting bilong lotu.) Nau long namba 5 taim samting Pailat i tok, “Mi no painim wanpela rong long em.”

Ol Juda i bin kotim Jisas long mekim rong long gavman, tasol tok bilong ol i popaia, olsem na nau ol i laik kotim em gen long samting bilong lotu, olsem ol i bin mekim long Kaunsil, na ol i tok em i bin tok bilas long God. Ol i tok: “Mipela i gat wanpela lo, na dispela lo i tok, dispela man i mas i dai. Long wanem, em i bin tok olsem, ‘Mi Pikinini Bilong God.’ ”

Dispela tok ol i kotim Jisas long en em i nupela tok long Pailat, na nau Pailat i pret moa yet. Nau em i save, Jisas i no wanpela man nating, olsem driman bilong meri bilong em na strongpela pasin bilong Jisas i makim. Orait, olsem wanem long dispela tok, olsem Jisas em i “Pikinini Bilong God”? Pailat i save Jisas i bilong Galili, tasol em i laik save, Jisas i bin i stap bipo tu, o olsem wanem? Olsem na Pailat i kisim em i go insait gen long haus na i askim em: “Yu bilong wanem ples?”

Tasol Jisas i no bekim tok. Bipo em i tokim pinis Pailat em i wanpela king, na Kingdom bilong em i no bilong dispela graun, olsem na nau em i no mekim sampela tok moa. Pailat i kros long dispela na em i tok: “Olsem wanem? Yu no laik bekim tok bilong mi, a? Mi gat strong inap long lusim yu, na mi gat strong inap long nilim yu long diwai . . . Ating yu no save long dispela?”

Long pasin daun Jisas i tokim Pailat: “Sapos God . . . i no bin givim strong long yu, orait yu bai i no gat strong.” Em i toktok long God yet i larim ol man olsem Pailat hia i bosim ol samting bilong graun. Na em i tok: “Man i bin putim mi long han bilong yu, sin bilong dispela man em i winim sin bilong yu.” Tru tumas, Hetpris Kaiafas wantaim lain bilong em na Judas Iskariot i gat bikpela rong moa, winim rong bilong Pailat long mekim nogut long Jisas.

Pailat i pilim moa yet strongpela pasin bilong Jisas na em i pret, nogut Jisas i pikinini tru bilong God. Olsem na Pailat i traim gen long lusim Jisas i go, tasol ol Juda i no laik. Ol i sutim gen tok long Jisas long samting bilong gavman, na ol i laik pretim Pailat tu, na ol i tok: “Sapos yu lusim dispela man i go, orait yu no pren bilong Sisar. Man i tok long em yet i king, em i birua bilong Sisar.”

Tasol Pailat i kisim Jisas i go ausait na em i tokim ol gen: “Lukim king bilong yupela.”

Ol i singaut olsem: “Rausim em! Rausim em i go! Nilim em long diwai.”

Pailat i askim ol: “Yupela laik bai mi nilim king bilong yupela long diwai [pos]?”

Ol Rom i bosim ol Juda, na ol Juda i bel nogut long dispela, tasol long pasin bilong tupela maus ol bikpris i tok, “Mipela i no gat narapela king. Sisar wanpela tasol! ”

Pailat i tingim biknem na namba em i holim, olsem na em i harim tok bilong ol na em i givim Jisas long han bilong ol. Ol soldia i rausim retpela klos long em na ol i putim klos bilong em yet long em, na ol i kisim em i go bilong nilim em long diwai, na em yet i mas karim dispela diwai i go.

Nau em Fraide Nisan 14, na ating i no belo yet. Jisas i bin kirap long Fonde long moningtaim tru na em i no slip inap long nau, na planti pen na hevi i bin painim em, olsem na strong bilong em i pinis na em i no inap karim moa dispela diwai​—em i hevi tumas. Olsem na ol i subim wanpela man long karim, em Saimon, bilong taun Sairini long Afrika. Planti manmeri i bihainim ol, na ol meri i paitim bros bilong ol na ol i krai na sori long Jisas.

Jisas i tanim na i tokim ol: “Yupela meri bilong Jerusalem, yupela i no ken krai long mi. Mobeta yupela i krai long yupela yet na long ol pikinini bilong yupela. Harim. Wanpela taim bai i kamap na ol bai i tok olsem, ‘Ol meri i no inap karim pikinini, na ol meri i no bin karim pikinini, na ol meri i no bin givim susu long pikinini, em ol i ken amamas.’ . . . Sapos nau ol i mekim dispela kain pasin long diwai i gat wara, orait ol bai i mekim wanem kain pasin long diwai i drai pinis?”

Em i tok piksa long diwai i makim lain Juda. Diwai i gat hap wara i stap yet long en, long wanem, Jisas wantaim lain bilong em i stap; tasol bihain ol i no ken i stap moa namel long ol, na i olsem diwai i drai pinis​—long ai bilong God bai i olsem lain Juda i dai pinis. Jehova bai larim ami bilong Rom i bagarapim ol, na long dispela taim ol bai krai nogut tru! Jon 19:​6-17; 18:31; Luk 23:​24-31; Matyu 27:​31, 32; Mak 15:​20, 21.

▪ Taim Pailat i no bilipim tumas tok ol bikpris i sutim long Jisas long samting bilong gavman, nau ol i sutim wanem narapela tok long Jisas?

▪ Bilong wanem nau Pailat i pret moa yet?

▪ Husat i gat bikpela asua moa long ol samting i bin painim Jisas?

▪ Ol bikpris i tok wanem long Pailat bilong kirapim em long givim Jisas long han bilong ol soldia bilong kilim em i dai?

▪ Jisas i tok wanem long ol meri i krai long em? Em i tok piksa long diwai i gat “wara,” tasol bihain diwai i “drai,” na dispela i makim wanem samting?

Sapta 125

Bikpela Pen Tru Long Diwai

OL I bringim tupela stilman tu i go wantaim Jisas bilong kilim ol i dai wantaim em. Ol i wokabaut i go ausait liklik long taun na i kamap long wanpela ples ol i kolim Golgota, o Bun Bilong Het.

Ol soldia i rausim klos bilong 3-pela na givim wain long ol bilong dring, i gat wanpela kain marasin olsem drak long en. Ating ol meri bilong Jerusalem i save wokim dispela kain dring bilong kilim pen, na ol Rom i orait long givim long ol kalabus ol i nilim long diwai. Tasol taim ol i laik givim long Jisas, em i no laik dring. Bilong wanem? Em i laik bai tingting bilong em i klia na em i ken tingting gut na i stap strong long dispela bikpela traim tru.

Nau ol i slipim Jisas long dispela diwai na ol i taitim tupela han bilong em i go antap long het bilong em. Ol soldia i paitim ol traipela nil i go insait long han na lek bilong em na nilim i go long diwai. Em i kisim bikpela pen tru long dispela. Ol i wok long sanapim diwai na nau skin bilong Jisas i hangamap long nil na hevi bilong en i brukim nogut skin long han lek na pen bilong en i bikpela moa yet. Tasol Jisas i no tok long bekim nogut long ol soldia, nogat. Em i beten olsem: “Papa, yu ken lusim sin bilong ol. Ol i no save long dispela samting ol i mekim.”

Pailat i tok na ol i pasim wanpela toksave long diwai antap long het bilong Jisas, olsem: “Jisas bilong Nasaret, king bilong ol Juda.” Ating Pailat i raitim dispela tok long wanem em i laikim Jisas na i laik litimapim nem bilong em, na tu, em i bel nogut tru long ol pris Juda, long wanem ol i subim em long putim Jisas long han bilong ol soldia bilong kilim em i dai. Em i laik bai olgeta man i ken kaunim dispela toksave, olsem na em i tok long ol i mas raitim long 3-pela tok ples, em tok Hibru na tok Rom na tok Grik.

Ol bikpris, em Kaiafas wantaim Anas tu, ol i kirap nogut long dispela rait. Ol i amamas long lukim Jisas i hangamap long diwai​—ol i ting ol yet i win na Jisas i lus. Olsem na ol i bel nogut na tokim Pailat: “Yu no ken raitim olsem, ‘King bilong ol Juda.’ Nogat. Yu mas raitim tok olsem, ‘Dispela man i bin tok, “Mi king bilong ol Juda.” ’ ” Tasol Pailat i belhat long em i bin i stap olsem boi bilong ol dispela bikpris bilong kamapim laik bilong ol, olsem na em i tokim ol: “Maski. Tok mi raitim pinis em i mas i stap.”

Orait nau ol bikpris wantaim bikpela lain manmeri ol i bung long ples bilong kilim i dai Jisas. Ol pris i tok, dispela rait i stap long diwai i no stret. Ol i kamapim gen dispela tok giaman ol i bin sutim long Jisas taim em i bin kot long ol kaunsil. Ol man i wokabaut i go i kam ol i harim dispela tok na ol tu i kirap tok bilas long Jisas. Ol i tok: “Yu man bilong brukim tempel na sanapim gen long tripela de tasol, yu ken helpim yu yet. Sapos i tru yu Pikinini Bilong God, orait lusim diwai . . . na kam daun.”

Ol bikpris na saveman bilong lo i tok bilas long em olsem: “Em i bin helpim ol arapela man, tasol em i no inap helpim em yet. Em i king bilong Israel. Orait em i ken lusim diwai . . . na i kam daun, na bai yumi bilip long em. Em i . . . tok, ‘Mi Pikinini Bilong God.’ Orait, sapos God i laikim em, God i ken helpim em nau.”

Dispela i kirapim ol soldia na ol tu i tok bilas long Jisas. Nek bilong Jisas i drai, olsem na ol i mekim olsem ol i laik givim wain long em bilong dring, na ating ol i holim longwe liklik long maus bilong em na bai em i no inap kisim. Ol i tok: “Sapos i tru yu king bilong ol Juda, orait yu ken helpim yu yet.” Na tupela stilman i hangamap long han sut na han kais bilong Jisas, ol tu i kirap tok bilas long em! Olaman! Jisas i winim tru olgeta narapela man i bin i stap long graun, na em i bin helpim God Jehova long wokim olgeta samting, tasol ol dispela man i tok bilas nogut tru long em!

Ol soldia i pilai satu bilong makim wanem man bai kisim ol klos bilong Jisas. Tasol siot bilong Jisas i gutpela tru​—ol i bin wokim long wanpela laplap tasol na ol i no bin katim na samapim. Olsem na ol soldia i tok: “Yumi no ken brukim dispela siot. Nogat. Yumi mas pilai satu bilong makim wanem man bai i kisim.” Taim ol i mekim olsem, ol inapim wanpela tok i stap long buk bilong God i tok: “Ol i tilim klos bilong mi, na . . . ol i pilai satu bilong makim man i ken kisim saket bilong mi.”

Nau wanpela bilong dispela tupela stilman i kirap bilip olsem Jisas em i wanpela king. Olsem na em i krosim poroman bilong em na i tok: “Yu kisim wankain hevi olsem dispela man, na yu no pret long God, a? Ol i kilim mitupela i dai, em ol i mekim stretpela pasin . . . Tasol dispela man hia em i no bin mekim wanpela rong.” Na em i tokim Jisas: “Taim yu kamap king, yu ken tingting long mi.”

Jisas i tokim em, ‘Bai yu stap wantaim mi long Paradais.’ Jisas bai truim dispela tok promis taim em i stap King long heven na bosim graun. Jisas bai i kirapim bek dispela stilman i bin tanim bel, na em i ken i stap long dispela Paradais long graun. Ol man i abrusim bagarap long Armagedon na ol poroman bilong ol bai ol i kisim gutpela wok bilong kamapim dispela Paradais. Matyu 27: 33-44; Mak 15:​22-32; Luk 23:​27, 32-43; Jon 19:​17-24.

▪ Bilong wanem Jisas i no laik dring wain i gat marasin long en?

▪ Ating i gat wanem as na Pailat i putim wanpela tok long diwai bilong Jisas? Wanem tok i kamap namel long Pailat na ol bikpris long dispela?

▪ Taim Jisas i hangamap long diwai, husat moa ol i tok bilas long em na ol i tok wanem? Ating wanem samting i kirapim ol long mekim olsem?

▪ Ol soldia i mekim wanem long ol klos bilong Jisas na dispela inapim wanpela tok profet?

▪ Wanpela stilman i tanim bel na em i tok wanem? Olsem wanem Jisas bai truim tok promis em i mekim long dispela man?

Sapta 126

“Tru Tumas, Dispela Man Em i Pikinini Bilong God”

JISAS i hangamap liklik taim na long belo bikpela tudak i kamap na i stap inap 3-pela aua. Tasol i no olsem mun i pasim ai bilong san na tudak i kamap, nogat; long wanem, dispela i save kamap taim mun i nupela. Tasol nau em taim bilong Pasova, na ai bilong mun i bikpela. Na tu, taim mun i pasim ai bilong san, tudak i save stap inap sampela minit tasol. Olsem na dispela bikpela tudak nau i kamap, em God i as bilong en! Ol man i tok bilas long Jisas, ating nau ol i pasim maus na ol i no tok bilas moa long em.

Sapos dispela tudak i kamap paslain long taim stilman i krosim poroman na i tokim Jisas long tingim em, ating dispela tudak i wanpela as na em i tanim bel. Na ating long dispela taim bilong tudak yet, 4-pela meri i go sanap klostu long Jisas, em Maria, mama bilong Jisas, na sista bilong em Salome, na Maria bilong Makdala, na Maria, em mama bilong aposel Jems namba 2. Na aposel Jon, em dispela man Jisas i laikim tumas, em tu i stap wantaim ol.

Bel bilong mama bilong Jisas i bagarap stret taim em i lukim pikinini bilong em i hangamap long diwai! Mama i bin givim susu long em taim em i liklik pikinini yet, na i lukautim em gut na mekim bikpela long em, na nau em i karim bikpela pen tru! Tasol Jisas i no tingim bikpela pen bilong em​—em i tingim mama bilong em. Em i makim Jon na tokim mama: “Meri, dispela man em i pikinini bilong yu.” Na em i tokim Jon: “Dispela meri em i mama bilong yu.”

Ating long dispela taim man bilong Maria i dai pinis na em i stap wanpis. Olsem na Jisas i putim em long han bilong Jon na bai Jon i ken lukautim em. Em i mekim olsem, long wanem, long dispela taim ol narapela pikinini man bilong Maria ol i no bilip yet long Jisas. Olsem na Jisas i olsem gutpela piksa​—em i laik helpim mama long samting bilong skin na bilong spirit.

Long 3 klok samting long apinun, Jisas i tok: “Nek bilong mi i drai.” Nau em i pilim olsem Papa i no was moa long em​—em i laik bai Jisas i ken kamapim klia olsem em i stap gut long Papa i go inap long em i dai. Olsem na Jisas i singaut strong olsem: “God bilong mi, God bilong mi, bilong wanem yu lusim mi?” Sampela man i sanap klostu, ol i harim na ol i tok: “Em i singautim Elaija.” Kwiktaim wanpela man i ran i go givim wain long Jisas bilong dring. Tasol sampela i tok: “Wet, yumi lukim pastaim. Ating bai Elaija i kam kisim em i kam daun, o nogat?”

Taim Jisas i dring dispela wain, em i singaut strong olsem: “Em i pinis nau.” Tru yet, em i mekim pinis olgeta wok Papa bilong em i salim em i kam bilong mekim. Nau em i tok: “Papa, mi putim spirit bilong mi long han bilong yu.” Em nau, Jisas i putim strong bilong laip bilong em long han bilong God​—em i bilip tru olsem God bai givim laip gen long em. Nau em i daunim het na em i dai.

Taim win bilong Jisas i pinis, long dispela taim stret wanpela bikpela guria i kamap na ol bikpela ston i bruk. Dispela guria i strong tru, olsem na ol matmat ausait long Jerusalem i op na guria i tromoi skin bilong ol man i dai pinis i kam antap. Ol man i wokabaut long dispela hap ol i lukim skin bilong ol dispela man i dai pinis i stap ples klia na ol i go insait long Jerusalem na i tokaut long dispela samting ol i lukim.

Na tu, stret long taim Jisas i dai, bikpela laplap i hangamap insait long tempel namel long Rum Tambu na Rum Tambu Tru em i bruk long antap i go inap long daunbilo bilong en na i kamap tupela hap. Dispela laplap i gat gutpela bilas tru long en na i bikpela moa​—ating longpela bilong en inap olsem 18 mita, na em i strongpela laplap tru! Dispela bikpela mirakel i kamapim klia belhat bilong God long ol dispela lain i bin kilim i dai Pikinini bilong em, na i makim tu olsem i dai bilong Jisas i opim rot bilong i go insait long ples em Rum Tambu Tru i makim, olsem heven.

Taim graun i guria na ol man i lukim ol samting i kamap, ol i pret nogut tru. Kepten bilong ol soldia i bin nilim Jisas long diwai em i litimapim nem bilong God na em i tok: “Tru tumas, dispela man em i Pikinini Bilong God.” Ating em i bin i stap taim Jisas i kot long Pailat na tok i kamap long em i Pikinini bilong God o nogat. Orait nau dispela man i bilip tru olsem Jisas em i Pikinini bilong God, na em i nambawan man tru i winim ol narapela man.

Sampela manmeri moa i pilim tru ol dispela bikpela mirakel i bin kamap, na ol i wokabaut i go bek long haus bilong ol na paitim bros bilong ol bilong makim olsem bel bilong ol i bagarap stret na ol i sem. Sampela meri i save bihainim Jisas ol i sanap longwe liklik na i lukluk i stap, na bel bilong ol i pilim tru ol dispela bikpela samting i bin kamap. Aposel Jon tu i stap wantaim ol. Matyu 27:​45-56; Mak 15:​33-41; Luk 23:​44-49; 2:​34, 35; Jon 19:​25-30.

▪ Olsem wanem yumi save, i no olsem mun i pasim ai bilong san na dispela bikpela tudak i kamap na i stap inap 3-pela aua?

▪ Klostu long taim Jisas i dai, em i mekim wanem na em i stap olsem gutpela piksa bilong ol manmeri em papamama bilong ol i lapun pinis?

▪ Wanem 4-pela laspela tok Jisas i mekim na nau em i dai?

▪ Dispela bikpela guria i mekim wanem? Taim bikpela laplap insait long haus lotu i bruk i go tupela hap, dispela i makim wanem samting?

▪ Taim Jisas i dai na ol mirakel i kamap, dispela i mekim wanem long kepten bilong ol soldia?

Sapta 127

Ol i Planim Em long Fraide, Tasol Matmat i Stap Nating Long Sande

NAU em Fraide long apinun. De Sabat bilong Nisan 15 bai kirap taim san i go daun. Jisas i dai pinis na skin bilong em i hangamap i stap long diwai, tasol tupela stilman i stap laip yet. Nau em taim bilong redi long de Sabat, olsem redim kaikai na mekim ol narapela wok ol i mas mekim, long wanem, ol i no inap mekim wok long de Sabat.

Dispela de Sabat i laik kirap, olsem Nisan 15, em i narapela kain​—em i “bikpela” de Sabat, long wanem, em i wanpela de Sabat olsem i save kamap long olgeta wik (long namba 7 de bilong wik), na tu em i wanpela de Sabat, long wanem, em i namba wan de bilong Ol Bikpela De Bilong Bret I No Gat Yis (na maski namba wan de bilong dispela bung i kamap long wanem de bilong wik, em i wanpela de Sabat).

Lo bilong God i tok, no ken larim skin bilong man i hangamap i stap long diwai i go inap tulait, olsem na ol Juda i askim Pailat long brukim lek bilong 3-pela man i hangamap na bai ol i ken i dai hariap. Ol soldia i mekim olsem long tupela stilman, tasol ol i lukim olsem Jisas i dai pinis, na ol i no brukim lek bilong em. Dispela i truim wanpela tok bilong Baibel i tok: “Bai ol i no brukim wanpela bun bilong en.”

Tasol ol soldia i laik save, Jisas i dai tru o nogat, olsem na wanpela i kisim spia na sutim banis bilong em klostu long klok bilong em, na blut wantaim wara i kapsait. Aposel Jon i lukim samting ol i mekim, na bihain em i tok, dispela i truim narapela tok bilong Baibel, olsem: “Bai ol i lukluk long dispela man ol i bin sutim.”

Josep bilong Arimatea i stap, em i wanpela kaunsil. Taim ol kaunsil i bin pasim tok long kilim i dai Jisas, Josep i no orait long dispela samting. Em i wanpela disaipel bilong Jisas, tasol em i bin haitim dispela samting​—em i no laik bai ol man i save. Tasol nau em i strongim bel na i askim Pailat long givim skin bilong Jisas long em. Pailat i singautim kepten bilong ol soldia na kepten i tok, Jisas i dai pinis, na nau Pailat i orait long Josep i kisim skin bilong Jisas.

Orait, Josep i pasim gutpela laplap olsem banis long skin bilong Jisas na redim bilong planim long matmat, na Nikodemus i helpim em. Nikodemus tu em i wanpela kaunsil na em i bilip long Jisas. Tasol em tu i pret na i haitim dispela samting, nogut ol i rausim em long kaunsil. Orait nau em i bringim sanda inap olsem 33 kilogram i kam. Tupela i banisim pinis skin bilong Jisas long laplap na tupela i putim dispela sanda i go insait long banis; ol Juda i save mekim olsem long skin bilong man taim ol i laik planim em.

Ol i slipim skin bilong Jisas insait long nupela matmat, em bilong Josep na ol i bin wokim i go insait long ston, na ol i pasim wanpela bikpela ston long maus bilong matmat. Ol i bin redim hariap skin bilong Jisas na bai ol i ken planim paslain long de Sabat. Maria bilong Makdala, na Maria em mama bilong Jems namba 2, ating tupela i bin helpim ol, na nau tupela i go hariap long haus na bai ol i ken redim sampela sanda moa; ol i ting, bihain long de Sabat ol i ken putim dispela sanda long skin bilong Jisas na bai i no ken sting hariap.