Long Sande long moningtaim, Maria bilong Makdala wantaim Maria, em mama bilong Jems, na Salome na Joana na ol narapela meri ol i karim sanda i kam long matmat bilong mekim gut skin bilong Jisas. Taim ol i wokabaut yet, ol i tok: “Husat bai helpim yumi long tantanim dispela ston na rausim long maus bilong matmat?” Tasol taim ol i kamap long matmat, ol i save i gat wanpela guria i bin kamap, na ensel bilong Jehova i bin rausim dispela ston. Ol soldia i go pinis na matmat i stap nating! Matyu 27:57–28:2; Mak 15:42–16:4; Luk 23:50–24:​3, 10; Jon 19:​14, Jon 19:31–20:1; Jon 12:42; Wok Pris 23:​5-7; Lo 21:​22, 23; Buk Song 34:20; Sekaraia 12:10.

Sapta 128

Jisas i Stap Laip!

OL MERI i lukim matmat bilong Jisas i stap nating na Maria bilong Makdala i ran i go bilong tokim Pita na Jon. Tasol ating ol narapela meri ol i sanap i stap klostu long matmat. Nau wanpela ensel i kamap na em i tokim ol long i go insait long matmat.

Ol meri i go insait na i lukim narapela ensel gen, na wanpela i tokim ol: “Yutupela i no ken pret. Mi save, yutupela i kam bilong painim Jisas, . . . Em i no i stap hia. Em i kirap pinis, olsem bipo em i bin tok. Yutupela kam lukim ples em i bin slip long en. Na yutupela go kwiktaim na tokim ol disaipel bilong en olsem, em i lusim matmat na i kirap bek pinis.” Ol dispela meri i pret, tasol ol i amamas moa yet, na kwiktaim ol tu i ran i go.

Maria i painim pinis Pita na Jon, na em i tokim tupela: “Ol i tekewe Bikpela pinis long matmat, na mipela i no save, wanem hap ol i putim em.” Kwiktaim tupela aposel i ran i go long matmat. Ating Jon i yangpela liklik, olsem na em i winim Pita na i kamap pastaim long matmat. Tasol ol meri i go pinis na i no gat wanpela i stap. Jon i brukim skru na i lukluk i go insait long matmat na em i lukim ol dispela laplap ol i bin pasim long skin bilong Jisas, tasol em i no go insait.

Taim Pita i kamap, kwiktaim em i go insait long matmat. Em i lukim ol laplap i stap na dispela laplap ol i bin pasim long het bilong Jisas, i olsem wanpela man i bin raunim na putim i stap. Orait nau Jon tu i go insait, na em i lukim ol samting na em i bilipim tok bilong Maria. Tasol long dispela taim Pita na Jon i no save olsem Jisas i kirap bek pinis, maski planti taim em i bin tokim ol long em bai i kirap bek. Tupela i tingting planti na i go bek long ples. Tasol Maria i kam bek pinis na em i stap yet long matmat.

Ol narapela meri i ran i go bilong tokim ol disaipel olsem Jisas i kirap bek pinis, olsem ensel i tokim ol long mekim. Ol i siksti i go na Jisas i bungim ol long rot, na em i tok: “Moning tru.” Ol i brukim skru long lek bilong em. Nau em i tokim ol, ‘Yupela i no ken pret. Yupela go tokim ol brata bilong mi long ol i mas i go long Galili. Ol bai i lukim mi long dispela hap.’

Pastaim, taim guria i kamap na ol ensel i kamap long matmat, ol soldia i was long matmat ol i pret nogut tru na i kamap olsem ol man i dai pinis. Taim ol i orait gen, kwiktaim ol i ran i go insait long taun na ol i tokim ol bikpris long ol samting i kamap. Orait, ol bikpris i bung wantaim “ol hetman” bilong ol Juda na ol i pasim tok long ol i mas haitim dispela samting. Ol i givim mani long ol soldia na ol i tok: “Yupela i mas tok olsem, ‘Ol disaipel bilong en i kam long nait, na taim mipela i slip, ol i stilim bodi bilong en.’ ”

Sapos wanpela soldia Rom i gat wok long was i stap na em i slip, em inap kisim bikpela strafe, olsem ol bai kilim em i dai. Olsem na ol bikpris i tok promis long ol olsem: “Sapos namba wan gavman i harim dispela tok [olsem yupela i bin slip], orait mipela i ken stretim tok wantaim em, na bai yupela i no gat [kot].” Ol bikpris na hetman i bin givim bikpela mani long ol dispela soldia, olsem na ol soldia i bihainim tok bilong ol na ol i wok long kamapim dispela stori giaman olsem ol disaipel i bin stilim skin bilong Jisas. Dispela stori i go nabaut na planti Juda i harim.

Maria bilong Makdala i stap yet long matmat na em i krai i stap. Em i tingting: Jisas i stap we? Em i brukim skru na i lukluk i go insait long matmat. Nau em i lukim tupela ensel i gat waitpela klos ol i kamap gen! Tupela i sindaun long ples em skin bilong Jisas i bin i stap long en. Orait tupela i askim Maria: “Meri, bilong wanem yu krai?”

Maria i tok: “Ol i tekewe Bikpela bilong mi, na mi no save wanem hap ol i bin putim em.” Em i tanim na i lukim wanpela man, na em tu i askim Maria: “Bilong wanem yu krai? Yu laik painim husat?”

Maria i ting em i man bilong bosim gaden em matmat i stap long en, na em i tokim man: “Bikman, sapos yu bin kisim em i go, yu mas tokim mi long ples yu putim em, na bai mi go kisim em.”

Nau dispela man i tok, “Maria.” Wantu Maria i save, em Jisas tasol! Em i kirap nogut na i tok: “Rabonai.” (Dispela tok i olsem “Tisa.”) Em i amamas tru na i laik holim Jisas. Tasol Jisas i tok: “Yu no ken holim mi, long wanem, mi no i go antap yet long Papa bilong mi. Tasol yu mas i go long ol brata bilong mi na tokim ol olsem, mi bai go antap, na mi go long Papa bilong mi na Papa bilong yupela. Na mi go long God bilong mi na God bilong yupela.”

Nau Maria i ran i go long ples ol aposel na disaipel i bung i stap long en. Em i mekim wankain tok long ol olsem ol narapela meri i bin mekim, em ol i tokaut olsem Jisas i kirap bek pinis na ol i bin lukim em. Ol dispela man i no bilipim tok bilong ol meri i bin kamap pastaim long ol, na nau ol i no bilipim tok bilong Maria tu. Matyu 28:​3-15; Mak 16:​5-8; Luk 24:​4-12; Jon 20:​2-18.

▪ Taim Maria bilong Makdala i lukim matmat i stap nating, em i mekim wanem? Wanem samting i painim ol narapela meri?

▪ Taim ol narapela meri i go bilong tokim ol disaipel olsem Jisas i kirap bek pinis, wanem samting i painim ol long rot?

▪ Wanem samting i bin painim ol soldia i was i stap long matmat? Taim ol i go tokim ol bikpris long samting i painim ol, ol dispela bikpris i mekim wanem?

▪ Taim Maria bilong Makdala tasol i stap long matmat, wanem samting i kamap? Taim ol meri i go tokim ol disaipel long olgeta samting i bin kamap, ol i ting olsem wanem long dispela tok?

OL DISAIPEL i bel hevi yet. Ol i lukim matmat i stap nating, tasol ol i no save Jisas i kirap bek. Ol i no bilipim tok bilong ol meri. Olsem na bihain liklik, long Sande yet, Kliopas wantaim narapela disaipel i lusim Jerusalem na wokabaut i go long Emeus, em longwe inap 11-pela kilomita.

Long rot tupela i wok long toktok long olgeta samting i bin kamap, na wanpela man i kam klostu na wokabaut wantaim tupela. Em i tok, ‘Yutupela i toktok long wanem samting?’

Tupela i sanap na pes bilong tupela i soim olsem tupela i bel sori tru. Kliopas i tok: “Ating yu wanpela tasol yu no save long ol samting i bin kamap long Jerusalem long dispela taim?” Dispela man i tok: “Wanem samting?”

Tupela i tokim em olsem, ‘Mipela i tok long dispela ol samting i bin kamap long Jisas bilong Nasaret, em ol bikpris na ol hetman i bin putim em long han bilong gavman na ol i kilim em i dai.’ Na tupela i tok: “Pastaim mipela i bin bilip olsem, Jisas em dispela man God i makim bilong kisim bek ol manmeri bilong Israel.”

Na tupela i stori long ol samting i bin kamap em ol i kirap nogut long en na ol i no save long as bilong en, olsem ol meri i tok ol i bin lukim ol ensel, na matmat i stap nating. Nau dispela man i tokim tupela: “Yutupela i no gat tingting na bel bilong yutupela i no kirap kwik long bilipim olgeta tok ol profet i bin mekim. . . . Ating yutupela i no save, dispela man . . . bilong kisim bek ol manmeri bilong [God], em i mas karim pen pastaim na bihain em bai i kisim bikpela namba tru long God?” Na em i kirap long skulim tupela long as bilong sampela tok long buk bilong God i stori olsem.

Ol i kamap klostu long Emeus na dispela man i mekim olsem em i laik i go moa. Tasol tupela i laik harim sampela tok moa, olsem na tupela i tok: “Yu stap wantaim mitupela. . . . liklik taim bai tudak i kamap.” Olsem na em i go insait long haus wantaim tupela. Bihain ol i laik kaikai na em i kisim bret na i tenkyu long God, na i brukim, na i givim long tupela. Nau tupela i luksave olsem em Jisas tasol, em i tanim i kamap man. Na wantu em i lus nating na ol i no lukim em moa.

Nau tupela i save olsem wanem dispela man i gat bikpela save olsem! Long rot em i bin “autim as tingting bilong buk bilong God” long tupela na bel bilong tupela i kirap tru. Kwiktaim tupela i go bek long Jerusalem, na ol i lukim ol aposel na sampela moa ol i bung i stap. Tupela i no stori yet na ol narapela i kirap tokim tupela: “Tru tumas, Bikpela i kirap bek! Saimon i lukim em pinis!” Nau tupela i stori long Jisas i bin kamap long tupela tu. Em namba 4 taim Jisas i bin kamap long ai bilong sampela disaipel long dispela san.

Wantu Jisas i kamap long ai bilong ol long namba 5 taim. Ol disaipel i pret long ol Juda na ol i lokim pinis ol dua, tasol Jisas i kam sanap namel long ol. Em i tokim ol: “Bel bilong yupela i ken i stap isi.” Ol i kirap nogut na ol i pret. Ol i ting ol i lukim wanpela spirit. Tasol Jisas i tokim ol: “Bilong wanem yupela i tingting planti? Lukim han na lek bilong mi. Mi yet mi stap. Holim skin bilong mi, na lukim. Ol [spirit] i no gat mit na bun olsem yupela i lukim i stap long mi.” Tasol ol i no bilip yet.

Bilong helpim ol long save, tru em i Jisas, em i tokim ol: “Ating yupela i gat sampela kaikai i stap hia?” Ol i bin kukim pis na ol i givim hap pis long em na em i kaikai. Na em i tokim ol: “Taim mi stap yet wantaim yupela, mi bin tokim yupela pinis olsem, olgeta samting bipo ol i raitim long mi long lo bilong Moses na long buk bilong ol profet na long Buk Song, dispela olgeta samting i mas kamap tru.”

Nau Jisas i skulim ol long tok bilong Baibel, em i tok: “Buk bilong God i gat tok olsem, man God i makim bilong kisim bek ol manmeri bilong en, em i mas karim pen, na long de namba 3 em i mas kirap bek long matmat. Na long nem bilong em bai ol i mas autim tok long olgeta lain manmeri, bai ol i ken tanim bel, na bai God i lusim ol sin bilong ol. Yupela i mas statim dispela wok long Jerusalem, na yupela i mas autim tok long ol dispela samting i bin kamap.”