Taim ol man bilong tanim tok bilong Baibel i rausim nem bilong God na putim ol biknem long ples bilong en, ol i mekim bikpela popaia. Ol i mekim na i olsem God i stap longwe tumas na i no save tingim ol man, tasol Baibel i kirapim ol man long kamap ‘pren tru bilong God.’ (Song 25:14) Tingim wanpela gutpela pren bilong yu. Sapos yu no save long nem bilong pren bilong yu, bai yu stap klostu tru long em? Na olsem tasol, taim ol man i no save long nem bilong God, Jehova, olsem wanem ol inap stap klostu long em? Na tu, taim ol man i no yusim nem bilong God, ol i no save long gutpela mining bilong dispela nem. Orait wanem mining bilong nem bilong God?

God yet i bin kamapim mining bilong nem bilong em long gutpela wokman bilong em, Moses. Taim Moses i askim long nem bilong God, Jehova i tok: “Mi bai kamap wanem wanem kain mi laikim.” (Kisim Bek 3:​14, NW) Olsem na Jehova inap kamap wanem wanem kain em i mas kamap bilong inapim ol samting em i tingting pinis long mekim.

Sapos yu inap kamap wanem wanem kain yu laikim, bai yu mekim wanem bilong helpim ol pren bilong yu? Sapos wanpela bilong ol i kisim bikpela sik, ating bai yu kamap wanpela gutpela dokta na oraitim sik bilong em. Sapos narapela pren i kisim bikpela hevi long mani, yu inap kamap maniman na helpim em. Tasol yu no inap kamap olgeta kain yu laikim. Yumi olgeta i no inap mekim olsem. Taim yu stadi long Baibel, bai yu kirap nogut long lukim olsem wanem Jehova i kamap wanem wanem kain em i mas kamap bilong inapim ol tok promis bilong em. Na em i amamas long yusim strong bilong em bilong helpim ol man i laikim em. (2 Stori 16:9) Ol man i no save long nem bilong Jehova, ol i no inap save long ol dispela gutpela pasin bilong em.

Tru tumas, nem Jehova i mas i stap long Baibel. Taim yumi save long mining bilong en na yusim dispela nem taim yumi mekim lotu, em bai helpim yumi long i go klostu moa long Papa bilong yumi long heven, Jehova.b

PROFET Daniel i bin stap winim 500 yia paslain long taim mama i karim Jisas. Tasol Jehova i kamapim sampela tok long Daniel i helpim ol man long save long wanem taim holi spirit bai makim Jisas long kamap Mesaia, o Krais. God i tokim Daniel: “Yu mas harim na save olsem, stat long taim dispela tok i kamap bilong wokim gen Jerusalem, 7 taims 7-pela yia [“7-pela wik,” NW] na 62 taims 7-pela yia [“62 wik,” NW] i mas pinis pastaim, orait na dispela bikman God i bin makim, em bai i kamap. Insait long dispela taim bai ol i wokim Jerusalem gen wantaim ol rot insait long taun na bikpela baret i raunim banis bilong taun. Tasol ol dispela yia bai i stap olsem taim bilong hevi.”​—Daniel 9:​25, sta.

Bilong save long taim Mesaia i kam, pastaim yumi mas save long wanem taim stret ol i kirap kaunim ol yia i kamap paslain long Mesaia i kam. Tok profet i tok, dispela haptaim i “stat long taim dispela tok i kamap bilong wokim gen Jerusalem.” Long wanem taim dispela “tok i kamap”? Man bilong raitim Baibel, Nehemia, em i tok dispela tok bilong wokim gen banis bilong Jerusalem i kamap long “namba 20 yia bilong Artaserksis i stap king.” (Nehemia 1:1; 2:​1, 5-8) Ol saveman i tokaut olsem yia 474 B.C.E., em i namba wan yia Artaserksis i mekim wok king long yia olgeta. Olsem na namba 20 yia bilong wok king bilong em i kamap long 455 B.C.E. Orait nau yumi save long taim bilong kirap kaunim ol yia em tok profet bilong Daniel long Mesaia i stori long en, em 455 B.C.E.

Daniel i kamapim hamas yia i mas pinis pastaim na bihain “bikman God i makim” bai kamap. Tok profet i tok long “7-pela wik na 62 wik”​—em 69 wik olgeta. Dispela haptaim i longpela olsem wanem? Olgeta wan wan wik i makim 7-pela yia.a Ol Juda bilong bipo i save gut long dispela kain haptaim olsem wik i makim 7-pela yia. Olsem: Olgeta namba 7 yia em yia Sabat. (Kisim Bek 23:​10, 11) Olsem na dispela 69 wik tok profet i makim i olsem 69 taims 7-pela yia, em 483 yia.

Nau yumi mas kaunim ol yia. Sapos yumi kirap long 455 B.C.E., na kaunim i go 483 yia, yumi kamap long yia 29 C.E. Long dispela yia stret Jisas i kisim baptais na kamap Mesaia!b (Luk 3:​1, 2, 21, 22) Truim bilong dispela tok profet bilong Baibel i strongim tru bilip bilong yumi, a?

BILONG helpim yumi long save Mesaia em i husat, God Jehova i kirapim planti profet bilong Baibel long stori long dispela Man Bilong Kisim Bek ol man, ol i tok profet long ol samting bilong taim mama i karim em, wok bilong em, na indai bilong em. Olgeta dispela tok profet bilong Baibel i kamap tru long Jisas Krais. Ol tok profet i kolim planti samting na olgeta tok i kamap tru. Bilong kamapim klia dispela samting, yumi ken skelim sampela tok profet i tok long ol samting bilong taim mama i karim Mesaia na taim em i liklik pikinini.

Profet Aisaia i tok profet olsem Mesaia bai stap wanpela tumbuna pikinini bilong King Devit. (Aisaia 9:7) Na tru tumas, Jisas i kamap long lain bilong Devit.​—Matyu 1:​1, 6-17.

Maika, narapela profet bilong God, em i tok profet olsem dispela pikinini bai kamap king na mama bai karim em long “Betlehem Efrata.” (Maika 5:2) Long taim mama i karim Jisas, i gat tupela taun long Israel i gat nem Betlehem. Wanpela i stap klostu long Nasaret long hap not bilong kantri, na narapela i stap klostu long Jerusalem long Juda. Betlehem i stap klostu long Jerusalem, bipo em i gat nem Efrata. Mama i karim Jisas long dispela taun, olsem tok profet i bin makim!​—Matyu 2:1.

Narapela tok profet bilong Baibel i tok olsem God bai singautim Pikinini bilong em “long lusim Isip.” Taim Jisas i pikinini yet, ol i kisim em i go long Isip. Em i lusim Isip bihain long Herot i dai, olsem na truim bilong tok profet i kamap.​—Hosea 11:1; Matyu 2:15.

Long blok i stap long pes 200, ol skripsa i stap aninit long het tok “Tok Profet” i gat ol tok i makim Mesaia. Plis skelim ol dispela skripsa wantaim ol skripsa i stap aninit long het tok “Truim.” Dispela bai strongim bilip bilong yu olsem tok bilong Baibel em i tru.

Taim yu skelim ol dispela skripsa, yu ken save olsem ol skripsa i kamapim tok profet, ol i bin raitim inap planti handet yia paslain long mama i karim Jisas. Jisas i tok: “Olgeta samting bipo ol i raitim long mi long lo bilong Moses na long buk bilong ol profet na long Buk Song, dispela olgeta samting i mas kamap tru.” (Luk 24:44) Long Baibel bilong yu yet yu ken luksave olsem olgeta tok profet i kamap tru​—olgeta wan wan tok bilong ol!