1. I gat wanem as na God i wokim dispela graun?

SAMTING God bai mekim long dispela graun i gutpela tru. Jehova i laik bai graun i pulap long ol manmeri i stap amamas, na ol i no gat sik. Baibel i tok, “Bikpela i wokim wanpela gaden i stap long Iden” na em i “mekim graun i kamapim ol kain kain diwai, pikinini bilong ol i gutpela long kaikai. Olgeta dispela diwai i naispela tru.” Bihain long God i bin wokim namba wan man na meri, Adam tupela Iv, Em i putim ol long dispela gutpela ples na tokim ol: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” (Stat 1:28; 2:​8, 9, 15) Olsem na God i laik bai ol manmeri i karim ol pikinini, skruim Paradais i go long olgeta hap bilong graun, na lukautim ol animal.

2. (a) Olsem wanem yumi save ol samting God i tingting pinis long mekim long graun em bai kamap tru? (b) Baibel i tok wanem long ol manmeri bai stap oltaim?

² Yu ting laik bilong God Jehova olsem ol manmeri bai stap long wanpela paradais long graun bai kamap tru? God i tok: “Mi tok pinis long mekim dispela ol samting, na bai mi mekim ol i kamap olsem mi tok.” (Aisaia 46:​9-11; 55:11) Yes, ol samting God i tingting pinis long mekim em bai mekim tru! Em i tok em i “no wokim graun bilong i stap nating. Nogat. Em i bin wokim bilong olgeta samting i ken i stap long en.” (Aisaia 45:18) God i laik bai wanem kain ol man i stap long graun? Na em i laik bai ol i stap hamas yia long en? Baibel i tok: “Ol stretpela man bai i kisim graun God i givim ol, na bai ol i stap oltaim long en.”​—Song 37:29; KTH 21:​3, 4.

3. Wanem ol samting nogut i stap nau long graun? Dispela i kamapim wanem ol askim?

³ Tru, dispela samting i no bin kamap yet. Ol manmeri i save sik na dai; ol i save pait tu na narapela i save kilim i dai narapela. Hevi i bin kamap. Tasol yumi no ken ting God i laik bai graun i stap olsem yumi lukim long nau! Wanem samting i bin kamap? Bilong wanem samting God i tingting pinis long mekim i no bin kamap? Wanpela buk ol man tasol i bin kamapim i no inap tokim yumi long dispela, long wanem, dispela hevi i kirap long heven.

WANPELA BIRUA I KAMAP

4, 5. (a) Husat i toktok long Iv long rot bilong snek? (b) Wanpela man em bipo em i gutpela man na i no save giaman, olsem wanem em inap kamap stilman?

⁴ Namba wan buk bilong Baibel i stori long wanpela birua bilong God i kamap long gaden Iden. Baibel i tok em i olsem “snek,” tasol em i no wanpela animal nating tasol. Laspela buk bilong Baibel i tok em i dispela man “ol i kolim em Satan na . . . em i man bilong giamanim olgeta manmeri bilong graun.” Baibel i kolim em tu olsem “dispela snek bilong bipo yet.” (Stat 3:1; KTH 12:9) Dispela strongpela ensel, o strongpela spirit yumi no inap lukim, em i toktok long Iv long rot bilong snek, wankain olsem man i tromoi nek bilong em long maus bilong doli na i olsem doli i toktok. Dispela spirit i bin stap taim God i wokim graun bilong ol manmeri i ken stap long en.​—Jop 38:​4, 7.

⁵ Tasol olgeta samting Jehova i bin wokim i gutpela olgeta, olsem na husat i wokim “Satan”? Yumi ken tok, wanpela strongpela pikinini spirit bilong God i mekim em yet i kamap Satan. Olsem wanem dispela inap kamap? Long nau tu, wanpela man em bipo em i gutpela man na i no save giaman, em inap kamap stilman. Olsem wanem dispela inap kamap? Ating dispela man i larim ol tingting i no stret i kamap long bel bilong em. Sapos em i wok long tingting long en, dispela laik nogut inap kamap strong tru. Na taim rot i op, ating bai em i mekim ol samting nogut em i bin tingting long en.​—Jems 1:​13-15.

6. Olsem wanem wanpela strongpela pikinini spirit bilong God i kamap Satan na Devil?

⁶ Dispela samting i bin kamap long Satan. Em i harim God i tokim Adam tupela Iv long kamapim ol pikinini na go sindaun long olgeta hap bilong graun. (Stat 1:​27, 28) Ating Satan i tingting, ‘Olgeta dispela manmeri inap lotu long mi na i no long God!’ Olsem na tingting kranki i kamap long bel bilong em. Bihain, em i trikim Iv long rot bilong sutim ol tok giaman long God. (Stat 3:​1-5) Olsem na em i kamap “Devil,” mining bilong dispela tok em “Man bilong bagarapim gutnem bilong narapela.” Na tu, em i kamap “Satan,” mining bilong dispela tok em “Birua.”

7. (a) Bilong wanem Adam tupela Iv i dai? (b) Bilong wanem olgeta pikinini bilong Adam i save go lapun na i dai?

⁷ Long rot bilong pasin giaman na pasin trik, Satan i kirapim Adam tupela Iv long sakim tok bilong God. (Stat 2:17; 3:6) Olsem na bihain ol i dai, olsem God i bin tok ol bai dai sapos ol i sakim tok bilong em. (Stat 3:​17-19) Adam i kamap man i no gutpela olgeta taim em i mekim sin, olsem na olgeta pikinini bilong em i kisim sin long em. (Rom 5:12) Yumi ken tok piksa long dispela samting long tin bilong wokim bret long en. Sapos tin i gat krungut long en, wanem samting bai kamap long olgeta wan wan bret ol i wokim long dispela tin? Olgeta bret bai gat krungut long en, olsem ol i no gutpela olgeta. Na olsem tasol, olgeta man i bin kisim “krungut” olsem sin bilong Adam. Long dispela as olgeta man i save go lapun na i dai.​—Rom 3:23.

8, 9. (a) Satan i bin sutim wanem tok long God? (b) Bilong wanem God i no kilim i dai wantu ol dispela bikhetman?

⁸ Taim Satan i kirapim Adam tupela Iv long mekim rong long God, em i kamapim pasin bilong bikhet long God. Em i sutim tok long pasin bilong Jehova long mekim wok bos. I olsem Satan i tok: ‘God i bos nogut. Em i save giaman na i no save givim ol gutpela samting long ol man i stap aninit long em. I no gat wok long God i bosim ol manmeri. Ol yet i ken makim wanem samting i gutpela na wanem samting i nogut. Na sapos mi bosim ol, ol bai stap gutpela moa.’ God bai mekim wanem long kain tok nogut olsem? Sampela i ting i gutpela moa sapos God i bin kilim i dai ol dispela bikhetman. Tasol yu ting dispela bai bekim ol tok Satan i bin sutim? Dispela bai kamapim klia olsem pasin bilong God long bosim ol man i stret?

⁹ Stretpela pasin bilong Jehova i gutpela olgeta, olsem na em i no inap kilim i dai wantu ol dispela bikhetman. Bilong bekim gut tok Satan i bin sutim na long kamapim olsem Satan em i man bilong giaman, em i ting sampela haptaim i mas lus pastaim. Olsem na God i ting inap sampela haptaim em bai larim ol man i stap aninit long strong bilong Satan na bosim wokabaut bilong ol yet. Sapta 11 bilong dispela buk bai skelim i gat wanem as na Jehova i mekim olsem, na bilong wanem em i bin larim longpela haptaim i lus paslain long em i stretim ol dispela bikpela tok. Tasol nau i gutpela long tingting long ol dispela askim: I stret Adam tupela Iv i bilip long Satan husat i no bin mekim wanpela gutpela samting long ol? Jehova i bin givim ol olgeta samting, olsem na i stret ol i ting em i man nogut bilong giaman? Sapos yu bin stap long dispela taim, bai yu mekim wanem?

10. Yu ken mekim wanem bilong sapotim sait bilong Jehova na bekim tok Satan i bin sutim long em?

¹⁰ Em i gutpela long tingim ol dispela askim, long wanem, ol i stret long yumi olgeta long nau tu. Em nau, yu gat rot long sapotim sait bilong Jehova na bekim tok Satan i bin sutim long em. Yu inap daun long Jehova olsem King bilong yu na helpim wok bilong soim olsem Satan em i man bilong giaman. (Song 73:28; Sindaun 27:11) Sori tru, sampela manmeri tasol namel long planti bilion manmeri i gat laik long mekim olsem. Dispela i kamapim wanpela bikpela askim olsem: Tru tru Baibel i tok olsem Satan i bosim dispela graun?

HUSAT I BOSIM DISPELA GRAUN?

11, 12. (a) Taim Satan i traim Jisas, olsem wanem dispela i kamapim klia olsem Satan em i hetman i save bosim dispela graun? (b) Wanem narapela samting i kamapim klia olsem Satan i bosim dispela graun?

¹¹ Jisas i kliagut olsem Satan em i hetman i save bosim dispela graun. Long rot bilong wanpela mirakel, Satan i soim long Jisas “olgeta strongpela kantri bilong dispela graun wantaim ol gutpela samting bilong ol.” Satan i tok promis long Jisas olsem: “Sapos yu brukim skru na lotu long mi, orait bai mi givim yu dispela olgeta samting.” (Matyu 4:​8, 9; Luk 4:​5, 6) Tingim dispela. Sapos ol dispela gavman i no bilong Satan, yu ting dispela tok bilong Satan inap pulim Jisas? Nogat tru! Jisas i save ol dispela gavman bilong graun i bilong Satan. Sapos ol i no bilong Satan, Jisas bai tokaut olsem.

¹² Jehova em i God i Gat Olgeta Strong, na Man Bilong Wokim heven na graun. (KTH 4:11) Tasol i no gat wanpela hap long Baibel i tok olsem God Jehova o Jisas Krais i bosim dispela graun. Jisas i tokaut stret olsem Satan em i “hetman i save bosim dispela graun.” (Jon 12:31; 14:30; 16:11) Baibel i tok Satan em i “giaman god bilong dispela graun.” (2 Korin 4:​3, 4) Kristen aposel Jon i toktok long dispela birua, Satan, olsem: “Dispela graun olgeta em i stap aninit long strong bilong Satan.”​—1 Jon 5:19.

GRAUN BILONG SATAN BAI PINIS OLSEM WANEM?

13. Bilong wanem nupela taim i mas kamap?

¹³ Long olgeta yia, pasin bilong dispela graun i wok long i go nogut moa. Em i pulap long ol ami i pait wantaim, ol man politik i mekim pasin giaman, ol bikman bilong lotu i gat tupela maus, na ol raskol i no gat sori. I no gat rot bilong stretim pasin bilong olgeta man. Baibel i kamapim klia olsem klostu nau God bai pinisim ol man nogut long pait bilong em long Armagedon. Long dispela rot nupela taim i gat stretpela pasin long en bai kamap.​—KTH 16:​14-16.

14. God i bin makim husat long kamap King long Kingdom bilong Em? Olsem wanem Baibel i bin tok profet long dispela?

¹⁴ God Jehova i makim Jisas Krais long kamap King long Kingdom o gavman bilong Em long heven. Long bipo yet Baibel i tok profet: “Wanpela pikinini man i kamap pinis long yumi, em wanpela pikinini God i givim long yumi. Em bai i stap king bilong yumi, na em bai i gat ol dispela nem, . . . ‘King bilong kamapim gutpela sindaun na bel isi.’ . . . Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim.” (Aisaia 9:​6, 7) Jisas i lainim ol disaipel bilong em long beten long dispela gavman: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:10) Olsem yumi bai lukim long narapela hap bilong dispela buk, klostu nau Kingdom Bilong God bai rausim olgeta gavman bilong dispela graun, na em bai kisim ples bilong olgeta dispela gavman. (Daniel 2:44) Long dispela taim Kingdom Bilong God bai kamapim Paradais hia long graun.

NUPELA TAIM I KLOSTU PINIS!

15. “Nupela graun” em i wanem samting?

¹⁵ Baibel i tok: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (2 Pita 3:13; Aisaia 65:17) Taim Baibel i tok long “graun,” sampela taim dispela i makim ol manmeri i stap long graun. (Song 97:1) Olsem na “nupela graun” i makim lain manmeri em God i orait long ol.

16. God bai givim wanem gutpela presen long ol man em i orait long ol? Yumi mas mekim wanem bilong kisim dispela presen?

¹⁶ Jisas i tok promis olsem long nupela taim ol man God i orait long ol, ol bai kisim “laip i stap gut oltaim oltaim” olsem presen. (Mak 10:30) Plis opim Baibel bilong yu long Jon 3:16 na 17:​3, na ritim tok Jisas i mekim long yumi mas mekim wanem bilong kisim laip oltaim. Nau skelim long Baibel ol blesing ol man bai kisim, em ol man husat i winim mak bilong kisim dispela gutpela presen long God long Paradais bai kamap long graun.

17, 18. Olsem wanem yumi ken save olsem bel isi na gutaim bai stap long olgeta hap?

¹⁷ Pasin nogut, woa, pasin raskol, na pasin bilong pait na bagarapim man bai pinis. “Ol man nogut i lus olgeta. . . . Tasol ol manmeri i daunim nem bilong ol yet, bai God i givim olgeta graun long ol.” (Song 37:​10, 11) Gutaim bai kamap, long wanem, ‘God i save mekim i dai pait long olgeta hap graun.’ (Song 46:9; Aisaia 2:4) Long dispela taim “ol manmeri i ken bihainim stretpela pasin tasol. Taim mun i lait yet, planti gutpela samting i ken kamap”​—na dispela samting bai stap inap oltaim oltaim!​—Song 72:7.

¹⁸ Ol lain i lotuim Jehova bai i no bungim birua. Taim lain Israel long bipo i bihainim tok bilong God, ol i stap gut. (Wok Pris 25:​18, 19) Em bai gutpela samting tru long i stap gut olsem long Paradais!​—Aisaia 32:18; Maika 4:4.

19. Olsem wanem yumi save bai i gat planti kaikai long nupela taim God bai kamapim?

¹⁹ Kaikai bai i no sot. Man bilong raitim song i tok: “Planti rais na wit samting i ken kamap long ol gaden bilong ol manmeri, inap olsem i save kamap long Lebanon.” (Song 72:16) God Jehova bai blesim ol stretpela man, na ‘planti gutpela kaikai bai kamap long graun.’​—Song 67:6.

20. Bilong wanem yumi ken bilip tru olsem graun olgeta bai kamap wanpela paradais?

²⁰ Graun olgeta bai kamap wanpela paradais. Ol naispela haus na gaden bai stap long dispela graun em bipo ol man i gat sin i bin bagarapim. (Aisaia 65:​21-24; KTH 11:18) Ol hap bilong graun i kamap gutpela pinis bai go bikpela moa inap long graun olgeta i kamap naispela tru na i kamapim ol gutpela kaikai samting olsem gaden Iden. Na God bai ‘opim han bilong em na inapim laik bilong olgeta samting i gat laip.’​—Song 145:​16, NW.

21. Wanem samting i soim olsem pasin wanbel bai stap namel long ol man na animal?

²¹ Ol man na animal bai i stap wanbel wantaim. Ol wel animal na ol animal em ol man i save lukautim ol bai kaikai wantaim. Ol liklik pikinini tu bai i no pret long ol animal em ol inap bagarapim ol man long nau.​—Aisaia 11:​6-9; 65:25.

22. Wanem samting bai kamap long ol sik?

²² Ol sik bai pinis. Jisas em i King bilong Kingdom Bilong God long heven, na em bai mekim bikpela wok bilong oraitim ol manmeri, winim taim em i bin stap long graun. (Matyu 9:35; Mak 1:​40-42; Jon 5:​5-9) Long dispela taim “bai i no gat wanpela man i tok: ‘Mi gat sik.’ ”​—Aisaia 33:​24, NW; 35:​5, 6.

23. Bilong wanem kirap bek bai givim bikpela amamas long yumi?

²³ Ol man i dai pinis bai kisim laip gen na ol inap i stap oltaim. Olgeta man i dai pinis em God i tingim ol, ol bai kirap bek. “God bai i kirapim bek ol man i dai pinis, em ol stretpela man na ol man nogut wantaim.”​—Aposel 24:15; Jon 5:​28, 29.

24. Yu pilim olsem wanem taim yu tingim laip long Paradais long graun?

²⁴ Gutpela samting tru bai painim ol man husat i laik kisim save long Bikpela Man Bilong Wokim yumi, God Jehova, na i laik mekim wok bilong em! Jisas i toktok long Paradais bai kamap bihain long graun, taim em i tokim man nogut i dai klostu long em: “Mi tok tru long yu nau, bai yu stap wantaim mi long Paradais.” (Luk 23:​43, NW ) Em i bikpela samting long yumi kisim sampela save moa long Jisas Krais, em long rot bilong em olgeta dispela blesing bai kamap.

1. Nau bai yumi skelim wanem beten em planti man i save long en?

PLANTI milion manmeri long olgeta hap i save long wanpela beten em planti ol i save kolim Papa Bilong Mipela, o Beten Bilong Bikpela. Dispela tupela tok i makim dispela beten em Jisas Krais yet i bin kolim bilong yumi ken bihainim. Em i wanpela beten i gat bikpela insait bilong en, na wok bilong skelim tripela samting beten i kolim pastaim bai helpim yu long kisim stretpela save moa long Baibel.

2. Jisas i lainim ol disaipel long beten long wanem tripela samting?

² Long kirap bilong dispela beten, Jisas i tokim ol man: “Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.’” (Matyu 6:​9-13) Wanem mining bilong ol dispela tripela samting beten i kolim?

3. Yumi mas save long wanem samting long Kingdom Bilong God?

³ Yumi kisim bikpela save pinis long nem bilong God, Jehova. Na yumi bin skelim pinis sampela tok long laik bilong God​—ol samting em i mekim pinis na ol samting em bai mekim bilong helpim ol manmeri. Tasol Jisas i toktok long wanem samting taim em i tokim yumi long beten olsem: “Kingdom bilong yu i mas i kam”? Kingdom Bilong God em i wanem samting? Taim Kingdom i kam, olsem wanem dispela bai mekim holi nem bilong God? Na olsem wanem Kingdom i helpim laik bilong God long kamap?

KINGDOM BILONG GOD

4. Kingdom Bilong God em i wanem samting? Husat em i King bilong en?

⁴ Kingdom Bilong God em i wanpela gavman em God Jehova i bin kamapim na i gat King God i bin makim. Husat em i King bilong Kingdom Bilong God? Jisas Krais. Jisas em i bikpela King i winim olgeta bikman bilong graun na Baibel i kolim em “King bilong olgeta king, na Bikpela bilong olgeta bikman.” (1 Timoti 6:15) Em i gat strong long mekim planti gutpela samting, winim tru olgeta bikman bilong graun, ol nambawan gutpela bikman tu.

5. Kingdom Bilong God i stap we na mekim wok? Em bai bosim wanem samting?

⁵ Kingdom Bilong God bai stap we na mekim wok? Orait Jisas i stap we? Yu lainim pinis olsem ol man i kilim em i dai long diwai pos, na bihain em i kirap bek. Bihain liklik long dispela, em i go antap long heven. (Aposel 2:33) Olsem na Kingdom Bilong God i stap long dispela hap​—long heven. Long dispela as Baibel i kolim em olsem ‘kingdom i stap long heven.’ (2 Timoti 4:18) Maski Kingdom Bilong God i stap long heven, em bai bosim graun.​—KTH 11:15.

6, 7. Wanem samting i mekim na Jisas em i gutpela King tru?

⁶ Wanem samting i mekim na Jisas em i gutpela King tru? Wanpela samting, em bai no inap i dai. Baibel i skelim Jisas wantaim ol king bilong graun, na i tok Jisas “wanpela tasol i no save dai. Em i stap long bikpela lait tru.” (1 Timoti 6:16) Dispela i makim olsem olgeta gutpela wok Jisas bai mekim em bai stap oltaim. Na em bai mekim ol bikpela na gutpela wok bilong helpim ol man.

⁷ Tingim dispela tok profet bilong Baibel i makim Jisas: “Spirit bilong Bikpela bai i kam i stap long em na givim em gutpela save na tingting, na bai em i stap strongpela king na i gat gutpela tingting na save bilong bosim ol manmeri bilong en. Em bai i save long tingting bilong Bikpela. Oltaim em bai i stap aninit long Bikpela, na dispela pasin bai i mekim em i amamas moa yet. Long taim em i harim kot, em i no inap skelim man long ol toktok em i harim na long ol samting em i lukim long ai tasol. Nogat. Long stretpela pasin bilong skelim kot, em bai i harim wari bilong ol rabisman na em bai i helpim ol tarangu, ol arapela i daunim ol na mekim nogut long ol. Em i tok, na ol manmeri i gat asua bai i karim pen, na ol man nogut bilong bikhet bai i dai.” (Aisaia 11:​2-4) Ol dispela tok i soim olsem Jisas bai mekim wok King bilong em long bosim ol man bilong graun long stretpela pasin na pasin sori. Olsem wanem? Yu laik bai kain King olsem i stap bos bilong yu?

8. Husat bai mekim wok king wantaim Jisas?

⁸ Narapela stretpela tok long Kingdom Bilong God i olsem: I no Jisas wanpela tasol bai mekim wok king. Ol narapela bai mekim wok king wantaim em. Aposel Pol i tokim Timoti: “Sapos yumi stap strong na karim olgeta hevi, orait bai yumi stap king tu wantaim em.” (2 Timoti 2:12) Yes, Pol, Timoti, na ol arapela gutpela man em God i bin makim, ol bai mekim wok king wantaim Jisas long Kingdom bilong heven. Hamas man bai kisim dispela gutpela wok?

9. Hamas manmeri bai mekim wok king wantaim Jisas? Wanem taim God i kirap long makim ol?

⁹ Olsem Sapta 7 bilong dispela buk i kamapim, aposel Jon i bin lukim long driman “Pikinini Sipsip [Jisas Krais] i sanap long maunten Saion [ples bilong em long heven long mekim wok king], na 144,000 manmeri i sanap wantaim em. Nem bilong Pikinini Sipsip na nem bilong Papa bilong en, dispela nem God i bin raitim long pes bilong ol.” Husat ol dispela lain 144,000? Jon yet i tok: “Olgeta ples Pikinini Sipsip i laik i go long en, orait ol dispela man i save bihainim em i go. God i bin baim bek ol dispela lain namel long olgeta manmeri bilong graun, na ol i stap olsem namba wan lain God i kisim bek, bai ol i stap ol lain bilong em yet na bilong Pikinini Sipsip.” (KTH 14:​1, 4) Yes, em ol lain bilong Jisas Krais em God i bin makim ol bilong mekim wok king long heven wantaim Krais. Taim ol i kirap bek na kisim laip long heven, “bai ol i stap king na bosim ol manmeri bilong graun” wantaim Jisas. (KTH 5:10) Kirap long taim bilong ol aposel, God i wok long makim ol Kristen i stap gut long em bilong inapim dispela namba 144,000.

10. Bilong wanem em i gutpela pasin tru long God i stretim rot na Jisas wantaim lain 144,000 i bosim ol manmeri?

¹⁰ Em i gutpela pasin tru long God i stretim rot na Jisas wantaim lain 144,000 bai bosim ol manmeri. Jisas i save pinis long pasin bilong stap olsem man na karim pen na hevi. Pol i tok Jisas ‘inap sori long yumi. Olgeta traim i save kamap long yumi, dispela olgeta i bin kamap pinis long em bilong traim em tu. Tasol em i no mekim sin.’ (Hibru 4:15; 5:8) Ol manmeri i mekim wok king wantaim em, ol tu i bin stap long graun na karim ol hevi. Na tu, ol i bin karim hevi bilong sin na hevi bilong kain kain sik. Ol bai pilim tru ol hevi bilong ol man!

KINGDOM BILONG GOD BAI MEKIM WANEM?

11. Bilong wanem Jisas i tok ol disaipel i mas beten long laik bilong God i mas kamap long heven?

¹¹ Taim Jisas i tok ol disaipel i mas beten long Kingdom Bilong God i mas i kam, em i tok tu olsem ol i mas beten long laik bilong God i mas kamap long heven na long graun tu. God i stap long heven, na ol ensel i stap gut long em ol i bin bihainim laik bilong em long olgeta taim. Tasol long Sapta 3 bilong dispela buk, yumi bin kisim save olsem wanpela ensel nogut i no bihainim moa laik bilong God na em i kirapim Adam tupela Iv long mekim sin. Long Sapta 10 bai yumi kisim sampela save moa long tok Baibel i mekim long dispela ensel nogut, em Baibel i kolim em Satan. God i larim Satan na ol ensel husat i bihainim em​—ol spirit nogut​—long i stap long heven inap sampela haptaim. Olsem na i no olgeta lain i stap long heven i bihainim laik bilong God. Dispela samting i senis taim Kingdom Bilong God i kirap mekim wok. Nupela King, Jisas Krais, i pait wantaim Satan.​—KTH 12:​7-9.

12. Kamapim Tok Hait 12:10 i stori long wanem tupela bikpela samting?

¹² Tok profet hia i stori long wanem samting i kamap: “Long heven mi harim maus bilong wanpela man i singaut strong olsem, ‘Nau God bilong yumi em i kisim bek yumi pinis, na strong bilong en i kamap pinis long ples klia, na em i stap king. Na dispela man em i makim bilong kisim bek ol manmeri bilong en, em i kisim pinis bikpela namba na strong. Long wanem, dispela man bilong kotim ol brata bilong yumi, em i bin kotim ol long ai bilong God bilong yumi long san na long nait, tasol nau ol ensel i tromoi em i go daun pinis.’ ” (KTH 12:10) Yu lukim tupela bikpela samting dispela ves i kamapim? Namba wan, Kingdom Bilong God long han bilong Jisas Krais i kirap mekim wok. Namba tu, ol i rausim Satan long heven i kam daun long graun.

13. Ol i rausim Satan long heven na wanem samting i bin kamap?

¹³ Dispela tupela samting i bin kamapim wanem samting? Baibel i tok long samting i kamap long heven: “Yu heven, na yupela olgeta lain i stap long heven, yupela i ken amamas.” (KTH 12:12) Yes, ol gutpela ensel long heven i amamas, long wanem, Satan na ol spirit nogut i no stap moa, na olgeta lain i stap long heven ol i stap gut long God Jehova. Gutaim tru na pasin wanbel i stap long dispela hap. Olgeta i bihainim laik bilong God long heven.

14. Ol i rausim Satan i kam daun long graun na wanem samting i bin kamap?

¹⁴ Tasol olsem wanem long graun? Baibel i tok: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” (KTH 12:12) Satan i kros long ol i bin rausim em long heven na em i gat sotpela taim tasol bilong i stap. Em i belhat tru na em i kamapim “bikpela hevi” long graun. Bai yumi kisim sampela save moa long dispela “bikpela hevi” long sapta i kamap bihain long dispela. Tasol taim yumi tingim bikpela hevi Satan i kamapim, yumi inap askim, Olsem wanem Kingdom inap mekim na ol man i bihainim laik bilong God long graun?

15. God i laik bai dispela graun i stap olsem wanem?

¹⁵ Tingim ol samting God bai kamapim hia long graun. Yu bin kisim save long dispela long Sapta 3. Long Iden, God i soim olsem em i laik bai dispela graun i stap olsem ples paradais i pulap long ol stretpela manmeri i no save dai. Satan i kirapim Adam tupela Iv long mekim sin, olsem na sampela senis i kamap, tasol dispela i no senisim laik bilong God. Jehova i gat laik yet olsem ‘ol stretpela man bai i kisim graun na bai ol i stap oltaim long en.’ (Song 37:29) Na Kingdom Bilong God bai kamapim dispela samting. Olsem wanem em bai kamapim?

16, 17. Daniel 2:44 i givim wanem save long yumi long Kingdom Bilong God?

¹⁶ Tingim tok profet i stap long Daniel 2:44. Em i tok: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.” Dispela i givim wanem save long yumi long Kingdom Bilong God?

¹⁷ Namba wan, em i soim olsem Kingdom Bilong God i kamap long “taim ol dispela king i stap yet,” o long taim ol arapela kingdom i stap yet. Namba tu, em i soim olsem dispela Kingdom bai stap oltaim. Ol arapela gavman bai no daunim em o kisim ples bilong en. Namba tri, yumi lukim olsem Kingdom Bilong God na ol kingdom bilong graun bai i pait wantaim. Kingdom Bilong God bai win. Bihain, dispela gavman tasol bai bosim ol manmeri. Ol manmeri bai stap aninit long nambawan gutpela gavman.

18. Wanem nem bilong laspela pait namel long Kingdom Bilong God na ol gavman bilong dispela graun?

¹⁸ Baibel i stori planti long laspela pait namel long Kingdom Bilong God na ol gavman bilong dispela graun. Olsem: Em i tok olsem taim pinis i wok long i kam klostu, ol spirit nogut bai mekim planti tok giaman bilong paulim “ol king bilong olgeta kantri bilong graun.” Bilong wanem ol i mekim olsem? “Ol i laik mekim ol king i bringim ol ami bilong ol i kam bung, bai ol i ken kirapim pait long dispela bikpela de bilong God I Gat Olgeta Strong.” Ol king bilong graun bai bung wantaim long “dispela hap, long tok Hibru ol i kolim Armagedon.” (KTH 16:​14, 16) Olsem dispela tupela ves i kamapim, laspela pait namel long ol gavman bilong graun na Kingdom Bilong God, ol i kolim olsem Armagedon.

19, 20. Wanem samting i mekim na laik bilong God i no kamap long graun long nau?

¹⁹ Kingdom Bilong God bai kamapim wanem samting long rot bilong Armagedon? Tingim gen God i laik bai dispela graun i stap olsem wanem. God Jehova i tokaut pinis olsem graun bai pulap long ol stretpela manmeri i gutpela olgeta na i mekim wok bilong em long Paradais. Wanem samting i mekim na dispela i no inap kamap long nau stret? Namba wan samting, yumi gat sin, na yumi save sik na dai. Tasol long Sapta 5 yumi kisim save olsem Jisas i dai bilong yumi ken kisim laip oltaim. Ating yu tingim tok i stap long Gutnius Jon i Raitim: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”​—Jon 3:16.

²⁰ Narapela hevi em olsem: Planti manmeri i save mekim pasin nogut. Ol i tok giaman, trikim ol man, na mekim pasin pamuk. Ol i no laik mekim laik bilong God. Ol manmeri i save mekim pasin nogut ol bai bagarap long pait bilong God long Armagedon. (Song 37:10) Narapela as na ol manmeri i no bihainim laik bilong God long graun, em ol gavman i no strongim ol manmeri long mekim olsem. Planti gavman i no gat strong, ol i gat hatpela pasin, o ol i pulap long olkain pasin korapsen. Baibel i tokaut stret: “Sampela bikman i wok long daunim ol arapela manmeri na mekim nogut long ol.”​—Saveman 8:9.

21. Olsem wanem Kingdom bai mekim na laik bilong God bai kamap long graun?

²¹ Bihain long Armagedon, ol manmeri bai stap aninit long wanpela gavman tasol, em Kingdom Bilong God. Dispela Kingdom bai bihainim laik bilong God na kamapim ol gutpela samting. Olsem, em bai rausim Satan na ol spirit nogut. (KTH 20:​1-3) Strong bilong ofa bilong Jisas long baim bek ol man bai helpim ol man i stap gut long God na ol bai no sik moa na i dai. Nogat. Ol bai inap i stap oltaim oltaim aninit long Kingdom. (KTH 22:​1-3) Graun bai kamap wanpela paradais. Long dispela rot Kingdom bai kamapim laik bilong God long graun na mekim holi nem bilong God. Dispela i makim wanem samting? Em i makim olsem aninit long Kingdom Bilong God olgeta manmeri i stap laip ol bai litimapim nem bilong Jehova.

WANEM TAIM KINGDOM BAI KAMAPIM LAIK BILONG GOD LONG GRAUN?

22. Olsem wanem yumi save Kingdom Bilong God i no kamap taim Jisas i stap long graun o kamap bihain stret long taim em i kirap bek?

²² Taim Jisas i tokim ol disaipel long beten olsem, “Kingdom bilong yu i mas i kam,” dispela i kamapim klia olsem Kingdom i no bin kamap yet long dispela taim. Olsem wanem? Em i kamap long taim Jisas i go antap long heven? Nogat, olsem Pita na Pol i tok, bihain long Jisas i kirap bek, truim bilong tok profet i stap long Song 110:1 i kamap long em: “Bikpela [“Jehova,” NW] i tokim Bikpela bilong mi olsem, ‘Yu sindaun long han sut bilong mi inap mi putim ol birua bilong yu i stap aninit long yu.’ ” (Aposel 2:​32-35; Hibru 10:​12, 13) Jisas i mas wet pastaim.

23. (a) Kingdom Bilong God i kirap mekim wok long wanem taim? (b) Sapta i kamap bihain long dispela bai skelim wanem samting?

²³ Em i mas wet inap long wanem taim? Long yia 1880 i go inap long 1900 samting, isi isi ol sumatin bilong Baibel i luksave olsem haptaim bilong em long wet i stap i pinis long 1914. (Bilong kisim sampela save moa long dispela det, lukim Apendiks, pes 216-18.) Ol samting i kamap long graun kirap long 1914, i kamapim klia olsem ol dispela gutpela sumatin bilong Baibel i bin kisim stretpela save long dispela samting. Truim bilong tok profet bilong Baibel i soim olsem long 1914, Krais i kamap King na Kingdom Bilong God long heven i kirap mekim wok. Olsem na yumi stap long dispela “sotpela taim” Satan i gat bilong i stap. (KTH 12:12; Song 110:2) Yumi ken tok tu olsem klostu nau Kingdom Bilong God bai mekim ol samting bilong kamapim laik bilong God hia long graun. Yu ting dispela em i wanpela gutpela tok tru? Yu bilip olsem dispela tok em i tru? Sapta i kamap bihain long dispela bai helpim yu long save olsem Baibel i tok wanem long ol dispela tok.