● Dokta Patricia Papernow, dokta bilong helpim step-famili,a em i tok, sapos man i laik givim skultok long step-famili, i no stret long em i givim seim skultok bilong famili em papa na mama tru i stap wantaim ol pikinini. Dispela i olsem man i raun long Pot Mosbi tasol em i yusim mep bilong Lae.

Ol hevi bilong step-famili i narapela kain long ol famili i gat papa na mama tru i stap wantaim ol pikinini. Dokta William Merkel i stori long step-famili olsem, ol i gat ‘kain kain hevi na i hatwok long ol i pas gut wantaim.’

Yu ting ol step-famili inap pas gut wantaim? Pasin bilong ol long pas gut wantaim i kain olsem betsit em ol i samapim ol narapela narapela hap laplap na joinim wantaim. Taim meri i kirap samap ol join i no strong, tasol sapos em i bin samapim gut pinis ol join bai strong moa.

Bai yumi skelim hevi bilong step-famili na ol rot we i bin helpim ol long pas gut. Bai yumi ritim stori bilong fopela step-famili em ol i bin winim sampela hevi na pas gut wantaim.

HEVI 1: OL SAMTING I NO KAMAP OLSEM YU LAIKIM

“Mi laik bai ol step-pikinini bilong mi i laikim mi na tingim mi, tasol inap 8-pela yia pinis na mi wet yet.”—Gloria.b

TAIM papa na mama bilong tupela narapela famili i marit, ol i laik bai ol gutpela samting i kamap. Ating papa o mama i laik abrusim ol hevi i bin kamap long namba 1 marit bilong em, na em i laik bai nupela poroman marit i laikim famili bilong em. Ol samting ol i laik i mas kamap long famili i olsem driman tasol na taim ol i no kamap, ol i bel hevi. Baibel i tok: “Sapos man i ting long kisim wanpela samting na i wet nating longpela taim, bai em i bel hevi moa yet.” (Sindaun 13:12) Olsem wanem sapos samting yu laikim i no kamap na yu bel hevi?

SAMTING YU KEN MEKIM

No ken ting dispela bel hevi bai pinis nating, nogat. Pastaim luksave long samting em yu laikim tasol i no kamap na yu bel hevi. Orait skelim gut as na yu laik bai dispela samting i kamap, na bai yu inap kliagut long wai na yu gat dispela tingting. Nau kisim stretpela tingting long ol samting tru i save kamap. Em hia sampela eksampel:

1. Mi bai laikim ol step-pikinini bilong mi, na ol bai laikim mi.

Wai na mi ting olsem? Mi laikim olsem famili bilong mi i mas pas gut wantaim.

Stretpela tingting: Bihain pasin bilong laikim narapela narapela inap kamap strong. Bikpela samting mipela i stap gut na narapela i rispektim narapela.

2. Olgeta long nupela famili bai lain kwik long narapela narapela.

Wai na mi ting olsem? Mipela i redi long i stap olsem nupela famili.

Stretpela tingting: Planti taim inap 4-pela o 7-pela yia i lus pastaim na ol step-famili i sindaun gut wantaim. Ol hevi mipela i gat insait long famili em i save kamap long ol narapela famili tu.

3. Mipela i no inap tok pait long mani.

Wai na mi ting olsem? Mipela i laikim narapela narapela olsem na mipela i no inap tok pait.

Stretpela tingting: Hevi bilong mani long famili bilong mipela long pastaim i bikpela moa. Ating mipela i no redi long bungim mani wantaim.

HEVI 2: KLIAGUT LONG TINGTING BILONG NARAPELA

“Mipela i lain kwik long narapela narapela insait long step-famili bilong mipela.”—Yoshito.

“Tenpela yia i bin lus na bihain mi inap helpim gut step-famili bilong mi.”—Tatsuki, step-pikinini man bilong Yoshito.

OLSEM Yoshito na Tatsuki, ating olgeta insait long step-famili ol i no kliagut long tingting bilong narapela narapela. Taim hevi i kamap, ating wantu yu laik stretim. Tasol bilong stretim gut hevi, yu mas kliagut long tingting bilong ol narapela long famili.

Em i bikpela samting long skelim pasin bilong yu long toktok, long wanem, toktok inap bagarapim man, na tu, em inap mekim gut bel bilong man. Baibel i tok: “Toktok bilong yu em inap mekim man i stap gut na em inap long bagarapim man.” (Sindaun 18:21) Olsem wanem yu ken yusim maus bilong yu long helpim famili long kliagut long tingting bilong narapela narapela, na no ken daunim ol?

SAMTING YU KEN MEKIM

• Yu mas i gat laik long save long samting narapela i laikim na pilim tingting bilong em, tasol no ken skelim em. Olsem:

Sapos pikinini i tok, “Mi misim Papa,” yu mas pilim bel hevi bilong em. No ken tok, “Tasol step-papa i laikim yu na em i save mekim gut long yu winim papa bilong yu.” I gutpela long tok: “Mi save yu misim papa bilong yu. Yu laik stori long ol samting papa i save mekim na yu misim em?”

No ken sutim tok long nupela man o meri bilong yu na tok, “Sapos yu mekim gut wok bilong yu, pikinini man bilong yu bai i no inap bikhet.” I gutpela long tok: “Inap yu tokim Luke long kam lukim mi taim em i kam long haus? Bai mi amamas sapos em i mekim olsem.”

• Famili i ken kaikai wantaim, kisim amamas, na mekim famili lotu wantaim bambai narapela i lain gut long narapela.

• Makim taim bilong famili olgeta i ken bung na toktok. Larim wan wan i kamapim tingting bilong ol na no ken katim tok. Stori pastaim long ol gutpela samting bilong famili, na bihain kamapim samting em yupela i no amamas long en. Maski yu no wanbel, rispektim ol na larim wan wan i kamapim tingting bilong ol long stretim hevi.

HEVI 3: OL I MAS PILIM OLSEM OL I HAP BILONG FAMILI

“Meri bilong mi na ol pikinini bilong em i save bung na kros long mi. Mi pilim olsem mi no hap bilong famili.”—Walt.

SAPOS yu pilim olsem yu no hap bilong famili, dispela inap kamapim ol hevi. Olsem:

• Ol pikinini i save toktok gut wantaim man o meri husat bai maritim papa o mama tru bilong ol, bihain taim tupela i marit pinis ol dispela pikinini i save pilim hatwok moa.

• Step-papa o mama i jeles long pikinini i gat sikspela krismas.

• Ating bikpela kros i kamap long wanpela liklik samting tasol insait long famili.

Taim hevi i kamap insait long step-famili, dispela inap givim bel hevi moa long papa o mama tru bilong pikinini. Carmen i tok: “Em hatwok tru taim hevi i kamap namel long man bilong mi na tupela pikinini bilong mi, mi no save mi bai helpim husat.”

Dispela stiatok inap helpim yupela. Jisas i tok: “Olgeta samting yupela i laik bai ol man i mekim long yupela, yupela i mas mekim long ol.” (Matyu 7:12) Olsem wanem olgeta long step-famili i ken helpim narapela narapela long pilim olsem ol i hap bilong famili?

SAMTING YU KEN MEKIM

• Tingim marit bilong yu i bikpela samting. (Stat 2:24) Lusim haptaim wantaim nupela man o meri bilong yu, na tok klia long ol pikinini olsem em i man o meri bilong yu. Olsem, paslain long papa i marit gen ating em i ken tokim ol pikinini: “Mi laikim Anna, na mi bai maritim em. Mi laik bai yupela i mekim gutpela pasin long em.”

• Makim taim bilong mekim ol samting wantaim olgeta pikinini. Dispela bai kamapim klia olsem ol i bikpela samting long yu na yu laikim ol.

• Lusim haptaim long i stap wantaim olgeta wan wan step-pikinini bilong yu bambai yu inap kisim save long ol, na i no gat wok long papa o mama tru bilong ol i stap namelman o meri bilong yupela.

• Mekim ol samting na bai pikinini i pilim olsem em i hap bilong famili, na no ken tokim em long lusim tingting long papa o mama bilong em. I no gutpela long subim ol step-pikinini long kolim yu olsem “Mama” o “Papa.” Ating pastaim ol bikpela pikinini bai hatwok long yusim kain tok olsem “famili bilong mipela” taim ol i stori long step-famili bilong ol.

• Givim sampela wok bilong haus long ol pikinini, sindaun wantaim ol na kaikai, na ol i mas i gat rum bilong ol yet. Dispela i makim tu ol pikinini em ol i save kam stap wantaim yupela sampela taim.

• Ating i gutpela long muv i go long nupela haus o stretim haus na bai i gat inap spes na nupela papa o mama na ol pikinini bilong em i ken pilim olsem ol tu i insait long famili.

HEVI 4: WOK BILONG STRETIM OL PIKININI

“Taim mi stretim ol pikinini bilong Carmen, em i save mekim gut bel bilong ol na em i no sapotim mi.”—Pablo.

“Mi save bel hevi tru taim Pablo i mekim hatpela pasin long ol pikinini bilong mi.”—Carmen.

PASIN bilong mekim bikpela long ol pikinini, em inap kamapim hevi insait long step-famili. Famili i gat papa o mama tasol, ating em i no save stretim tumas ol pikinini. Taim step-papa o mama i maritim kain papa o mama olsem, pastaim bai em i no pas gut wantaim ol step-pikinini. Bilong wanem? Step-papa bai pilim olsem meri bilong em i save isi long ol pikinini tru bilong em yet, na meri bai pilim olsem step-papa i save mekim hatpela pasin long ol pikinini bilong em.

Baibel i stori long pasin bilong mekim bikpela long ol pikinini: “Yupela i no ken sikirapim bel bilong ol pikinini bilong yupela, nogat. Oltaim yupela i mas mekim bikpela long ol na trenim ol olsem [God] Jehova i makim, na putim tingting bilong em long bel bilong ol.” (Efesus 6:4) Dispela i makim olsem papamama i mas skulim ol pikinini na no ken bosim ol strong. Taim ol i stretim pikinini, ol i mas mekim long pasin laikim na no ken sikirapim bel bilong ol.

SAMTING YU KEN MEKIM

• Ating i gat sampela lo yupela i putim pinis, orait tokim ol long bihainim. Tingim olsem wanem dispela bai helpim ol:

Step-mama: Jennifer, lo bilong haus em, yu no ken salim teks mesis inap long taim yu pinisim homwok.

Jennifer: Yu no mama bilong mi.

Step-mama: Em tru, tasol nau nait mi stap olsem het bilong famili, na lo i olsem taim yu pinisim homwok, orait yu ken teks.

• No ken putim planti lo o senisim tumas ol samting. Ating wanpela lo em step-papa o mama i putim, em i ting i no hatwok long pikinini i bihainim, tasol long pikinini dispela i bikpela hevi long em. Tasol i gutpela long putim sampela lo long pasin bilong rispek long narapela na no ken go insait nating long rum bilong narapela. Na tu, putim lo long wanem kain klos ol i mas werim long haus, moa yet sapos i gat ol bikpela pikinini i stap.

• Taim step-papa na mama i no wanbel long pasin bilong stretim pikinini, tupela yet i ken toktok na no ken mekim long ai bilong pikinini. Ol i mas toktok long popaia em pikinini i mekim na ol i no ken sutim tok long narapela narapela long wok bilong em long mekim bikpela long pikinini.

[Ol Futnot]

[Piksa long pes 3]

Ating i hatwok long bilip olsem ol step-famili inap stap wanbel

[Piksa long pes 4]

Putim gut yau na bai yu ken kliagut long tingting na filings bilong narapela

[Piksa long pes 6]

Sapos yupela i no wanbel, no ken stretim tok long ai bilong ol pikinini

MIPELA I NO WANHAUS TASOL

Pikinini meri bilong Philip, Elise, em i gat 20 krismas, em i stap wantaim papa olsem na em i mekim olgeta wok bilong haus. Bihain Philip i maritim Louise, yu ting step-mama na step-pikinini inap pas gut wantaim?

Louise: Pastaim mipela i hatwok tru long stap gut wantaim. Mi save amamas long stap long haus na mekim ol wok bilong haus.

Elise: Louise i stretim ol samting long haus na em i rausim planti samting bilong mipela. Mi stretim ol samting wanpela taim na mi no putim ol long ples stret bilong ol, long wanem, mi no save ol i stap we. Dispela i mekim na Louise i belhat, na mitupela i kros na inap wanpela wik mi no toktok wantaim em.

Louise: Wanpela taim mi tokim Elise, “Mi no save wanem samting bai kamap, tasol mi no laik bai hevi namel long yumi i stap olsem.” Bihain em i kam na tok sori long mi. Mi holimpasim em na mitupela i krai.

Elise: Louise i larim sampela piksa bilong mi i hangamap i stap, na Papa i no rausim ol lait mi bin putim long haus. Em liklik samting, tasol taim ol i mekim olsem mi pilim olsem haus bilong mi i no senis olgeta. Mi amamas tu long pasin bilong Louise long lukautim gut liklik brata bilong mi taim em i kam stap wantaim mipela. Em tupela yia pinis, na nau mi tingim em olsem hap bilong famili.

Louise: Mi pilim olsem nau mipela i no wanhaus tasol, nogat, mitupela Elise i stap olsem gutpela pren tu.

“PASIN WANBEL EM I BIKPELA SAMTING”

Anton i gat 3-pela pikinini na Marelize i gat 3-pela pikinini. Taim tupela i marit 6-pela yia i go pinis ol i bungim tupela famili wantaim.

Anton: Mipela famili i save raun na mekim ol samting wantaim. Inap sampela yia i lus na bihain mipela i stap gut wantaim, na planti samting bipo mipela i no bin wanbel long en, nau mipela i wanbel long en.

Marelize: Mipela i pilim olsem em i bikpela samting long tingim olgeta pikinini olsem ol i pikinini bilong mitupela. Wanpela taim mi kros long Anton, long wanem, mi pilim olsem em i wansait long pikinini meri bilong em na tokim em long sindaun long fran sia bilong kar, na em i stretim pikinini man bilong mi. Tasol mi save olsem pasin wanbel i bikpela samting winim pasin bilong sindaun long fran sia. Mipela i traim long mekim wankain pasin long olgeta pikinini.

Na tu, mi no save stori long ol samting em famili bilong mi long pastaim i save mekim, nogut step-famili bilong mi i ting olsem mi laikim moa olpela famili bilong mi. Tasol mi save kamapim olsem mi amamas long nupela famili bilong mipela.

“PASTAIM MIPELA I TOK AMAMAS”

Fopela yia i go pinis Francis i maritim Cecelia. Insait long step-famili bilong ol, Cecelia i gat 3-pela bikpela pikinini, na Francis i gat wanpela tineja pikinini man.

Francis: Mi traim long mekim ol samting na bai ol i no pret long toktok wantaim mi, na mi no bel hevi kwik. Mipela i save kaikai na stori wantaim. Na tu, mi kirapim olgeta long mekim ol wok long haus, long wanem, dispela bai helpim famili olgeta.

Cecelia: Mi save lusim haptaim wantaim ol wan wan pikinini bilong mipela na putim yau long ol wari bilong ol. Taim famili i bung, pastaim mipela i tok amamas long ol na bihain strongim ol long mekim gut ol wok bilong ol. Na taim mi popaia mi save tokaut long dispela na tok sori.

STEP-PAPAMAMA I MEKIM BIKPELA LONG MI

Yuki i gat 20 krismas, tasol taim em i gat 5-pela krismas papa i lusim ol. Bihain mama bilong em i maritim Tomonori, na taim Yuki i gat 10-pela krismas, mama i dai. Faivpela yia bihain, step-papa bilong em i maritim Mihoko. Nau Yuki i stap wantaim step-papamama.

Yuki: Taim step-papa bilong mi i laik marit gen, mi ting, “Mi no nidim wanpela step-mama. Mi pilim olsem i gat planti senis i kamap pinis insait long famili.” Mi no amamas long step-papa i marit gen na mi mekim hatpela pasin long step-mama.

Mihoko: Man bilong mi no subim mi long laikim step-pikinini bilong em, tasol mi tingting olsem mi bai wok strong long pas gut wantaim Yuki. Mipela i larim em i mekim yet ol samting em i save mekim, olsem mekim wok lotu, kisim amamas, kaikai na toktok wantaim em. Na tu, em i stori long mi long filings bilong em long dai bilong mama bilong em, na nau mi kliagut long em.

Taim mi gat bel, mipela i tingting planti long Yuki na mipela i no laik bai em i pilim olsem em i no hap bilong famili. Mipela i larim Yuki i givim kaikai long bebi, wasim em na senisim nepi bilong em, na long ai bilong ol narapela mipela i save tok amamas long Yuki long ol gutpela wok em i mekim. Olsem na liklik boi, Itsuki, i pas gut wantaim Yuki. Taim em i lain long toktok, fes wed em i kolim, em niinii, olsem bikpela brata, i no “papa” o “mama.”

Yuki: Mi wanpela step-pikinini, olsem na mi pilim olsem mi stap wanpis. I hatwok long tokim ol narapela long ol samting mi pilim, long wanem ol i no kliagut. Tasol mi amamas olsem ol wanbilip Kristen i save helpim mi. Nau mi no mekim moa hatpela pasin long step-mama. Em i save givim gutpela skultok long mi na mi inap tokim em long ol samting mi pilim long bel.

[Rait long pes 9]

No ken les kwik! Ol step-famili inap stap amamas na pas gut